ಆತ್ಮೀಯರಿಂದ ದೂರ ಇರೋದ್ರಿಂದ ಅವ್ರೊಂದಿಗಿನ ಪ್ರೀತಿ ಹೆಚ್ಚಾಗ್ತದಾ ಅಥ್ವಾ ಪ್ರೀತಿ ಗಟ್ಟಿಯಾಗಿರಲು ಒಟ್ಟಿಗೆ ಇರ್ಲೇಬೇಕಾ?
ಅತಿಯಾದ ಕಾಳಜಿ ತೋರಿಸೋದೇ ಪ್ರೀತಿನಾ?
ಒಬ್ಬರನ್ನು ನೋಡಿದ ಕೂಡಲೇ ಪ್ರೀತಿ ಆಗ್ತದಾ?
ಹುಡುಗಿಗೆ ಹೇಗೆ ಬೇಕೋ, ಹಾಗೆ ಇರೋದೇ ಪ್ರೀತಿಯಾ?
ಅಪರಿಚಿತರು, ಪರಿಚಿತರಾಗಿ, ಸಡನ್ ದೂರ ಆಗೋದೂ ದುಃಖ ತರಿಸುತ್ತಾ?
ಒಟ್ಟೊಟ್ಟಿಗೆ ಇರೋದೇ ಪ್ರೀತಿಯಾ?
ಪ್ರೀತಿಸಿದವರಿಂದ ದೂರ ಇದ್ದಾಗ ಮಾತ್ರ ಪ್ರೀತಿಯ ಬೆಲೆ ಅರ್ಥವಾಗೋದಾ?
ಪ್ರೀತಿಗೂ expiry date ಇರುತ್ತಾ?
15 ವರ್ಷದಿಂದ ಮಗ, ಸೊಸೆ, ಮೊಮ್ಮಗಳನ್ನು ನೋಡಿರದ ವೀರಣ್ಣ ದಂಪತ, ಹುಡುಗ ತೋರುತ್ತಿರುವ ಅತಿಯಾದ ಪ್ರೀತಿಯನ್ನೇ ಕಿರಿಕಿರಿ ಎಂದು break upಗೆ ಮುಂದಾದ ಹುಡುಗಿ, ಕೋವಿಡ್ ಕಾರಣದಿಂದ ಸರಿಯಾಗಿ ಹೆಂಡ್ತಿ, ಮಗಳೊಂದಿಗೆ ಸಮಯ ಕಳೆಯಲು ಆಗದಿರೋ ಡಾಕ್ಟರ್ ಅಪ್ಪ ಇವರೆಲ್ಲರ ಕಥೆಯ ಜೊತೆಗೆ, ಮದುವೆಗೆ ಹುಡುಗಿ ನೋಡಲು ಹೊರಟಿರುವ ರಾಜೇಶ್ ನ ಕೆಲವು ಸ್ಟೋರಿಗಳು – ಹೀಗೆ ನಾಲ್ಕು ಕಥೆಗಳು ಮೇಲಿನ ಎಲ್ಲಾ ಪ್ರಶ್ನೆಗಳಿಗೂ ಉತ್ತರ ನೀಡುತ್ತೆ.
ಹೀಗೆ ಪ್ರೀತಿ ಎಂದರೇನು ಎಂಬುದನ್ನು ವಿವರಿಸಲು, ಕೋವಿಡ್ ಕಾಲದ ದಿನಗಳನ್ನ ಆಯ್ಕೆ ಮಾಡಿದ್ದು ವಿಶೇಷ ಅನಿಸಿತು ಹಾಗೂ ಬಹಳ ಸೂಕ್ತವೂ ಅನಿಸಿತು. ಕೋವಿಡ್ ದಿನಗಳನ್ನೇ ಮುಖ್ಯವಾಗಿರಿಸಿ ಒಂದಷ್ಟು ಸಿನಿಮಾಗಳು ಬಂದಿವೆ. ದೂರದಲ್ಲಿದ್ರೂ ಹೇಗೆ ಕನೆಕ್ಪ್ ಆಗಿದ್ರು, ಅಥ್ವಾ ಲಾಕ್ಡೌನ್ ವೇಳೆ ಬಂಧಿಯಾಗಿದ್ರಿಂದ ಪ್ರೀತಿ ಏನಾಯ್ತು, ಹೀಗೆ ಪ್ರೀತಿ ಹಾಗೂ ಕೋವಿಡ್ ಸುತ್ತ ಬೇರೆ ಬೇರೆ ಸಿನಿಮಾಗಳು ಬಂದಿವೆ. ಆದರೆ ಹೊಸ ದಿನಚರಿ ಸಿನಿಮಾ ಬಹಳ ಹಿಡಿಸಿತು.
ಜೀವ, ಜೀವನ, ಪ್ರೀತಿ, ಸಂಬಂಧ, ಭಾವನೆ ಹೀಗೆ ಇದೆಲ್ಲವನ್ನೂ, ಇವೆಲ್ಲವುಗಳ ಪ್ರಾಮುಖ್ಯತೆಯನ್ನು ಹೊಸ ದಿನಚರಿ ತೋರಿಸುತ್ತೆ. ಹಾಡುಗಳ ಸಾಹಿತ್ಯ, ಸಂಗೀತ ಸಂಯೋಜನೆ ಕಥೆಯನ್ನು ಮತ್ತಷ್ಟು ಬಲಗೊಳಿಸಿದೆ. ಏನೂ ಅನಗತ್ಯ ಅನಿಸಲ್ಲ. ವೀರಣ್ಣ ದಂಪತಿಯ ಸಂಭಾಷಣೆಗಳು ಈ ಸಿನಿಮಾದ ಮತ್ತೊಂದು ಪ್ಲಸ್ ಪಾಯಿಂಟ್.
ಸಿನಿಮಾದಲ್ಲಿ ಬರೋ ಒಂದು ಡೈಲಾಗ್, “ಕಥೆಗಳು ಕೊನೆಯಾಗ್ತವೆ, ವ್ಯಕ್ತಿಗಳು ಬಂದು ಹೋಗ್ತಾರೆ, ಆದ್ರೆ, ಅವು ಬಿಟ್ಟು ಹೋಗೋ ನೆನಪುಗಳು ಹಾಗೇ ಉಳೀತವೆ” – ಇದರಂತೆ ಈ ಸಿನಿಮಾವೂ ಕೊನೆಗೊಂಡರೂ, ಕೆಲವು ಪಾತ್ರಗಳು, ಸನ್ನಿವೇಶಗಳು ನಮ್ಮನ್ನು ಕನೆಕ್ಟ್ ಆಗ್ತವೆ. ಬಹಳ ಪ್ರಭಾವ ಬೀರದಿದ್ರೂ ಕೋವಿಡ್ ದಿನಗಳ ನಮ್ಮ ನೆನಪುಗಳನ್ನು ಮರುಕಳಿಸುತ್ತವೆ.
ಈ ಸಿನಿಮಾ ಒಂದು ಕ್ಷಣ ನಮ್ಮನ್ನು ಲಾಕ್ಡೌನ್ ದಿನಗಳತ್ತ ಕೊಂಡೊಯ್ಯುತ್ತದೆ. ವೈದ್ಯರ ಕಷ್ಟ, ಸಂಬಂಧಗಳು, ಮನೆಯಲ್ಲಿನ ಬಿಕ್ಕಟ್ಟು ಹೀಗೆ, ಎಲ್ಲವನ್ನು ಸ್ಪಷ್ಟವಾಗಿ ವಿವರಿಸದಿದ್ದರೂ, ಬಹುತೇಕ ವಿಷಯಗಳ ಮೇಲೆ ಬೆಳಕು ಚೆಲ್ಲುವಲ್ಲಿ ಹೊಸ ದಿನಚರಿ ಯಶಸ್ವಿಯಾಗಿದೆ. ಒಟ್ನಲ್ಲಿ ಒಂದೊಳ್ಳೆ ಫ್ಯಾಮಿಲಿ ಎಂಟರ್ಟೈನರ್ ಈ ಸಿನಿಮಾ. ಅಮೆಜಾನ್ ಪ್ರೈಮ್ನಲ್ಲಿದೆ.
Nice review