ರಾಹುಲ್ ಗಾಂಧಿ ದಿಲ್ಲಿಯಲ್ಲಿ ಕರ್ನಾಟಕದ ಕಾಂಗ್ರೆಸ್ ಸರಕಾರದ ಎಲ್ಲ ಸಚಿವರನ್ನು ಕರೆಸಿ ಅತ್ಯಂತ ಸ್ಪಷ್ಟ ಮಾತುಗಳಲ್ಲಿ ಭ್ರಷ್ಟಾಚಾರ ರಹಿತ ಸ್ವಚ್ಛ ಆಡಳಿತ ನೀಡುವಂತೆ ಖಡಕ್ ಸೂಚನೆ ನೀಡಿದ್ದಾರೆಂದು ತಿಳಿದುಬಂದಿದೆ. ಅದು ಸೂಕ್ತವಾದುದೇ ಆಗಿದೆ. ನಾಯಕರಿಗೆ ಆ ಕಾಳಜಿ ಬೇಕೇಬೇಕು. ಯಾಕೆಂದರೆ ಹಿಂದಿನ ಬಿಜೆಪಿ ಸರಕಾರದ ವಿರುದ್ಧ ಶೇ. ೪೦ ಕಮಿಶನ್ ಆರೋಪ ಮಾಡಿಯೇ ಕಾಂಗ್ರೆಸ್ ಪಕ್ಷ ತನ್ನ ಚುನಾವಣಾ ಪ್ರಚಾರ ನಡೆಸಿ ಜನರ ಗಮನ ಸೆಳೆದಿದೆ. ಆದ್ದರಿಂದ ಈಗ ಯಾವ ಕಮಿಶನ್ ಇಲ್ಲದೆ ಪರಿಶುದ್ಧ/ ಪಾರದರ್ಶಕ ಆಡಳಿತ ನೀಡಬೇಕಾದ್ದು ಕಾಂಗ್ರೆಸ್ ನಾಯಕರ ಆದ್ಯ ಕರ್ತವ್ಯ ಮತ್ತು ಜವಾಬ್ದಾರಿ ಕೂಡ.
ಕಳೆದ 60-70 ವರ್ಷಗಳ ಈ ದೇಶದ ರಾಜಕೀಯ ಇತಿಹಾಸ ಬಲ್ಲವರಿಗೆ ಬಹುಕಾಲ ಆಡಳಿತ ನಡೆಸಿದ ಕಾಂಗ್ರೆಸ್ ಪಕ್ಷದ ಕುರಿತೂ ತಿಳಿದಿರುತ್ತದೆ. ಕೊನೆಗೆ 2014ರಲ್ಲಿ ಯುಪಿಎ ಆಡಳಿತ ಮುಕ್ತಾಯವಾದದ್ದೂ ಮಹಾ ಭ್ರಷ್ಟಾಚಾರದ ಆರೋಪಗಳನ್ನು ಹೊತ್ತುಕೊಂಡೇ. ಕಾಂಗ್ರೆಸ್ಸಿಗರ ನೂರಾರು ಹಗರಣ, ಅವ್ಯವಹಾರ, ಕರ್ಮಕಾಂಡಗಳ ಬಗ್ಗೆ ಜನರಿಗೆ ಹೊಸದಾಗಿ ಹೇಳಬೇಕಾದ್ದೇನೂ ಇಲ್ಲ. ಕಾಂಗ್ರೆಸ್ಸಿಗರು ಅವನ್ನು ನಿರಾಕರಿಸುವುದು ಸಹಜವಾದರೂ ಆ ಆರೋಪಗಳು ದಾಖಲೆಯಿಲ್ಲದ್ದೇನಲ್ಲ. ರಾಜ್ಯ ಕಾಂಗ್ರೆಸ್ ನಾಯಕರು ಸಹ ಅದಕ್ಕೆ ಹೊರತಾದವರೇನಲ್ಲ. ನಾವು ಅಪ್ಪಟ ಪ್ರಾಮಾಣಿಕರು, ಭಯಂಕರ ಸಂಭಾವಿತರು ಎಂದೆಲ್ಲ ಹೇಳಿಕೊಳ್ಳುವುದು ಸುಲಭ. ಜನ ನಂಬಬೇಕಾದ್ದು ಮುಖ್ಯ. ರಾಜ್ಯ ಬಿಜೆಪಿ ಮೇಲಿನ ಹಲವು ಅಸಮಾಧಾನ ಮತ್ತು ಗ್ಯಾರಂಟಿಗಳ ಆಸೆಗೆ ಮತದಾರರು ಕಾಂಗ್ರೆಸ್ಸನ್ನು ಅಧಿಕಾರಕ್ಕೆ ತಂದರು. ಹೊರತು ಕಾಂಗ್ರೆಸ್ ಭ್ರಷ್ಟಾಚಾರ ರಹಿತ ಆಡಳಿತ ನೀಡುತ್ತದೆಂಬ ಮಹದಾಸೆಯಿಂದೇನೂ ಅಲ್ಲ. ಅದು ಎಲ್ಲರಿಗೂ ಗೊತ್ತಿರುವ ಸಂಗತಿ.
ಇಂತಹ ಒಂದು ಭ್ರಷ್ಟಾಚಾರದ ಬೃಹತ್ ಹಿನ್ನೆಲೆ ಹೊಂದಿರುವ ಕಾಂಗ್ರೆಸ್ಸು ಕರ್ನಾಟಕದಲ್ಲಿ ಒಮ್ಮಿಂದೊಮ್ಮೆಲೇ ಭ್ರಷ್ಟಾಚಾರ ರಹಿತ ಆಡಳಿತ ನೀಡುತ್ತೇನೆ ಎಂದು ಹೇಳಿಕೊಂಡಾಕ್ಷಣಕ್ಕೆ ಅದನ್ನು ಜನ ಒಮ್ಮೆಲೇ ನಂಬಲು ಸಾದ್ಯವೇ? . ಅದು ಮುಂದಿನ ದಿನಗಳಲ್ಲಿ ಆಡಳಿತದ ಮೂಲಕ ಸಿದ್ಧವಾಗಬೇಕಾದ ವಿಚಾರ. ಮತ್ತು ಅದು ಜನರ ಅನುಭವಕ್ಕೆ ಬರಬೇಕು. ಆದರೆ ರಾಜ್ಯ ಕಾಂಗ್ರೆಸ್ಸಗರಿಗೆ ಅದು ಸಾಧ್ಯವೇ ಎಂಬುದು ಈಗ ನಮ್ಮೆದುರಿಗಿರುವ ಪ್ರಶ್ನೆ. ಸಾಧ್ಯವಾದರೆ ಬಹಳ ಸಂತೋಷ. ಜನ ಮತ್ತೊಮ್ಮೆ ಅವರನ್ನು ಆರಿಸಿತರುತ್ತಾರೆ. ಆದರೆ ಸದ್ಯದ ಮಟ್ಟಿಗಂತೂ ಬಹುತೇಕ ಜನರಲ್ಲಿ ಅಂತಹ ಯಾವ ನಂಬಿಕೆಯೂ ಇದ್ದಂತಿಲ್ಲ. ನಂಬಲು ಅಂತಹ ಆಧಾರವೂ ಇಲ್ಲ. ಇದು ಈಗ ಅಸ್ತಿತ್ವದಲ್ಲಿರುವ ಸರಕಾರಕ್ಕಷ್ಟೇ ಸಂಬಂಧಿಸಿ ಹೇಳುವಂತಹದು ಮತ್ತು ಇದನ್ನು ಸಾಧಿಸಿ ತೋರಿಸುವ ಕೆಲಸವೀಗ ಕಾಂಗ್ರೆಸ್ಸಿನದು. ಇದರ ಅರ್ಥ ಇತರ ಪಕ್ಷಗಳು ಬಹಳ ಪ್ರಾಮಾಣಿಕ ಎಂದೇನಲ್ಲ. ನಾಲ್ಕಾರು ದಶಕಗಳಿಂದ ಬೆಳೆದುಕೊಂಡು ಬಂದ ಅಭ್ಯಾಸ ತಕ್ಷಣ ಮಾಯವಾಗಿಬಿಡುತ್ತದೆಂದು ಯಾರೂ ಭಾವಿಸಿಲ್ಲ ಮತ್ತು ಹಾಗೆ ಭಾವಿಸುವುದೂ ಮೂರ್ಖತನ.
ಅಳಿಯನ ಮುಖ ಬೆಳಗಾದರೆ ಕಾಣುತ್ತದಲ್ಲ ಎಂಬುದು ನಮ್ಮಲ್ಲಿ ಪ್ರಚಾರವಿರುವ ಒಂದು ನಾಣ್ಣುಡಿ. ಕಾದು ನೋಡೋಣ ಆ ಮುಖ ಕಪ್ಪೋ ಬಿಳುಪೋ ಎಂದು.