ಜಗತ್ತಿನಲ್ಲೇ ಸಂಚಲವನ್ನು ಸೃಷ್ಟಿಸಿದ್ದ ಕೃತಕ ಬುದ್ಧಿಮತ್ತೆಯ (ಎಐ) ಗಾಡ್ಫಾದರ್ ಡಾ ಜೆಫ್ರಿ ಹಿಂಟನ್ ಗೂಗಲ್ ಕಂಪನಿಯಿಂದ ಹೊರನಡೆಯುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ.
ಒಂದು ದಶಕಕ್ಕೂ ಹೆಚ್ಚು ಕಾಲ ಗೂಗಲ್ನಲ್ಲಿ ಉದ್ಯೋಗಿಯಾಗಿದ್ದ ಜೆಫ್ರಿ ಹಿಂಟನ್, ಇತ್ತೀಚೆಗೆ ಗೂಗಲ್ನಲ್ಲಿ ತನ್ನ ಕೆಲಸವನ್ನು ತೊರೆದಿದ್ದಾರೆ.
ಭವಿಷ್ಯದ ದಿನಗಳಲ್ಲಿ ಕೃತಕ ಬುದ್ಧಿಮತ್ತೆ ಮಾಡಲಿರುವ ಅಪಾಯಗಳ ಬಗ್ಗೆ ಮುಕ್ತವಾಗಿ ಮಾತನಾಡಲೆಂದೇ ಗೂಗಲ್ನಿಂದ ಹೊರಬರುತ್ತಿದ್ದೇನೆ ಎಂದು ಜೆಫ್ರಿ ಹೇಳಿದ್ದಾರೆ.
ಎಐ ಕ್ಷೇತ್ರದಲ್ಲಿ ನಾನು ಮಾಡಿದ ಕೆಲಸದ ಬಗ್ಗೆ ವಿಷಾದವಿದೆ. ಸದ್ಯಕ್ಕೆ ಕೃತಕ ಬುದ್ಧಿ ಮತ್ತೆಯು ಮನುಷ್ಯನನ್ನು ಮೀರಿಸಿಲ್ಲ. ಮುಂದೆ ಅಂಥ ದಿನಗಳು ಬರಬಹುದು. ಆಗ ಅಪಾಯ ತಪ್ಪಿದ್ದಲ್ಲ. ಈ ಬಗ್ಗೆ ಮಾತನಾಡುವ ಸಲುವಾಗಿಯೇ ಗೂಗಲ್ ಅನ್ನು ತೊರೆದೆ ಎಂದು ಹಿಂಟರ್ ಹೇಳಿಕೊಂಡಿದ್ದಾರೆ.
ಎಐ ಹೆಚ್ಚಿನ ಸಂಖ್ಯೆಯಲ್ಲಿ ಜನರಿಂದ ಉದ್ಯೋಗಗಳನ್ನು ಕಸಿದುಕೊಳ್ಳಲಿದೆ. ಸಮಾಜದಲ್ಲಿ ತಪ್ಪು ಮಾಹಿತಿ ವೇಗವಾಗಿ ಹರಡಲು ಕಾರಣವಾಗುತ್ತದೆ. ಇದನ್ನು ಯಾರು ಯಾವ ಉದ್ದೇಶಕ್ಕೆ ಬಳಸುತ್ತಾರೆ ಎನ್ನುವುದನ್ನು ಹೇಳಲಿಕ್ಕಾಗದು. ದುರ್ಬಳಕೆಯನ್ನು ತಡೆಯಲೂ ಸಾಧ್ಯವಿಲ್ಲ ಎಂದು ಅವರು ಹೇಳಿದ್ದಾರೆ.
ಗೂಗಲ್ ಪ್ರತಿಕ್ರಿಯೆ:
ಜೆಫ್ರಿ ಹಿಂಟನ್ ಗೂಗಲ್ ಸಂಸ್ಥೆ ತೊರೆದಿರುವುದಕ್ಕೆ ಗೂಗಲ್ ಪ್ರತಿಕ್ರಿಯೆ ನೀಡಿದೆ. ನಾವು ಎಐಯ ಜವಾಬ್ದಾರಿಯುತ ವಿಧಾನಕ್ಕೆ ಬದ್ಧರಾಗಿದ್ದೇವೆ. ಮುಂಬರಲಿರುವ ಅಪಾಯಗಳನ್ನು ಅರ್ಥಮಾಡಿಕೊಳ್ಳಲು ನಾವು ನಿರಂತರವಾಗಿ ಕಲಿಯುತ್ತಿದ್ದೇವೆ ಮತ್ತು ಧೈರ್ಯದಿಂದ ಆವಿಷ್ಕಾರಗಳನ್ನು ಮಾಡುತ್ತಿದ್ದೇವೆ ಎಂದು ಗೂಗಲ್ನ ಮುಖ್ಯ ವಿಜ್ಞಾನಿ ಜೆಫ್ ಡೀನ್ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಎಐ ಯಾವ ವಲಯದಲ್ಲಿ ಪರಿಣಾಮ ಬೀರಲಿದೆ:
ಇನ್ನು ಎರಡು ವರ್ಷಗಳಲ್ಲಿಯೇ 8.50 ಕೋಟಿ ಉದ್ಯೋಗಿಗಳ ಜಾಗವನ್ನು ಎಐ ಆಕ್ರಮಿಸಿಕೊಳ್ಳಬಹುದು ಎಂದು ದಿ ವರ್ಲ್ಡ್ ಎಕನಾಮಿಕ್ ಫೋರಂನ ವರದಿಯಲ್ಲಿ ಅಂದಾಜು ಮಾಡಲಾಗಿದೆ. ಭವಿಷ್ಯದ ಉದ್ಯೋಗಗಳ ಕುರಿತ ಇದೇ ವರದಿಯಲ್ಲಿ ಎಐ ಆಧಾರಿತ 9.7 ಕೋಟಿ ಹೊಸ ಉದ್ಯೋಗಗಳೂ ಸೃಷ್ಟಿಯಾಗಲಿವೆ ಎಂದೂ ಹೇಳಲಾಗಿದೆ. ಎಐನಿಂದ ಹೊಸ ಉದ್ಯೋಗಗಳು ಸೃಷ್ಟಿಯಾಗಬಹುದು. ಆದರೆ, ಅವುಗಳ ಸಂಖ್ಯೆ ಕಡಿಮೆ. ಉದ್ಯೋಗ ಕಳೆದುಕೊಳ್ಳುವವರ ಸಂಖ್ಯೆ ಹೆಚ್ಚಾಗಿರುತ್ತದೆ, ಎಂದು ಕೆಲವು ತಜ್ಞರು ವಾದಿಸಿದ್ದಾರೆ. ಭಾರತದಂಥ ಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶಗಳಲ್ಲಿ ನಿರುದ್ಯೋಗ ಹೆಚ್ಚಳಕ್ಕೆ ಎಐ ಕಾರಣವಾಗಬಹುದಾ ಎನ್ನುವ ಕಳವಳಗಳು ಹೆಚ್ಚಾಗಿದೆ.