ಕರ್ನಾಟಕದಲ್ಲಿ ಇಂದು ಮತದಾನದ ಹಬ್ಬ ನಡೆಯುತ್ತಿದ್ದು, ಮೊದಲ ವಿಧಾನ ಸಭೆ ಚುನಾವಣೆ ನಡೆದು ಈ ಬಾರಿಯ ಚುನಾವಣೆಗೆ 71ವರ್ಷಗಳು ಸಂದಿವೆ. ಕರ್ನಾಟಕ ರಚನೆಯಾಗುವ ಮೊದಲು ಮೈಸೂರು ಪ್ರಾಂತ್ಯವಿದ್ದಾಗ ಮೊದಲ ಬಾರಿಗೆ ವಿಧಾನಸಭಾ ಚುನಾವಣೆ ನಡೆಯಿತು.ಇಲ್ಲಿಯವರೆಗೂ 15 ಸಾರ್ವತ್ರಿಕ ಚುನಾವಣೆಗಳು ನಡೆದಿದ್ದು, ಇದು 16ನೇ ಸಾರ್ವತ್ರಿಕ ಚುನಾವಣೆಯಾಗಿದೆ.
ವಿಧಾನಸಭಾ ಚುನಾವಣೆ ನಡೆದು ಬಂದ ಹಾದಿ:
1952 ಮಾರ್ಚ್ 26 ರಂದು ಮೈಸೂರು ಪ್ರಾಂತ್ಯದ ಮೊದಲ ವಿಧಾನಸಭಾ ಚುನಾವಣೆಯು ನಡೆಯಿತು. ಇದು ಕರ್ನಾಟಕದ ಮೊದಲ ವಿಧಾನಸಭಾ ಚುನಾವಣೆ. ಈ ಚುನಾವಣೆ 80 ಕ್ಷೇತ್ರಗಳಲ್ಲಿ 99 ಸ್ಥಾನಗಳಿಗೆ ನಡೆದಿತ್ತು ಹಾಗೂ 394 ಅಭ್ಯರ್ಥಿಗಳು ಸ್ಪರ್ಧಿಸಿದ್ದರು.
ಎರಡನೇ ಚುನಾವಣೆ ಬರುವ ಹೊತ್ತಿಗೆ ಭಾಷಾವಾರು ರಾಜ್ಯಗಳ ರಚನೆಯಾಗಿ ಮೈಸೂರು ರಾಜ್ಯ ಉದಯವಾಗಿತ್ತು. 1957ರಲ್ಲಿ ವಿಧಾನಸಭೆಗೆ ಎರಡನೇ ಚುನಾವಣೆ ನಡೆಯಿತು.ಭಾಷಾವಾರು ರಾಜ್ಯ ರಚನೆಯಾದ ಬಳಿಕ ಕ್ಷೇತ್ರಗಳ ಸಂಖ್ಯೆಯೂ ಹೆಚ್ಚಿತು. 179 ಕ್ಷೇತ್ರಗಳಲ್ಲಿ 208 ಸ್ಥಾನಗಳಿಗೆ ಈ ವೇಳೆ ಚುನಾವಣೆ ನಡೆದಿತ್ತು.
ನಾಲ್ಕನೇ ವಿಧಾನಸಭೆ ಚುನಾವಣೆ 1967ರಲ್ಲಿ ನಡೆಯಿತು. ಈ ವೇಳೆ ವಿಧಾನಸಭಾ ಸ್ಥಾನಗಳ ಸಂಖ್ಯೆ 208ರಿಂದ 216ಕ್ಕೆ ಏರಿಕೆಯಾಗಿತು.1978ರಲ್ಲಿ ನಡೆದ ಆರನೇ ವಿಧಾನಸಭಾ ಚುನಾವಣೆ ಕ್ಷೇತ್ರಗಳ ಸಂಖ್ಯೆ 216 ರಿಂದ 224ಕ್ಕೆ ಏರಿಸಲಾಯಿತು. ನಂತರ 2008ರಲ್ಲಿ 224 ಕ್ಷೇತ್ರಗಳನ್ನು ಪುನರ್ವಿಂಗಡನೆ ಮಾಡಿ, ಭೌಗೋಳಿಕವಾಗಿ ಬದಲಾಯಿಸಲಾಯಿತು. ಕ್ಷೇತ್ರಗಳಿಗೆ ಮರುನಾಮಕರಣ ಮಾಡಲಾಯಿತು.
ಮೊದಲ ಆರು ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್ಪಕ್ಷ ಗೆದ್ದು, 1972 ರಿಂದ 1978ರವರೆಗೂ ಕಾಂಗ್ರೆಸ್ನವರೇ ಮುಖ್ಯಮಂತ್ರಿಯಾಗಿದ್ದರು. ಅದಾದ ಬಳಿಕ 7 ಮತ್ತು 8ನೇ ವಿಧಾನಸಭೆಯಲ್ಲಿ ಜನತಾ ಪಕ್ಷ ಅಧಿಕಾರಕ್ಕೆ ಬಂದಿತ್ತು. ಮತ್ತೆ 9ನೇ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್ ಕೈಗೆ ಅಧಿಕಾರ ಸಿಕ್ಕಿತ್ತು. 1994ರಲ್ಲಿ ಜೆಡಿಎಸ್ಗೆ ಅಧಿಕಾರ ಪಡೆದುಕೊಂಡಿತು, 1999ರಲ್ಲಿ ಕಾಂಗ್ರೆಸ್ ಮತ್ತೆ ಅಧಿಕಾರಕ್ಕೆ ಬಂತು.
2004ರಲ್ಲಿ ಯಾವ ಪಕ್ಷವು ಬಹುಮತ ಪಡೆಯದೇ ಮೊದಲ ಬಾರಿಗೆ ಅತಂತ್ರ ಸನ್ನಿವೇಶ ಸೃಷ್ಟಿಯಾಯಿತು ಆಗ ಮೊದಲು ಕಾಂಗ್ರೆಸ್-ಜೆಡಿಎಸ್, ಬಳಿಕ ಜೆಡಿಎಸ್ – ಬಿಜೆಪಿ ಮೈತ್ರಿ ಸರ್ಕಾರ ರಚನೆಯಾಗಿತ್ತು. 2008ರಲ್ಲಿ ಬಿಜೆಪಿ ಸರ್ಕಾರ ಅಸ್ತಿತ್ವಕ್ಕೆ ಬಂದರೆ, 2013ರಲ್ಲಿ ಕಾಂಗ್ರೆಸ್ ಮತ್ತೆ ಅಧಿಕಾರದ ಪಡೆದುಕೊಂಡಿತು.
2018ರಲ್ಲಿ ಮತ್ತೆ ಯಾವುದೇ ಪಕ್ಷಕ್ಕೂ ಬಹುಮತ ಸಿಗಲಿಲ್ಲ. ಆಗ ಬಿಜೆಪಿಯ ಬಿಎಸ್ ಯಡಿಯೂರಪ್ಪ ಸಿಎಂ ಆಗಿ ಪ್ರಮಾಣ ವಚನ ಸ್ವೀಕರಿಸಿದರು. ಆದರೆ, ಬಹುಮತ ಸಾಬೀತುಪಡಿಸಲು ಸಾಧ್ಯವಾಗದೇ ರಾಜೀನಾಮೆ ನೀಡಿದರು. ಬಳಿಕ ಕಾಂಗ್ರೆಸ್ ಜೆಡಿಎಸ್ ಸರ್ಕಾರ ರಚನೆಯಾಯಿತು. ಅದು ಕೂಡ ಪತನವಾಗಿ ಮತ್ತೆ ಬಿಜೆಪಿ ಅಧಿಕಾರಕ್ಕೆ ಬಂತು.