ಎಲ್ಲ ವೈದ್ಯರೂ ಜನರಿಕ್ ಔಷಧವನ್ನು ಬರೆದು ಶಿಫಾರಸು ಮಾಡುವುದು ಇನ್ಮೇಲೆ ಕಡ್ಡಾಯ. ತಪ್ಪಿದರೆ ಅಂಥ ವೈದ್ಯರಿಗೆ ದಂಡ ಕೂಡ ಬೀಳಲಿದೆ. ರಾಷ್ಟ್ರೀಯ ವೈದ್ಯಕೀಯ ಆಯೋಗ (ಎನ್ಎಂಸಿ) ಇಂಥದ್ದೊಂದು ಮಹತ್ವದ ಸೂಚನೆಯನ್ನು ನೀಡಿದೆ. ವೈದ್ಯರು ಜನರಿಕ್ ಔಷಧವನ್ನು ಬರೆಯಬೇಕು ಎಂದು ರಾಷ್ಟ್ರೀಯ ವೈದ್ಯಕೀಯ ಆಯೋಗ ಸೂಚನೆ ನೀಡುತ್ತಿರುವುದು ಇದೇ ಮೊದಲಲ್ಲದಿದ್ದರೂ ಇದೇ ಪ್ರಥಮ ಬಾರಿಗೆ ತಪ್ಪಿತಸ್ಥರಿಗೆ ದಂಡ ವಿಧಿಸಲೂ ಕೂಡಾ ಮುಂದಾಗಿದೆ.
ರಾಷ್ಟ್ರೀಯ ವೈದ್ಯಕೀಯ ಆಯೋಗದ ‘ರೆಗ್ಯುಲೇಷನ್ಸ್ ರಿಲೇಟಿಂಗ್ ಟು ಪ್ರೊಫೆಷನಲ್ ಕಂಡಕ್ಟ್ ಆಫ್ ರಿಜಿಸ್ಟರ್ಡ್ ಮೆಡಿಕಲ್ ಪ್ರ್ಯಾಕ್ಟಿಷಿನರ್ಸ್’ ಪ್ರಕಾರ ವೈದ್ಯರು ಜನರಿಕ್ ಔಷಧವನ್ನು ಬರೆದುಕೊಡುವುದಲ್ಲದೆ, ಬ್ರ್ಯಾಂಡೆಡ್ ಜನರಿಕ್ ಔಷಧವನ್ನು ಬರೆಯುವುದನ್ನು ತಪ್ಪಿಸಬೇಕು ಎಂದೂ ಸೂಚನೆ ನೀಡಲಾಗಿದೆ. ಆಯೋಗದಿಂದ ಆಗೋಸ್ಟ್ 2ರಂದು ಈ ಮಹತ್ವದ ಸೂಚನೆಯನ್ನು ಹೊರಡಿಸಿದೆ.
ಭಾರತದಲ್ಲಿ ಆರೋಗ್ಯಕ್ಕೆ ಸಂಬಂಧಿಸಿದಂತೆ ಸಾರ್ವಜನಿಕರು ದೊಡ್ಡ ಮೊತ್ತವನ್ನು ಖರ್ಚು ಮಾಡುತ್ತಿದ್ದಾರೆ. ಆದರೆ ಬ್ರ್ಯಾಂಡೆಡ್ ಔಷಧಗಳಿಗಿಂತ ಜನರಿಕ್ ಔಷಧ ಶೇ. 30ರಿಂದ 80ರಷ್ಟು ಕಡಿಮೆ ಬೆಲೆಯದ್ದಾಗಿದ್ದು, ವೈದ್ಯರು ಅಂಥ ಔಷಧಗಳನ್ನೇ ರೋಗಿಗಳಿಗೆ ಸೂಚಿಸಬೇಕು ಎಂದು ಆಯೋಗ ಹೇಳಿದೆ. ವೈದ್ಯರು ಜನರಿಕ್ ಔಷಧವನ್ನು ಬರೆಯದಿದ್ದಲ್ಲಿ ಅವರಿಗೆ ದಂಡ ವಿಧಿಸಲಾಗುವುದು. ಪದೇಪದೆ ಉಲ್ಲಂಘಿಸಿದರೆ ಅಂಥವರ ಪರವಾನಗಿಯನ್ನು ಅಮಾನತಿನಲ್ಲಿ ಇಡಲಾಗುವುದು ಎಂದೂ ರಾಷ್ಟ್ರೀಯ ವೈದ್ಯಕೀಯ ಆಯೋಗ ಹೇಳಿದೆ.
ಜೆನೆರಿಕ್ ಔಷಧ ಕಳೆದ ಹಲವು ವರ್ಷಗಳಿಂದ ಈ ಹೆಸರು ಸಾಕಷ್ಟು ಸದ್ದು ಮಾಡ್ತಿದೆ. ಬ್ರಾಂಡೆಡ್ ಔಷಧಗಳ ಬದಲಾಗಿ ಜೆನೆರಿಕ್ ಔಷಧ ಬಳಕೆ ಮಾಡಿದರೆ ಅತಿ ಕಡಿಮೆ ದರಕ್ಕೆ ಗುಣಮಟ್ಟದ ಔಷಧಗಳು ಸಿಗುತ್ತವೆ. ಇದಕ್ಕಾಗಿಯೇ ಪ್ರಧಾನ ಮಂತ್ರಿ ಜನೌಷಧ ಕೇಂದ್ರಗಳನ್ನು ನಗರಗಳಲ್ಲಿ ಅಲ್ಲಲ್ಲಿ ಆರಂಭಗೋಳಿಸಲಾಗಿದೆ. ಆದರೆ ವೈದ್ಯರು ಮಾತ್ರ ರೋಗಿಗಳಿಗೆ ಜೆನೆರಿಕ್ ಔಷಧ ಬರೆದು ಕೊಡ್ತಿಲ್ಲ ಅನ್ನೋ ಆರೋಪಗಳು ಕೇಳಿ ಬರುತ್ತಿದ್ದವು.
ವೈದ್ಯರು ಜನರಿಕ್ ಔಷಧವನ್ನು ಶಿಫಾರಸ್ಸು ಮಾಡದಿರಲು ಮುಖ್ಯ ಕಾರಣ ಯಾವುದೇ ಜೆನೆರಿಕ್ ಔಷಧಕ್ಕೆ ಬ್ರಾಂಡ್ ನೇಮ್ ಇರೋದಿಲ್ಲ. ಹೀಗಾಗಿ, ವೈದ್ಯರು ರಾಸಾಯನಿಕ ಸಮ್ಮಿಶ್ರಣ (ಕೆಮಿಕಲ್ ಕಾಂಪೋಸೀಷನ್) ಬರೆದು ಕೊಡಬೇಕಾಗುತ್ತದೆ. ಆದ್ರೆ, ಸಾಮಾನ್ಯವಾಗಿ ಒಂದೇ ರಾಸಾಯನಿಕ ಸಮ್ಮಿಶ್ರಣದ ಔಷಧವನ್ನು ಬರೆದುಕೊಡಲು ಆಗೋದಿಲ್ಲ. ಉದಾಹರಣೆಗೆ ಮಲ್ಟಿ ವಿಟಮಿನ್ ಕ್ಯಾಪ್ಸೂಲ್ನಲ್ಲಿ ಹತ್ತಾರು ರಾಸಾಯನಿಕಗಳ ಸೂಕ್ತ ಸಮ್ಮಿಶ್ರಣ ಇರುತ್ತದೆ. ಇವನ್ನೆಲ್ಲಾ ಬರೆಯೋಕೆ ಸಾಕಷ್ಟು ಸಮಯ ಬೇಕಾಗುತ್ತದೆ. ಜೊತೆಗೆ ಸ್ಪೆಲಿಂಗ್ ಮಿಸ್ಟೇಕ್ ಆದರೆ ಸಮಸ್ಯೆಯಾಗುತ್ತದೆ. ಇನ್ನು ರೋಗಿಗಳು ಜನೌಷಧ ಕೇಂದ್ರಕ್ಕೆ ಹೋದರೆ ಮಾತ್ರ ಈ ಜೆನೆರಿಕ್ ಔಷಧ ಸಿಗುತ್ತದೆ. ಹಾಗಾಗಿ ಜನರು ಜನೌಷಧ ಕೇಂದ್ರವನ್ನು ಹುಡುಕಿಕೊಂಡು ಹೋಗಬೇಕು ಅಷ್ಟೇ.
ಯುಎಸ್ಎಫ್ಡಿಎ ಪ್ರಕಾರ, ಜೆನೆರಿಕ್ ಔಷಧ ಅಥವಾ ಜೆನೆರಿಕ್ ಔಷಧವು ಡೋಸೇಜ್ ರೂಪದಲ್ಲಿ, ಸುರಕ್ಷತೆ, ಶಕ್ತಿ, ಆಡಳಿತದ ಮಾರ್ಗ, ಗುಣಮಟ್ಟ, ಕಾರ್ಯಕ್ಷಮತೆಯ ಗುಣಲಕ್ಷಣಗಳು ಮತ್ತು ಉದ್ದೇಶಿತ ಬಳಕೆಯಲ್ಲಿ ಈಗಾಗಲೇ ಮಾರುಕಟ್ಟೆಯಲ್ಲಿರುವ ಬ್ರಾಂಡ್-ಹೆಸರಿನ ಔಷಧದಂತೆಯೇ ರಚಿಸಲಾದ ಔಷಧಿಯಾಗಿದೆ.
ಗುಣಮಟ್ಟದ ವಿಷಯದ ಬಗ್ಗೆ ಹೇಳುವುದಾದರೆ ಖಾಸಗಿ ಕಂಪನಿಗಳು ತಯಾರು ಮಾಡುವ ಔಷಧ ಸಮ್ಮಿಶ್ರಣಗಳನ್ನೇ ಸರ್ಕಾರದ ನಿಯಂತ್ರಣಕ್ಕೆ ಒಳಪಟ್ಟಿರುವ ಕಂಪನಿಗಳು ಕೂಡಾ ತಯಾರು ಮಾಡುತ್ತವೆ. ಆದರೆ, ಈ ಔಷಧಗಳು ಯಾವುದೇ ಒಂದು ನಿರ್ದಿಷ್ಟ ಕಂಪನಿಗೆ ಸಂಬಂಧಿಸಿರುವುದಿಲ್ಲ. ಇವುಗಳನ್ನೇ ಜೆನೆರಿಕ್ ಔಷಧ ಎನ್ನಲಾಗುತ್ತದೆ. ಜನಪ್ರಿಯ ಕಂಪನಿಗಳ ಬ್ರಾಂಡೆಡ್ ಔಷಧ ಹಾಗೂ ಸರ್ಕಾರದ ನಿಯಂತ್ರಣಕ್ಕೆ ಒಳಪಟ್ಟಿರುವ ಕಂಪನಿಗಳು ತಯಾರಿಸುವ ಜೆನೆರಿಕ್ ಔಷಧದಲ್ಲಿ ರಾಸಾಯನಿಕ ಸಮ್ಮಿಶ್ರಣ ವ್ಯತ್ಯಾಸ ಇರೋದಿಲ್ಲ. ಖಾಸಗಿ ಕಂಪೆನಿಗಳ ಔಷಧಿಗಳಿಗೆ ಹೋಲಿಸಿದ್ದರೆ ಸರ್ಕಾರಿ ನಿಯಂತ್ರಣದ ಕಂಪನಿಗಳ ಜೆನೆರಿಕ್ ಔಷಧಗಳ ಬೆಲೆ ಕಡಿಮೆ ಇರುತ್ತದೆ.
ಇನ್ನು ಬೆಲೆ ಕಡಿಮೆಗೆ ಮುಖ್ಯ ಕಾರಣ ಜೆನೆರಿಕ್ ಔಷಧಕ್ಕೆ ಪೇಟೆಂಟ್ ಇರೋದಿಲ್ಲ. ಬ್ರ್ಯಾಂಡ್ ಇಲ್ಲವಾದ ಕಾರಣ ಅದರ ಮಾರ್ಕೆಟಿಂಗ್, ಪ್ರಚಾರ, ಮಾರುಕಟ್ಟೆ ವೆಚ್ಚಗಳು ಇರೋದಿಲ್ಲ. ವಿಶೇಷವಾದ ಯಾವುದೇ ಖರ್ಚುಗಳೂ ಇರೋದಿಲ್ಲ. ಸರ್ಕಾರದ ನಿಯಂತ್ರಣದಲ್ಲಿ ಇರುವ ಸಂಸ್ಥೆಗಳೇ ಉತ್ಪಾದನೆ ಮಾಡೋದ್ರಿಂದ ತಯಾರಿಕಾ ವೆಚ್ಚ ಕೂಡಾ ಕಡಿಮೆ ಇರುತ್ತದೆ. ಹೀಗಾಗಿ, ಬ್ರಾಂಡೆಡ್ ಔಷಧಕ್ಕಿಂತಲೂ ಜೆನೆರಿಕ್ ಔಷಧಗಳ ಬೆಲೆ ಅರ್ಧಕ್ಕೂ ಹೆಚ್ಚು ಕಡಿಮೆ ಇರುತ್ತದೆ. ಜೆನೆರಿಕ್ ಔಷಧ ಹಾಗೂ ಬ್ರಾಂಡೆಡ್ ಔಷಧಗಳ ನಡುವೆ ಬೆಲೆ ವ್ಯತ್ಯಾಸದ ಹೊರತಾಗಿ ಬೇರೆ ಯಾವುದೇ ವ್ಯತ್ಯಾಸ ಇರೋದಿಲ್ಲ.
ರಾಷ್ಟ್ರೀಯ ವೈದ್ಯಕೀಯ ಆಯೋಗ ಇಂತಹ ಒಂದು ಸೂಚನೆಯನ್ನು ಜಾರಿಗೋಳಿಸಿರುವುದು ಸ್ವಾಗತಾರ್ಹ ಆದರೆ ಅದರ ಲಾಭ ಪಡೆಯುವುದು ಜನರ ಕೈಯಲ್ಲಿದೆ. ದುಬಾರಿ ಔಷಧಿ ಮತ್ತು ಕಡಿಮೆ ವೆಚ್ಚದ ಔಷಧಿಯ ಗುಣಮಟ್ಟದಲ್ಲಿ ಯಾವುದೇ ವ್ಯತ್ಯಾಸ ಇರುವುದಿಲ್ಲ. ಇನ್ನು ಭಾರತದ ಜನರಿಕ್ ಔಷಧಿಗಳಿಗೆ ವಿದೇಶದಲ್ಲಿಯೂ ಬಹಳ ಬೇಡಿಕೆ ಇರುವುದಂತು ಸತ್ಯ. ಆದರೆ ಒಂದು ಸವಾಲು ಜನ ಔಷಧಿ ಕೇಂದ್ರದಲ್ಲಿ ಮಾತ್ರೆಯನ್ನು ವಿತರಿಸುವವರಿಗೆ ರಾಸಾಯನಿಕ ಸಮ್ಮಿಶ್ರಣದ ಜ್ಞಾನ ಕೂಡಾ ಅವಶ್ಯಕವಾಗಿರ ಬೇಕಾಗುತ್ತದೆ.
ಜನರಿಕ್ ಔಷಧ ವಸ್ತು ವಿಷಯವನ್ನು ಇಟ್ಟುಕೊಂಡು ಬಾಲಿವುಡ್ ನಟ ಅಮೀರ್ ಖಾನ್ ತನ್ನ ಸತ್ಯಮೇವ ಜಯತೆ ಯಲ್ಲಿ ಜನರಿಕ್ ಔಷಧದ ಕುರಿತಾದ ವಿಷಯವನ್ನು ಚರ್ಚೆಗೆ ತರಲಾಯಿತ್ತು. ಇನ್ನು ಕನ್ನಡದ ಹೆಬ್ಬುಲಿ ಚಿತ್ರದಲ್ಲೂ ಜನರಿಕ್ ಔಷಧದ ಕುರಿತಾದ ವಸ್ತು ವಿಷಯವನ್ನು ಇಟ್ಟುಕೊಂಡು ಸಿನಿಮಾ ಮಾಡಿರೊದನ್ನ ಇಲ್ಲಿ ಸ್ಮರಿಸಬಹುದು.