ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ, ಹಳೆ ಭವನಕ್ಕೆ ‘ಸಂವಿಧಾನ ಸದನ’ ಎಂಬ ಹೊಸ ನಾಮಕರಣ ಮಾಡಿದರು. ಸಂಸತ್ನ ಸದನಗಳಾದ ಲೋಕಸಭೆ ಮತ್ತು ರಾಜ್ಯಸಭೆ ಎರಡೂ ಗಣೇಶ ಚತುರ್ಥಿಯ ಸಂದರ್ಭದಲ್ಲಿ ನೂತನ ಕಟ್ಟಡಕ್ಕೆ ಸ್ಥಳಾಂತರಗೊಂಡಿವೆ.
ಹಳೆಯ ಭವನ ಎಂದು ಸರಳವಾಗಿ ಕರೆಯುವುದರಿಂದ, ಕಳೆದ 75 ವರ್ಷಗಳಲ್ಲಿ ಸಂಸತ್ ಕಲಾಪಗಳು ನಡೆದ ಕಟ್ಟಡದ ಘನತೆಯು ಕುಂದುವಂತೆ ಮಾಡಬಾರದು ಎಂದು ಪ್ರಧಾನಿ ಮೋದಿ ಅವರು ‘ಸಂವಿಧಾನ ಸದನ’ ಹೆಸರಿನ ಸಲಹೆಗೆ ವಿವರಣೆ ನೀಡಿದರು.
“ಹಳೆ ಕಟ್ಟಡಕ್ಕೆ ‘ಸಂವಿಧಾನ ಸದನ’ ಎಂಬ ಹೆಸರು ಇರಿಸುವುದು, ಸಂಸತ್ನಲ್ಲಿ ಇತಿಹಾಸ ನಿರ್ಮಿಸಿದ ನಾಯಕರಿಗೆ ನೀಡುವ ಗೌರವವಾಗಲಿದೆ. ಭವಿಷ್ಯದ ತಲೆಮಾರಿಗೆ ಈ ಕೊಡುಗೆಯನ್ನು ನೀಡುವ ಅವಕಾಶವನ್ನು ನಾವು ಕೈಬಿಡಬಾರದು” ಎಂದು ಹೇಳಿದರು.
“ಇಂದು ನಾವು ಇಲ್ಲಿಂದ ನಿರ್ಗಮಿಸಿ, ಹೊಸ ಸಂಸತ್ ಕಟ್ಟಡದ ಕಡೆಗೆ ತೆರಳಲಿದ್ದೇವೆ. ಇಂದು ಗಣೇಶ ಚತುರ್ಥಿಯ ಶುಭದಿನ” ಎಂದ ಮೋದಿ, ತಮ್ಮ ಅಕ್ಕ ಪಕ್ಕ ಕುಳಿತಿದ್ದ ಎರಡೂ ಸದನಗಳ ಸ್ಪೀಕರ್ಗಳ ಕಡೆ ತಿರುಗಿ, ಹೆಸರು ಬದಲಾವಣೆಯ ಕುರಿತು ಮನವಿ ಮಾಡಿದರು. “ಈ ಸದನದ ಭವ್ಯತೆ ಎಂದಿಗೂ ಕಡಿಮೆಯಾಗಬಾರದು. ಹೀಗಾಗಿ ಇದನ್ನು ನಾವು ‘ಹಳೆ ಕಟ್ಟಡ’ ಎಂದು ಕರೆಯಬಾರದು. ನೀವಿಬ್ಬರೂ ಅನುಮತಿ ನೀಡಿದರೆ, ಈ ಕಟ್ಟಡವು ‘ಸಂವಿಧಾನ ಸದನ’ ಎಂದು ಪರಿಚತವಾಗಬೇಕು. ಏಕೆಂದರೆ ಇದು ನಮಗೆ ಯಾವಾಗಲೂ ಸ್ಫೂರ್ತಿ ನೀಡುತ್ತದೆ” ಎಂದರು.
ಹೊಸ ಕಟ್ಟಡಕ್ಕೆ ಸ್ಥಳಾಂತರಗೊಳ್ಳುವುದಕ್ಕೂ ಮುನ್ನ ಸಂಸತ್ನ ಸೆಂಟ್ರಲ್ ಹಾಲ್ನಲ್ಲಿ ಮೋದಿ ಮಾತನಾಡಿದರು. ಮಂಗಳವಾರ ಮಧ್ಯಾಹ್ನದಿಂದ ಸೆಪ್ಟೆಂಬರ್ 22ರವರೆಗೂ ನಡೆಯಲಿರುವ ಸಂಸತ್ನ ವಿಶೇಷ ಅಧಿವೇಶನ ಹೊಸ ಭವನದಲ್ಲಿ ಮುಂದುವರಿಯಲಿವೆ. ಮುಂಬರುವ ಎಲ್ಲಾ ಅಧಿವೇಶನಗಳು ಕೂಡ ಇಲ್ಲಿಯೇ ನಡೆಯಲಿವೆ.