ಕಾಸರಗೋಡು ಜಿಲ್ಲೆಗೆ ಸೇರಿದ ಕನ್ನಡಿಗರೇ ಹೆಚ್ಚಿರುವ ಕನ್ನಡ–ಮಲಯಾಳಂ ಮಿಶ್ರ ಸಂಸ್ಕೃತಿಯ ಗಡಿನಾಡ ಗ್ರಾಮ ಪಡ್ರೆ. ಬೇರೆಲ್ಲೂ ಕಾಣಸಿಗದಂತಹ ವಿಶೇಷತೆಯೊಂದು ಈ ಊರಲ್ಲಿದೆ. ಅದುವೇ 100ಕ್ಕೂ ಹೆಚ್ಚು ಮನೆಗಳಲ್ಲಿರುವ ಸುರಂಗಗಳು. ಆಧುನಿಕತೆಯತ್ತ ಹೊರಳುತ್ತಿರುವ ಇತರೆ ಗ್ರಾಮಗಳಿಗಿಂತ ಪಡ್ರೆ ಗ್ರಾಮ ಹಳೆಯ ಪದ್ಧತಿಗಳನ್ನೇ ಉಳಿಸಿಕೊಂಡು ಬಂದಿದೆ.
ಕೃಷಿಗೆ ನೀರು ಹಾಯಿಸಲು ಪಂಪ್ ಸೆಟ್ಗಳ ಸೌಲಭ್ಯಗಳೇ ಇಲ್ಲದ ಕಾಲದಲ್ಲಿ ಹಿಂದಿನ ತಲೆಮಾರಿನವರು ಅವಲಂಭಿಸಿದ್ದ ಸುರಂಗ ನೀರಿನ ವ್ಯವಸ್ಥೆಯಲ್ಲಿ ನಂಬಿಕೆ ಇಟ್ಟು ಇಲ್ಲಿನ ಜನರು ಬದುಕು ಸಾಗಿಸುತ್ತಿದ್ದಾರೆ. ಜಂಬಿಟ್ಟಿಗೆ ಇರುವ ಗುಡ್ಡಗಳು, ಮಿತ ಎತ್ತರದ ಬೆಟ್ಟಗಳು, ಹೇರಳವಾಗಿರುವ ವನ್ಯಸಂಪತ್ತು ಮತ್ತು ಧಾರಾಳವಾಗಿ ಸುರಿಯುವ ಮಳೆಯಿಂದಾಗಿ ಪಡ್ರೆಗಾಮದಲ್ಲಿ ಪ್ರತಿ ಮನೆಯ ಹಿತ್ತಲಿನಲ್ಲೂ ನೀರಿನ ಸುರಂಗಗಳಿವೆ. 70ವರ್ಷಕ್ಕೂ ಅಧಿಕ ಇತಿಹಾಸ ಹೊಂದಿರುವ ಈ ಸುರಂಗಗಳಲ್ಲಿ ವರ್ಷಪೂರ್ತಿ 24ಗಂಟೆ ನೀರು ಹರಿದು ಬರುತ್ತದೆ.
ನೀರಿನ ಸುರಂಗ ಎಂದರೇನು?
ಬಾವಿಯನ್ನು ತೆಗೆದು ನೀರು ಸಂಗ್ರಹಿಸುವ ಬದಲು ಎತ್ತರದ ಗುಡ್ಡಗಳಿಗೆ ಅಡ್ಡಲಾಗಿ ಸುರಂಗ ನಿರ್ಮಿಸಿ ನೀರನ್ನು ಪಡೆದುಕೊಳ್ಳುವುದು. ಮಣ್ಣಿನಲ್ಲಿ ಇಂಗುವ ನೀರನ್ನು ಹಿಡಿದುಕೊಂಡ ಗುಡ್ಡಗಳ ಕೆಳಗೆ ಸುರಂಗ ಕೊರೆಯುವುದರಿಂದ ನೀರು ಅಲ್ಲಲ್ಲಿ ಒರತೆ ಮತ್ತು ಹನಿ ರೂಪದಲ್ಲಿ ಹರಿದು ಬಂದು ಎಲ್ಲ ಸೇರಿ ದೊಡ್ಡ ಮಟ್ಟದಲ್ಲಿ ಹರಿದು ಹೊರಗೆ ಬರುತ್ತದೆ. ಸುರಂಗವನ್ನು ಎಲ್ಲಿ ಬೇಕಾದರಲ್ಲಿ ನಿರ್ಮಾಣ ಮಾಡಲು ಸಾಧ್ಯವಿಲ್ಲ ಅದಕ್ಕೆ ತಕ್ಕದಾದ ಜಂಬಿಟ್ಟಿಗೆ ಮಣ್ಣುನ್ನು ಹೊಂದಿರುವ ನಿರ್ದಿಷ್ಟವಾದ ಪ್ರದೇಶದಲ್ಲಿ ಮಾತ್ರ ಸುರಂಗ ನಿರ್ಮಾಣ ಮಾಡಲು ಸಾಧ್ಯ. ಸದಾ ನೀರು ನೀಡುವ ಈ ಸುರಂಗಗಳನ್ನು ಕೊರೆಯುವುದು ಸಾಹಸವೇ ಸರಿ. ಮಣ್ಣಿನ ಬಗ್ಗೆ ಅಪಾರವಾದ ಜ್ಞಾನವಿದ್ದವರಿಗೆ ಮಾತ್ರ ಈ ಕೆಲಸ ಸಾಧ್ಯವಾಗುವುದು.
ಈ ಸುರಂಗವನ್ನು ನಿರ್ಮಾಣ ಮಾಡಲು ಜಾಣ್ಮೆ ಇರಬೇಕು ಮತ್ತು ಇದು ಒಬ್ಬರೇ ಮಾಡುವಂತ ಕೆಲಸವಾಗಿದ್ದರಿಂದ ನುರಿತ ಶ್ರಮ ಜೀವಿಗಳಿಂದ ಮಾತ್ರ ಸಾಧ್ಯ. 2 ಅಡಿ ಅಗಲ 5ರಿಂದ 6 ಅಡಿ ಎತ್ತರದ ಸುರಂಗವನ್ನು ನಿರ್ಮಾಣ ಒಬ್ಬ ವ್ಯಕ್ತಿ ಮಾತ್ರ ಕೊರೆಯಲು ಸಾಧ್ಯ. ಸಣ್ಣ ಹಾರೆ ಬುಟ್ಟಿಯ ಹೊರತಾಗಿ ಬೇರೆ ಯಾವುದೇ ಸಾಮಗ್ರಿಯನ್ನು ಕೂಡಾ ಸುರಂಗ ಕೊರೆಯಲು ಬಳಸಲಾಗದು.
ಭಾರತ ಮಾತ್ರವಲ್ಲದೇ ಇರಾನ್ ಚೀನಾ ಸೇರಿದಂತೆ ಹಲವು ದೇಶಗಳಲ್ಲಿ ಈ ಸುರಂಗ ಕೊರೆಯುವ ಪದ್ಧತಿ ಇದೆ ಎಂದು ಹೇಳಲಾಗುತ್ತದೆ.