ಐಸ್ ಸೇಬು (ತಾಳೆ ಹಣ್ಣು) ಸಕ್ಕರೆ ತಾಳೆ ಮರದ ಸಿಸನಲ್ ಹಣ್ಣಾಗಿದೆ. ರಸ್ತೆಗಳಲ್ಲಿ ಎಳೆ ನೀರಿನಂತೆ ಗಾಡಿಗಳಲ್ಲಿ ಮಾರುತ್ತಿರುವ ದೃಶ್ಯ ಸರ್ವೇ ಸಾಮಾನ್ಯವಾಗಿದೆ. ಬೇಸಿಗೆಯಲ್ಲಿ ವ್ಯಾಪಕವಾಗಿ ಲಭ್ಯವಿರುವ ಹಣ್ಣು. ಅರೆಪಾರದರ್ಶಕ, ರಸಭರಿತ ದ್ರವದಿಂದ ತುಂಬಿರುವ ಜೆಲ್ತರ ಇರುವ ಹಣ್ಣು, ಅತ್ಯುತ್ತಮವಾಗಿ ತಂಪಾಗಿಸುವ ಗುಣಗಳನ್ನು ಹೊಂದಿದೆ. ಐಸ್ ಸೇಬು ವಿನ್ಯಾಸದಲ್ಲಿ ಲಿಚಿ ಹಣ್ಣಿಗೆ ತುಂಬಾ ಹೋಲುತ್ತದೆ.ತಿನ್ನುವಾಗ ಅದರ ಒಳಗಿಂದ ಸ್ವಲ್ಪ ಸಿಹಿಯಾದ ಎಳನೀರಿನಂತ ರಸವು ಬಾಯಿಯಲ್ಲಿ ಸೇರುತ್ತದೆ.
ಹೆಚ್ಚಾಗಿ ಹಳ್ಳಿಗಾಡಿನ ಪ್ರದೇಶದಲ್ಲಿ ತಾಳೆ ಮರವನ್ನು ನಾವು ಕಾಣಬಹದು. ಪಟ್ಟಣ ಮಂದಿಗೆ ಬೀದಿಯಲ್ಲಿ ಎಳೆನೀರಿನಂತೆ ಕೈಗಾಡಿಗಳಲ್ಲಿ ಖರೀದಿಸಿ ತಿನ್ನುವಂತಹ ಭಾಗ್ಯ. ಅಂದಹಾಗೆ ತಾಳೆ ಮರದ ಕೊಂಬುಗಳನ್ನು ಕೊಯ್ದು ಅದಕ್ಕೆ ಮಡಕೆ ಕಟ್ಟಿ, ಕೊಂಬುಗಳಿಂದ ಬರುವ ರಸವನ್ನು ಸಂಗ್ರಹಿಸುವುದನ್ನು ಕಂಡಿರಬೇಕು. ಇದು ಅಪ್ಪಟ್ಟ ದೇಸಿ ಸುರ(ಶೇಂದಿ).
ತಾಳೆ ಹಣ್ಣುಬೇಸಿಗೆಯಲ್ಲಿ ದೇಹಕ್ಕೆ ಖನಿಜಗಳು ಮತ್ತು ಸಕ್ಕರೆಗಳ ಪರಿಪೂರ್ಣ ಮಿಶ್ರಣವನ್ನು ಒದಗಿಸುತ್ತದೆ. ಹಣ್ಣನ್ನು ಹಿಂದಿಯಲ್ಲಿ ತಡ್ಗೋಲಾ, ತಮಿಳಿನಲ್ಲಿ ನುಂಗು, ತೆಲುಗಿನಲ್ಲಿ ತಾತಿ ಮುಂಜಾಲು, ತುಳುವಿನಲ್ಲಿ ಇರೊಳು ಎಂದು ಕರೆಯಲಾಗುತ್ತದೆ.
ತಾಳೆ ಹಣ್ಣಿನಲ್ಲಿ ಅಡಕವಾಗಿರುವ ಪೋಷಾಕಾಂಶಗಳು:
ತಾಳೆ ಹಣ್ಣು ಕಡಿಮೆ ಕ್ಯಾಲೋರಿ ಹೊಂದಿರುವ ಹಣ್ಣಾಗಿದ್ದು, ಕ್ಯಾಲೊರಿಗಳು, ಕಾರ್ಬೋಹೈಡ್ರೇಟ್ಗಳು ಮತ್ತು ಕ್ಯಾಲ್ಸಿಯಂ ಮತ್ತು ಫೈಟೊನ್ಯೂಟ್ರಿಯೆಂಟ್ಗಳಿಂದ ಸಮೃದ್ಧವಾಗಿದೆ. ಇದು ಕನಿಷ್ಠ ಪ್ರಮಾಣದ ಫೈಬರ್, ಪ್ರೋಟೀನ್, ವಿಟಮಿನ್ ಸಿ, ಎ, ಇ, ಕೆ, ಬಿ ೭ ಮತ್ತು ಕಬ್ಬಿಣಾಂಶವನ್ನು ಸಹ ಹೊಂದಿರುತ್ತದೆ.
ಈ ತಾಳೆ ಹಣ್ಣುನ್ನು ಸಿಪ್ಪೆ ಸುಳಿದು ನೇರವಾಗಿ ತಿನ್ನಬಹುದು ಇಲ್ಲ ಬೇರೆ ಖಾದ್ಯಗಳಲ್ಲಿ ಬಳಸಬಹದು.
ತಾಳೆ ಹಣ್ಣು ಖೀರ್ ಮಾಡಲು ಬೇಕಾಗುವ ಸಾಮಾಗ್ರಿಗಳು
೪ – ತಾಳೆ ಹಣ್ಣುಗಳು, ೨ ಕಪ್ ಹಾಲು,೧/೨ ಕಪ್ ಸಕ್ಕರೆ, ೧೦ ಬಾದಾಮಿ,೧/೪ ಟೀಸ್ಪೂನ್ ಏಲಕ್ಕಿ ಪುಡಿ,ಕೇಸರಿಯ ಕೆಲವು ಎಳೆಗಳು.
ತಾಳೆ ಹಣ್ಣುಗಳ ಸಿಪ್ಪೆಯನ್ನು ತೆಗೆದು ತುಂಡುಗಳಾಗಿ ಕತ್ತರಿಸಿ, ಮಿಕ್ಸರ್ನಲ್ಲಿ ಹಾಕಿ ಬಾದಾಮಿ, ಏಲಕ್ಕಿ ಪುಡಿ ಮತ್ತು ಸ್ವಲ್ಪ ಹಾಲು ಸೇರಿಸಿ ನಯವಾದ ಪೇಸ್ಟ್ ಮಾಡಿಕೊಳ್ಳಬೇಕು.
ಪಾನ್ಗೆ ಹಾಲು ಹಾಕಿ, ಮೊದಲೇ ರೆಡಿ ಮಾಡಿದ್ದ ಪೇಸ್ಟ್ನ್ನು ಮತ್ತು ಡ್ರೈ ಪ್ರೂಟ್ಗಳನ್ನು ಸೇರಿಸಬೇಕು.ಮಿಶ್ರಣವು ದಪ್ಪವಾಗುವವರೆಗೆ ಹದ ಉರಿಯಲ್ಲಿ ಬೇಯಿಸಬೇಕು. ನಂತರ ಸಕ್ಕರೆಯನ್ನು ಸೇರಿಸಿ, ಚೆನ್ನಾಗಿ ಬೆರೆಸಿ ಮತ್ತು ೩-೪ ನಿಮಿಷಗಳ ಕಾಲ ಬೇಯಿಸಿ, ಪಾತ್ರೆಯನ್ನು ತೆಗೆದು ತಣ್ಣಗಾಗಲು ಬಿಡಬೇಕು.
ಕತ್ತರಿಸಿದ ತಾಳೆ ಹಣ್ಣುಗಳನ್ನು ಮಿಶ್ರಣಕ್ಕೆ ಸೇರಿಸಿ ಮತ್ತು ಚೆನ್ನಾಗಿ ಮಿಶ್ರಣ ಮಾಡಿ, ಒಂದು ಗಂಟೆಗಳ ಕಾಲ ರೆಫ್ರಿಜರೇಟರ್ನಲ್ಲಿ ಸೆಟ್ ಆಗಲು ಬಿಡಬೇಕು. ತಣ್ಣಾಗಾದ ಮೇಲೆ ಮೇಲೆ ಖೀರ್ಗೆ ಕೇಸರಿ ಎಳೆಗಳು ಮತ್ತು ಬಾದಾಮಿಯನ್ನು ಬೆರೆಸಿ ಸರ್ವ್ ಮಾಡಹುದು.