ಛಾಯಾಗ್ರಹಣವು ನಮ್ಮ ಜೀವನದ ಅವಿಭಾಜ್ಯ ಅಂಗವಾಗಿದೆ. ಈಗಿನ ಸ್ಮಾರ್ಟ್ಫೋನ್ ಕಾಲದಲ್ಲಿ ಎಲ್ಲರೂ ಛಾಯಾಗ್ರಾಹಕರೇ. ಮೊಬೈಲ್ ಫೋನ್ನಲ್ಲಿ ಈಗ ಹಿಂದೆ ನಾಲ್ಕು, ಮುಂದೆ ಒಂದು, ಎರಡು ಕ್ಯಾಮೆರಾಗಳಿವೆ. ಕಣ್ಣುಮುಚ್ಚಿ ತೆರೆಯುವಷ್ಟರಲ್ಲಿ ಸ್ಮಾರ್ಟ್ಫೋನ್ನೊಳಗೆ ಫೋಟೊಗಳು ರೆಡಿಯಾಗುತ್ತವೆ. ಸ್ಮಾರ್ಟ್ಫೋನ್ನಲ್ಲಿ ಎಷ್ಟೇ ಅದ್ಭುತ ಫೋಟೊ ಬರಲಿ. ಆದರೆ, ಡಿಎಸ್ಎಲ್ಆರ್ ಇತ್ಯಾದಿ ಕ್ಯಾಮೆರಾಗಳ ಮೇಲಿನ ಮೋಹ ಕಡಿಮೆಯಾಗಿಲ್ಲ. ಛಾಯಾಗ್ರಹಣವು ಯುವಜನತೆಯ ನೆಚ್ಚಿನ ವೃತ್ತಿ ಕ್ಷೇತ್ರವಾಗಿದ್ದು, ಅನೇಕರು ಇಂದು ಇದನ್ನೇ ತನ್ನ ಜೀವನಾಧಾರವಾಗಿ ಮಾಡಿಕೊಂಡಿದ್ದಾರೆ. ಇನ್ನೂ ಕೆಲವರು ಛಾಯಾಗ್ರಹಣವನ್ನು ಫ್ಯಾಷನ್ ಆಗಿ ಮಾಡಿಕೊಂಡಿದ್ದಾರೆ. ಡೆಗೋರಿಯಾ ಟೈಪ್ ಮತ್ತು ಕ್ಯಾಲೋ ಟೈಪ್ ಎಂಬ ಎರಡೂ ಛಾಯಾಗ್ರಹಣ ಪರಿಕರಗಳನ್ನು 1839ರಲ್ಲಿ ಕಂಡುಹಿಡಿದ ಸವಿನೆನಪಿಗಾಗಿ ಪ್ರತಿ ವರ್ಷ ಆಗಸ್ಟ್ 19ರಂದು ವಿಶ್ವ ಛಾಯಾಗ್ರಹಣ ದಿನವನ್ನು ಆಚರಿಸಲಾಗುತ್ತದೆ.
ವಿಶ್ವ ಛಾಯಾಗ್ರಹಣ ದಿನದ ಇತಿಹಾಸ:
1939ರ ಆಗಸ್ಟ್ 19ರಂದು ಫ್ರಾನ್ಸ್ ದೇಶದಲ್ಲಿ ಮೊದಲ ಬಾರಿಗೆ ವಿಶ್ವ ಛಾಯಾಗ್ರಹಣ ದಿನವನ್ನು ಘೋಷಿಸಲಾಯಿತು. ಆದರೆ ಜಾಗತಿಕ ಮಟ್ಟದಲ್ಲಿ ಛಾಯಾಚಿತ್ರಕ್ಕಿರುವ ಮನ್ನಣೆಯನ್ನು ಗಮನಿಸಿ 2010 ರಲ್ಲಿ ಆಗಸ್ಟ್ 19 ರಂದು ವಿಶ್ವ ಮಟ್ಟದಲ್ಲಿ ಭಾರತವು ಸೇರಿದಂತೆ ಅಂದಾಜು 100 ದೇಶಗಳಲ್ಲಿ ಆನ್ಲೈನ್ ಗ್ಯಾಲರಿಗಳು ಮೊದಲ ಛಾಯಾಗ್ರಹಣ ದಿನವನ್ನು ಆಚರಿಸಿತು.
ವಿಶ್ವ ಛಾಯಾಗ್ರಹಣ ದಿನ ಆಚರಣೆಯ ಮಹತ್ವ:
ಛಾಯಾಗ್ರಾಹಕರು ತಮ್ಮ ಯೋಚನೆಗಳನ್ನು ಹಂಚಿಕೊಳ್ಳಲು, ಪ್ರೋತ್ಸಾಹಿಸುವ ಮೂಲಕ ವಿಶ್ವ, ದೇಶ, ರಾಜ್ಯ ಮಟ್ಟದಲ್ಲಿ ಅತ್ಯುತ್ತಮ ಚಿತ್ರಗಳನ್ನು ಪ್ರದರ್ಶಿಸುವ ಮೂಲಕ ವಿಶ್ವ ಛಾಯಾಗ್ರಹಣ ದಿನವನ್ನು ವಿಶೇಷವಾಗಿ ಆಚರಣೆ ಮಾಡಲಾಗುತ್ತದೆ. ಮಾತ್ರವಲ್ಲದೇ ಈ ದಿನವನ್ನು ಛಾಯಾಗ್ರಹಣ ಕ್ಷೇತ್ರದಲ್ಲಿ ಗಮನಾರ್ಹ ಕೊಡುಗೆ ನೀಡಿದ ಜನರನ್ನು ಗೌರವಿಸಲು ಮತ್ತು ಅವರ ಸಾಧನೆಯನ್ನು ನೆನಪಿಸಲು ಆಚರಿಸಲಾಗುತ್ತದೆ.
ಫೋಟೊಗ್ರಫಿ ಪಯಣ:
*ಲೂಯಿಸ್ ಡಾಗುರೆ ಕಂಡುಹಿಡಿದ “ಡಾಗುರೆ ಮಾದರಿ” ಮೊದಲ ಶಾಶ್ವತ ಛಾಯಾಗ್ರಹಣದ ಚಿತ್ರ. 1826ರಲ್ಲಿ ನಿಪ್ಕೆ ಎಂಬುವರು ಹೆಲಿಯೊಗ್ರಫಿ ಪ್ರಕ್ರಿಯೆ ಮೂಲಕ “ಲೆ ಗ್ರಾಸ್ನಲ್ಲಿ ಕಿಟಕಿ ಮೂಲಕ ವೀಕ್ಷಣೆ” ಹೆಸರಿನಲ್ಲಿ ಶಾಶ್ವತ ಚಿತ್ರವನ್ನು ಸೆರೆ ಹಿಡಿದಿದ್ದರು.
*ಮೊತ್ತ ಮೊದಲ ಬಾಳಿಕೆ ಬರುವ ಬಣ್ಣದ ಛಾಯಾಚಿತ್ರವನ್ನು 1861ರಲ್ಲಿ ಥಾಮಸ್ ಸಟ್ಟರ್ ಎಂಬುವರು ಕಂಡುಹಿಡಿದರು. ಈ ಬಣ್ಣದ ಛಾಯಾಚಿತ್ರವು ಕೆಂಪು, ಹಸಿರು ಮತ್ತು ನೀಲಿ ಫಿಲ್ಟರ್ಗಳ ಮೂಲಕ ತೆಗೆದುಕೊಂಡ ಕಪ್ಪು ಮತ್ತು ಬಿಳಿ ಬಣ್ಣದ ಮೂರು ಛಾಯಾಚಿತ್ರಗಳ ಸೆಟ್ ಆಗಿತ್ತು. ಆದಾಗ್ಯೂ ಆಗ ಬಳಸಲಾದ ಫೋಟೊಗ್ರಾಫಿಕ್ ಎಮಲ್ಷನ್ ಸ್ಪೆಕ್ಟಮ್ಗಳಿಗೆ ಸೂಕ್ಷ್ಮಗ್ರಾಹಿಯಾಗಿರಲಿಲ್ಲ. ಹಾಗಾಗಿ ಫಲಿತಾಂಶವು ಸಾಕಷ್ಟು ಅಪೂರ್ಣವಾಗಿತ್ತು.
*ಮೊದಲ ಡಿಜಿಟಲ್ ಛಾಯಚಿತ್ರವನ್ನು ತೆಗೆದಿದ್ದು 1957ರಲ್ಲಿ. ಅಂದರೆ ಕೊಡಕ್ನ ಎಂಜಿನಿಯರ್ ಡಿಜಿಟಲ್ ಕ್ಯಾಮರಾ ಕಂಡುಹಿಡಿಯುವ 20 ವರ್ಷಗಳ ಹಿಂದೆಯೇ ಡಿಜಿಟಲ್ ಫೋಟೊವನ್ನು ತೆಗೆಯಲಾಗಿತ್ತು. ಈ ಚಿತ್ರವು ಡಿಜಿಟಲ್ ಸ್ಕ್ಯಾನ್ ಶಾಟ್ ಆಗಿದ್ದು, 176*176 ರೆಸಲ್ಯೂಶನ್ನಲ್ಲಿ ಕಿಸ್ಚ್ರ್ ಅವರ ಮಗನ ಚಿತ್ರವನ್ನು ಕ್ಲಿಕ್ಕಿಸಲಾಗಿತ್ತು.
ಉದ್ಯಮವಾಗಿ ಫೋಟೋಗ್ರಫಿ:
ಇಂದು ಫೋಟೋಗ್ರಫಿ ಎನ್ನುವುದು ಒಂದು ದೊಡ್ಡ ಉದ್ಯಮವಾಗಿದೆ. ಫೋಟೋಗ್ರಫಿ ಉದ್ಯಮವು ಈಗ ಎಲ್ಲಾ ಕ್ಷೇತ್ರಗಳಲ್ಲಿ ತನ್ನ ಛಾಪನ್ನ ಮೂಡಿಸಿದೆ. ಲಕ್ಷಾಂತರ ಯುವ ಜನರು ಫೋಟೋಗ್ರಫಿಯಿಂದಲೇ ತಮ್ಮ ಬದುಕು ಕಟ್ಟಿಕೊಳ್ಳುತ್ತಿದ್ದಾರೆ. ಇಂದಿನ ಯುಗದಲ್ಲಿ ಫೋಟೋಗ್ರಫಿ ಎಂದರೆ, ಅದು ಕೇವಲ ಫೋಟೋ ತೆಗೆಯುವುದು ಮಾತ್ರವಲ್ಲ, ಮದುವೆ, ಸಭೆ, ಸಮಾರಂಭಗಳಲ್ಲಿ ವಿಡಿಯೋಗಳನ್ನು ಸೆರೆ ಹಿಡಿದು ಅದನ್ನು ಸುಂದರವಾಗಿ ಕಟ್ಟಿಕೊಡುವ ಒಂದು ಕಲೆಯೂ ಆಗಿದೆ. ಇಂದು ವೆಡ್ಡಿಂಗ್ ಫೋಟೋಗ್ರಫಿ, ಸಿನಿಮಾ ಫೋಟೋಗ್ರಫಿ ಎಂಬ ಹೆಸರಿನಲ್ಲಿ ದೊಡ್ಡ ಉದ್ದಿಮೆಯಾಗಿ ಬೆಳೆದು ನಿಂತಿದೆ