ಗೋಕರ್ಣ: ಜಗತ್ತಿನ ಅನೇಕ ದೇಶಗಳ ಜನರು ಹಿಂದೂ ಸಂಪ್ರದಾಯಗಳನ್ನು ಪಾಲಿಸುವುದು , ಹಬ್ಬಗಳ ಆಚರಣೆ ನಡೆಸುವುದು ಹೊಸದೇನಲ್ಲ. ಇತರ ಧರ್ಮಕ್ಕೆ ಸೇರಿದ ವಿದೇಶೀ ಪ್ರಜೆಗಳೂ ಕುಂಭ ಮೇಳಗಳಂತಹ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳುವುದು, ಸಂಸ್ಕೃತ ಅಭ್ಯಾಸ ಮಾಡುವುದು, ಹಿಂದೂ ಶಾಸ್ತ್ರಗಳನ್ವಯ, ಸಂಪ್ರದಾಯದಂತೆ ಇಲ್ಲಿಗೆ ಬಂದು ಮದುವೆ ಆಗುವುದು ಆಗಾಗ ವರದಿ ಆಗುತ್ತಲೇ ಇರುತ್ತದೆ. ಆದರೆ ಮುಸ್ಲಿಂ ಕುಟುಂಬವೊಂದು ಇತ್ತೀಚೆಗೆ ಪಿತೃಪಕ್ಷದ ಪರ್ವಕಾಲದಲ್ಲಿ ಪಿತೃಕಾರ್ಯ ನೆರವೇರಿಸಿ ಅಚ್ಚರಿ ಮೂಡಿಸಿದೆ.
ಧಾರವಾಡದ ದಾನೇಶ್ವರಿ ನಗರದಲ್ಲಿ ವಾಸವಿರುವ ಮರದ ಕುಶಲ ಕರ್ಮಿ ವೃತ್ತಿಯಲ್ಲಿರುವ ಮುಸ್ಲಿಂ ಕುಟುಂಬದ ಸದಸ್ಯರು ಜ್ಯೋತಿಷಿಯೊಬ್ಬರ ಸಲಹೆ ಮೇರೆಗೆ ಗೋಕರ್ಣಕ್ಕೆ ಬಂದು ನಾರಾಯಣ ಬಲಿ, ತ್ರಿಪಿಂಡಿ ಶ್ರಾದ್ಧ ಮತ್ತು ತಿಲ ಹವನವನ್ನು ಇಲ್ಲಿಯ ಪಿತೃಶಾಲೆಯಲ್ಲಿ ನೆರವೇರಿಸಿದ್ದಾರೆ. ಈ ಕುರಿತು ಪ್ರತಿಕ್ರಿಯಿಸಿದ ಕುಟುಂಬದ ಸದಸ್ಯ ಮೊಹಮ್ಮದ್ ಶಂಶಾದ್ ನಾವು ಮೊದಲಿನಿಂದಲೂ ಹಿಂದೂ ಸಂಪ್ರದಾಯದ ಕೆಲ ಆಚರಣೆಗಳನ್ನು ಪಾಲಿಸುತ್ತಿದ್ದೇವೆ. ನಮ್ಮ ತಂದೆ ಗದಗಿನ ವೀರನಾರಾಯಣ ದೇವಸ್ಥಾನದ ಬಳಿಯಲ್ಲಿ ಜನಿಸಿದ್ದು ಬ್ರಾಹ್ಮಣ ಮತ್ತು ಲಿಂಗಾಯತ ಸಮುದಾಯದವರ ಜತೆ ಬೆಳೆದವರು. ನಮಗೆ ಹಿಂದೂ ಸ್ನೇಹಿತರೇ ಅಧಿಕವಾಗಿದ್ದಾರೆ. ನನ್ನ ತಮ್ಮನಿಗೆ ಮದುವೆ ಮಾಡಲು ಹೆಣ್ಣು ಅನೇಕ ಕಡೆ ಹೆಣ್ಣು ಹುಡುಕಿದರೂ ಯಾವುದೂ ಸಂಬಂಧ ಕೂಡಿ ಬರಲಿಲ್ಲ. ಆಗ ಜ್ಯೋತಿಷಿಯೊಬ್ಬರ ಮೊರೆ ಹೋಗಿದ್ದೆವು. ಅವರ ಸಲಹೆಯಂತೆ ಈ ಪಿತೃ ಕಾರ್ಯ ನರವೇರಿಸಿದ್ದೇವೆ. ನನ್ನ ತಮ್ಮನ ಮದುವೆ ಹಾಗೂ ಕುಟುಂಬದ, ಮಾನಸಿಕ ಶಾಂತಿಗೆ ಈ ಕಾರ್ಯ ಮಾಡಿದ್ದೇವೆ’ ಎಂದು ಅವರು ತಿಳಿಸಿದರು.
ಪುರೋಹಿತರಾದ ನಾಗರಾಜ ಭಟ್ ಗುರ್ಲಿಂಗ್, ಸುಬ್ರಮಣ್ಯ ಚಿತ್ರಿಗೆಮಠ ಅವರ ನೇತೃತ್ವದಲ್ಲಿ ಪಿತೃ ಕಾರ್ಯವನ್ನು ನಡೆಸಲಾಯಿತು. ‘ಗೋಕರ್ಣದಲ್ಲಿ ಕ್ರೈಸ್ತ ಸಮುದಾಯದವರು ಪಿತೃಕಾರ್ಯ ನೆರವೇರಿಸಿದ ಉದಾಹರಣೆಗಳಿವೆ. ಆದರೆ, ಮುಸ್ಲಿಂ ಕುಟುಂಬ ಪಿತೃಕಾರ್ಯ ಮಾಡಿದ್ದು ಅಪರೂಪ’ ಎಂದು ಅರ್ಚಕರೊಬ್ಬರು ತಿಳಿಸಿದರು.