ಕುಂದ ನಗರಿ ಎಂದು ಪ್ರಸಿದ್ಧವಾಗಿರುವ 13,400 ಸ್ಕ್ವೇರ್ ಕಿಲೋಮೀಟರ್ ವಿಸ್ತೀರ್ಣ ಹೊಂದಿರುವ ಬೆಳಗಾವಿ ಕರ್ನಾಟಕದ ಅತಿ ದೊಡ್ಡ ಜಿಲ್ಲೆಯಾಗಿದೆ. ಇಲ್ಲಿ ಕನ್ನಡಿಗರೇ ಹೆಚ್ಚಿದ್ದು ಮಹಾರಾಷ್ಟ್ರದ ಗಡಿ ಪ್ರದೇಶವನ್ನು ಹಂಚಿಕೊಂಡಿರುವುದರಿಂದ ಮರಾಠಿ ಭಾಷೆಯನ್ನು ಬಳಸುವವರು ಕಡಿಮೆ ಇಲ್ಲ.
ಭಾಷೆಯ ವಿಚಾರಕ್ಕೆ ಬಂದರೆ ಬೆಳಗಾವಿ ಜಿಲ್ಲೆ ಯಾವಾಗಲೂ ಬೂದಿ ಮುಚ್ಚಿದ ಕೆಂಡದಂತಿರುತ್ತದೆ. ಇದೆ ವಿಚಾರಕ್ಕೆ ಯಾವಾಗಲೂ ಸುದ್ದಿಯಲ್ಲಿರುವ ಬೆಳಗಾವಿ ಅದೆಷ್ಟೋ ಸರಿ ಹಿಂಸಾಚಾರಕ್ಕೆ ತಿರುಗಿದ್ದನ್ನು ನಾವು ನೋಡಿರುತ್ತೇವೆ. ಸರ್ಕಾರ ಕೂಡ ಮರಾಠಿ ಜನರಿಗೆ ಅನುದಾನ ನೀಡಿ ಅವರನ್ನು ಪ್ರೋತ್ಸಾಹಿಸಿ ಬೆಳೆಸಿದ್ದನ್ನು ನಾವು ನೋಡಿದ್ದೇವೆ.
ಬ್ರಿಟಿಷರ ಆಡಳಿತದ ವಿರುದ್ಧ ಹೋರಾಡಿದ ಸಂಗೊಳ್ಳಿ ರಾಯಣ್ಣ ಕೂಡ ಹುಟ್ಟಿದ್ದು ಇದೇ ಬೆಳಗಾವಿ ಜಿಲ್ಲೆಯ ಬೈಲಹೊಂಗಲ ತಾಲೂಕಿನಲ್ಲಿ ಎಂಬುದು ಮರೆಯಲಾಗದು. ಬೆಳಗಾವಿ ಭೂಪ್ರದೇಶ ಆಯಾ ಕಾಲಮಾನದಲ್ಲಿ ಯಾವುದೇ ಅರಸ ಅಥವಾ ಬ್ರಿಟಿಷ್ ಆಸ್ತಿಗೆ ಒಳಪಟ್ಟಿದ್ದರೂ ಆಡಳಿತ ಭಾಷೆ ಕನ್ನಡವಾಗಿತ್ತು ಎಂಬುದಕ್ಕೆ ಈಗ ಮತ್ತಷ್ಟು ಮಹತ್ವದ ದಾಖಲೆ ಸಿಕ್ಕಿದೆ. 08/12/1939 ರಲ್ಲಿ ದಿ. ಬಾಬು ಶ್ರೀಶೈಲಪ್ಪ ಕೂಪಾಟಿ ಎನ್ನುವವರನ್ನು ಬೆಳಗಾವಿಯ ಜಿಲ್ಲಾ ಪೊಲೀಸ್ ಇಲಾಖೆಯಲ್ಲಿ ಅಮಲ್ದಾರರಾಗಿ ನೇಮಕ ಮಾಡಿ ಜಿಲ್ಲಾ ಸುಪ್ರಿಟೆಂಡೆಂಟ್ ಆಫ್ ಪೊಲೀಸ್ ಕಚೇರಿಯಿಂದ ಆದೇಶ ಹೊರಡಿಸಲಾಗಿತ್ತು.
ಮುಂಬೈ ಪೊಲೀಸ್ ಆಕ್ಟ್ ಅನ್ವಯ ಇವರಿಗೆ ಕೆಲಸ, ಹಕ್ಕುಗಳನ್ನು ನೀಡಿ ಆದೇಶ ಹೊರಡಿಸಿದ್ದರು. ಆದೇಶ ಪ್ರತಿಯು ಮೊಟ್ಟೆ ಆಕಾರದ ಕಾಗದದ ಎರಡು ಪ್ರತಿಗಳಲ್ಲಿದ್ದು, ಆದೇಶದ ಒಂದು ಪ್ರತಿ ಕನ್ನಡ ಭಾಷೆಯಲ್ಲಿ ಹೊರಡಿಸಿದ್ದು, ಇನ್ನೊಂದು ಪ್ರತಿಯನ್ನು ಇಂಗ್ಲೀಷ್ ಭಾಷೆಯಲ್ಲಿ ಹೊರಡಿಸಲಾಗಿದೆ. ಎರಡು ಆದೇಶದ ಪ್ರತಿಗಳನ್ನು ಒಂದೇ ದಾರದಲ್ಲಿ ಪೋಣಿಸಲಾಗಿದೆ. ಕಾಗದದಲ್ಲಿರುವ ಜಿಲ್ಲಾ ಸುಪ್ರಿಟೆಂಡೆಂಟ್ ಆಫ್ ಪೊಲೀಸ್ ಎನ್ನುವ ಮೊಹರು ಕನ್ನಡ ಹಾಗೂ ಇಂಗ್ಲಿಷ್ ಭಾಷೆಯಲ್ಲಿ ಇದೆ. ಈ ದಾಖಲೆಯನ್ನು ಬಾಬು ಶ್ರೀಶೈಲಪ್ಪ ಅವರ ಮೊಮ್ಮಗ ಶ್ರೀಶೈಲ ಕೂಪಾಟಿ ನೀಡಿದ್ದು, ಈ ದಾಖಲೆಯನ್ನು ಕರ್ನಾಟಕ ಮಹಾರಾಷ್ಟ್ರ ಗಡಿ ವಿವಾದದ ಕುರಿತು ಇರುವ ರಾಜ್ಯದ ಕಾನೂನು ಸಲಹಾ ಸಮಿತಿ ಅಧ್ಯಕ್ಷ ಎಂ. ರಾಮಕೃಷ್ಣ ಗೆ ಹಸ್ತಾಂತರಿಸಲು ರಾಜ್ಯ ವಕೀಲರ ಸಾಹಿತ್ಯ ಪರಿಷತ್ ಜಿಲ್ಲಾ ಅಧ್ಯಕ್ಷ ರವೀಂದ್ರ ತೋಟಿಗೇರ್ ಸಿದ್ದತೆ ನಡೆಸಿದ್ದಾರೆ.