ಹಾಸನ: ಹೇಮಾವತಿ ನದಿಯ ನೀರು ತಮಿಳುನಾಡು ಹಾಗೂ ನಾಲೆ ಮೂಲಕ ನಾನಾ ಕಡೆಯ ಹರಿಯುತ್ತಿದೆ. ಪರಿಣಾಮ ಜಲಾಶಯದ ಒಡಲು ಬೇಸಿಗೆ ವೇಳೆಗೆ ಬರಿದಾಗುತ್ತಿದೆ. ಮುಂದೆ ಕುಡಿಯುವ ನೀರಿಗೆ ಹಾಹಾಕಾರ ಸೃಷ್ಟಿಯಾಗುವುದೇ ಎಂಬ ಆತಂಕ ಕಾಡಲಾರಂಭಿಸಿದೆ.
ಹೇಮಾವತಿ ಜಲಾಶಯ ಈ ಬಾರಿ ಮಳೆ ಕೊರತೆಯಿಂದ ಪೂರ್ಣ ಪ್ರಮಾಣದಲ್ಲಿ ಭರ್ತಿಯಾಗಿಲ್ಲ. ಹೀಗಾಗಿ ಕಳೆದ ವರ್ಷ ಇದೇ ದಿನ 32 ಟಿಎಂಸಿಯಷ್ಟಿದ್ದ ನೀರಿನ ಸಂಗ್ರಹ ಈ ಬಾರಿ 19 ಟಿಎಂಸಿ ಇದೆ. ಇದರಲ್ಲಿ ನದಿಗೆ ನಿತ್ಯ ಒಂದು ಸಾವಿರದಿಂದ 1250 ಕ್ಯೂಸೆಕ್, ಹೇಮಾವತಿ ಎಡ ಮತ್ತು ಬಲದಂಡೆ ನಾಲೆಗಳಿಗೆ 6090 ಕ್ಯೂಸೆಕ್ ಬಿಡಲಾಗುತ್ತಿದೆ. ಜಲಾಶಯ 37 ಟಿಎಂಸಿ ನೀರಿನ ಸಂಗ್ರಹ ಸಾಮರ್ಥ್ಯ ಹೊಂದಿದ್ದು, ಸಂಗ್ರಹವಾಗಿರುವ 19 ಟಿಎಂಸಿಯಲ್ಲಿ ಮೂರರಿಂದ ನಾಲ್ಕು ಟಿಎಂಸಿ ಡೆಡ್ಸ್ಟೋರೇಜ್ ಕಳೆದರೆ 15 ಟಿಎಂಸಿ ಉಳಿಯುತ್ತದೆ.
ನಿತ್ಯ ಹಾಸನ ನಗರಕ್ಕೆ 30 ರಿಂದ 35 ಎಂಎಲ್ಡಿ (ಮಿಲಿಯನ್ ಲೀಟರ್ ಫಾರ್ಡೆ) ನೀರಿನ ಅಗತ್ಯವಿದೆ. ಅರಸೀಕೆರೆ, ಅರಕಲಗೂಡು, ಹೊಳೆನರಸೀಪುರ, ಚನ್ನರಾಯಪಟ್ಟಣ ತಾಲೂಕಿಗೂ ಜಲಾಶಯದಿಂದಲೇ ನೀರು ಹರಿಸಲಾಗುತ್ತದೆ. ಈ ಬಾರಿ ಮಳೆ ಕೊರತೆಯಿಂದ ನಿಗದಿತ ಸಮಯದಲ್ಲಿ ನಾಲೆಗೆ ನೀರು ಬಿಡಲಾಗದೆ ರೈತರ ಒತ್ತಡದ ಬಳಿಕ ನೀರಾವರಿ ಸಲಹಾ ಸಮಿತಿ ಸಭೆಯನ್ನು ಕರೆಯದೆ ನೀರು ಬಿಡಲಾಯಿತು. ಮನಸ್ಸಿಗೆ ಬಂದಾಗ ನೀರು ಬಿಟ್ಟಿರುವ ಪರಿಣಾಮ ರೈತರಿಗೆ ಅನುಕೂಲವಾಗುವುದಿಲ್ಲ ಎಂದು ಶಾಸಕ ಎಚ್.ಡಿ.ರೇವಣ್ಣ ಅಸಮಾಧಾನ ಹೊರಹಾಕಿದ್ದರು.
ಆ. 10ರಿಂದ 1830 ಕ್ಯೂಸೆಕ್ನಿಂದ ನಿತ್ಯ ಹೊರ ಹರಿವನ್ನು ಹೆಚ್ಚಿಸಿಕೊಂಡೇ ಬರುತ್ತಿದ್ದು, 14ರಂದು 4540 ಕ್ಯೂಸೆಕ್, 16ರಂದು 5360 ಸೆ. 11ರಂದು 6090 ಕ್ಯೂಸೆಕ್ ನೀರು ಹೊರ ಬಿಡಲಾಗುತ್ತಿದೆ. ಹೀಗಾಗಿ ನಿತ್ಯ ಜಲಾಶಯದ ನೀರಿನ ಮಟ್ಟ ಕ್ಷೀಣಿಸುತ್ತಿದೆ. ಬೇಸಿಗೆಗೆ ಆರು ತಿಂಗಳು ಇದ್ದು, ಅದುವರೆಗೆ ಜಲಾಶಯದಲ್ಲಿ ಸಂಗ್ರಹವಾಗಿರುವ ನೀರು ಖಾಲಿಯಾದರೆ ಹೇಗೆ ಎಂಬುದು ಜನತೆ ಆತಂಕ.