ಕೆಫೆ ಕಾಫಿ ಡೇ ಗ್ಲೋಬಲ್ ಸೀಮಿತ ಕಂಪನಿ 12,000 ಎಕರೆಗಳಷ್ಟು ತನ್ನದೇ ಆದ ಎಸ್ಟೇಟ್ಗಳಲ್ಲಿ ಕಾಫಿ ಬೆಳೆಯುವ ಚಿಕ್ಕಮಗಳೂರು ಮೂಲದ ವ್ಯವಹಾರವಾಗಿದೆ. ಏಷ್ಯಾದ ಅರೇಬಿಕಾ ಬೀನ್ಸ್ ಅನ್ನು ಯುಎಸ್ಎ, ಯುರೋಪ್ ಮತ್ತು ಜಪಾನ್ ಸೇರಿದಂತೆ ವಿವಿಧ ದೇಶಗಳಿಗೆ ರಫ್ತು ಮಾಡುವ ಅತಿದೊಡ್ಡ ಕಂಪನಿಯಾಗಿದೆ. ಕೆಫೆ ಕಾಫಿ ಡೇಯನ್ನು 1996 ಜುಲೈ 11ರಲ್ಲಿ ಚಿಲ್ಲರೆ ವ್ಯಾಪಾರದ ರೆಸ್ಟೋರೆಂಟ್ ಎಂದು ಬ್ರಿಗೇಡ್ ರಸ್ತೆ ಬೆಂಗಳೂರಿನಲ್ಲಿ ಮೊದಲು ಪ್ರಾರಂಭಿಸಲಾಯಿತು. ಇದು ನಂತರ ಮಾರ್ಚ್ 2015 ರ ಹೊತ್ತಿಗೆ ಭಾರತದ 28 ರಾಜ್ಯಗಳಲ್ಲಿ 1530 ಮಳಿಗೆಗಳನ್ನು ತೆರೆಯುವ ಮೂಲಕ ವಿವಿಧ ನಗರಗಳಲ್ಲಿ ವೇಗವಾಗಿ ವಿಸ್ತಾರಗೊಂಡಿತು. ಸಿ.ಸಿ.ಡಿ.ಯು ಭಾರತದ ಹೊರಗೆ ಆಸ್ಟ್ರಿಯಾ (ವಿಯೆನ್ನಾ), ಝೆಕ್ ರಿಪಬ್ಲಿಕ್, ಮಲೇಷಿಯಾ, ಈಜಿಪ್ಟ್ ಮತ್ತು ನೇಪಾಳದಲ್ಲಿ ತನ್ನ ಮಳಿಗೆಗಳನ್ನು ವಿಸ್ತರಿಸಿದೆ.
ಜನಪ್ರಿಯ ಕಾಫಿ ಚೈನ್ ನೆಟ್ವರ್ಕ್ “ಕೆಫೆ ಕಾಫಿ ಡೇ” ಈಗ ದಿವಾಳಿ ಪ್ರಕ್ರಿಯೆಯಲ್ಲಿದೆ. ಕಳೆದ ವಾರ ಕಾಫಿ ಡೇ ಗ್ಲೋಬಲ್ ದಿವಾಳಿತನ ಅರ್ಜಿ ಪ್ರಕ್ರಿಯೆ ಆರಂಭವಾಗಿದೆ ಎಂದು ವರದಿಗಳು ತಿಳಿಸಿವೆ. ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಮಂಡಳಿಗೆ (ಎನ್.ಸಿ.ಎಲ್.ಟಿ) ಇಂಡಸ್ಇಂಡ್ ಬ್ಯಾಂಕ್ ಅರ್ಜಿ ಸಲ್ಲಿಸಿದ ಬಳಿಕ ಕಾಫಿ ಡೇ ಗ್ಲೋಬಲ್ ಕಂಪನಿಯು ದಿವಾಳಿತನ ಪ್ರಕರಣವನ್ನು ಎದುರಿಸುತ್ತಿದೆ ಎಂದು ಎಕಾನಮಿಕ್ ಟೈಮ್ಸ್ ವರದಿ ತಿಳಿಸಿದೆ.
2022ರ ಮಾರ್ಚ್ 31ರಲ್ಲಿ ಇಂಡಸ್ ಇಂಡ್ ಬ್ಯಾಂಕ್ನಿಂದ ಕಾಫಿ ಡೇ ಗ್ಲೋಬಲ್ ಕಂಪನಿಯು 67.3 ಕೋಟಿ ರೂಪಾಯಿ ಸಾಲವನ್ನು ಪಡೆದಿತ್ತು. ಸಿ.ಸಿ.ಡಿ.ಯ ಸ್ಥಾಪಕ ವಿ.ಜಿ. ಸಿದ್ಧಾರ್ಥ ಅವರು ಸಿ.ಸಿ.ಡಿ.ಯ ನಷ್ಟ ವನ್ನು ತಾಳಲಾರದೆ 29 ಜುಲೈ 2019 ರಂದು ಮಂಗಳೂರಿನ ಉಳ್ಳಾಲದಲ್ಲಿ ನೇತ್ರಾವತಿ ನದಿಯ ಸೇತುವೆಯಲ್ಲಿ ಆತ್ಮಹತ್ಯೆ ಮಾಡಿಕೊಳ್ಳುತ್ತಾರೆ. ನಂತರ ಅವರ ಪತ್ನಿ ಮಾಳವಿಕಾ ಹೆಗಡೆ ಈಗ ಸಿ.ಸಿ.ಡಿ.ಯ CEO ಆಗಿದ್ದಾರೆ. ಇವರ ಸಾವಿನ ಬಳಿಕ ಸಾಕಷ್ಟು ಬದಲಾವಣೆಗಳಾಗಿದ್ದವು. ಈ ಸಮಯದಲ್ಲಿ ಆರ್ಥಿಕ ಸಮಸ್ಯೆಗಳೂ ಚರ್ಚೆಗೆ ಬಂದಿತ್ತು.
ಈಗಲೂ ಭಾರತದಲ್ಲಿ ಸುಮಾರು 469 ಕೆಫೆ ಕಾಫಿ ಡೇಗಳಿವೆ. ಕೆಲವು ವರ್ಷಗಳ ಹಿಂದೆ 1700 ಕ್ಕೂ ಹೆಚ್ಚು ಕೆಫೆ ಕಾಫಿ ಡೇಗಳು ಇದ್ದವು. ಕಂಪನಿಗೆ 7000 ಕೋಟಿ ರೂಪಾಯಿಯಷ್ಟು ಸಾಲ ಇತ್ತು. 2023ರ ವೇಳೆಗೆ ಈ ಸಾಲದ ಮೊತ್ತ 465 ಕೋಟಿ ರೂಪಾಯಿಗೆ ಇಳಿಕೆಯಾಗಿದೆ ಎನ್ನಲಾಗಿದೆ. ಬಾಕಿ ಇರುವ ಸಾಲಗಳನ್ನು ಮರುಪಾವತಿಸಲು ಸಾಧ್ಯವಾಗದ ವ್ಯಕ್ತಿಯು ನಾನು ದಿವಾಳಿ ಎಂದು ಘೋಷಿಸಿಕೊಳ್ಳಬಹುದು. ಇದೇ ರೀತಿ ಕಂಪನಿಗಳು ಕೂಡ ದಿವಾಳಿತನ ಘೋಷಣೆ ಮಾಡಬಹುದು. ಈ ರೀತಿ ಅರ್ಜಿ ಸಲ್ಲಿಸಿದ ಬಳಿಕ ದಿವಾಳಿತನ ಅಥವಾ ಬ್ಯಾಂಕ್ರಪ್ಟೆಸಿ ಪ್ರಕ್ರಿಯೆ ಆರಂಭವಾಗುತ್ತದೆ. ಸಂಬಂಧಪಟ್ಟ ದಿವಾಳಿತನ ಕೋರ್ಟ್ ಕಂಪನಿಯ ಸ್ವತ್ತುಗಳನ್ನು ಪರಿಶೀಲಿಸುತ್ತದೆ. ಸ್ವತ್ತುಗಳ ಮೌಲ್ಯಮಾಪನ ಮಾಡುತ್ತದೆ. ಕಂಪನಿ ಅಥವಾ ವ್ಯಕ್ತಿಯ ಬಾಕಿ ಸಾಲಗಳನ್ನು ಮರುಪಾವತಿಸಲು ಈ ಸ್ವತ್ತುಗಳನ್ನು ಬಳಸುವ ಅವಕಾಶವೂ ಇದೆ. ದಿವಾಳಿತನ ಎನ್ನುವುದು ಕಾನೂನುಬದ್ಧ ಪ್ರಕ್ರಿಯೆಯಾಗಿದೆ.
ಸಿದ್ಧಾರ್ಥ ಅವರ ಮಗನನ್ನು ಡಿ.ಕೆ. ಶಿವಕುಮಾರ್ ಅವರ ಮಗಳು ಮದುವೆ ಆಗಿದ್ದರು. ಡಿ.ಕೆ. ಶಿವಕುಮಾರ್ ಅವರು ಅಳಿಯನ ಕಂಪನಿ ಉಳಿಸೋ ಪ್ರಯತ್ನ ಮಾಡ್ತಾರ ಅಂತಾ ಕಾದು ನೋಡಬೇಕು. ಇನ್ನೊಂದು ಕಡೆ ಟಾಟಾ ಗ್ರೂಪ್ ಸಿಸಿಡಿ ಖರೀದಿಯ ಪ್ರಯತ್ನದಲ್ಲಿದೆ ಅಂತ ಹೇಳಲಾಗುತ್ತಿದೆ.