ಪ್ರಧಾನಿ ನರೇಂದ್ರ ಮೋದಿ ಮುಂದಿನ ವಾರ ಅಮೆರಿಕ ಪ್ರವಾಸ ಕೈಗೊಳ್ಳಲಿದ್ದಾರೆ. ಈ ವೇಳೆ ಅವರನ್ನು ಸ್ವಾಗತಿಸಲು ನ್ಯೂಜೆರ್ಸಿಯ ರೆಸ್ಟೊರೆಂಟ್ ಒಂದು ವಿಶೇಷ ಥಾಲಿಯನ್ನು ಸಿದ್ಧಪಡಿಸಿದ್ದು, ಅದಕ್ಕೆ “ಮೋದಿ ಜೀ ಥಾಲಿ” ಎಂದು ಹೆಸರಿಡಲಾಗಿದೆ. ಭಾರತೀಯ ಮೂಲದ ಬಾಣಸಿಗ ಶ್ರೀಪಾದ್ ಕುಲಕರ್ಣಿ ಈ ಥಾಲಿಯನ್ನು ಸಿದ್ಧಪಡಿಸಿದ್ದಾರೆ.
ಕೇವಲ ಪ್ರಧಾನಿ ನರೇಂದ್ರ ಮೋದಿ ಮಾತ್ರವಲ್ಲದೇ ವಿದೇಶಾಂಗ ವ್ಯವಹಾರಗಳ ಸಚಿವ ಎಸ್ ಜೈಶಂಕರ್ ಅವರ ಹೆಸರಲ್ಲಿಯೂ ಕೂಡ ವಿಶೇಷ ಥಾಲಿಯನ್ನು ಸಿದ್ಧಪಡಿಸುವುದಾಗಿ ರೆಸ್ಟೋರೆಂಟ್ ಮಾಲೀಕರು ತಿಳಿಸಿದ್ದಾರೆ. ಈ ಬಗ್ಗೆ ಮಾತನಾಡಿರುವ ರೆಸ್ಟೊರೆಂಟ್ ಮಾಲೀಕರು, ನಾವು ಮೋದಿ ಜೀ ಥಾಲಿಯನ್ನು ಶೀಘ್ರದಲ್ಲೇ ಪ್ರಾರಂಭಿಸಲು ಯೋಜಿಸಿದ್ದೇವೆ. ಇದು ಖಂಡಿತ ಜನಪ್ರಿಯತೆ ಗಳಿಸಲಿದೆ ಎಂಬ ನಂಬಿಕೆ ಇದೆ. ಇದು ಉತ್ತಮವಾಗಿ ಜನರನ್ನು ತಲುಪಿದರೆ ಡಾ ಜೈ ಶಂಕರ್ ಥಾಲಿಯನ್ನು ಪ್ರಾರಂಭಿಸಲು ಯೋಜನೆ ಹಾಕಿಕೊಂಡಿದ್ದೇವೆ ಎಂದರು.
ಅಲ್ಲಿ ವಾಸಿಸುವ ಅನಿವಾಸಿ ಭಾರತೀಯರ ಬೇಡಿಕೆಯಂತೆ ಈ ಥಾಲಿಯನ್ನು ಸಿದ್ಧಪಡಿಸಲಾಗಿದೆ. ಇದರ ಜೊತೆಗೆ ಇದಕ್ಕೆ ಸಿರಿಧಾನ್ಯಗಳನ್ನು ಬಳಸಿ ತಯಾರಿಸಿದ ಭಕ್ಷ್ಯಗಳನ್ನು ಸೇರಿಸುವ ಮೂಲಕ ಭಾರತ ಸರ್ಕಾರದ ಶಿಫಾರಸಿನಂತೆ ವಿಶ್ವಸಂಸ್ಥೆಯಿಂದ 2023 ರನ್ನು ಅಂತಾರಾಷ್ಟ್ರೀಯ ಸಿರಿಧಾನ್ಯದ ವರ್ಷವೆಂದು ಘೋಷಿಸಿದ್ದರ ಗೌರವಾರ್ಥವಾಗಿಯೂ ಈ ಥಾಲಿ ಸಿದ್ಧಪಡಿಸಲಾಗಿದೆ ಎಂದು ಬಾಣಸಿಗ ಕುಲಕರ್ಣಿ ಹೇಳಿದ್ದಾರೆ..
ಖಿಚಡಿ, ರಸಗುಲ್ಲಾ, ಸಾರ್ಸನ್ ಕಾ ಸಾಗ್, ಕಾಶ್ಮೀರಿ ದಮ್ ಆಲೂ, ಇಡ್ಲಿ, ಧೋಕ್ಲಾ, ಚಾಂಚ್ ಮತ್ತು ಪಾಪಡ್ನಂತಹ ಸಾಂಪ್ರದಾಯಿಕ ಭಾರತೀಯ ಖಾದ್ಯಗಳನ್ನು ಮೋದಿ ಥಾಲಿ ಒಳಗೊಂಡಿದೆ.
ಮೋದಿ ಥಾಲಿ ಇದೇ ಮೊದಲಲ್ಲ:
ಇನ್ನು, ಪ್ರಧಾನಿ ನರೇಂದ್ರ ಮೋದಿ ಅವರ ಹೆಸರಲ್ಲಿ ವಿಶೇಷ ಥಾಲಿ ಸಿದ್ಧವಾಗುತ್ತಿರುವುದು ಇದೇ ಮೊದಲಲ್ಲ. ಕಳೆದ ವರ್ಷ ಪ್ರಧಾನಿ ಅವರ ಜನ್ಮದಿನಕ್ಕೂ ಮೊದಲು ದಿಲ್ಲಿಯ ರೆಸ್ಟೋರೆಂಟ್ ಒಂದು ನರೇಂದ್ರ ಮೋದಿ ಥಾಲಿಯನ್ನು ಸಿದ್ಧಪಡಿಸಿತ್ತು. ಅದರಲ್ಲಿ ಸಸ್ಯಾಹಾರಿ ಮತ್ತು ಮಾಂಸಾಹಾರಿ ಸೇರಿ 56 ಖಾದ್ಯಗಳು ಇದ್ದವು.
ಮೋದಿಗೆ ಆಹ್ವಾನ ನೀಡಿರುವ ಜೋ ಬೈಡನ್ ದಂಪತಿ:
ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಮತ್ತು ಪ್ರಥಮ ಮಹಿಳೆ ಜಿಲ್ ಬಿಡೆನ್ ಅವರ ವಿಶೇಷ ಆಹ್ವಾನದ ಮೇರೆಗೆ ಪ್ರಧಾನಿ ನರೇಂದ್ರ ಮೋದಿ ಜೂನ್ 21 ರಿಂದ ಜೂನ್ 24 ರವರೆಗೆ ಅಮೆರಿಕಾ ಪ್ರವಾಸ ಕೈಗೊಳ್ಳಲಿದ್ದಾರೆ. ಜೂನ್ 22 ರಂದು ಅಲ್ಲಿನ ಜಂಟಿ ಸದನವನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ. ಹಾಗೆಯೇ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಹಾಗೂ ಅವರ ಪತ್ನಿ ಜಿಲ್ ಬೈಡೆನ್ ಜೊತೆ ಭೋಜನಕೂಟದಲ್ಲಿ ಭಾಗವಹಿಸಲಿದ್ದಾರೆ.
ಪ್ರಧಾನಿ ಮೋದಿ ಅವರನ್ನು ಸ್ವಾಗತಿಸಲು ಜೂನ್ 18 ರಂದು ಅಮೆರಿಕದ 20 ವಿವಿಧ ನಗರಗಳಲ್ಲಿ ‘ಭಾರತೀಯ ಏಕತಾ ಮಾರ್ಚ್’ ಆಯೋಜಿಸಲಾಗಿದೆ. ಈ ಭೇಟಿಯು ಉಭಯ ದೇಶಗಳ ಸ್ನೇಹವನ್ನು ಗಟ್ಟಿಗೊಳಿಸಲಿದ್ದು, ರಕ್ಷಣಾ ವಲಯ, ಇಂಧನ ಮತ್ತು ಬಾಹ್ಯಾಕಾಶ ಸೇರಿದಂತೆ ಹಲವು ವಿಚಾರಗಳ ಬಗ್ಗೆ ಕೇಂದ್ರೀಕರಿಸಲಿದೆ ಎಂದು ಮೂಲಗಳು ತಿಳಿಸಿವೆ.