ನವದೆಹಲಿ: ಕೇಂದ್ರ ಗೃಹ ಸಚಿವಾಲಯವು ವಿದೇಶಾಂಗ ವ್ಯವಹಾರಗಳ ಸಚಿವ ಎಸ್. ಜೈಶಂಕರ್ ಅವರ ಭದ್ರತೆಯನ್ನು Z ಕೆಟಗರಿಗೆ ಮೇಲ್ದರ್ಜೆಗೇರಿಸಿದೆ. ಕೆನಡಾದಲ್ಲಿ ಖಲಿಸ್ತಾನಿ ಉಗ್ರರ ಗುಂಪುಗಳು ಹಾಕಿದ ಹೊಸ ಪೋಸ್ಟರ್ಗಳಲ್ಲಿ ಸಚಿವರ ಮತ್ತು ಪ್ರಧಾನಿಯವರ ಚಿತ್ರಗಳನ್ನು ಹಾಕಿ ಅವರ ಹತ್ಯೆಗೆ ಕರೆ ನೀಡಿರುವ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಪ್ರಧಾನಿ ನರೇಂದ್ರ ಮೋದಿ, ವಿದೇಶಾಂಗ ಸಚಿವ ಎಸ್ ಜೈಶಂಕರ್ ಮತ್ತು ಹೈಕಮಿಷನರ್ ಸಂಜಯ್ ಕುಮಾರ್ ವರ್ಮಾ ಅವರಿಗೆ ಬೆದರಿಕೆ ಹಾಕುವ ಭಾರತದ ವಿರುದ್ಧ ದ್ವೇಷವನ್ನು ಉತ್ತೇಜಿಸುವ ಹೊಸ ಪೋಸ್ಟರ್ಗಳು ಕೆನಡಾದ ಸರ್ರೆಯಲ್ಲಿರುವ ಗುರುನಾನಕ್ ಸಿಖ್ ಗುರುದ್ವಾರದ ಅತ್ಯಂತ ಜನನಿಬಿಡ ರಸ್ತೆಯಲ್ಲಿ ಸಂಪೂರ್ಣ ಪ್ರದರ್ಶನಗೊಂಡಿವೆ. ಖಲಿಸ್ತಾನಿ ಗ್ರೂಪ್ ಸಿಖ್ಸ್ ಫಾರ್ ಜಸ್ಟಿಸ್ (SFJ) ಮಂಗಳವಾರ ಈ ಪೋಸ್ಟರ್ಗಳನ್ನು ಹಾಕಿದ್ದು, ಹರ್ದೀಪ್ ಸಿಂಗ್ ನಿಜ್ಜರ್ ಹತ್ಯೆಯಾದ ಬ್ರಿಟಿಷ್ ಕೊಲಂಬಿಯಾದ ಸರ್ರೆಯಲ್ಲಿರುವ ಗುರುನಾನಕ್ ಸಿಖ್ ಗುರುದ್ವಾರದ ಹೊರಗೆ ಭಾರತದಿಂದ ಪ್ರತ್ಯೇಕ ರಾಜ್ಯವನ್ನು ಪಡೆಯಬೇಕೆ ಬೇಡವೇ ಎಂಬುದರ ಕುರಿತು “ಜನಮತಸಂಗ್ರಹ” ವನ್ನು ನಡೆಸುವುದಾಗಿ ಘೋಷಿಸಿದೆ. ಪೋಸ್ಟರ್ಗಳ ಪ್ರಕಾರ, ಅಕ್ಟೋಬರ್ 21 ರಂದು ಸರ್ರೆಯಿಂದ ಭಾರತೀಯ ದೂತಾವಾಸಕ್ಕೆ ಪ್ರಾರಂಭವಾಗುವ ಪ್ರತಿಭಟನೆಯ ನಂತರ ಅಕ್ಟೋಬರ್ 29 ರಂದು ವ್ಯಾಂಕೋವರ್ನಲ್ಲಿ “ಜನಮತಸಂಗ್ರಹ” ನಡೆಯಲಿದೆ ಎಂದು ತಿಳಿದು ಬಂದಿದೆ.
ಈ ಪೋಸ್ಟರ್ಗಳಲ್ಲಿ ಕೆನಡಾದಲ್ಲಿರುವ ಭಾರತೀಯ ಹೈಕಮಿಷನ್ ಸಂಜಯ್ ಕುಮಾರ್ ವರ್ಮಾ ಮತ್ತು ಕಾನ್ಸುಲ್ ಜನರಲ್ಗಳಾದ ಮನೀಶ್ ಮತ್ತು ಅಪೂರ್ವ ಶ್ರೀವಾಸ್ತವ ಅವರನ್ನು ಹತ್ಯೆ ಮಾಡುವಂತೆ ಕರೆ ನೀಡಲಾಗಿದೆ. |
ಈ ಹಿಂದೆ ಕೆನಡಾದಲ್ಲಿರುವ ಭಾರತೀಯ ಹೈಕಮಿಷನ್ ಸಂಜಯ್ ಕುಮಾರ್ ವರ್ಮಾ ಮತ್ತು ಕಾನ್ಸಲ್ ಜನರಲ್ಗಳಾದ ಮನೀಶ್ ಮತ್ತು ಅಪೂರ್ವ ಶ್ರೀವಾಸ್ತವ ಅವರನ್ನು ಹತ್ಯೆ ಮಾಡುವಂತೆ ಪೋಸ್ಟರ್ಗಳು ಕರೆ ನೀಡಿದ್ದವು.
ಖಲಿಸ್ತಾನಿ ಉಗ್ರಗಾಮಿ ಗುರುಪತ್ವಂತ್ ಸಿಂಗ್ ಪನ್ನುನ್ ಪ್ರತ್ಯೇಕತಾವಾದಿ ಚಳವಳಿಯನ್ನು ಪ್ಯಾಲೆಸ್ತೀನ್ನ ಪರಿಸ್ಥಿತಿಯೊಂದಿಗೆ ಸಮೀಕರಿಸಿ SFJ ಕೂಡ ಭಾರತದ ಮೇಲೆ ಹಮಾಸ್ ತರಹದ ದಾಳಿಗಳನ್ನು ನಡೆಸುತ್ತದೆ ಎಂದು ಹೇಳಿರುವ ಬೆನ್ನಲ್ಲೇ ಈ ಪೋಸ್ಟರ್ ಗಳು ಕಾಣಿಸಿಕೊಂಡಿವೆ.
“ಈ ಬೆಳವಣಿಗೆಯ ನಂತರ ಭಾರತದಲ್ಲಿರುವ ಕೆನಡಾದ ಹೈಕಮಿಷನರ್ ಕ್ಯಾಮರೂನ್ ಮ್ಯಾಕೆ ಅವರನ್ನು ಗುರುವಾರ ಸೌತ್ ಬ್ಲಾಕ್ಗೆ ಕರೆಸಲಾಯಿತು ಮತ್ತು ಭಾರತದ ಪ್ರತಿಭಟನೆಯನ್ನು ತಿಳಿಸಲಾಯಿತು. ಪ್ರತಿಭಟನೆಯ ಟಿಪ್ಪಣಿಯಲ್ಲಿ ಸರ್ರೆ ಗುರುದ್ವಾರದಲ್ಲಿರುವ ಪೋಸ್ಟರ್ಗಳನ್ನು ತಕ್ಷಣವೇ ತೆಗೆದು ಹಾಕಲು ಮತ್ತು ಕೆನಡಾದಲ್ಲಿರುವ ಭಾರತದ ರಾಜತಾಂತ್ರಿಕರಿಗೆ ಬೆದರಿಕೆಯ ಕುರಿತು ತನಿಖೆ ನಡೆಸುವಂತೆ ಮತ್ತು ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ತೆಗೆದುಕೊಳ್ಳುವಂತೆ ಟ್ರುಡೊ ಸರ್ಕಾರವನ್ನು ಕೇಳಿದೆ.
ದೇಶದಲ್ಲಿ ಸುಮಾರು 176 ಗಣ್ಯ ವ್ಯಕ್ತಿಗಳಿಗೆ ನೀಡಲಾಗಿರುವ z ದರ್ಜೆಯ ಭದ್ರತೆಯನ್ನು ನೀಡಿರುವ ಕೇಂದ್ರೀಯ ಮೀಸಲು ಭದ್ರತಾ ಪಡೆ (ಸಿಆರ್ಪಿಎಫ್) ನ ವಿಐಪಿ ಭದ್ರತಾ ವಿಭಾಗವು ಜೈಶಂಕರ್ ಅವರಿಗೆ ಈಗ ಭದ್ರತೆಯನ್ನು ಒದಗಿಸಿದೆ. ಕಳೆದ ಸೆಪ್ಟೆಂಬರ್ 18 ರಂದು ಕೆನಡಾದ ಪ್ರಧಾನ ಮಂತ್ರಿ ಜಸ್ಟಿನ್ ಟ್ರುಡೊ ಅವರು ಭಾರತೀಯ ಸರ್ಕಾರಿ ಏಜೆಂಟರು ಮತ್ತು ಕೆನಡಾದ ಪ್ರಜೆ ನಿಜ್ಜಾರ್ ಅವರ ಹತ್ಯೆಯ ನಡುವೆ “ಸಂಭಾವ್ಯ ಸಂಬಂಧ” ಇರಬಹುದು ಎಂದು ಹೇಳಿದ ನಂತರ ನಿಜ್ಜರ್ ಸಾವು ರಾಜತಾಂತ್ರಿಕ ಬಿಕ್ಕಟ್ಟಾಗಿ ಮಾರ್ಪಟ್ಟಿತು. ಭಾರತವು ಈ ಆರೋಪವನ್ನು “ಅಸಂಬದ್ಧ ಮತ್ತು ಪ್ರೇರಿತ” ಎಂದು ತಳ್ಳಿಹಾಕಿದೆ. ಭಾರತವು ಸೆಪ್ಟೆಂಬರ್ 22 ರಂದು ಕೆನಡಿಯನ್ನರಿಗೆ ಹೊಸ ವೀಸಾಗಳನ್ನು ಅಮಾನತುಗೊಳಿಸಿತು.
ಅಕ್ಟೋಬರ್ 3 ರಂದು, ಕೆನಡಾದ ವಿದೇಶಾಂಗ ಸಚಿವೆ ಮೆಲಾನಿ ಜೋಲಿ ಅವರು ರಾಜತಾಂತ್ರಿಕ ವಿವಾದವನ್ನು ಪರಿಹರಿಸಲು ಕೆನಡಾವು ಭಾರತದೊಂದಿಗೆ ಖಾಸಗಿ ಮಾತುಕತೆಗಳನ್ನು ನಡೆಸಲು ಇಚ್ಚಿಸಿದೆ ಎಂದು ಹೇಳಿದರು, ನಂತರ ಕೆನಡಾದ 41 ರಾಜತಾಂತ್ರಿಕರನ್ನು ಹಿಂತೆಗೆದುಕೊಳ್ಳುವಂತೆ ಭಾರತವು ಕೆನಡಾಗೆ ಸೂಚಿಸಿ ಹೊರಕಳಿಸಿತ್ತು. ಕೆನಡಾ ರಾಜತಾಂತ್ರಿಕ ವಿವಾದವನ್ನು ಉಲ್ಬಣಗೊಳಿಸಲು ನೋಡುತ್ತಿಲ್ಲ ಎಂದು ಕೆನಡಾ ಪ್ರಧಾನಿ ಟ್ರುಡೊ ಹೇಳಿದ್ದು “ನಾವು ಇದನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸುತ್ತಿದ್ದೇವೆ, ಆದರೆ ನಾವು ಭಾರತ ಸರ್ಕಾರದೊಂದಿಗೆ ಜವಾಬ್ದಾರಿಯುತವಾಗಿ ಮತ್ತು ರಚನಾತ್ಮಕವಾಗಿ ತೊಡಗಿಸಿಕೊಳ್ಳುವುದನ್ನು ಮುಂದುವರಿಸಲಿದ್ದೇವೆ” ಎಂದು ಸುದ್ದಿಗಾರರಿಗೆ ತಿಳಿಸಿದರು. ಆದರೆ ಕೆನಡಾ ಭಾರತದೊಂದಿಗೆ ಯಾವುದೇ ವಿಶ್ವಾಸಾರ್ಹ ಪುರಾವೆಗಳನ್ನು ಹಂಚಿಕೊಂಡಿಲ್ಲ.