ಮುಂಬರುವ 2024ರ ಲೋಕಸಭಾ ಚುನಾವಣೆಗೆ ಪಕ್ಷದಿಂದ ಸ್ಪರ್ಧಿಸುವ ಆಕಾಂಕ್ಷಿಗಳು ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಬೆಳಗಾವಿ ಲೋಕಸಭಾ ಕ್ಷೇತ್ರದಲ್ಲಿ ಹಾಲಿ ಸಂಸದರಿದ್ದಾರೆ. ಆದರೂ, ಪಕ್ಷದಲ್ಲಿ ಸ್ಪರ್ಧೆ ಬಯಸುವವರ ಸಂಖ್ಯೆ ಹೆಚ್ಚಿದೆ. ಹಾಗಾಗಿ, ಈ ಕ್ಷೇತ್ರದಿಂದ ಯಾರು ಸ್ಪರ್ಧಿಸಬೇಕು ಎಂಬುದನ್ನು ಪಕ್ಷದ ವರಿಷ್ಠರೇ ಅಂತಿಮವಾಗಿ ನಿರ್ಧರಿಸಲಿದ್ದಾರೆ.
ಬೆಳಗಾವಿ ಲೋಕ ಕ್ಷೇತ್ರವು ಹಲವು ವಿಶೇಷತೆಗಳನ್ನು ಹೊಂದಿದೆ. 30 ವರ್ಷದ ರಾಜಕೀಯ ಜೀವನಲ್ಲಿ ಸೋಲೇ ಕಾಣದ ಕಾಂಗ್ರೆಸ್ ನ ಸಭಾವಿ ಮುಖಂಡ ಸತೀಶ ಜಾರಕಿಹೊಳಿ ಸೋಲಿನ ರುಚಿ ಕಂಡಿದ್ದು ಇದೇ ಕ್ಷೇತ್ರದಲ್ಲಿ, ಅನುಕಂಪದ ಅಲೆಯಲ್ಲಿ ಮಂಗಲ ಸುರೇಶ ಅಂಗಡಿ ಗೆದ್ದು ಹೊಸ ಇತಿಹಾಸ ಬರೆದಿದ್ದೂ ಇಲ್ಲಿಯೇ, ಇಂಥ ಕ್ಷೇತ್ರವೀಗ ಮುಂಬರುವ ಲೋಕಸಭೆ ಚುನಾವಣೆಗೆ ಸಜ್ಜಾಗುತ್ತಿದೆ. ಹೊಸ ಮುಖಗಳು ಕ್ಷೇತ್ರದಲ್ಲಿ ಅಭ್ಯರ್ಥಿಗಳಾಗುವ ಲಕ್ಷಣ ಗೋಚರಿಸಿದೆ.
ಬೆಳಗಾವಿ ಲೋಕಸಭೆ ಕ್ಷೇತ್ರವು ಬಿಜೆಪಿಯ ಭದ್ರ ನೆಲ, ಸುರೇಶ ಅಂಗಡಿ ಅವರು 2004ರಿ೦ದ ಸತತ ನಾಲ್ಕು ಬಾರಿ ಆಯ್ಕೆಯಾಗುವ ಮೂಲಕ ಈ ಮಾತನ್ನು ರುಜುವಾತುಪಡಿಸಿದ್ದರು. ಸುರೇಶ ಅಂಗಡಿ, ಅಕಾಲಿಕ ನಿಧನದ ಬಳಿಕ 2021ರಲ್ಲಿ ನಡೆದ ಉಪಚುನಾವಣೆಯಲ್ಲಿ ಸುರೇಶ ಅಂಗಡಿ ಅವರ ಪತ್ನಿ ಮಂಗಲ ಅಂಗಡಿ ಬಿಜೆಪಿ ಅಭ್ಯರ್ಥಿಯಾಗಿ ಕಣಕ್ಕಿಳಿದು ಗೆಲುವಿನ ನಗೆಬೀರಿದರು, ಸತೀಶ ಜಾರಕಿಹೊಳಿ ಅವರಂತಹ ಘಟಾನುಘಟಿ ಅಭ್ಯರ್ಥಿಯನ್ನು ಮಂಗಲ ಸೋಲಿಸಿದ್ದು ಗಮನಾರ್ಹ. ಬೆಳಗಾವಿ ಲೋಕಸಭೆ ಕ್ಷೇತ್ರದಿಂದ ಗೆದ್ದ ಮೊದಲ ಮಹಿಳೆ ಎನ್ನುವ ಕೀರ್ತಿಯೂ ಮಂಗಲ ಅವರದ್ದಾಗಿದೆ.
ಆದರೆ, ಸುರೇಶ ಅಂಗಡಿ ಅವರು ಬೆಳೆಸಿಕೊಂಡಿದ್ದ ಚರಿಷ್ಮಾ ಮಾತ್ರ ಮಂಗಳಾ ಅವರು ಬೆಳೆಸಿಕೊಂಡಿಲ್ಲ. ಎನ್ನುವ ಕೊರಗು ಕಾರ್ಯಕರ್ತರದ್ದು, ಹೀಗಾಗಿ ಹೊಸಬರಿಗೆ ಮನ್ನಣೆ ನೀಡಬೇಕು ಎನ್ನುವ ಕೂಗು ಪಕ್ಷದಲ್ಲಿ ಎದ್ದಿದೆ. ಮಂಗಳಾ ಅಂಗಡಿ ಅವರೂ ಸಹ ಚುನಾವಣೆಗೆ ಸ್ಪರ್ಧಿಸುವ ಆಸಕ್ತಿ ತೋರುತ್ತಿಲ್ಲ. ಈ ಹಿನ್ನೆಲೆಯಲ್ಲಿ ಹೊಸಬರಿಗಾಗಿ ಹುಡುಕಾಟ ಶುರುವಾಗಿದೆ.
ಬಿಜೆಪಿಯಲ್ಲಿ ಬದಲಾವಣಿ ಖಚಿತ : ಬಿಜೆಪಿ ಅಭ್ಯರ್ಥಿ ಯಾರಾದರೆ ಹಿತ ಎನ್ನುವ ಬಗ್ಗೆ ಪಕ್ಷದ ವೇದಿಕೆಯಲ್ಲಿ ಈಗಾಗಲೇ ಚರ್ಚೆಯಾಗಿದೆ. ಕ್ಷೇತ್ರ ಅವಲೋಕನ ಮಾಡಲಾಗುತ್ತಿದೆ. ಈ ಪೈಕಿ ವಿಧಾನ ಪರಿಷತ್ ಮಾಜಿ ಸದಸ್ಯ ಮಹಾಂತೇಶ ಕವಟಗಿಮಠ ಅವರ ಹೆಸರು ಮುಂಚೂಣಿಯಲ್ಲಿದೆ. ಕ್ಷೇತ್ರದಲ್ಲಿ ತಮ್ಮದೆಯಾದ ವರ್ಚಸ್ಸು ಹೊಂದಿದ್ದಾರೆ, ಕವಟಗಿಮಠ ಅವರು ರಾಜ್ಯಸಭಾ ಮಾಜಿ ಸದಸ್ಯ ಡಾ. ಪ್ರಭಾಕರ ಕೋರೆ ಅವರ ಆಪ್ತ ಬಳಗದಲ್ಲಿ ಯುವಜನರಿಗೆ ಗುರುತಿಸಿಕೊಂಡವರು, ಅಲ್ಲದೆ, ಬಿಜೆಪಿ ಪ್ರಮುಖ ಬಿ.ಎಲ್, ಸಂತೋಷ ಅವರಿಗೂ ಆಪ್ತ ಎನ್ನುವ ಕಾರಣಕ್ಕೆ ಮನ್ನಣೆ ದೊರೆಯಲಿದೆ.
ಅದಲ್ಲದೆ, ಬಿ.ಎಸ್. ಯಡಿಯೂರಪ್ಪ ಅವರ ಆಪ್ತ ವಲಯದಲ್ಲಿರುವ ಶಂಕರಗೌಡ ಪಾಟೀಲ ಅವರೂ ರೇಸ್ನಲ್ಲಿದ್ದಾರೆ. ವಕೀಲರೂ ಆದ ಎಂ.ಬಿ. ಜಿರಲಿ, ಮಾಜಿ ಶಾಸಕ ಅನಿಕ ಬೆನಕಿ, ಸಂಜಯ ಪಾಟೀಲ ಸಹ ಪಟ್ಟಿಯಲ್ಲಿದ್ದಾರೆ. ಇಷ್ಟಾಗಿಯೂ ಮತ್ತೆ ಯಾರು ಹಿತವರು ಎನ್ನುವ ಹುಡುಕಾಟ ವರಿಷ್ಠರಿಂದ ಶುರುವಾಗಿದೆ. ಯಾವುದಕ್ಕೂ ಬದಲಾವಣಿ ಬಿಜೆಪಿಯಲ್ಲಿ ಖಚಿತವಾದಂತಿದೆ.
ಕಾಂಗ್ರೆಸ್ ವಿಚಾರಕ್ಕೆ ಬಂದರೆ ಪ್ರಬಲ ಆಕಾಂಕ್ಷಿಗಳು ಕಾಣದಾಗಿದ್ದಾರೆ. ಕಳೆದ 20 ವರ್ಷಗಳಿಂದ ನೆಲೆಯನ್ನು ಕಳೆದುಕೊಂಡ ಕಾಂಗ್ರೆಸ್ಸ ಈ ಬಾರಿಯಾದರೂ ಬಿಜೆಪಿಯ ಭದ್ರ ನೆಲೆಯನ್ನು ಅಳುಗಾಡಿಸುವ ಪ್ರಯತ್ನವನ್ನು ಮಾಡುತ್ತಿದೆ.
ಇಲ್ಲಿಯೂ ಹೊಸಮುಖಗಳಿಗಾಗಿ ಹುಡುಕಾಟ ನಡೆದಿದೆ. ಕ್ಷೇತ್ರದಲ್ಲಿ ಬಿಗಿಹಿಡಿತ ಹೊಂದಿರುವ ಸತೀಶ ಜಾರಕಿಹೊಳಿ ಅವರ ಪುತ್ರಿ ಪ್ರಿಯಾಂಕಾ ಹೆಸರು ಬಲವಾಗಿ ಕೇಳಿಬರುತ್ತಿದೆ. ಇದರೊಟ್ಟಿಗೆ ಕಾಂಗ್ರೆಸ್ ಗ್ರಾಮೀಣ ಜಿಲ್ಲಾಧ್ಯಕ್ಷ ವಿನಯ ನಾವಲಗಟ್ಟಿ ಮುಂಚೂಣಿಯಲ್ಲಿದ್ದಾರೆ. ಸಚಿವ ಲಕ್ಷ್ಮೀ ಹೆಬ್ಬಾಳಕ್ ಅವರು ಚನ್ನರಾಜ ಹಟ್ಟಿಹೊಳಿ ಅವರಿಗೆ ಅವಕಾಶ ಕಲ್ಪಿಸಬೇಕೆಂದು ತುದಿಗಾಲ ಮೇಲೆ ನಿಂತಿದ್ದಾರೆ. ಕಿರಣ ಸಾಧುನವರ ಕೂಡಾ ಆಕಾಂಕ್ಷಿ. ಒಟ್ಟಾರೆ ಪ್ರಮುಖ ಪಕ್ಷಗಳಾದ ಬಿಜೆಪಿ ಮತ್ತು ಕಾಂಗ್ರೆಸ್ ನಲ್ಲಿ ಹೊಸಬರಿಗೆ ಮಣೆ ಹಾಕಲು ಚಿಂತನೆ ನಡೆದಿದೆ.
ಇನ್ನೂ ಮಹಾರಾಷ್ಟ್ರ ಏಕೀಕರಣ ಸಮೀತಿಯು ಈ ಬಾರಿ ತನ್ನ ಅದೃಷ್ಟವನ್ನು ಪರೀಕ್ಷಿಸಲು ಮುಂದಾಗಿದೆ. ಕಳೆದ ಬಾರಿ ಸುರೇಶ ಅಂಗಡಿಯವರ ನಿಧನದ ನಂತರ ನಡೆದ ಚುನಾವಣೆಯಲ್ಲಿ ಎಂಇಎಸ್ ನ ಶುಭಂ ಶೇಳಕೆ ರಾಷ್ಟ್ರೀಯ ಪಕ್ಷಗಳಿಗೆ ಅತ್ಯಂತ ಬಿರುಸಿನ ಪೈಪೋಟಿ ನೀಡಿದ್ದರು. ಹಾಗಾಗಿ ಈ ಬಾರಿ ತಮ್ಮಲ್ಲಿನ ಆಂತರಿಕ ಭಿನ್ನಾಭಿಪ್ರಾಯವನ್ನು ಮರೆತು ಕಳೆದು ಹೋದ ತಮ್ಮ ಆತ್ಮ ವಿಶ್ವಾಸವನ್ನು ಪುನಃ ಹಿಂಪಡೆಯಲು ಪ್ರಯತ್ನಿಸುತ್ತಿದ್ದಾರೆ.
ಬಿಜೆಪಿ ಮತ್ತು ಕಾಂಗ್ರೆಸ್ ಪಕ್ಷವು ಲಿಂಗಾಯತ ಸಮುದಾಯದವರನ್ನೇ ಕಣಕ್ಕಿಳಿಸುವ ಆಸಕ್ತಿ ಹೊಂದಿದೆ, ರಾಮದುರ್ಗ, ಸವದತ್ತಿ, ಅರಬಾವಿ, ಬೈಲಹೊಂಗಲ, ಬೆಳಗಾವಿ ನಗರ, ದಕ್ಷಿಣ, ಗ್ರಾಮೀಣ ಭಾಗದಲ್ಲಿಯೂ ಲಿಂಗಾಯತರ ಪ್ರಭಾವ ಹೆಚ್ಚಿದ್ದು, ಕ್ಷೇತ್ರದಲ್ಲಿ ಲಿಂಗಾಯತರೇ ನಿರ್ಣಾಯಕ ಪಾತ್ರವನ್ನು ವಹಿಸಲಿದ್ದಾರೆ.