ಸಾಮಾನ್ಯವಾಗಿ ಮನೆಯಲ್ಲಿ ಸಣ್ಣ ಮಕ್ಕಳಿದ್ದರೆ ಅವರನ್ನು ಮಲಗಿಸುವುದು ತಾಯಂದಿರಿಗೆ ದೊಡ್ಡ ಕೆಲಸ. ಮಕ್ಕಳು ಸಾಮಾನ್ಯವಾಗಿ ರಾತ್ರಿ ವೇಳೆ ಎದ್ದೇಳುತ್ತಾರೆ. ಕೆಲವೊಮ್ಮೆ ರಾತ್ರಿಯಿಡೀ ಎದ್ದಿದ್ದು, ಆಟವಾಡುತ್ತಿರುತ್ತಾರೆ. ಇದರಿಂದ ತಾಯಿಯ ನಿದ್ರೆ ಹಾಗೂ ಆರೋಗ್ಯ ಹದಗೆಡುತ್ತದೆ. ಹಿಂದಿನ ಕಾಲದಲ್ಲಿ ಅವಿಭಕ್ತ ಕುಟುಂಬವಿರುವುದರಿಂದ ಒಬ್ಬರಿಲ್ಲದಿದ್ದರೂ ಇನ್ನೊಬ್ಬರು ಮಗುವನ್ನು ನೋಡಿಕೊಳ್ಳುತ್ತಿದ್ದರು. ಆದರೆ ಇಂದು ವಿಭಕ್ತ ಕುಟುಂಬವಾಗಿರುವುದರಿಂದ ತಾಯಿಯ ಮಾತ್ರ ಮಗುವನ್ನು ನೋಡಿಕೊಳ್ಳಬೇಕಾದ ಪರಿಸ್ಥಿತಿ ಇರುತ್ತದೆ.
ಮಕ್ಕಳನ್ನು ಮಲಗಿಸಲು ಪೋಷಕರು ಎಲ್ಲಾ ರೀತಿಯ ಪ್ರಯತ್ನಗಳನ್ನು ಮಾಡುತ್ತಾರೆ. ಆದರೆ ಎಷ್ಟೋ ವೇಳೆ ಮಗು ಮಾತ್ರ ಮಲಗುವುದೇ ಇಲ್ಲ. ಅಂತಹ ಸಮಯದಲ್ಲಿ ನಾವು ಹೇಗೆ ಮಗುವನ್ನು ಆರಾಮವಾಗಿ ಮಲಗಿಸಬಹುದು ಎಂಬುದನ್ನು ನೋಡೋಣ.
ಮೊದಲನೇಯದಾಗಿ ಹೇಳಬೇಕು ಎಂದರೆ ಮಗು ಚೆನ್ನಾಗಿ ನಿದ್ರೆ ಮಾಡುವ ಸಮಯವನ್ನು ತಿಳಿದುಕೊಳ್ಳಿ. ಮಕ್ಕಳಿಗೆ ನಿದ್ರೆ ಬಂದಾಗ ಕಣ್ಣು ಉಜ್ಜುವುದು, ಅಳುವುದು, ಆಕಳಿಕೆ ಅಥವಾ ಕಿರಿಕಿರಿಯ ಲಕ್ಷಣಗಳನ್ನು ಮಾಡುತ್ತಿರುತ್ತಾರೆ. ಆಗ ಮಗುವಿನ ಸನ್ನೆಗಳನ್ನು ಅರ್ಥಮಾಡಿಕೊಳ್ಳುವ ಮೂಲಕ ನೀವು ಅವರಿಗೆ ನಿದ್ರೆ ಮಾಡಿಸಬೇಕು.
ಸ್ತನ್ಯಪಾನ ಮಾಡಲು ಮರೆಯದಿರಿ: ಮಲಗುವ ಮಗುವಿಗೆ ಹಾಲುಣಿಸಬೇಕು. ಹೊಟ್ಟೆ ತುಂಬಿದರೆ ಮಾತ್ರ ಮಕ್ಕಳು ಬೇಗ ನಿದ್ರೆ ಮಾಡುತ್ತಾರೆ. ನಿದ್ರೆ ಮಾಡುವಾಗ ಮಕ್ಕಳಿಗೆ ಹಸಿವಾದರೆ ನಿದ್ದೆ ಬರುವುದಿಲ್ಲ. ಆದ್ದರಿಂದ ಮಕ್ಕಳಿಗೆ ನಿದ್ರೆ ಬರುವಾಗ ಹಾಲುಣಿಸಬೇಕು.
ನಿಶಬ್ಧ ಕೋಣೆಯಲ್ಲಿ ಮಲಗಿಸಿ: ಮಕ್ಕಳನ್ನು ಗದ್ದಲದ ಸ್ಥಳಗಳಲ್ಲಿ ಮಲಗಿಸಬಾರದು. ಇದರಿಂದ ಮಕ್ಕಳು ಚೆನ್ನಾಗಿ ನಿದ್ರಿಸುವುದಿಲ್ಲ. ಶಬ್ದವಾದರೆ ಮಕ್ಕಳು ಅರ್ಧಂಬರ್ಧಂ ನಿದ್ರೆ ಮಾಡುತ್ತಾರೆ. ಆದ್ದರಿಂದ ಮಕ್ಕಳನ್ನು ಮಲಗಿಸಲು ನಿಶಬ್ಧವಾದ ಕೋಣೆಯನ್ನು ಆಯ್ಕೆ ಮಾಡಿಕೊಳ್ಳಬೇಕು.
ಮಕ್ಕಳೊಂದಿಗೆ ಇರಿ: ಮಕ್ಕಳನ್ನು ಮಲಗಿಸಿದ ನಂತರ ಪೋಷಕರು ಹೆಚ್ಚಾಗಿ ಕೆಲಸದಲ್ಲಿ ನಿರತರಾಗಿರುತ್ತಾರೆ. ಆ ವೇಳೆ ಸೊಳ್ಳೆ ಕಡಿತ ಅಥವಾ ಒದ್ದೆಯಾದ ಬಟ್ಟೆಗಳಿಂದ ಮಕ್ಕಳು ಹೆಚ್ಚಾಗಿ ಎಚ್ಚರಗೊಳ್ಳುತ್ತಾರೆ. ಆದ್ದರಿಂದ ಮಲಗುವ ಸಮಯದಲ್ಲಿ ಮಗುವಿನ ಸುತ್ತಲೂ ಪದರೆ ಹಾಕಿ ಮತ್ತು ಸಮಯಕ್ಕೆ ಸರಿಯಾಗಿ ಡಯಾಪರ್ ಅನ್ನು ಬದಲಿಸುತ್ತಾ ಮಕ್ಕಳ ಹತ್ತಿರವೇ ಯಾರಾದರೂ ಒಬ್ಬರು ಕಾದು ಕುಳಿತುಕೊಳ್ಳಬೇಕು.
ಸ್ವಚ್ಛತೆ ಕಡೆ ಗಮನ ಕೊಡಿ: ಶಿಶುವನ್ನು ಕೊಳಕು ಸ್ಥಳಗಳಲ್ಲಿ ಮಲಗಿಸಬಾರದು. ಈ ಕಾರಣದಿಂದ ಮಗು ಬ್ಯಾಕ್ಟೀರಿಯಾದ ಸೋಂಕು, ಉರಿಯೂತ, ತುರಿಕೆ ಮತ್ತು ಇತರ ಸಮಸ್ಯೆಗಳಿಗೆ ಒಳಗಾಗುತ್ತದೆ. ಆದ್ದರಿಂದ ಮಗುವನ್ನು ಯಾವಾಗಲೂ ಸ್ವಚ್ಛವಾದ ಸ್ಥಳದಲ್ಲಿ ಮಲಗಿಸಿದರೆ ಮಕ್ಕಳು ಚೆನ್ನಾಗಿ ನಿದ್ರೆ ಮಾಡುತ್ತವೆ.
ಸಡಿಲವಾದ ಬಟ್ಟೆಗಳನ್ನು ಧರಿಸಿ: ಮಗುವನ್ನು ಮಲಗಿಸುರವಾಗ ಆದಷ್ಟು ಸ್ನಾನ ಮಾಡಿಸಿ, ಹಗುರವಾದ ಮತ್ತು ಸಡಿಲವಾದ ಬಟ್ಟೆಗಳನ್ನು ಹಾಕಿದರೆ ಮಕ್ಕಳು ಆರಾಮವಾಗಿ ಮಲಗುತ್ತಾರೆ. ಹೀಗೆ ಮಗುವನ್ನು ಮಲಗಿಸುವಾಗ ಕಾಳಜಿ ವಹಿಸಬೇಕು.