ಪ್ರತ್ಯೇಕ ಧರ್ಮ ನೀಡಬೇಕೆಂದು ಹಲವಾರು ಧರ್ಮಗಳ ಬೇಡಿಕೆಯ ನಡುವೆಯೇ ಮುಂದಿನ ಜನಗಣತಿಯಲ್ಲಿ ಕೇವಲ ಆರು ಧರ್ಮಗಳನ್ನು ಮಾತ್ರ ಪರಿಗಣಿಸಲು ತೀರ್ಮಾನಿಸಲಾಗಿದೆ.
ಕರ್ನಾಟಕದಲ್ಲಿ ಲಿಂಗಾಯತರು, ಜಾರ್ಖಂಡ್, ಛತ್ತೀಸ್ಗಢ ಮತ್ತು ಒಡಿಶಾದಲ್ಲಿ ಪ್ರಕೃತಿಯನ್ನು ಆರಾಧಿಸುವ ಆದಿವಾಸಿಗಳು ತಮ್ಮ ಸರ್ನಾ ಧರ್ಮವನ್ನು ಪ್ರತ್ಯೇಕ ಧರ್ಮವಾಗಿ ಸೇರಿಸಲು ಕೆಲ ವರ್ಷಗಳಿಂದ ಬೇಡಿಕೆಯನ್ನು ಇಡುತ್ತಿದ್ದಾರೆ. ಆದರೆ, ಈ ಬೇಡಿಕೆಗೆ ಜನಗಣತಿಯಲ್ಲಿ ಯಾವುದೇ ಮನ್ನಣೆ ದೊರೆತಿಲ್ಲ.
ಮುಂದಿನ ಜನಗಣತಿಯು ಹಿಂದೂ, ಮುಸ್ಲಿಂ, ಕ್ರೈಸ್ತ, ಬೌದ್ಧ, ಸಿಖ್ ಹಾಗೂ ಜೈನ ಧರ್ಮಗಳನ್ನು ಆಧರಿಸಿ ನಡೆಯಲಿದೆ. ಹಾಗೆಯೇ ಇತರ ಧರ್ಮದ ಹೆಸರನ್ನು ಜನಗಣತಿ ರೂಪದಲ್ಲಿ ಬರೆಯಬಹುದೇ ಹೊರತು ಅದಕ್ಕೆ ಯಾವುದೇ ಪ್ರತ್ಯೇಕ ಕೋಡ್ ಅನ್ನು ನಿಗಧಿಪಡಿಸಿರುವುದಿಲ್ಲ.
ದೆಹಲಿಯಲ್ಲಿ ಮೇ 22 ರಂದು ಹೊಸ ಜನಗಣತಿ ಕಟ್ಟಡದ ಉದ್ಘಾಟನಾ ಸಮಾರಂಭದಲ್ಲಿ ಗೃಹ ಸಚಿವ ಅಮಿತ್ ಶಾ ಅವರು ಬಿಡುಗಡೆ ಮಾಡಿದ ‘ದಿ ಟ್ರೀಟೈಸ್ ಆನ್ ಇಂಡಿಯನ್ ಸೆನ್ಸಸ್ ಸಿನ್ಸ್ 1981’ ಎಂಬ ಶೀರ್ಷಿಕೆಯ ವರದಿಯಲ್ಲಿ ಇದನ್ನು ತಿಳಿಸಲಾಗಿದೆ.
2011 ರ ಜನಗಣತಿಯ ಸಮಯದಲ್ಲಿ ಸಂಗ್ರಹಿಸಿದ ಮಾಹಿತಿಯ ಆಧಾರದ ಮೇಲೆ ಧರ್ಮಕ್ಕಾಗಿ ವಿವರವಾದ ಕೋಡ್ಗಳನ್ನು ಅಧಿಕಾರಿಗಳು ವಿನ್ಯಾಸಗೊಳಿಸಿದ್ದಾರೆ. ಆದರೂ, ಅವುಗಳನ್ನು ಸರ್ಕಾರ ಕೈಬಿಟ್ಟಿದೆ. ಡೇಟಾ ಬಳಕೆದಾರರ ಸಭೆಯಲ್ಲಿ ನಡೆದ ಚರ್ಚೆಯ ನಂತರ ಅಂತಿಮ ಪಟ್ಟಿಯಲ್ಲಿ ಆರು ಧರ್ಮದ ಆಯ್ಕೆಗಳನ್ನು ಮಾತ್ರ ಉಳಿಸಿಕೊಳ್ಳಲಾಗಿದೆ.
ಎರಡುಹಂತಗಳಲ್ಲಿ ಜನಗಣತಿ-2021ನ್ನು ನಡೆಸಲು ಯೋಜನೆ ರೂಪಿಸಲಾಗಿತ್ತು ಆದರೆ ಕೋವಿಡ್ನಿಂದಾಗಿ ಅನಿರ್ದಿಷ್ಟಾವಧಿಯವರೆಗೆ ಕೇಂದ್ರ ಸರ್ಕಾರ ಜನಗಣತಿಯನ್ನು ಮುಂದೂಡಿತ್ತು. ಎರಡುಹಂತದಲ್ಲಿ ಮನೆ ಮನೆ ಗಣತಿ ಕುಟುಂಬಗಳ ಮಾಹಿತಿಯನ್ನು ಪಡೆಯಲಿದ್ದು,31 ಪ್ರಶ್ನೆಗಳಿಗೆ ಸಂಬಂಧಿಸಿದಂತೆ 2020ರಲ್ಲಿಯೇ ಅಧಿಸೂಚನೆ ಹೊರಬಿದ್ದಿದೆ. 2ನೇ ಹಂತದ ಜನಗಣತಿಯಲ್ಲಿ 28 ಪ್ರಶ್ನೆಗಳಿರಲಿದ್ದು, ಈ ಕುರಿತು ಇನ್ನು ಅಧಿಸೂಚನೆ ಪ್ರಕಟಿಸಬೇಕಾಗಿದೆ.
ಮುಂದಿನ ಜನಗಣತಿಗೆ ಡಿಜಿಟಲ್ ಸ್ವರ್ಶವಿರಲಿದೆ. ಜನರು ಮನೆಯಲ್ಲಿ ಕುಳಿತೇ ಪ್ರಶ್ನೋತ್ತರ ಭರ್ತಿಮಾಡಬಹುದಾಗಿದೆ. ಇನ್ನು ಈ ಬಾರಿಯ ಜನಗಣತಿಯಲ್ಲಿ ಮೊದಲ ಹಂತದ 31 ಪ್ರಶ್ನೆಗಳನ್ನು ಹೌಸ್ಲಿಸ್ಟಿಂಗ್ ಮತ್ತು ವಸತಿ ಪಟ್ಟಿಯಲ್ಲಿ ಕೇಳಲಾಗುತ್ತದೆ. ಎರಡನೇ ಹಂತದಲ್ಲಿ ಜನಸಂಖ್ಯೆ ಎಣಿಕೆಗೆ 28 ಪ್ರಶ್ನೆಗಳನ್ನು ಅಂತಿಮಗೊಳಿಸಲಾಗಿದೆ.
ಹೊಸಪ್ರಶ್ನೆ ಸೇರ್ಪಡೆ:
ಆಸಿಡ್ ದಾಳಿ, ಬೌದ್ಧಿಕ ಅಸಾಮರ್ಥ್ಯ, ದೀರ್ಘಕಾಲದ ನರ ಕಾಯಿಲೆ ಮತ್ತು ರಕ್ತ ಅಸ್ವಸ್ಥತೆ ಸೇರಿದಂತೆ ವಿಕಲಾಂಗತೆಗಳ ವಿಧಗಳು ಮತ್ತು ಕಾರಣಗಳ ಕುರಿತಾದ ಪ್ರಶ್ನೆಗಳನ್ನು ಹೊಸದಾಗಿ ಕೇಳಲಾಗುತ್ತದೆ. ಮುಂದಿನ ಜನಗಣತಿಯು ಬಾಡಿಗೆ ಮನೆಯಲ್ಲಿ ವಾಸಿಸುವ ವ್ಯಕ್ತಿಯು ಬೇರೆಡೆಯಲ್ಲಿ ಮನೆ ಹೊಂದಿದ್ದಾನೆಯೇ ಅಥವಾ ಯಾವುದೇ ವಸತಿ ಆಸ್ತಿಯನ್ನು ಹೊಂದಿಲ್ಲವೇ ಎಂಬ ವಿವರಗಳನ್ನು ಸಹ ದಾಖಲಿಸುತ್ತದೆ.
ಜನರ ವಲಸೆಗೆ ಕಾರಣವಾಗಬಹುದಾದ ಪರಿಣಾಮಗಳ ಪಟ್ಟಿಗೆ ಪ್ರಾಕೃತಿಕ ವಿಕೋಪವನ್ನು ಸೇರಿಸಲಾಗಿದೆ. ಶಿಕ್ಷಣ,ಮದುವೆ, ಕೆಲಸ ಹೊರತುಪಡಿಸಿ ಕುಟುಂಬ ಅಥವಾ ಒಬ್ಬರೆ ವಲಸೆ ಹೋಗಲು ಪ್ರಕೃತಿ ವಿಕೋಪ ಕಾರಣವೇ ಎಂದು ತಿಳಿಯುವುದು ಇದರ ಮುಖ್ಯ ಉದ್ದೇಶವಾಗಿದೆ.
ಎರಡನೇ ಹಂತದ ಜನಗಣತಿಯಲ್ಲಿ ಇದೇ ಮೊದಲ ಬಾರಿಗೆ ಹೆಚ್ಚುವರಿ ಮಾಹಿತಿ ದಾಖಲಿಸಲು ಕೋಡ್ ಮಾದರಿಯನ್ನು ಅನುಸರಿಸಲಾಗುತ್ತಿದ್ದು, ಕುಟುಂಬದ ಮುಖ್ಯಸ್ಥ ಜೊತೆಗಿನ ಸಂಬಂಧ, ಮಾತೃಭಾಷೆ, ತಿಳಿದಿರುವ ಇತರೆ ಭಾಷೆಗಳು ವೃತ್ತಿ, ಕೆಲಸ, ಜನ್ಮಸ್ಥಳ, ಪರಿಶಿಷ್ಟ, ಜಾತಿ, ಪಂಗಡ ಮುಂತಾದ ವಿವರಗಳ ದಾಖಲಾತಿಗಾಗಿ ನಿರ್ದಿಷ್ಟ ಕೋಡ್ ಬಳಸಲಾಗುತ್ತಿದೆ.