ಜುಲೈನಿಂದ ಒಂದು ವರ್ಷದೊಳಗೆ ರಾಜ್ಯಾದ್ಯಂತ 5 ಕೋಟಿ ಸಸಿ ನೆಡುವ ಗುರಿಯನ್ನು ಅರಣ್ಯ ಇಲಾಖೆ ಹೊಂದಿದೆ. ಸಸಿಗಳ ಸ್ಥಿತಿಗತಿ ತಿಳಿಯಲು ಜಿಯೋ ಟ್ಯಾಗ್ ಅಳವಡಿಸಿ ಆಡಿಟ್ಗೂ ಕ್ರಮ ವಹಿಸಲಾಗುವುದು ಎಂದು ಅರಣ್ಯ, ಜೀವಿಶಾಸ್ತ್ರ ಮತ್ತು ಪರಿಸರ ಖಾತೆ ಸಚಿವ ಈಶ್ವರ ಖಂಡ್ರೆ ಮಾಹಿತಿ ನೀಡಿದ್ದಾರೆ.
ರಾಜ್ಯದ ಭೌಗೋಳಿಕ ವಿಸ್ತೀರ್ಣದ ಶೇ.33ರಷ್ಟು ಅರಣ್ಯ, ಹಸಿರು ಪ್ರದೇಶವಿರಬೇಕು. ಸದ್ಯ ಶೇ. 20.19ರಷ್ಟು ಮಾತ್ರ ಅರಣ್ಯ, ಹಸಿರು ವಲಯವಿದೆ. ಪ್ರಕೃತಿ ಉಳಿಸುವುದು ಹಾಗೂ ಅರಣ್ಯ ವ್ಯಾಪ್ತಿ, ಹಸಿರು ವ್ಯಾಪ್ತಿ ವೃದ್ಧಿಸಬೇಕೆಂಬುದು ನಮ್ಮ ಧ್ಯೇಯೋದ್ದೇಶ. ಅದರಂತೆ ಜು.1ರಿಂದ ಮುಂದಿನ ವರ್ಷದ ಜೂ. 30ರೊಳಗೆ ರಾಜ್ಯಾದ್ಯಂತ 5 ಕೋಟಿ ಸಸಿ ನೆಡಲು ನಿರ್ಧರಿಸಲಾಗಿದೆ ಎಂದು ಸಚಿವರು ತಿಳಿಸಿದ್ದಾರೆ.
ವನಮಹೋತ್ಸವ ಆಚರಣೆಗಾಗಿ ಸಮಿತಿ ರಚನೆ:
ಜು.1ರಿಂದ 7 ದಿನಗಳ ಕಾಲ ವನಮಹೋತ್ಸವ ಆಚರಣೆಗಾಗಿ ಜಿಲ್ಲಾಧಿಕಾರಿಗಳ ಅಧ್ಯಕ್ಷತೆಯಲ್ಲಿ ಸಮಿತಿ ರಚಿಸಲಾಗಿದೆ. ಪೊಲೀಸ್ ವರಿಷ್ಠಾಧಿಕಾರಿಗಳು, ಜಿಲ್ಲಾಪಂಚಾಯಿತಿ ಸಿಇಒಗಳು, ಉಪ ಅರಣ್ಯ ಸಂರಕ್ಷಣಾಧಿಕಾರಿಗಳು ಸಮಿತಿಯ ಸದಸ್ಯ ಕಾರ್ಯದರ್ಶಿಗಳಾಗಿರುತ್ತಾರೆ.
ಜುಲೈ ಮೊದಲ ವಾರ ಒಂದು ಕೋಟಿ ಸಸಿ ನೆಡಲು ಸಿದ್ಧತೆ:
ಈಗಾಗಲೇ ಇಲಾಖೆ ಬಳಿ 2.50 ಕೋಟಿ ಸಸಿಗಳಿದ್ದು, ವನಮಹೋತ್ಸವ ಕಾರ್ಯಕ್ರಮದ ಅವಧಿಯಲ್ಲಿ ರಾಜ್ಯಾದ್ಯಂತ ಒಂದು ಕೋಟಿ ಸಸಿ ನೆಡಲು ಸಿದ್ಧತೆಯಾಗಿದೆ. ನಂತರ ಮಳೆ, ಋುತುಮಾನ ಆಧರಿಸಿ ಮುಂದಿನ ಜೂ.30ರೊಳಗೆ 4 ಕೋಟಿ ಸಸಿ ನೆಡಲಾಗುವುದು. ಸ್ಥಳೀಯ ಪ್ರಭೇದದ ಗಿಡಗಳನ್ನೇ ನೆಡಲಾಗುವುದು
ನರೇಗಾದಲ್ಲಿ ಸಸಿ ನೆಡುವ ಕಾರ್ಯಕ್ರಮ:
‘ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯಡಿಯೂ (ನರೇಗಾ) ಗ್ರಾಮೀಣ ಪ್ರದೇಶದಲ್ಲಿ ಸಸಿ ನೆಡುವ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗುವುದು. ಹಾಗೆಯೇ ನಗರ ಮತ್ತು ಪಟ್ಟಣ ಪ್ರದೇಶಗಳಲ್ಲಿ ಸ್ಥಳೀಯ ನಗರ ಸಂಸ್ಥೆಗಳ ಸಹಯೋಗದಲ್ಲಿ ಕಾರ್ಯಕ್ರಮ ರೂಪಿಸಲಾಗುವುದು.
ಸಸಿಗಳ ಸ್ಥಿತಿಗತಿ ತಿಳಿಯಲು ಜಿಯೋ ಟ್ಯಾಗ್ :
ನೆಟ್ಟ ಸಸಿಗಳ ನಿರ್ವಹಣೆಗೆ ಒತ್ತು ನೀಡಲು ನೆಡುವ ಪ್ರತಿ ಸಸಿಗಳಿಗೆ ಜಿಯೋ ಟ್ಯಾಗ್ ಅಳವಡಿಸಿ ದಾಖಲಿಸಿ ಆಡಿಟ್ ನಡೆಸಲಾಗುವುದು. ಈ ಬಾರಿ ನೆಡಲಾಗುವ ಸಸಿಗಳ ಪೈಕಿ ಶೇ. 80ರಷ್ಟು ಉಳಿಸುವ ಉದ್ದೇಶದಿಂದ 10-15 ದಿನದಲ್ಲಿಆಡಿಟ್ ವರದಿ ಪಡೆಯಲು ಪ್ರಯತ್ನಿಸಲಾಗುವುದು ಎಂದು ಸಚಿವರು ಮಾಹಿತಿ ನೀಡಿದ್ದಾರೆ.