ಇಂಫಾಲ್: ಕಳೆದ ಆಗಸ್ಟ್ 6 ರಂದು ಕ್ವಾಕ್ಟಾ ಪಟ್ಟಣವನ್ನು ಬೆಚ್ಚಿಬೀಳಿಸಿದ ಹಿಂಸಾಚಾರದ ಸಂದರ್ಭದಲ್ಲಿ ಬಿಷ್ಣುಪುರ್ ಪೊಲೀಸ್ ಸಿಬ್ಬಂದಿಗೆ ಕರ್ತವ್ಯಕ್ಕೆ ಅಡ್ಡಿಪಡಿಸಿದ ಆರೋಪದ ಮೇಲೆ ಮಣಿಪುರ ಪೊಲೀಸರು ಅಸ್ಸಾಂ ರೈಫಲ್ಸ್ ಸಿಬ್ಬಂದಿ ವಿರುದ್ಧ ಸ್ವಯಂಪ್ರೇರಿತ ಎಫ್ಐಆರ್ ದಾಖಲಿಸಿದ್ದಾರೆ. ಪೊಲೀಸರು ಮತ್ತು ಎಆರ್ ಸಿಬ್ಬಂದಿಗಳ ನಡುವಿನ ತೀವ್ರ ಮಾತಿನ ಚಕಮಕಿಯ ವಿಡಿಯೋ ಈ ಹಿಂದೆ ವೈರಲ್ ಆಗಿತ್ತು.
ಬಿಷ್ಣುಪುರ್ ಜಿಲ್ಲೆಯ ಫೌಗಕ್ಚಾವೊ ಪೊಲೀಸ್ ಠಾಣೆಯ ಉಸ್ತುವಾರಿ ಅಧಿಕಾರಿ ದಾಖಲಿಸಿದ ಎಫ್ಐಆರ್ ಪ್ರಕಾರ ಸರ್ಕಾರಿ ನೌಕರರ ಕರ್ತವ್ಯ ನಿರ್ವಹಣೆಗೆ ಅಡ್ಡಿಪಡಿಸುವುದು, ಸರ್ಕಾರಿ ಸೇವಕನಿಗೆ ಹಲ್ಲೆ ನಡೆಸುವ ಬೆದರಿಕೆ, ಕ್ರಿಮಿನಲ್ ಬೆದರಿಕೆಯ ಸೆಕ್ಷನ್ಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಆಗಸ್ಟ್ 3ರ ಮುಂಜಾನೆ, ಕ್ವಾಕ್ಟಾದಲ್ಲಿನ ಅವರ ಮನೆಗಳಲ್ಲಿ ಮೈತೇಯಿ ಸಮುದಾಯದ ಮೂರು ಜನರು ಕೊಲ್ಲಲ್ಪಟ್ಟರು. ನಂತರ ಮೈತೇಯಿ ಜನಾಂಗ ಪ್ರಾಬಲ್ಯದ ಬಿಷ್ಣುಪುರ್ ಜಿಲ್ಲೆಯ ಗಡಿಯಲ್ಲಿ ಪಟ್ಟಣಕ್ಕೆ ಸಮೀಪದಲ್ಲಿ ಭಾರೀ ಗುಂಡಿನ ದಾಳಿ ಪ್ರಾರಂಭವಾಯಿತು.
ಕುಕಿ-ಜೋಮಿ ಜನಾಂಗವು ಚುರಾಚಂದ್ಪುರ ಜಿಲ್ಲೆಯಲ್ಲಿ ಪ್ರಾಬಲ್ಯವನ್ನು ಹೊಂದಿದೆ. ಈ ಹತ್ಯೆಗಳು “ಶಂಕಿತ ಕುಕಿ ಉಗ್ರಗಾಮಿಗಳ” ಕೈವಾಡ ಎಂದು ಪೊಲೀಸರು ಹೇಳಿದ್ದಾರೆ.
ಎಫ್ಐಆರ್ ಪ್ರಕಾರ ಆ ದಿನ ಬೆಳಿಗ್ಗೆ 6:30 ರ ಸುಮಾರಿಗೆ ಬಿಷ್ಣುಪುರ್ ಜಿಲ್ಲೆಯ ರಾಜ್ಯ ಪೊಲೀಸರ ತಂಡಗಳು ಕ್ವಾಕ್ಟಾ ವಾರ್ಡ್ 8 ರ ಮೂಲಕ ಚುರಾಚಂದ್ ಪುರ ಜಿಲ್ಲೆಯ ಫೋಲ್ಜಾಂಗ್ ಗ್ರಾಮಕ್ಕೆ ತೆರಳುತ್ತಿದ್ದಾಗ ಈ ಘಟನೆ ನಡೆದಿದೆ ಎಂದು ತಿಳಿಸಿದ್ದಾರೆ. “ಕ್ವಾಕ್ಟಾ ಮತ್ತು ಫೋಲ್ಜಾಂಗ್ ಗ್ರಾಮದ ನಡುವಿನ ಪಕ್ಕದ ಪ್ರದೇಶದಲ್ಲಿ ಆಶ್ರಯ ಪಡೆದಿರಬಹುದಾದ ಆರೋಪಿಗಳಾದ ಕುಕಿ ಉಗ್ರಗಾಮಿಗಳನ್ನು ಪತ್ತೆಹಚ್ಚಲು ಕಾರ್ಯಾಚರಣೆ ನಡೆಸಲಾಗುತಿತ್ತು.
9ನೇ ಅಸ್ಸಾಂ ರೈಫಲ್ಸ್ನ (ಏಅರ್) ಸಿಬ್ಬಂದಿಗಳು ಕ್ವಾಕ್ಟಾ – ಫೋಲ್ಜಾಂಗ್ ರಸ್ತೆಯ ಮಧ್ಯದಲ್ಲಿ ಸೈನಿಕರನ್ನು ಸಾಗಿಸಲು ಬಳಸುತ್ತಿದ್ದ ಶಸ್ತ್ರಸಜ್ಜಿತ ವಾಹನಗಳನ್ನು ಅಡ್ಡಲಾಗಿ ನಿಲ್ಲಿಸಿ ಪೋಲೀಸರ ತಂಡಗಳನ್ನು “ತಡೆದು ನಿಲ್ಲಿಸಿದರು” ಎಂದು ದೂರಿನಲ್ಲಿ ಹೇಳಲಾಗಿದೆ. 9 ನೇ ಎಆರ್ನ ಸಿಬ್ಬಂದಿಯ ಇಂತಹ ದುರಹಂಕಾರದ ಕೃತ್ಯವು ಆರೋಪಿ ಕುಕಿ ಉಗ್ರಗಾಮಿಗಳಿಗೆ ತಪ್ಪಿಸಿಕೊಳ್ಳಲು ಅವಕಾಶವನ್ನು ನೀಡಿತು ಎಂದು ದೂರಿನಲ್ಲಿ ಹೇಳಲಾಗಿದೆ.
ಆಗ ನಡೆದ ಮಾತಿನ ಚಕಮಕಿಯ ವಿಡಿಯೋದಲ್ಲಿ ಪೊಲೀಸ್ ಸಿಬ್ಬಂದಿ ಎಆರ್ ವಾಹನಗಳನ್ನು ತೆಗೆಯಬೇಕೆಂದು ಒತ್ತಾಯಿಸುತ್ತಿರುವುದು ಮತ್ತು ಸೇನಾ ಸಿಬ್ಬಂದಿ ಕರ್ತವ್ಯಕ್ಕೆ ಅಡ್ಡಿ ಪಡಿಸುತ್ತಿದ್ದೀರಾ ಎಂದು ಆರೋಪಿಸುತ್ತಿರುವುದು ಕಂಡು ಬಂದಿದೆ. ಈ ಕುರಿತು ರಕ್ಷಣಾ ಇಲಾಖೆಯ ವಕ್ತಾರರನ್ನು ಸಂಪರ್ಕಿಸಿದಾಗ, ಎಆರ್ ವಾಹನಗಳನ್ನು ಮೈತೇಯಿ ಮತ್ತು ಕುಕಿ-ಜೋಮಿ ಪ್ರಾಬಲ್ಯದ ಪ್ರದೇಶಗಳ ನಡುವೆ “ಬಫರ್ ವಲಯ” ದಲ್ಲಿ ಇರಿಸಲಾಗಿದೆ ಮತ್ತು ಬಿಷ್ಣುಪುರ್ ಜಿಲ್ಲೆ ಅಥವಾ ಚುರಾಚಂದ್ಪುರ ಜಿಲ್ಲೆಯಲ್ಲಿ ಕಾರ್ಯಾಚರಣೆ ನಡೆಸಲು ಮಣಿಪುರ ಪೊಲೀಸ್ ಸಿಬ್ಬಂದಿಗೆ ಅನುಮತಿ ನೀಡಲಾಗುವುದಿಲ್ಲ ಎಂದು ಹೇಳಿದರು.
ಮೈತೇಯಿ ಪ್ರಾಬಲ್ಯದ ಕಣಿವೆಯಲ್ಲಿ ಅಸ್ಸಾಂ ರೈಫಲ್ಸ್ ವಿರುದ್ಧ ಬೆಳೆಯುತ್ತಿರುವ ಮತ್ತೊಂದು ಬೆಳವಣಿಗೆಯಲ್ಲಿ, ಬಿಜೆಪಿಯ ಮಣಿಪುರ ರಾಜ್ಯ ಘಟಕವು ಅಸ್ಸಾಂ ರೈಫಲ್ಸ್ ಅನ್ನು ಶಾಶ್ವತವಾಗಿ ಹೊರಕಳಿಸುವಂತೆ ಒತ್ತಾಯಿಸಿ ಪದಾಧಿಕಾರಿಗಳ ಸಹಿಯೊಂದಿಗೆ ಮನವಿ ಪತ್ರವನ್ನು ಪ್ರಧಾನಿಗೆ ಸಲ್ಲಿಸಿದೆ. ರಾಜ್ಯ “ಸಾರ್ವಜನಿಕರ ಹಿತಾಸಕ್ತಿಯ ದೃಷ್ಟಿಯಿಂದ ಅಸ್ಸಾಂ ರೈಫಲ್ಸ್ ಹಿಂತೆಗೆದುಕೊಂಡು “ಇತರ ಯಾವುದೇ ಅರೆಸೇನಾ ಪಡೆಗಳನ್ನು ಕಳಿಸುವಂತೆ ಒತ್ತಾಯಿಸಿದೆ. ಅಸ್ಸಾಂ ರೈಫಲ್ಸ್ ಪಡೆಗಳು ಒಂದು ಜನಾಂಗದ ಪರ ಮೈತೇಯನ್ನರ ವಿರುದ್ದ ಕೆಲಸ ಮಾಡುತ್ತಿವೆ ಎಂದೂ ಆರೋಪಿಸಲಾಗಿದೆ.
ಮಣಿಪುರ ಪೋಲೀಸರನ್ನು ಅಸ್ಸಾಂ ರೈಫಲ್ಸ್ ತಡೆದು ಕುಕಿ ಉಗ್ರಗಾಮಿಗಳು ತಪ್ಪಿಸಿಕೊಳ್ಳಲು ಸಹಾಯ ಮಾಡಿದೆ ಅಲ್ಲದೆ “ಅನೇಕ ಸಂದರ್ಭಗಳಲ್ಲಿ, ಅಸ್ಸಾಂ ರೈಫಲ್ಸ್ ಇದೇ ರೀತಿ ವರ್ತಿಸಿದೆ” ಎಂದು ಪತ್ರದಲ್ಲಿ ಆರೋಪಿಸಿದೆ.