ಬೇಸಿಗೆಯಲ್ಲಿ ತಲೆಯ ನೆತ್ತಿಯ ಭಾಗ ಹೆಚ್ಚು ಬೆವರುತ್ತದೆ. ಹಾಗಾಗಿ ಕೆಲವರು ಬೇಸಿಗೆಯಲ್ಲಿ ಕೂದಲಿಗೆ ಎಣ್ಣೆ ಹಚ್ಚೋದನ್ನು ಇಷ್ಟಪಡುವುದಿಲ್ಲ. ಆದರೆ ಕೂದಲಿನ ಬೆಳವಣಿಗೆಗೆ, ಕೂದಲು ಉದುರುವುದನ್ನು ತಡೆಯಲು ಕೂದಲಿಗೆ ಎಣ್ಣೆ ಹಚ್ಚುವುದು ಮುಖ್ಯವಾಗಿರುತ್ತದೆ. ಆದರೆ ಬೇಸಿಗೆಯಲ್ಲಿ ಬೆವರಿನ ಜೊತೆ ಎಣ್ಣೆ ಮಿಕ್ಸ್ ಆಗುವುದರಿಂದ ನೆತ್ತಿಯಲ್ಲಿ ಜಿಡ್ಡು ಉಂಟಾಗುಬಹುದು. ಬೇಸಿಗೆಯಲ್ಲೂ ಕೂದಲಿಗೆ ಕಂಡೀಷನಿಂಗ್ ಅಗತ್ಯವಿದೆ. ಏಕೆಂದರೆ ಶಾಖದಿಂದ ನಿರ್ಜಲೀಕರಣದ ಸಮಸ್ಯೆ ಹೆಚ್ಚಾಗುತ್ತದೆ ಮತ್ತು ಕೂದಲು ಕೂಡ ಡ್ರೈ ಆಗಿರುತ್ತದೆ. ಅದಕ್ಕಾಗಿ ಆದಷ್ಟು ಎಣ್ಣೆಯ ಮಸಾಜ್ ಅನ್ನು ಮಾಡುತ್ತಿರಬೇಕು.
ಎಲ್ಲಾ ಸಮಯದಲ್ಲಿಯೂ ಕೂದಲಿನ ಕಾಳಜಿ ವಹಿಸದಿದ್ದರೆ, ಕೂದಲು ಉದುರಲು ಪ್ರಾರಂಭವಾಗುತ್ತದೆ. ಯಾವುದೇ ಹಾನಿಯಾಗದಂತೆ ಕೂದಲನ್ನು ರಕ್ಷಿಸಬೇಕಾದರೆ ನೀವು ಬೇಸಿಗೆಯಲ್ಲೂ ಎಣ್ಣೆಯಿಂದ ನೆತ್ತಿಯನ್ನು ಮಸಾಜ್ ಮಾಡುವುದು ಒಳ್ಳೆಯದು. ಬೇಸಿಗೆಯಲ್ಲಿ ಬೆವರು, ಧೂಳು ಮತ್ತು ಎಣ್ಣೆಯ ಮಿಶ್ರಣವು ನಿಮ್ಮ ಕೂದಲನ್ನು ಹಾಳುಮಾಡುತ್ತದೆ ಎಂದು ಕೆಲವರು ತಿಳಿದಿದ್ದಾರೆ. ಹಾಗೆಂದ ಮಾತ್ರಕ್ಕೆ ನೀವು ಎಣ್ಣೆಯನ್ನು ಹಚ್ಚುವುದನ್ನು ನಿಲ್ಲಿಸಬೇಡಿ. ಬೇಸಿಗೆಯಲ್ಲೂ ಕೂದಲಿಗೆ ಶುದ್ಧ ತೆಂಗಿನ ಎಣ್ಣೆ ಹಚ್ಚುವುದು ಉತ್ತಮ ಎಂದು. ತಜ್ಞರು ಹೇಳುತ್ತಾರೆ.
ಬೇಸಿಗೆಯಲ್ಲಿ ನಿಮ್ಮ ಕೂದಲು ನೇರವಾದ ಸೂರ್ಯನ ಬೆಳಕಿಗೆ ಒಡ್ಡಿಕೊಳ್ಳುವುದರಿಂದ ತುಂಬಾ ಸುಕ್ಕುಗಟ್ಟಿದ, ಶುಷ್ಕ ಮತ್ತು ನಿರ್ಜೀವವಾಗಿರುತ್ತದೆ. ಸುಡುವ ಶಾಖವು ಕೂದಲನ್ನು ಹಾನಿಗೊಳಿಸುತ್ತದೆ. ಈ ಹಾನಿಯನ್ನು ತಡೆಗಟ್ಟಲು ಕೂದಲಿಗೆ ಎಣ್ಣೆಹಚ್ಚುವುದು ಮುಖ್ಯ.
ಬೇಸಿಗೆಯಲ್ಲಿ ಕೂದಲಿಗೆ ಸಾಸಿವೆ ಎಣ್ಣೆ ಹಚ್ಚುವುದು ಉತ್ತಮವಾಗಿದೆ. ನಿಮ್ಮ ತಲೆ ತೊಳೆಯುವ ಮೊದಲು ಸಾಸಿವೆ ಎಣ್ಣೆಯನ್ನು ನಿಮ್ಮ ಕೂದಲಿಗೆ ಹಚ್ಚಿ. ಏಕೆಂದರೆ ಇದು ಒಮೆಗಾ -3, ಒಮೆಗಾ -6 ಮತ್ತು ಕೊಬ್ಬಿನಾಮ್ಲಗಳಿಂದ ಸಮೃದ್ಧವಾಗಿರುವುದರಿಂದ ತಲೆ ಕೂದಲು ಹೇರಳವಾಗಿ ಬೆಳೆಯುತ್ತದೆ.
ಸಾಸಿವೆ ಎಣ್ಣೆ ಕೂದಲಿನ ಶಕ್ತಿಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ. ವಿಟಮಿನ್ ಎ, ಡಿ, ಇ ಮತ್ತು ಕೆ ಕೂಡ ಸಾಸಿವೆ ಎಣ್ಣೆಯಲ್ಲಿ ಕಂಡುಬರುತ್ತದೆ, ಇದು ಕೂದಲಿನ ವಿವಿಧ ಸಮಸ್ಯೆಗಳನ್ನು ತೆಗೆದುಹಾಕಲು ಸಹಾಯ ಮಾಡುತ್ತದೆ. ಸಾಸಿವೆ ಎಣ್ಣೆಯಲ್ಲಿ ಆಂಟಿ ಡ್ಯಾಂಡ್ರಫ್ ಗುಣವಿದೆ. ಇದು ಕೂದಲಿನಲ್ಲಿರುವ ತಲೆಹೊಟ್ಟು ಸಮಸ್ಯೆಯನ್ನು ನಿವಾರಿಸುತ್ತದೆ. ಇದು ನೆತ್ತಿಯ ತುರಿಕೆ ಮತ್ತು ಸೋಂಕನ್ನು ತಡೆಯುತ್ತದೆ. ನಿಮ್ಮ ಕೂದಲನ್ನು ತೊಳೆಯುವ ಮೊದಲು ನಿಮ್ಮ ತಲೆಗೆ ಸಾಸಿವೆ ಎಣ್ಣೆಯನ್ನು ಹಚ್ಚಬೇಕು. ನಂತರ ಸ್ವಲ್ಪ ಸಮಯ ಬಿಟ್ಟು ತಲೆ ತೊಳೆಯಿರಿ.
ನೀವು ಕೂದಲು ಉದುರುವಿಕೆಯಿಂದ ಬಳಲುತ್ತಿದ್ದರೆ, ಬಾದಾಮಿ ಎಣ್ಣೆಯು ನಿಮಗೆ ಉತ್ತಮವಾದದ್ದು. ಬಾದಾಮಿ ಎಣ್ಣೆಯ ನಿಯಮಿತ ಬಳಕೆಯು ಕೂದಲಿನ ಬೆಳವಣಿಗೆಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ. ಇದರಲ್ಲಿ ವಿಟಮಿನ್ ಇ ಯು ಹೇರಳ ವಾಗಿದೆ, ಇದು ಪೋಷಣೆಗೆ ಮುಖ್ಯವಾಗಿದೆ. ಈ ಎಣ್ಣೆ ಕೂದಲಿಗೆ ಕ್ಲೆನ್ಸಿಂಗ್ ಏಜೆಂಟ್ ಆಗಿ ಕಾರ್ಯನಿರ್ವಹಿಸುತ್ತದೆ ಎಂದು ಹೇಳಲಾಗುತ್ತದೆ.
ತೆಂಗಿನ ಎಣ್ಣೆಯು ಕೂದಲಿಗೆ ತುಂಬಾ ಉತ್ತಮವಾಗಿದೆ. ಇದು ಬಹುಪಯೋಗಿ ಎಣ್ಣೆಯಾಗಿದ್ದು, ಕೂದಲಿನ ಬೆಳವಣಿಗೆಯನ್ನು ಹೆಚ್ಚಿಸುತ್ತದೆ, ತಲೆಹೊಟ್ಟು ತೊಡೆದುಹಾಕಲು ಸಹಾಯ ಮಾಡುತ್ತದೆ, ಒಣ ನೆತ್ತಿಯ ವಿರುದ್ಧ ಹೋರಾಡುತ್ತದೆ, ಕೂದಲಿಗೆ ಪೋಷಣೆಯನ್ನು ನೀಡುತ್ತದೆ ಮತ್ತು ಕೂದಲಿಗೆ ಹೊಳಪು ನೀಡುತ್ತದೆ. ಆದ್ದರಿಂದ ಸದಾಕಾಲ ಬೇಸಿಗೆಕಾಲ ಮಳೆಗಾಲ ಚಳಿಗಾಲ ಎನ್ನದೆ ಎಲ್ಲಾ ಕಾಲದಲ್ಲಿಯೂ ತೆಂಗಿನ ಎಣ್ಣೆಯನ್ನು ತಲೆಗೆ ಹಾಕಿ ಚೆನ್ನಾಗಿ ಮಸಾಜ್ ಮಾಡಿಕೊಳ್ಳುವುದರಿಂದ ಕೂದಲಿನ ಮತ್ತು ದೇಹದ ಸಂರಕ್ಷತೆಯನ್ನು ಕಾಪಾಡಿಕೊಳ್ಳಬಹುದು.