ಟಿಶ್ಯೂ ಬಳಕೆ ಜಗತ್ತಿಗೆ ವರವೋ ಅಥವಾ ಶಾಪವೋ? ಬನ್ನಿ ಇದರ ಬಗ್ಗೆ ವಿವರವಾಗಿ ತಿಳಿದುಕೊಂಡು ಜಾಣ ಹೆಜ್ಜೆಯನ್ನು ಇಡುವ ಪ್ರಯತ್ನಿಸೋಣ.
ಟಿಶ್ಯೂ ಪೇಪರ್ ಅನ್ನು ತಯಾರಿಸಲು ನಮಗೆಲ್ಲ ತಿಳಿದಿರುವಂತೆ ಮರದ ತಿರುಳಿನಲ್ಲಿರುವ ಫೈಬರ್ ಅನ್ನು ಬಳಸಿಕೊಳ್ಳಲಾಗುತ್ತದೆ. ಒಂದು ಟಿಶ್ಯೂ ರೋಲ್ ಅನ್ನು ತಯಾರಿಸಲು ಕನಿಷ್ಠ 0.68 ಕೆಜಿ ಮರದ ಅವಶ್ಯಕತೆ ಇದೆ. ಇಂದು ವರ್ಷ ಒಂದಕ್ಕೆ ವಿಶ್ವದಾದ್ಯಂತ ಟಿಶ್ಯೂ ಪೇಪರ್ ಮತ್ತು ಕಾಗದವನ್ನು ತಯಾರಿಸಲು ಅಂದಾಜು ಒಂದು ಕೋಟಿ ಮರಗಳನ್ನು ನಾಶಪಡಿಸಿಲಾಗುತ್ತಿದೆ. ಅಲ್ಲದೆ ಟಿಶ್ಯೂ ಪೇಪರ್ ಗಳನ್ನು ಮರಗಳ ಪಲ್ಪ್ ಹಾಗೂ ಸಂಶ್ಲೇಷಿತ ವಸ್ತುಗಳ ಮಿಶ್ರಣದಿಂದ ತಯಾರಿಸುವ ಕಾರಣ ಇದು ಒಳಚರಂಡಿ ವ್ಯವಸ್ಥೆಯಲ್ಲಿ ಸಮಸ್ಯೆಯನ್ನು ಉಂಟುಮಾಡುತ್ತದೆ.
ಈ ಟಿಶ್ಯೂ ಪೇಪರ್ ಗಳು ಕೇವಲ ಒನ್ ಟೈಮ್ ಯೂಸ್ ಎಂಬ ಸಂಗತಿ ನಮಗೆಲ್ಲ ತಿಳಿದಿರುವುದೇ ಆದರೂ ಯುವಜನತೆ ಸಾರ್ವಜನಿಕವಾಗಿ ಇದನ್ನು ಬಳಸುವುದು ಗೌರವದ ಸಂಕೇತ ಎಂಬಂತೆ ಬಿಂಬಿಸುತ್ತಿದ್ದಾರೆ. ಸಂಸ್ಥೆಗಳಲ್ಲಿ ಕಾರ್ಯ ನಿರ್ವಹಿಸುತ್ತಿರುವವರು, ವಿದ್ಯಾರ್ಥಿಗಳು ಟಿಶ್ಯೂ ಪೇಪರ್ ಬಳಕೆಯಲ್ಲಿ ಮುಂದಿದ್ದಾರೆ. ಡ್ರೈ ಮತ್ತು ವೆಟ್ ಟಿಶ್ಯೂ ಗಳು ಚಿಕ್ಕ ಚಿಕ್ಕ ಗಾತ್ರದಲ್ಲಿ ಲಭ್ಯವಿರುವ ಕಾರಣ, ಎಲ್ಲಾ ಕಡೆಗೂ ತಮ್ಮ ಬ್ಯಾಗ್ ಗಳಲ್ಲಿ ಇರಿಸಿ ಉಪಯೋಗಿಸಿಕೊಳ್ಳತ್ತಿದ್ದಾರೆ.
ಹಾಗಾದರೆ ನಾವು ಟಿಶ್ಯೂ ಬಳಕೆ ತಪ್ಪಾ? ಇದಕ್ಕೆ ಇರುವ ಪರ್ಯಾಯವಾದ ಅಂಶಗಳಾವುವು ಎಂದು ತಿಳಿಯೋಣ. ಟಿಶ್ಯೂ ಬರುವ ಮುನ್ನ ನಮ್ಮೆಲ್ಲರ ಬಳಿಯಲ್ಲಿಯೂ ಕರ ವಸ್ತ್ರ ಬಳಕೆಯಲ್ಲಿತ್ತು. ಇಂದಿಗೂ ಕೆಲವರು ಮುಖ, ಕೈ ಓರೆಸಲು ತಮ್ಮಲ್ಲಿರುವ ಕರವಸ್ತ್ರವನ್ನೇ ಬಳಸಲು ಇಚ್ಚಿಸುತ್ತಾರೆ. ಈ ಪ್ರವೃತ್ತಿಯೇ ದೊಡ್ಡ ಪ್ರಮಾಣದಲ್ಲಿ ಮುಂದುವರೆದಿದ್ದರೆ, ಪ್ರಾಯಶ ಟಿಶ್ಯೂ ಬಳಕೆಯನ್ನು ನಿಯಂತ್ರಿಸಬಹುದು. ಸಾರ್ವಜನಿಕವಾಗಿ ತಮ್ಮ ಶುಚಿತ್ವವನ್ನು ಕಾಪಾಡಲು ಸದಾ ಕರ ವಸ್ತ್ರವನ್ನೇ ಇಟ್ಟುಕೊಂಡು ಬಳಸುವುದರಿಂದ ಅನಗತ್ಯ ಟಿಶ್ಯೂ ಪೇಪರ್ ಗಳ ಬಳಕೆಗೆ ಪೂರ್ಣವಿರಾಮವಿಡಬಹುದು.
ಇತರ ದೇಶಗಳಿಗೆ ಹೋಲಿಸಿದರೆ ಭಾರತದಲ್ಲಿ ಟಿಶ್ಯೂ ಪೇಪರ್ ಬಳಕೆ ಸದ್ಯದ ಮಟ್ಟಿಗೆ ಕಡಿಮೆ ಇದೆ ಆದರೆ ಯುಎಸ್ ಮತ್ತು ಯುಕೆ ದೇಶಗಳಿಗೆ ಹೋಲಿಸಿದರೆ ಭಾರತದ ಜನಸಂಖ್ಯೆ 3 ಪಟ್ಟು ಹೆಚ್ಚಿದೆ. ಭವಿಷ್ಯದಲ್ಲಿ ಟಿಶ್ಯೂ ಪೇಪರ್ ಬಳಕೆ ಅಧಿಕವಾಗಬಹುದು. ಜೀವನಶೈಲಿಯ ಬದಲಾವಣೆ ಎಂಬ ಸೋಗಿನಲ್ಲಿ ಪರಿಸರ ಸಂರಕ್ಷಣೆಯ ಪರಿಕಲ್ಪನೆಗಳಿಗೆ ಅನುಚಿತ ವಿಷಯಗಳನ್ನು ಪರಿಚಯಿಸದೆ ಇರುವುದು ಉತ್ತಮ. ಪರಿಸರಕ್ಕೆ ಅನುಗುಣವಾಗಿ ಸಾಂಪ್ರದಾಯಿಕ ವಸ್ತುಗಳನ್ನು ಬಳಸುವುದರ ಮೂಲಕ ಇಂತಹ ಸಮಸ್ಯೆಗಳಿಗೆ ತೆರೆ ಎಳೆಯಬೇಕು.