ಕಣ್ಣಿನ ಸುತ್ತಲಿನ ಕಪ್ಪು ಕಲೆಗಳು ಮುಖದ ಆಕರ್ಷಣೆ ಹಾಗೂ ಸೌಂದರ್ಯವನ್ನು ಕಡಿಮೆ ಮಾಡುವುದು. ಈ ಸಮಸ್ಯೆಗೆ ನಾವು ನಿತ್ಯವು ಕೆಲವು ಆರೈಕೆ ವಿಧಾನಗಳನ್ನು ಅನುಸರಿಸಿದರೆ ಉಪಶಮನ ಪಡೆಯಬಹುದು.
ಚರ್ಮದ ಆರೈಕೆಯ ವಿಷಯ ಬಂದಾಗ ಸಾಮಾನ್ಯವಾಗಿ ಮೊಡವೆ, ಕಲೆಗಳು, ಮುಖದ ಆಕರ್ಷಣೆ, ಫೇಸ್ ಮಾಸ್ಕ್ ಸೇರಿದಂತೆ ಇನ್ನಿತರ ವಿಷಯಗಳ ಬಗ್ಗೆ ಮಾತನಾಡುತ್ತೇವೆ. ಕಣ್ಣಿನ ಸುತ್ತ ಕಾಡುವ ಕಲೆಯ ಬಗ್ಗೆ ಅಷ್ಟಾಗಿ ಮಹತ್ವ ನೀಡುವುದಿಲ್ಲ. ಕಣ್ಣಿನ ಸುತ್ತಲಿನ ಚರ್ಮವು ಸೂಕ್ಷ್ಮತೆಯಿಂದ ಕೂಡಿರುತ್ತದೆ. ನಿದ್ದೆ ಇಲ್ಲದಿದ್ದರೆ, ಆಯಾಸವಾಗಿದ್ದರೆ ಅಥವಾ ಇನ್ಯಾವುದೋ ಔಷಧಗಳ ಅಡ್ಡ ಪರಿಣಾಮ ಉಂಟಾಗಿದ್ದರೆ ಕಣ್ಣುಗಳ ಸುತ್ತ ಉಬ್ಬು ಹಾಗೂ ಗಾಢವಾದ ಕಪ್ಪು ಬಣ್ಣವು ಕಾಣಿಸಿಕೊಳ್ಳುವುದು.
ಕಣ್ಣುಗಳ ಸುತ್ತಲಿನ ಚರ್ಮದ ಕಾಳಜಿ ಹೇಗೆ ಮಾಡುವುದು?
ಕಣ್ಣುಗಳ ಸುತ್ತಲಿನ ಚರ್ಮವು ಅತ್ಯಂತ ಸೂಕ್ಷ್ಮವಾದ ಭಾಗವಾಗಿರುತ್ತದೆ. ಇದಕ್ಕೆ ಸಾಮಾನ್ಯವಾದ ಆರೈಕೆ ಮಾಡಿದರೆ ಸಾಕಾಗುವುದಿಲ್ಲ. ಸಾಮಾನ್ಯವಾಗಿ ಈ ಭಾಗವು ಮುಖದ ಚರ್ಮಗಳಿಗಿಂತ ಕೊಂಚ ಮಂಕಾದ ಬಣ್ಣಗಳಿಂದಲೇ ಕೂಡಿರುತ್ತದೆ. ಆದ್ದರಿಂದ ಕೆಲವು ಬಾರಿ ಆ ಭಾಗದಲ್ಲಿ ಉಂಟಾಗಿರುವ ಗಾಢ ಬಣ್ಣವನ್ನು ನಾವು ಅಷ್ಟಾಗಿ ಪರಿಗಣಿಸುವುದಿಲ್ಲ. ಈ ಭಾಗವು ನಮ್ಮ ಆರೋಗ್ಯದ ಕೆಲವು ನ್ಯೂನತೆಯನ್ನು ತೋರುವುದು. ಹಾಗಾಗಿ ಕಣ್ಣುಗಳ ಸುತ್ತಲಿನ ಆರೋಗ್ಯವನ್ನು ಪರಿಗಣಿಸಿದರೆ ಮುಖದ ಆಕರ್ಷಣೆ ಹಾಗೂ ಆರೋಗ್ಯವು ಸುಧಾರಿಸುವುದು.
ಮುಖದ ಆರೈಕೆಗಾಗಿ ಬಳಸುವ ಕೆಲವು ಕ್ರೀಮ್ಗಳನ್ನು ಕಣ್ಣಿನ ಸುತ್ತಲಿನ ಚರ್ಮದ ಆರೈಕೆಗೆ ಬಳಸಬಹುದು. ಕಣ್ಣಿನ ಸುತ್ತಲ ಚರ್ಮ ಅಥವಾ ಕಪ್ಪಾಗಿರುವ ಭಾಗದಲ್ಲಿ ತೈಲ ಗ್ರಂಥಿಗಳು ಇರುವುದಿಲ್ಲ. ಹಾಗಾಗಿ ಮುಖಕ್ಕೆ ಹಚ್ಚುವ ಕ್ರೀಮ್ ಅನ್ನು ಕಣ್ಣಿನ ಕೆಳಗಿನ ಭಾಗಕ್ಕೆ ಅನ್ವಯಿಸುವಾಗ ಮಾಯ್ಚುರೈಸ್ ಕ್ರೀಮ್ ಅನ್ನು ಮಿಶ್ರಗೊಳಿಸಿಯೇ ಅನ್ವಯಿಸಬೇಕು. ಇಲ್ಲವೇ ಮೊದಲು ಮಾಯ್ಚುರೈಸ್ ಕ್ರೀಮ್ ಅನ್ನು ಅನ್ವಯಿಸಿ ನಂತರ ಬೇರೆ ಕ್ರೀಮ್ಗಳನ್ನು ಹಚ್ಚಬಹುದು. ಆಗ ಕಣ್ಣಿನ ಸುತ್ತಲಿನ ಚರ್ಮವು ಸಹ ಆಕರ್ಷಣೆಯಿಂದ ಹಾಗೂ ಆರೋಗ್ಯಕರವಾಗಿ ಗೋಚರಿಸುವುದು.
ಕಣ್ಣಿನ ಸುತ್ತ ಮಾಯ್ಚುರೈಸರ್ ಅಥವಾ ಕೆನೆಯನ್ನು ಅನ್ವಯಿಸ ಬಹುದು. ಇದನ್ನು ಅನ್ವಯಿಸುವಾಗ ಬೆರಳಿನ ತುದಿಯಲ್ಲಿ ಕ್ರೀಮ್ ಅನ್ನು ತೆಗೆದುಕೊಂಡು ಪ್ರದಕ್ಷಿಣಾ ಚಲನೆಯಂತೆ ಮೃದುವಾಗಿ ಬೆರಳುಗಳಿಂದ ಮಸಾಜ್ ಮಾಡಬೇಕು. ಮಲಗುವ ಮುನ್ನ 30 ನಿಮಿಷಕ್ಕಿಂತ ಮೊದಲು ಈ ಕ್ರಮವನ್ನು ಅನುಸರಿಸಿ ಮಲಗಿದರೆ ಮುಂಜಾನೆ ಹೊತ್ತಿಗೆ ಕಣ್ಣಿನ ಕೆಳ ಭಾಗವು ಉಬ್ಬುವ, ಕೆಂಪಾಗುವ ಅಥವಾ ಗಾಢವಾದ ಬಣ್ಣಗಳಿಂದ ಕೂಡಿರುವ ಸಮಸ್ಯೆಗಳಿಂದ ಮುಕ್ತವಾಗುವುದು. ಜೊತೆಗೆ ಆಕರ್ಷಕ ತ್ವಚೆಯಿಂದ ಮುಖದ ಆಕರ್ಷಣೆಯನ್ನು ಹೆಚ್ಚಿಸುವುದು.
ಮಲಗುವ ಮುನ್ನ ಏನನ್ನು ಹಚ್ಚಬೇಕು?
ರಾತ್ರಿ ಮಲಗುವ ಮುನ್ನ ಮಾಯ್ಚುರೈಸರ್, ಸನ್ ಸ್ಕ್ರೀನ್, ಮೇಕಪ್ ಮತ್ತು ಇತರ ಫೇರ್ನೆಸ್ ಕ್ರೀಮ್ಗಳನ್ನು ಹಚ್ಚುವುದನ್ನು ನಿಲ್ಲಿಸಬೇಕು. ಯಾವುದೇ ಬಗೆಯ ಕ್ರೀಮ್ ಅಥವಾ ಮೇಕಪ್ ಹೊಂದಿದ್ದರೆ ಅದನ್ನು ಮೊದಲು ಸ್ವಚ್ಛವಾದ ನೀರಿನಲ್ಲಿ ತೊಳೆಯಿರಿ. ನಂತರ ಕೆಲವು ಹನಿ ಜೇನುತುಪ್ಪ, ಹರಳೆಣ್ಣೆ, ವಿಟಮಿನ್ ಸಿ ಮತ್ತು ವಿಟಮಿನ್ ಇ ಇರುವ ಎಣ್ಣೆಯನ್ನು ಕಣ್ಣಿನ ಕೆಳ ಭಾಗದಲ್ಲಿ ಅನ್ವಯಿಸಿಕೊಂಡು ಮಲಗಬೇಕು.
ರಾತ್ರಿ ಮತ್ತು ಹಗಲಿನ ಆರೈಕೆ
ರಾತ್ರಿ ಹೊತ್ತು ಮಲಗುವ ಮುನ್ನ ಕಣ್ಣಿನ ಕೆಳಭಾಗದಲ್ಲಿ ದಪ್ಪ ಕೆನೆ, ಬಾದಾಮಿ ಎಣ್ಣೆ, ಹರಳೆಣ್ಣೆಯಂತಹ ವಟಮಿನ್ ಭರಿತ ಎಣ್ಣೆಯನ್ನು ಅನ್ವಯಿಸಬೇಕು. ಅದೇರೀತಿ ಹಗಲಿನಲ್ಲಿ ಸನ್ಸ್ಕ್ರೀನ್ ಕ್ರೀಮ್ ಅನ್ನು ಅನ್ವಯಿಸಿಕೊಳ್ಳಲು ಮರೆಯಬಾರದು. ವಿಶೇಷವಾಗಿ ಕಣ್ಣಿನ ಮೇಲಿನ ರೆಪ್ಪೆಯ ಭಾಗಗಳಿಗೂ ಅನ್ವಯಿಸಬೇಕು. ಸಾಮಾನ್ಯವಾಗಿ ಅದನ್ನು ನಾವು ನಿರ್ಲಕ್ಷಿಸಿ ಬಿಡುತ್ತೇವೆ.
ಕಣ್ಣಿಗೆ ಕೆಲವು ವ್ಯಾಯಾಮ
ಕಣ್ಣಿಗೆ ಕೊಂಚ ವ್ಯಾಯಾಮವನ್ನು ನೀಡಿದರೆ ಕಣ್ಣಿನ ಆರೋಗ್ಯ ಹಾಗೂ ಅದರ ಸುತ್ತಲಿನ ಚರ್ಮವು ಬಿಗಿತ ಹಾಗೂ ಆರೋಗ್ಯದಿಂದ ಕೂಡಿರುತ್ತದೆ. ಕಣ್ಣುಗಳನ್ನು ಬಿಗಿಯಾಗಿ ಮುಚ್ಚಿಕೊಂಡು ಎರಡು ನಿಮಿಷಗಳ ಕಾಲ ಹಿಡಿದಿಡಿ. ನಂತರ ನಿಧಾನವಾಗಿ ಕಣ್ಣು ಬಿಡಿ. ಮತ್ತೆ ಅದೇ ಕ್ರಮವನ್ನು ಅನುಸರಿಸಿ. ಹೀಗೆ ಪ್ರತಿದಿನ ಐದು ಬಾರಿ ಮಾಡುವುದರಿಂದ ಕಣ್ಣಿನ ಆರೋಗ್ಯವು ಸುಧಾರಿಸುವುದು. ಕಣ್ಣಿನ ಸುತ್ತಲಿನ ಭಾಗವು ಯೌವ್ವನದಿಂದ ಕೂಡಿರುತ್ತದೆ.
ಸೂಕ್ತ ನಿದ್ರೆ ಅತ್ಯಗತ್ಯ
ಸೂಕ್ತ ಅವಧಿಗಳ ನಿದ್ರೆ ಮಾಡುವುದರಿಂದ ಕಣ್ಣುಗಳ ಆರೋಗ್ಯ ಹಾಗೂ ಮುಖದ ಚರ್ಮವು ಆರೋಗ್ಯಕರವಾಗಿ ಹಾಗೂ ಆಕರ್ಷಕವಾಗಿ ಇರುತ್ತದೆ. ಇಲ್ಲವಾದರೆ ಆಯಾಸ ಹಾಗೂ ಮಂಕಾದ ತ್ವಚೆಯು ನಮ್ಮ ಆಕರ್ಷಣೆಯನ್ನು ಕಡಿಮೆ ಮಾಡುವುದು.