ರಾಜ್ಯದ ಜನ ಗಣೇಶ ಹಬ್ಬ ಆಚರಿಸಲು ಕಾಯ್ತಾ ಇದ್ದಾರೆ. ಸುಪ್ರಸಿದ್ಧ ಗಣೇಶ ದೇವಾಲಯಗಳಿವು.
ಸೌತಡ್ಕ ಶ್ರೀ ಮಹಾಗಣಪತಿ ದೇವಾಲಯ- ದಕ್ಷಿಣ ಕನ್ನಡ ಜಿಲ್ಲೆಯ ಧರ್ಮಸ್ಥಳದಿಂದ ಸುಬ್ರಮಣ್ಯಕ್ಕೆ ತೆರಳುವ ಕೊಕ್ಕಡ ಸಮೀಪದಲ್ಲೇ ಇರುವಂತಹ ಕ್ಷೇತ್ರವೇ ಸೌತಡ್ಕ ಶ್ರೀ ಮಹಾಗಣಪತಿ ದೇವಸ್ಥಾನ. ಧರ್ಮಸ್ಥಳದಿಂದ 17 ಕಿಲೋ ಮೀಟರ್ ದೂರದಲ್ಲಿರುವ ಸೌತಡ್ಕ ಮಹಾಗಣಪತಿ ಕ್ಷೇತ್ರ ಭಕ್ತರ ಪಾಲಿಗೆ ಶ್ರಧ್ಧೆಯ ಭಕ್ತಿ ಕೇಂದ್ರವೂ ಹೌದು.
ಆನೆಗುಡ್ಡೆ ಶ್ರೀ ವಿನಾಯಕ ದೇಗುಲ- ಕುಂದಾಪುರದ ಆನೆಗುಡ್ಡೆ ಶ್ರೀ ವಿನಾಯಕ ದೇವಸ್ಥಾನವು ಬಹಳ ಪ್ರಸಿದ್ಧ. ಸುತ್ತಮುತ್ತಲಿನ ಜಿಲ್ಲೆಗಳಲ್ಲಿ ಪ್ರಸಿದ್ದವಾದ ದೇವಸ್ಥಾನಗಳಲ್ಲಿ ಇದೂ ಕೂಡ ಒಂದು.
ಗೋಕರ್ಣ ಮಹಾಗಣಪತಿ ದೇವಾಲಯ-ಆತ್ಮಲಿಂಗ ಇರುವ ಮಹಾಬಲೇಶ್ವರ ದೇವಾಲಯದ ಸಮೀಪ ಮಹಾಗಣಪತಿ ದೇವಾಲಯ ಇದೆ. ಭಕ್ತರು ಮೊದಲು ಗಣಪನನ್ನು ಪೂಜಿಸಿ ತರುವಾಯ ಆತ್ಮಲಿಂಗಕ್ಕೆ ಪೂಜೆ ಸಲ್ಲಿಸುವುದು ಸಂಪ್ರದಾಯ.
ಕುರುಡುಮಲೆ ಶ್ರೀ ಗಣೇಶ- ಇಲ್ಲಿನ ಗಣೇಶ ದೇವಾಲಯವು 13.5 ಅಡಿ ಎತ್ತರದ ಗಣಪತಿ ಮೂರ್ತಿಯನ್ನು ಹೊಂದಿದೆ ಮತ್ತು ದೇವಾಲಯದ ವಿನ್ಯಾಸವನ್ನು ಎರಡು ವಿಭಿನ್ನ ಶೈಲಿಗಳಲ್ಲಿ ನಿರ್ಮಿಸಲಾಗಿದೆ.
ಇಡಗುಂಜಿ ಗಣಪತಿ ದೇವಾಲಯ- ಇಡಗುಂಜಿ ಗಣಪತಿಯು ಭಕ್ತರಲ್ಲಿ ಮಹತೋಭಾರ ವಿನಾಯಕ ದೇವರು ಎಂದು ಪ್ರಸಿದ್ಧಿ. ಸುಮಾರು 1500 ಕ್ಕೂ ಹೆಚ್ಚು ವರ್ಷಗಳ ಹಿಂದಿನ ದೇಗುಲವಿದು ಎಂದು ಹೇಳಲಾಗುತ್ತದೆ. ಅಲ್ಲದೇ, ಸ್ಕಂದ ಪುರಾಣದಲ್ಲಿಯೂ ಇಡಗುಂಜಿ ಕ್ಷೇತ್ರದ ಉಲ್ಲೇಖವಿದೆಯಂತೆ. ತ್ರೇತಾಯುಗದಲ್ಲಿ ನಾರದರಿಂದ ಪ್ರತಿಷ್ಠಾಪಿಸಲ್ಪಟ್ಟ ದೇವಸ್ಥಾನವಿದು ಎಂಬ ನಂಬಿಕೆಯಿದೆ.
ಬೆಂಗಳೂರಿನ ದೊಡ್ಡ ಗಣಪತಿ ದೇವಸ್ಥಾನ- ಸುಮಾರು 500ಕ್ಕೂ ಅಧಿಕ ವರ್ಷದ ಹಳೆತನ ಈ ದೇವಸ್ಥಾನಕ್ಕಿದೆ. ಬ್ರಹ್ಮಾಂಡರೂಪಿಯಾಗಿ ಇಲ್ಲಿನ ಗರ್ಭಗುಡಿಯಲ್ಲಿ ವಿಘ್ನೇಶ್ವರನನ್ನು ಪ್ರತಿಷ್ಠಾಪಿಸಲಾಗಿದೆ. ಕ್ರಿ.ಶ 1536ರಲ್ಲಿ ಕೆಂಪೇಗೌಡರ ಕಾಲದಲ್ಲಿ ಈ ದೊಡ್ಡಗಣಪತಿ ದೇವಸ್ಥಾನವನ್ನು ನಿರ್ಮಿಸಲಾಯ್ತು.