ಹಿರಿಯರು ‘ಬಿಸಿ ಬಿಸಿ ಹಾಲಿಗೆ ನಾಲ್ಕೈದು ಗರಿ ಕುಂಕುಮ ಕೇಸರಿಯನ್ನು ಹಾಕಿ ಸ್ವಲ್ಪ ಹೊತ್ತು ದೇವರ ಮುಂದೆ ಇಟ್ಟು ಗರ್ಭಿಣಿಯರಿಗೆ ಕುಡಿಯಲು ಕೊಡುತ್ತಾರೆ’. ಗರ್ಭಾವಸ್ಥೆಯಲ್ಲಿ ಕೇಸರಿ ಹಾಲು ಕುಡಿಯವುದರಿಂದ ಮಗುವು ಕೆಂಪು ಕೆಂಪಾಗಿ ಹುಟ್ಟುತ್ತದೆ ಎಂದು ಅವರು ನಂಬುತ್ತಾರೆ.
ವಾಸ್ತವವಾಗಿ, ಕೇಸರಿಯು ಅನೇಕ ಭಕ್ಷ್ಯಗಳಿಗೆ ಬಳಸಲಾಗುತ್ತದೆ. ಅಲ್ಲದೆ, ಇದು ವಿಶ್ವದ ಅತ್ಯಂತ ದುಬಾರಿ ಮಸಾಲೆ ಕೂಡ ಹೌದು. ಇದು ಆಸ್ತಮಾ, ಕೆಮ್ಮು, ಕಫ, ನಿದ್ರಾಹೀನತೆ, ಕ್ಯಾನ್ಸರ್ನಂತಹ ಅನೇಕ ಸಮಸ್ಯೆಗಳಿಗೆ ಪರಿಣಾಮಕಾರಿಯಾಗಿ ಚಿಕಿತ್ಸೆ ನೀಡುತ್ತದೆ. ಸುಂದರವಾದ ಮಗು ಬೇಕು ಎಂದು ಗರ್ಭಿಣಿಯರು ಅಡ್ಡದಿಡ್ಡಿಯಾಗಿ ಕೇಸರಿ ಹಾಲನ್ನು ಸೇವಿಸುವಂತಿಲ್ಲ. ಇದನ್ನು ಯಾವಾಗ ಕುಡಿಯಬೇಕು? ಹೆಚ್ಚಾಗಿ ಕುಡಿಯುವುದರಿಂದ ಆಗುವ ಪರಿಣಾಮಗಳೇನು?
ಕೇಸರಿ ಗರ್ಭಪಾತಕ್ಕೆ ಕಾರಣವಾಗುತ್ತದೆಯೇ?
ಅಧ್ಯಯನದ ಪ್ರಕಾರ, ಕುಂಕುಮ ಕೇಸರಿಯನ್ನು ನಿರ್ದಿಷ್ಟ ಅವಧಿಯಲ್ಲಿ ಇಂತಿಷ್ಟೇ ಪ್ರಮಾಣದಲ್ಲಿ ಸೇವಿಸಬೇಕು ಎಂಬ ನಿಯಮವಿದೆ. ಹೆಚ್ಚಿನ ಪ್ರಮಾಣದಲ್ಲಿ ಕೇಸರಿ ಮಿಶ್ರಿತ ಹಾಲು ಕುಡಿಯುವುದರಿಂದ ವಿಷವಾಗಿ ಮಾರ್ಪಾಟಾತ್ತದೆ. ಅದು ಗರ್ಭಿಣಿ ಹಾಗು ಭ್ರೂಣಕ್ಕೆ ತೊಂದರೆಯನ್ನು ಉಂಟು ಮಾಡಬಹುದು. ಅಲ್ಲದೆ, ಅಕಾಲಿಕ ಹೆರಿಗೆ ಮತ್ತು ಗರ್ಭಪಾತಕ್ಕೆ ನೇರವಾಗಿ ಕಾರಣವಾಗಬಹುದು.
ಅಡ್ಡಪರಿಣಾಮಗಳು
ನೀವು ಕುಂಕುಮ ಕೇಸರಿಯನ್ನು ಹೆಚ್ಚಾಗಿ ಸೇವನೆ ಮಾಡಿದಾಗ ಈ ಕೆಳಗಿನ ಅಡ್ಡಪರಿಣಾಮಗಳನ್ನು ಹೊಂದಬಹುದು.
ಆತಂಕ
ಬಾಯಿ ಒಣಗುವುದು
ಮೂಗಿನಿಂದ ರಕ್ತಸ್ತಾವ
ವಾಕರಿಕೆ
ತುಟಿಗಳು ಮರಗಟ್ಟುವಿಕೆ
ರಕ್ತಸಿಕ್ತ ಅತಿಸಾರ
ವಾಂತಿ ಉಂಟಾಗಬಹುದು.
ಹೆಚ್ಚಿನ ಕುಂಕುಮ ಕೇಸರಿ ಸೇವಿಸಿದಾಗ ಭ್ರೂಣದ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ?
ಸಾಮಾನ್ಯವಾಗಿ ಹೆಚ್ಚಿನ ಪ್ರಮಾಣದ ಕೇಸರಿಯನ್ನು ತೆಗೆದುಕೊಳ್ಳುವುದರಿಂದ ಅಸುರಕ್ಷಿತ ಎಂದು ಹೇಳಲಾಗುತ್ತದೆ. ಇದು ಗರ್ಭಾಶಯವನ್ನು ಸಂಕುಚಿತಗೊಳಿಸಿ, ಗರ್ಭಪಾತವಾಗಲು ಪ್ರಚೋದಿಸಬಹುದು.
ಅಲ್ಲದೆ, ಇದು ಅಲರ್ಜಿ ಹೊಂದಿರುವವರಿಗೆ ಉಲ್ಬಣಗೊಳ್ಳುವ ಸಾಧ್ಯತೆಗಳಿರುತ್ತವೆ. ಈ ಕೇಸರಿಯು ದೇಹದಲ್ಲಿ ಉಷ್ಣತೆಯನ್ನು ಹೆಚ್ಚಿಸಲು ಉತ್ತೇಜಿಸುತ್ತದೆ. ಗರ್ಭಿಣಿಯರು ತಂಪಾಗಿರುವ ಆಹಾರ ಪದಾರ್ಥಗಳನ್ನು ತೆಗೆದುಕೊಳ್ಳಬೇಕಾಗಿರುವ ಕಾರಣ, ಈ ಕುಂಕುಮ ಕೇಸರಿಯನ್ನು ಗರ್ಭಾವಸ್ಥೆಯಲ್ಲಿ ಒಂದು ಅಥವಾ ಎರಡು ಬಾರಿ ಮಾತ್ರ ತೆಗೆದುಕೊಳ್ಳಬೇಕು.
ಗರ್ಭಿಣಿಯರು ಯಾವಾಗ ಕುಂಕುಮ ಕೇಸರಿ ಹಾಲು ಸೇವಿಸಬಹುದು?
ಗರ್ಭಿಣಿಯರಿಗೆ ಕುಂಕುಮ ಕೇಸರಿ ಬೆರಸಿದ ಹಾಲನ್ನು ಮೊದಲ ಹಾಗು ಎರಡನೇ ತ್ರೈಮಾಸಿಕದಲ್ಲಿ ನೀಡಲಾಗುವುದಿಲ್ಲ. ಬದಲಾಗಿ 9 ನೇ ತಿಂಗಳಿನಲ್ಲಿ ಹಿರಿಯರು ಶಿಫಾರಸು ಮಾಡುತ್ತಾರೆ. ಕೆಲವರು 5 ಮತ್ತು 9 ನೇ ತಿಂಗಳಿನಲ್ಲಿ ನೀಡಬಹುದು ಎಂದು ಸಲಹೆ ನೀಡುತ್ತಾರೆ.
ಗರ್ಭಿಣಿಯರು ಕಡ್ಡಾಯವಾಗಿ ಪಾಲಿಸಬೇಕಾದ ಆಹಾರ ಕ್ರಮಗಳಿವು
ಕುಂಕುಮ ಕೇಸರಿಯ ಪ್ರಮಾಣ
ಮಗು ಮುದ್ದಾಗಿ, ಬೆಳ್ಳಗೆ ಇರಬೇಕು ಎಂದು ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸುವುದರಿಂದ ಈ ಮೇಲೆ ಹೇಳಿದ ಅಡ್ಡಪರಿಣಾಮಗಳನ್ನು ನೀವು ಪಡೆಯುತ್ತೀರಿ. ಈ ಕಾರಣದಿಂದ ಶಿಫಾರಸು ಮಾಡಲಾದ ಅವಧಿಯಲ್ಲಿ ಅಂದರೆ 5 ತಿಂಗಳು ತುಂಬಿದ ಬಳಿಕ ಹಾಗು 9 ತಿಂಗಳು ತುಂಬಿದ ಬಳಿಕ ಕುಡಿಯಬೇಕು. ಅದು ಕೂಡ 4 ರಿಂದ 5 ಗರಿಗಳು ಮಾತ್ರ ಸಾಕು.