ಜೊತೆ ಜೊತೆಯಲಿ ಸೀರಿಯಲ್ ಖ್ಯಾತಿಯ ಆರ್ಯವರ್ಧನ್ ಮತ್ತೆ ಹೀರೋ ಆಗಿ ನಟಿಸಲು ಮುಂದಾಗಿದ್ದಾರೆ.
ಸಾಹಸ ಸಿಂಹ ವಿಷ್ಣುವರ್ಧನ್ ಅಳಿಯ ಅನಿರುದ್ಧ್ ಜಟ್ಕರ್ ಮೈಸೂರಿನ ವಿಷ್ಣು ಸ್ಮಾರಕದಲ್ಲಿ ಅವರು ಅಭಿನಯಿಸುತ್ತಿರುವ ಹೊಸ ಚಿತ್ರಕ್ಕೆ ಸ್ಕ್ರಿಪ್ಟ್ ಪೂಜೆ ಮಾಡಿಸಿದ್ದಾರೆ. ಅನಿರುದ್ಧ್ ಮತ್ತೆ ಬೆಳ್ಳಿ ತೆರೆಗೆ ಬರ್ತಿದ್ದಾರೆ. ಈ ಖುಷಿಯನ್ನ ಸ್ವತಃ ಅನಿರುದ್ಧ್ ಜಟ್ಕರ್ ಇದೀಗ ಹಂಚಿಕೊಂಡಿದ್ದಾರೆ. ಈ ಸಿನಿಮಾ ಮೂಲಕ ಕಿರುತೆರೆಯಿಂದ ಅನಿರುದ್ಧ್ ಬೆಳ್ಳಿತೆರೆಗೆ ಬರುತ್ತಿದ್ದಾರೆ.
ಇವರು ಅಭಿನಯಿಸುತ್ತಿರುವ ಈ ಸಿನಿಮಾದಲ್ಲಿ ಇಬ್ಬರು ನಾಯಕಿಯರಿದ್ದಾರೆ. ಆ ನಾಯಕಿಯರು ಯಾರಿರಬಹುದು ಅನ್ನೋ ಕುತೂಹಲ ಕೂಡ ಇದೀಗ ರಿವೀಲ್ ಆಗಿದೆ. ಇಡೀ ಸಿನಿಮಾ ತಂಡಕ್ಕೆ ವಿಷ್ಣುವರ್ಧನ್ ಆಶೀರ್ವಾದ ಇದೆ. ಭಾರತಿ ವಿಷ್ಣುವರ್ಧನ್ ಅವರು ಟೀಮ್ಗೆ ಗುಡ್ ಲಕ್ ಹೇಳಿದ್ದಾರೆ.
ಅನಿರುದ್ಧ ಅನೇಕ ಸಿನಿಮಾಗಳಲ್ಲಿ ಮಿಂಚಿದವರು. ಸೀರಿಯಲ್ ಕಡೆಗೆ ಬಂದವರೂ ಅಲ್ಲ. ಆದರೆ ಜೊತೆ ಜೊತೆಯಲಿ ಸೀರಿಯಲ್ ಮೂಲಕ ಎಲ್ಲರ ಮನೆ ಮಾತಾಗಿದ್ದರು. ಆದರೆ ಸೀರಿಯಲ್ನಿಂದ ಹೊರ ಬಂದ ಮೇಲೆ ಅವರ ಸಿನಿ ಪಯಣ ಒಂದು ಹಂತಕ್ಕೆ ಸ್ಟಾಪ್ ಆಗಿತ್ತು.
ಆದರೆ ಎಸ್.ನಾರಾಯಣ್ ಅವರ ಸೀರಿಯಲ್ನಲ್ಲೂ ಅನಿರುದ್ಧ್ ಜಟ್ಕರ್ ನಟಿಸ್ತಾರೆ ಅನ್ನೋ ಸುದ್ದಿ ಕೇಳಿಬರುತ್ತಿತ್ತು. ಅಷ್ಟರಲ್ಲಿಯೇ ಸ್ವತಃ ಅನಿರುದ್ಧ್ ಒಂದು ಸಿನಿಮಾ ಸುದ್ದಿ ಕೊಟ್ಟಿದ್ದಾರೆ.ಈ ಸಿನಿಮಾ ಮೂಲಕ ಅನಿರುದ್ಧ್ ಜಟ್ಕರ್ ಮತ್ತೆ ನಾಯಕರಾಗಿಯೇ ಬರ್ತಿದ್ದಾರೆ. ಒಬ್ಬರಲ್ಲ ಇಬ್ಬರು ಹೀರೋಯಿನ್ ಈ ಸಿನಿಮಾದಲ್ಲಿ ಅಭಿನಯಿಸಲಿದ್ದಾರೆ. ಆ ಇಬ್ಬರಲ್ಲಿ ಕನ್ನಡದ ನಾಯಕಿ ನಿಧಿ ಸುಬ್ಬಯ್ಯ ಕೂಡ ಒಬ್ಭರು. ಇನ್ನೋರ್ವ ನವ ನಾಯಕಿ ರಾಚೆಲ್ ಡೇವಿಡ್ ಈ ಸಿನಿಮಾದಲ್ಲಿ ಅನಿರುದ್ಧ್ ಅವರಿಗೆ ಜೋಡಿ ಆಗಲಿದ್ದಾರೆ ಎಂದು ತಿಳಿದು ಬಂದಿದೆ.