ಪ್ರತಿವರ್ಷ ವಿಶ್ವದಾದ್ಯಂತ ಜುಲೈ 6 ರಂದು ವಿಶ್ವ ಝೂನೋಸಸ್ ದಿನವನ್ನು ಆಚರಿಸಲಾಗುತ್ತದೆ. ಪ್ರತಿ ವರ್ಷ ಹೊಸ ಥೀಮ್ನೊಂದಿಗೆ ಈ ದಿನವನ್ನು ಆಚರಣೆ ಮಾಡಲಾಗುತ್ತದೆ ಈ ವರ್ಷ ‘ಒಂದು ಜಗತ್ತು, ಒಂದು ಆರೋಗ್ಯ: ಝೂನೋಸಸ್ ನ್ನು ತಡೆಯಿರಿ, ಅದರ ಹರಡುವಿಕೆಯನ್ನು ನಿಲ್ಲಿಸಿ, ಪ್ರಾಣಿ ಸಂಕುಲವನ್ನು ರಕ್ಷಿಸಿ’ ಎಂಬ ಥೀಮ್ನೊಂದಿಗೆ ವಿಶ್ವ ಝೂನೋಸಸ್ ದಿನವನ್ನು ಆಚರಿಸಲಾಗುತ್ತಿದೆ. ಆದರೆ ವಿಶ್ವ ಝೂನೋಸಸ್ ದಿನವನ್ನು ಏಕೆ ಆಚರಣೆ ಮಾಡುತ್ತಾರೆ? ಝೂನೋಸಸ್ ಎಂದರೇನು ಎಂದು ಹೆಚ್ಚಿನವರಿಗೆ ತಿಳಿದಿಲ್ಲ. ಝೂನೋಸಸ್ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ
ಝೂನೋಸಸ್ ಎಂದರೇನು?
ಮನುಷ್ಯನಿಗೆ ಬರುವ ರೋಗಗಳ ಪೈಕಿ ಬಹುಪಾಲು ರೋಗಗಳು ಪ್ರಾಣಿಗಳಿಂದ ಬರುತ್ತವೆ. ಪ್ರಾಣಿಗಳಲ್ಲಿರುವ ವೈರಸ್, ಬ್ಯಾಕ್ಟೀರಿಯಾದಿಂದ ಮನುಷ್ಯರಿಗೆ ಸೋಂಕು ತಗಲುತ್ತವೆ. ಪ್ರಾಣಿಗಳ ಮೇಲಿರುವ ರೋಗಾಣುಗಳು ಆಹಾರದ ಮೂಲಕ ಮನುಷ್ಯನ ದೇಹಕ್ಕೆ ಸೇರುತ್ತವೆ. ಇದು ಮನುಷ್ಯನಲ್ಲಿ ವಿವಿಧ ರೋಗಕ್ಕೆ ತುತ್ತಾಗುವಂತೆ ಮಾಡುತ್ತದೆ. ಹೀಗೆ ಪ್ರಾಣಿಗಳಿಂದ ಮನುಷ್ಯರಿಗೆ ಹರಡುವ ರೋಗಗಳಿಗೆ ಝೂನೋಸಸ್ ಎಂದು ಕರೆಯಲಾಗುತ್ತದೆ. ಅದೇ ಕೆಲವು ಪರಿಸ್ಥಿತಿಗಳಲ್ಲಿ ಸೋಂಕು ಮನುಷ್ಯರಿಂದ ಪ್ರಾಣಿಗಳಿಗೆ ಹರಡಬಹುದು. ಇಂತಹ ಸ್ಥಿತಿಯನ್ನು ರಿವರ್ಸ್ ಝೂನೋಸಸ್ ಎಂದು ಕರೆಯಲಾಗುತ್ತದೆ.
ಸೋಂಕಿತ ಪ್ರಾಣಿಯ ರಕ್ತ, ಮೂತ್ರ. ಲೋಳೆ, ಮಲ ಅಥವಾ ದೇಹದ ಇತರ ದ್ರವಗಳೊಂದಿಗೆ ನೇರ ಅಥವಾ ಪರೋಕ್ಷ ಸಂಪರ್ಕದಿಂದ ಝೂನೋಟಿಕ್ ಸೋಂಕುಗಳು ಪ್ರಾಣಿಗಳಿಂದ ಮನುಷ್ಯರಿಗೆ ಹರಡಬಹುದು. ಈ ಕಾಯಿಲೆಗಳು ಬ್ಯಾಕ್ಟೀರಿಯಾ, ವೈರಸ್, ಶಿಲೀಂದ್ರಗಳು ಅಥವಾ ಪರಾವಲಂಬಿಗಳಿಂದ ಉಂಟಾಗಬಹುದು. ಇದು ಕೆಲವೊಮ್ಮೆ ಮನುಷ್ಯರ ಮೇಲೆ ಗಂಭೀರ ಮತ್ತು ಮಾರಣಾಂತಿಕ ಪರಿಣಾಮವನ್ನು ಉಂಟು ಮಾಡುತ್ತದೆ. ಪ್ರಸ್ತುತ 200 ಕ್ಕೂ ಹೆಚ್ಚು ಝುನೋಟಿಕ್ ಕಾಯಿಲೆಗಳಿವೆ. ರೇಬಿಸ್, ಎಬೋಲಾ, ಹಂದಿ ಜ್ವರ, ಫ್ಲೂ, ಹಕ್ಕಿ ಜ್ವರ ಇವೆಲ್ಲವೂ ಝೂನೋಟಿಕ್ ಕಾಯಿಲೆಗಳು.
ವಿಶ್ವ ಝೂನೋಸಸ್ ದಿನದ ಇತಿಹಾಸ:
1885 ರಲ್ಲಿ ಜೂಯಿಸ್ ಪಾಶ್ಚರ್ ಅವರು ಝೂನೋಟಿಕ್ ಕಾಯಿಲೆಯಾದ ರೇಬಿಸ್ ವಿರುದ್ಧ ಮೊದಲ ಲಸಿಕೆಯನ್ನು ಕಂಡುಹಿಡಿದ ದಿನದ ನೆನಪಿಗಾಗಿ ಜುಲೈ 6 ರಂದು ವಿಶ್ವದಾದ್ಯಂತ ಝೂನೋಸಸ್ ದಿನವನ್ನು ಆಚರಿಸಲಾಗುತ್ತದೆ. ಝೂನೋಟಿಕ್ ಕಾಯಿಲೆಗಳನ್ನು ತಡೆಗಟ್ಟುವಲ್ಲಿ ಮತ್ತು ನಿಯಂತ್ರಿಸುವಲ್ಲಿ ಲೂಯಿಸ್ ಪಾಶ್ವರ್ ಅವರು ಕಂಡು ಹಿಡಿದಿರುವ ಲಸಿಕೆಯು ಬಹಳ ಪ್ರಮುಖ ಪಾತ್ರವನ್ನು ವಹಿಸಿದೆ. 2007 ರಲ್ಲಿ ಈ ಲಸಿಕೆ ನೂರನೇ ವರ್ಷದ ವಾರ್ಷಿಕೋತ್ಸವದ ದಿನದಂದು ಮೊದಲ ವಿಶ್ವ ಝೂನೋಟಿಕ್ ದಿನವನ್ನು ಆಚರಿಸಲಾಯಿತು. ಅಂದಿನಿಂದ ಪ್ರತಿವರ್ಷ ಝೂನೋಟಿಕ್ ಕಾಯಿಲೆಯ ಹರಡುವಿಕೆಯನ್ನು ತಡೆಗಟ್ಟಲು ಮತ್ತು ಜಾಗೃತಿಯನ್ನು ಮೂಡಿಸಲು ಪ್ರಪಂಚದಾದ್ಯಂತ ಝೂನೋಸಸ್ ದಿನವನ್ನು ಆಚರಿಸಲಾಗುತ್ತಿದೆ.
ವಿಶ್ವ ಝೂನೋಸಸ್ ಆಚಾರಣೆಯ ಮಹತ್ವ:
ಝೂನೋಟಿಕ್ ರೋಗಗಳ ಹೆಚ್ಚುತ್ತಿರುವ ಕಾರಣದಿಂದಾಗಿ, ಅದರ ಬಗ್ಗೆ ಜಾಗೃತಿಯನ್ನು ಹೆಚ್ಚಿಸುವುದು ಅಗತ್ಯವಾಗಿದೆ. ಇವು ಸಾಮಾನ್ಯ ಜ್ವರದಿಂದ ಹಿಡಿದು ಎಬೋಲಾ ನಂತಹ ಸಾಂಕ್ರಾಮಿಕ ರೋಗಗಳನ್ನು ಕೂಡಾ ಉಂಟು ಮಾಡಬಹುದು. ವಿಶ್ವ ಝೂನೋಸಸ್ ದಿನದ ಈ ಸಂದರ್ಭದಲ್ಲಿ, ಈ ರೋಗಗಳ ಕಾರಣಗಳು ಮತ್ತು ಅದನ್ನು ತಡೆಗಟ್ಟುವ ಕ್ರಮಗಳ ಕುರಿತು ಪ್ರಪಂಚದಾದ್ಯಂತ ಹಲವು ಕಾರ್ಯಕ್ರಮಗಳನ್ನು ಸರ್ಕಾರ, ಸಂಘ ಸಂಸ್ಥೆಗಳು ಆಯೋಜಿಸಿವೆ. ಮತ್ತು ಮನುಷ್ಯರು ಹಾಗೂ ಪ್ರಾಣಿಗಳ ಆರೋಗ್ಯವನ್ನು ಉತ್ತಮ ಮತ್ತು ಸುರಕ್ಷಿತವಾಗಿಸಲು ಜಾಗೃತಿಯನ್ನು ಮೂಡಿಸಲಾಗುತ್ತಿದೆ.
ಝೂನೋಟಿಕ್ ಕಾಯಿಲೆಗಳು :
ಕೊರೊನಾ. ರೇಬೀಸ್, ಪ್ಲೆಗ್, ಸ್ಕೇಬೀಸ್, ರೌಂಡ್ ವರ್ಮ್ಸ್, ಗಾರ್ಡಿಯಾ ಇನ್ಪೆಕ್ಷನ್, ಸ್ಯಾಲ್ಮನೇಲಾಸಿಸ್, ಕ್ಯಾಟ್ ಸ್ಕ್ರಾಚ್ ಫೀವರ್, ಟ್ಯೂಬರ್ ಕ್ಯುಲಾಸಿಸ್, ಹ್ಯಾಂಟಾ ವೈರಸ್, ಟಿಕ್ ಪ್ಯಾರಾಲಿಸಿಸ್, ಲೆಪ್ಟಾಸ್ಪಿರಾಸಿಸ್, ಲೈಮ್ ಡಿಸೀಸ್, ಕ್ಯಾಂಪಿಲೋಬ್ಯಾಕ್ಟರ್ ಇನ್ಪೆಕ್ಷನ್ ಇನ್ನೂ ಮುಂತಾದವುಗಳು. ಕೆಲವು ಝೂನೋಟಿಕ್ ಕಾಯಿಲೆಗಳಿಗೆ ಮಾತ್ರ ಇಲ್ಲಿಯವರೆಗೆ ಲಸಿಕೆ ಕಂಡುಹಿಡಿಯಲಾಗಿದೆ. ರೇಬೀಸ್, ಆಂಥ್ರಾಕ್ಸ್, ಸೇರಿದಂತೆ ಕೆಲವು ಮುಂತಾದ ಕಾಯಿಲೆಗಳಿಗೆ ಲಸಿಕೆ ಕಂಡು ಹಿಡಿಯಲಾಗಿದೆ. ಆದರೆ ಕೊರೊನಾ, ಕೋಳಿ ಜ್ವರ ಸೇರಿದಂತೆ ಹಲವು ಸೋಂಕುಗಳಿಗೆ ಇನ್ನೂ ಲಸಿಕೆ ಮತ್ತು ಔಷಧಿಯನ್ನು ಕಂಡುಹಿಡಿದಿಲ್ಲ.