ಬಿಹಾರದ ಚಂಪಾರಣ್ ಜಿಲ್ಲೆಯ ಕೈತ್ವಾಲಿಯಾದಲ್ಲಿ ನಿರ್ಮಾಣಗೊಳ್ಳಲಿರುವ ವಿರಾಟ್ ರಾಮಾಯಣ ರಾಮನ ದೇವಾಲಯವನ್ನು ವಿಶ್ವದ ಅತ್ಯಂತ ದೊಡ್ಡ ದೇವಾಲಯವೆಂದು ಕರೆಯಲಾಗಿದೆ. ಇಲ್ಲಿ ರಾಮನೊಂದಿಗೆ ಶಿವನನ್ನು ಪೂಜಿಸಲಾಗುವುದು. ಇಲ್ಲಿನ ಶಿವಲಿಂಗವೂ ವಿಶ್ವದ ಅತ್ಯಂತ ದೊಡ್ಡ ಶಿವಲಿಂಗವಾಗಿದೆ.
ಬಿಹಾರದ ಪೂರ್ವ ಚಂಪಾರಣ್ ಜಿಲ್ಲೆಯ ಕೈತ್ವಾಲಿಯಾದಲ್ಲಿ ವಿಶ್ವದ ಅತಿದೊಡ್ಡ ಹಿಂದೂ ದೇವಾಲಯವನ್ನು ನಿರ್ಮಿಸಲಾಗುತ್ತಿದೆ. ಈ ದೇವಾಲಯದ ಹೆಸರೇ ವಿರಾಟ್ ರಾಮಾಯಣ ದೇವಾಲಯ. ವಿರಾಟ್ ರಾಮಾಯಣ ದೇವಾಲಯದ ನಿರ್ಮಾಣ ಕಾರ್ಯವು 2023 ರ ಜೂನ್ 20 ರಿಂದ ಪ್ರಾರಂಭವಾಗುತ್ತಿದೆ. ನಂಬಿಕೆಯ ಪ್ರಕಾರ, ಜನಕಪುರದಿಂದ ಹಿಂದಿರುಗುವಾಗ ಭಗವಾನ್ ರಾಮನು ತನ್ನ ಸೈನ್ಯವನ್ನು ನಿಲ್ಲಿಸಿದ ಸ್ಥಳದಲ್ಲಿಯೇ ಈ ದೇವಾಲಯವನ್ನು ನಿರ್ಮಿಸಲಾಗಿದೆ. 120 ಎಕರೆ ಜಾಗದಲ್ಲಿ ಈ ದೇವಾಲಯ ನಿರ್ಮಾಣವಾಗಲಿದೆ. ದೇವಾಲಯದ ಎತ್ತರ ಸುಮಾರು 270 ಅಡಿ ಇರುತ್ತದೆ.
1. ಇಲ್ಲಿನ ಶಿವಲಿಂಗದ ವಿಶೇಷತೆ:
ಮಾಹಿತಿ ಪ್ರಕಾರ ದೇವಾಲಯ ನಿರ್ಮಾಣಕ್ಕೆ ಸುಮಾರು 500 ಕೋಟಿ ವೆಚ್ಚವಾಗಲಿದೆ. ಈ ದೇವಾಲಯದಲ್ಲಿ ನಿರ್ಮಿಸಲಾದ ಶಿವಲಿಂಗದ ತೂಕ ಸುಮಾರು 250 ಟನ್ ಆಗಿರುತ್ತದೆ. ಈ ತೂಕದ ಆಧಾರದ ಮೇಲೆ ಶಿವಲಿಂಗದ ಎತ್ತರವು ಸರಿಸುಮಾರು 33 ಅಡಿ ಇರುತ್ತದೆ. ಇಲ್ಲಿಯವರೆಗೆ ತಂಜಾವೂರಿನಲ್ಲಿರುವ 27 ಅಡಿ ಎತ್ತರದ ಶಿವಲಿಂಗವು ವಿಶ್ವದ ಅತಿ ಎತ್ತರದ ಶಿವಲಿಂಗ ಎಂದು ಪರಿಗಣಿಸಲ್ಪಟ್ಟಿದೆ. ಆದರೆ ಬಿಹಾರದ ಈ ದೇವಾಲಯದಲ್ಲಿ ನಿರ್ಮಿಸಲಾಗುವ ಈ ಶಿವಲಿಂಗ ಇದಕ್ಕಿಂತ ದೊಡ್ಡದಾಗಿರುತ್ತದೆ. ಕಪ್ಪು ಗ್ರಾನೈಟ್ ಕಲ್ಲುಗಳಿಂದ ಈ ಶಿವಲಿಂಗವನ್ನು ಸಿದ್ಧಪಡಿಸಲಾಗುವುದು. ಈ ಶಿವಲಿಂಗದ ನಿರ್ಮಾಣವು ಸಹಸ್ತ್ರಲಿಂಗದಂತಿರುತ್ತದೆ ಅಂದರೆ ಏಕೈಕ ಶಿವಲಿಂಗದಲ್ಲಿ ಒಂದು ಸಾವಿರದ ಎಂಟು ಶಿವಲಿಂಗಗಳು ಕುಳಿತಿರುತ್ತವೆ.
2. ವಿರಾಟ್ ರಾಮಾಯಣ ದೇವಾಲಯದ ವಿಶೇಷತೆ:
ಪ್ರಸ್ತುತ ಅಂಕೋರ್ ವಾಟ್ ದೇವಾಲಯವು ವಿಶ್ವದ ಅತಿದೊಡ್ಡ ಹಿಂದೂ ದೇವಾಲಯವಾಗಿದೆ. ಇವರ ಎತ್ತರ 215 ಅಡಿಗಳಾಗಿದೆ. ಈ ದೇವಾಲಯವು ಕಾಂಬೋಡಿಯಾದಲ್ಲಿದೆ. ಭಾರತದಲ್ಲಿ ನಿರ್ಮಾಣವಾಗುತ್ತಿರುವ ವಿರಾಟ್ ರಾಮಾಯಣ ದೇವಾಲಯವು ಕಾಂಬೋಡಿಯಾದಲ್ಲಿರುವ ದೇವಾಲಯಕ್ಕಿಂತ ಎತ್ತರವಾಗಿರುತ್ತದೆ. ವಿರಾಟ್ ರಾಮಾಯಣ ದೇವಾಲಯದ ಉದ್ದ 1080 ಅಡಿ ಮತ್ತು ಅಗಲ 540 ಅಡಿಗಳಷ್ಟಿರುತ್ತದೆ.
3. ದೇವಾಲಯದ ನಿರ್ಮಾಣ ಪೂರ್ಣಗೊಳ್ಳುವ ವರ್ಷ:
ಇನ್ನು ಕೆಲವೊಂದು ಮಾಹಿತಿಯ ಪ್ರಕಾರ, ಈ ದೇವಾಲಯದ ಆವರಣದಲ್ಲಿ ನಾಲ್ಕು ಋಷಿಗಳ ಹೆಸರಿನಲ್ಲಿ ನಾಲ್ಕು ಆಶ್ರಮಗಳನ್ನು ಸಹ ನಿರ್ಮಿಸಲಾಗುವುದು. ಇದರೊಂದಿಗೆ ದೇಗುಲದಲ್ಲಿ ಒಟ್ಟು 22 ಶೈವ ಮತ್ತು ವೈಷ್ಣವ ದೇಗುಲಗಳು ಇರಲಿವೆ. 2025ರ ವೇಳೆಗೆ ದೇವಾಲಯದ ನಿರ್ಮಾಣ ಕಾರ್ಯ ಪೂರ್ಣಗೊಳ್ಳಲಿದೆ. ವಿರಾಟ್ ರಾಮಾಯಣ ದೇವಾಲಯದ ನಿರ್ಮಾಣವನ್ನು ಸನ್ಟೆಕ್ ಇನ್ಫ್ರಾ ಸೊಲ್ಯೂಷನ್ಸ್ ಪ್ರೈವೇಟ್ ಲಿಮಿಟೆಡ್ ತೆಗೆದುಕೊಂಡಿವೆ ಎನ್ನುವ ಮಾಹಿತಿಯಿದೆ.
ಈ ದೇವಾಲಯದಲ್ಲಿ, ಭಗವಾನ್ ರಾಮನ ಜೊತೆಗೆ, ಸೀತಾ ದೇವಿ, ಲವ-ಕುಶ ಮತ್ತು ಮಹರ್ಷಿ ವಾಲ್ಮೀಕಿಯ ವಿಗ್ರಹಗಳು ಇರುತ್ತವೆ. ಇತರೆ ಹಿಂದೂ ದೇವಾಲಯಗಳಲ್ಲಿ ಇರುವಂತೆ ಇಲ್ಲಿಯೂ ವಿವಿಧ ರೀತಿಯ ದೇವರ ವಿಗ್ರಹವನ್ನು ಪ್ರತಿಷ್ಠಾಪಿಸಲಾಗುವುದು. ಇದು ವಿಶ್ವದ ಅತಿ ಎತ್ತರದ ಶಿವಲಿಂಗವನ್ನು ಮತ್ತು ರಾಮನ ದೇವಾಲಯವನ್ನು ಹೊಂದಿರುವ ದೇವಾಲಯವಾಗಿದೆ.