ಕಾಂಗ್ರೆಸ್ ಚುನಾವಣೆಗೂ ಮುನ್ನ ನೀಡಿದ್ದ ಐದು ಗ್ಯಾರಂಟಿಗಳನ್ನು ಜಾರಿಗೆ ತರಲು ಸರ್ಕಾರ ಸಕಲ ಸಿದ್ದತೆಯನ್ನು ನಡೆಸುತ್ತಿದೆ. ಗ್ಯಾರಂಟಿ ಯೋಜನೆಗಳ ಕುರಿತು ಈಗಾಗಲೇ ಅಧಿಕಾರಿಗಳೊಂದಿಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಲವಾರು ಸಭೆಗಳನ್ನು ನಡೆಸಿದ್ದಾರೆ. ಹಾಗೆಯೇ ಇಂದು ಸಂಪುಟ ಸಭೆ ನಡೆಯಲಿದ್ದು, ಅದರಲ್ಲೂ ಕೂಡ ಗ್ಯಾರಂಟಿ ಕುರಿತು ಮಹತ್ವದ ತೀರ್ಮಾನವನ್ನು ಕೈಗೊಳ್ಳುವ ನೀರಿಕ್ಚೆಯಿದೆ.
ಐದು ಗ್ಯಾರಂಟಿ ಯೋಜನೆಗಳನ್ನು ಜಾರಿಗೆ ತರಲು ರಾಜ್ಯ ಸರ್ಕಾರಕ್ಕೆ ವಾರ್ಷಿಕವಾಗಿ 50000 ಕೋಟಿ ರೂ ಬೇಕಾಗುತ್ತದೆ ಎಂದು ಅಂದಾಜಿಸಲಾಗಿದೆ. ಇಷ್ಟು ದೊಡ್ಡ ಮಟ್ಟದ ಸಂಪನ್ಮೂಲ ಕ್ರೋಡಿಕರಣ ಮಾಡುವುದು ರಾಜ್ಯದ ಹಣಕಾಸು ಇಲಾಖೆಗೆ ದೊಡ್ಡ ಸವಾಲಾಗಿದೆ. ಗ್ಯಾರಂಟಿ ಯೋಜನೆಗಳನ್ನು ಜಾರಿಗೆ ತರುವಲ್ಲಿ ಸರಕಾರಕ್ಕೆ ಆಗಲಿರುವ ಆರ್ಥಿಕ ಹೊರೆಯನ್ನು ಸರಿದೂಗಿಸಲು ಸರಕಾರಕ್ಕೆ ಹೆಚ್ಚಿನ ಆದಾಯ ತರುವ ಇಲಾಖೆಗಳಾದ ಆರ್ಟಿಒ, ಅಬಕಾರಿ, ಪೊಲೀಸ್ ಸೇರಿದಂತೆ ಹಲವು ಇಲಾಖೆಗಳಿಗೆ ಹೆಚ್ಚಿನ ಟಾರ್ಗೆಟ್ ನೀಡಲಾಗಿದೆ ಎನ್ನಲಾಗುತ್ತಿದೆ.
ಪೊಲೀಸರು ಈಗಾಗಲೇ ವಾಹನ ತಪಾಸಣೆ ವಿಶೇಷ ಕಾರ್ಯಾಚರಣೆ ಮೂಲಕ ಹೆಲ್ಮೆಟ್ ಹಾಕದಿರುವುದಕ್ಕೆ ದಂಡ, ನಿಯಮ ಉಲ್ಲಂಘನೆಗೂ ದಂಡ, ಕುಡಿದು ವಾಹನ ಚಾಲನೆ ಮಾಡಿದ್ದಕ್ಕೆ ಇತ್ಯಾದಿ ಉಲ್ಲಂಘನೆಗಳಿಗೆ ದಂಡ ವಿಧಿಸುತ್ತಿದ್ದಾರೆ. ಇನ್ನು ಮುಂದೆ ಒಂದು ವಾಹನ ಹಿಡಿದು ನಿಲ್ಲಿಸಿದರೆಂದರೆ ಸಾಕು, ಎಲ್ಲಾ ದಾಖಲೆಗಳು ಇದೆ ಎಂದರೂ ಕೂಡಾ ಕಡೆಗೆ ನಂಬರ್ ಪ್ಲೇಟ್ ಸರಿಯಿಲ್ಲ ಎಂದಾದರೂ ದಂಡ ಹಾಕುವುದು ಅನಿವಾರ್ಯ ಎಂಬಂತಾಗಿದೆ. ಈ ಬಾರಿ ಹೆಚ್ಚಿನ ಗುರಿಯನ್ನು ಇಲಾಖೆಗಳಿಗೆ ನೀಡಿದ್ದು ಕಟ್ಟುನಿಟ್ಟಾಗಿ ಗುರಿ ಸಾಧಿಸಲೇಬೇಕೆಂದು ಮೇಲಧಿಕಾರಿಗಳು ಸೂಚಿಸಿದ್ದಾರೆ ಎನ್ನಲಾಗಿದೆ. ಹೀಗಾಗಿ ಪೊಲೀಸರು ನಗರದ ರಸ್ತೆಗಳಿಗೆ ಇಳಿದರೆ, ಆರ್ಟಿಒ ಅಧಿಕಾರಿಗಳು ಹೆದ್ದಾರಿಗಳಲ್ಲಿ ಇನ್ನು ತಪಾಸಣೆ ಹೆಚ್ಚಿಸಿ, ದಂಡ ಸಂಗ್ರಹಿಸುವುದು ಅನಿವಾರ್ಯವಾಗಿದೆ.
ಗ್ಯಾರಂಟಿ ಜಾರಿಗೆ ಎಷ್ಟು ಹಣ ಖರ್ಚಾಗಲಿದೆ?
*ಪ್ರತಿಕುಟುಂಬದ ಯಜಮಾನಿಗೆ ಪ್ರತಿ ತಿಂಗಳು 2000 ರೂ ನೀಡುವ ಗೃಹಲಕ್ಷ್ಮಿ ಯೋಜನೆಗೆ ವಾರ್ಷಿಕವಾಗಿ 32000 ಕೋಟಿ ರೂ ಬೇಕಾಗಬಹುದು.
*ಪ್ರತಿ ತಿಂಗಳು ಗೃಹಬಳಕೆಯ 200 ಯೂನಿಟ್ ಉಚಿತ ವಿದ್ಯುತ್ ನೀಡುವ ಗೃಹಜ್ಯೋತಿ ಯೋಜನೆಗೆ ವಾರ್ಷಿಕವಾಗಿ 12038 ಕೋಟಿ ರೂ ಖರ್ಚಾಗಬಹುದು.
*ಪದವೀಧರರಿಗೆ 3000 ರೂ ಹಾಗೂ ಡಿಪ್ಲೋಮಾ ಪದವೀಧರರಿಗೆ 1500 ರೂ ನೀಡುವ ಯುವನಿಧಿ ಯೋಜನೆಗೆ ವಾರ್ಷಿಕವಾಗಿ 890 ರಿಂದ 900 ಕೋಟಿ ಹಣ ಬೇಕಾಗಲಿದೆ.
*ರಾಜ್ಯದ ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣ ಯೋಜನೆಗೆ ರಸ್ತೆ ಸಾರಿಗೆ ನಿಗಮದ ಮೇಲೆ ವಾರ್ಷಿಕ ಒಟ್ಟು 3,600 ಕೋಟಿ ರೂ ಹೊರೆ ಬೀಳಲಿದೆ.
*ಅನ್ನಭಾಗ್ಯ ಯೋಜನೆಗೆ ವಾರ್ಷಿಕವಾಗಿ ಸುಮಾರು 5000 ಕೋಟಿ ರೂ ವೆಚ್ಚವಾಗಲಿದೆ ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ.