ಬೆಂಗಳೂರು: ಕಳೆದ 2008 ರಲ್ಲಿ ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಟಿಫಿನ್ ಕ್ಯಾರಿಯರ್ ಬಾಂಬ್ ಸ್ಪೋಟಿಸಿ ಬೆಚ್ಚಿ ಬೀಳಿಸಿದ್ದ ಕೇರಳ ಮೂಲದ ಉಗ್ರ ತಡಿಯಂಟವಿಡೆ ನಸೀರ್ ನಿನ್ನೆ ಬೆಂಗಳೂರಿನಲ್ಲಿ ಸೆರೆಸಿಕ್ಕ ಐವರು ಶಂಕಿತ ಉಗ್ರರ ಜತೆ ಸಂಪರ್ಕದಲ್ಲಿರುವುದು ಮತ್ತು ಅವರಿಗೆ ವಿಧ್ವಂಸಕ ಕೃತ್ಯ ಎಸಗಲು ಪ್ರಚೋದನೆ ನೀಡಿರುವ ಮಾಹಿತಿ ತಿಳಿದು ಬಂದಿದೆ. ಉನ್ನತ ಪೋಲೀಸ್ ಮೂಲಗಳ ಪ್ರಕಾರ ಕೇರಳದ ಪಿಡಿಪಿ ಪಕ್ಷದ ನಾಯಕ 2008 ರ ಬೆಂಗಳೂರು ಸ್ಪೋಟದಲ್ಲಿ ಈಗ ನ್ಯಾಯಾಂಗ ಬಂಧನದಲ್ಲಿರುವ ಅಬ್ದುಲ್ ಮದನಿಯ ಶಿಷ್ಯನೂ ಆಗಿದ್ದಾನೆ. ಈತನ ಉಗ್ರ ಚಟುವಟಿಕೆ ದೊಡ್ಡದಾಗಿದೆ.
ಈಗ ಕೇರಳ ಜೈಲಿನಲ್ಲಿರುವ ನಸೀರ್ ಜೈಲಿನಲ್ಲಿದ್ದುಕೊಂಡೇ ಭಯೋತ್ಪಾದನಾ ಕೃತ್ಯ ಎಸಗಲು ಸಂಚು ರೂಪಿಸುತ್ತಿರುವುದು ಪೋಲೀಸ್ ತನಿಖೆಯಲ್ಲಿ ತಿಳಿದು ಬಂದಿದೆ. ಈತನು ಕೊಡಗಿನ ಸೋಮವಾರಪೇಟೆ ತಾಲ್ಲೂಕಿನ ಹೊಸತೋಟದಲ್ಲಿ ಶುಂಠಿ ಕೃಷಿಯ ನೆಪದಲ್ಲಿ ಬೆಂಗಳೂರಿನಲ್ಲಿ ಭಯೋತ್ಪಾದನಾ ಕೃತ್ಯವೆಸಗಲು ಸ್ಕೆಚ್ ರೂಪಿಸಿದ್ದ. ಮದನಿಯ ಜೊತೆಗೂಡಿ 1998 ರಲ್ಲಿ ಕೊಯಂಬತ್ತೂರಿನಲ್ಲಿ ಸ್ಪೋಟ ನಡೆಸಿದ್ದ ಈತ ನಂತರ ಬೆಂಗಳೂರಿನತ್ತ ಮುಖ ಮಾಡಿದ್ದ. ಬಳಿಕ ಹೊಸತೋಟವನ್ನೇ ತನ್ನ ಕಾರ್ಯಸ್ಥಾನ ಮಾಡಿಕೊಂಡಿದ್ದ ನಸೀರ್ ಬೆಂಗಳೂರಿನಲ್ಲಿ 2008 ರಲ್ಲಿ ಸರಣಿ ಸ್ಪೋಟದ ಪ್ರಮುಖ ರೂವಾರಿ ಆಗಿದ್ದು ನಂತರ ನಾಪತ್ತೆಯಾಗಿದ್ದ. ಆಮೇಲೆ ಬಾಂಗ್ಲಾದೇಶಕ್ಕೆ ಪರಾರಿಯಾಗುವ ಯತ್ನದ ವೇಳೆ ಗಡಿಯಲ್ಲಿ ಬಿಎಫ್ ಸಿಬ್ಬಂದಿ ಕೈಗೆ ಸಿಕ್ಕಿಬಿದ್ದಿದ್ದ. ಅಂದಿನ ಬೆಂಗಳೂರು ಸಿಸಿಬಿ ವಿಭಾಗದ ಡಿಸಿಪಿ ಸಿದ್ಧರಾಮಪ್ಪ ಹಾಗೂ ಎಸಿಪಿ ಒಂಕಾರಪ್ಪ ಮೇಘಾಲಯಕ್ಕೆ ತೆರಳಿ ಆತನ ವಶಕ್ಕೆ ಪಡೆದು ಕರೆತಂದಿದ್ದರು. ಅದರಂತೆ ಪರಪ್ಪನ ಅಗ್ರಹಾರದ ಜೈಲು ಸೇರಿದ್ದ. ಆದರೆ ಅಷ್ಟೊತ್ತಿಗಾಗಲೇ ಈತ ಉಗ್ರ ಸಂಘಟನೆಯಲ್ಲಿ ತನ್ನದೇ ಆದ ಪ್ರಭಾವ ಹೊಂದಿದ್ದನು.
ಪಾಕಿಸ್ಥಾನ ಮೂಲದ ಲಷ್ಕರ್ ಏ ತಯ್ಬಾ ದ ದಕ್ಷಿಣ ಭಾರತದ ಕಮಾಂಡರ್ ಆದ ನಸೀರ್ ಗೆ ಪಾಕಿಸ್ತಾನದಲ್ಲಿ ತರಬೇತಿ, ಬಾಂಬ್ ತಯಾರಿ, ಸ್ಪೋಟಕ ವಸ್ತುಗಳ ಸಂಗ್ರಹಣೆ, ಬಾಂಬ್ ಸ್ಪೋಟ ಮಾಡುವುದು, ಅದಕ್ಕೆ ಬೇಕಾದ ಫಂಡಿಗ್, ಟ್ರೇನಿಂಗ್ ನೀಡುವುದರಲ್ಲಿ ಪರಿಣಿತಿ ಹೊಂದಿದ್ದನು. ಜೊತೆಗೆ ಈತನ ಪ್ರಮುಖ ಅಸ್ತ್ರ ಬ್ರೇನ್ ವಾಶ್ ಮಾಡುವುದಾಗಿತ್ತು. ಉಗ್ರರಾಗಲು ಸಿದ್ದರಿರುವ ಮನೋಭಾವದ ವ್ಯಕ್ತಿಗಳ ಶೋಧ ನಡೆಸುತಿದ್ದ ಈತ ಅಂತಹವರು ಸಿಕ್ಕರೆ ಬ್ರೇನ್ ವಾಷ್ ಮೂಲಕ ಉಗ್ರರಾಗಿ ಮಾರ್ಪಡಿಸುತಿದ್ದ. ಅದರ ಮುಂದುವರೆದ ಭಾಗವಾಗಿ 2017ರಲ್ಲಿ ಆರ್. ಟಿ. ನಗರದಲ್ಲಿ ನಡೆದಿದ್ದ ನೂರ್ ಅಹ್ಮದ್ ಮರ್ಡರ್ ಕೇಸ್ನ ಆರೋಪಿ ಜುನೈದ್ ಈತನಿಗೆ ಪರಿಚಯವಾಗುತ್ತಾನೆ. ಪರಪ್ಪನ ಅಗ್ರಹಾರದ ಜೈಲಿನಲ್ಲೇ ಇಬ್ಬರಿಗೂ ಸ್ನೇಹ ಏರ್ಪಡುತ್ತದೆ. ನಾಸಿರ್ ಜೈಲಿನಲ್ಲೇ ತನ್ನ ಬ್ರೇನ್ ವಾಶ್ ಕೆಲಸ ಆರಂಭಿಸಿದ್ದ. ತನ್ನ ತತ್ವ ಸಿದ್ಧಾಂತಗಳಿಗೆ ಹೋಲುವ ವ್ಯಕ್ತಿಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಿದ್ದ ಹಾಗೂ ಅವರೊಂದಿಗೆ ಆತ್ಮೀಯನಾಗುತಿದ್ದ. ಪರಮ ದೈವ ಭಕ್ತನಂತೆ ನಟಿಸಿ ತಾನು ಗುರುತಿಸಿದ ಮುಸ್ಲಿಂ ಯುವಕರನ್ನು ತನ್ನ ಬ್ಯಾರೆಕ್ಗೆ ಕರೆಸಿಕೊಳ್ಳುತ್ತಿದ್ದ ಈತ ವಿಧ್ವಂಸಕ ಕೃತ್ಯ ಎಸಗಲು ಅವರನ್ನು ಪ್ರೇರೇಪಿಸುತ್ತಿದ್ದ. ಅದೇ ರೀತಿ ಜುನೈದ್ ಭೇಟಿ ಬಳಿಕ ಆತನ ಜೊತೆಗೂಡಿ ಬೇಕಾದ ಸಿದ್ಧತೆ ನಡೆಸಿ ಆತನನ್ನು ಉಗ್ರವಾದದೆಡೆಗೆ ತಯಾರು ಮಾಡಿದ ನಾಸೀರ್ ಆತನನ್ನು ವಿದೇಶಕ್ಕೆ ಕಳುಹಿಸಿದ್ದ. ಬಳಿಕ ಜುನೈದ್ ಮೂಲಕವೇ ಒಂದು ತಂಡವನ್ನು ರಚಿಸಿ ಆತನ ಮುಖಾಂತರವೇ ಬೆಂಗಳೂರಿನಲ್ಲೊಂದು ದೊಡ್ಡ ವಿಧ್ವಂಸಕ ಕೃತ್ಯ ನಡೆಸಲು ಸಂಚು ರೂಪಿಸಿರುವುದು ತನಿಖೆಯಲ್ಲಿ ಬಯಲಾಗಿದೆ. ಸದ್ಯ ಇದೆಲ್ಲಾ ಈಗ ಸಿಸಿಬಿ ವಿಚಾರಣೆ ವೇಳೆ ಬಯಲಾಗಿದ್ದು, ಜುನೈದ್ 8-10 ಜನ ತಂಡ ಕಟ್ಟಿದ್ದಾನೆ ಎನ್ನಲಾಗಿದೆ. ಈಗ ಬೆಂಗಳೂರಿನಲ್ಲಿ ಐವರು ಸೆರೆಯಾಗಿದ್ದು ದಾವಣಗೆರೆಯಲ್ಲಿ ಗುರುವಾರ ಇನ್ನೊಬ್ಬ ಶಂಕಿತ ಉಗ್ರ ಸೆರೆ ಯಾಗಿದ್ದಾನೆ.
ಈಗ ವಿದೇಶದಲ್ಲಿ ತಲೆ ಮರೆಸಿಕೊಂಡಿರುವ ಜುನೈದ್ ಜೊತೆ ಮಾತ್ರ ನಾಸೀರ್ ಚರ್ಚೆ ನಡೆಸುತ್ತಿದ್ದ. ಬೇಕಾದ ಫಂಡಿಂಗ್, ಶಸ್ತ್ರಾಸ್ತ್ರ ಹಾಗೂ ತರಬೇತಿಗಳನ್ನು ಆತನ ಮುಖಾಂತರವೇ ಕೊಡಿಸಿದ್ದಾನೆ ಎನ್ನಲಾಗಿದೆ. ಈಗ ಸೆರೆ ಸಿಕ್ಕಿರುವ ಆರು ಶಂಕಿತ ಉಗ್ರರಿಗೂ ಹಾಗೂ ನಾಸಿರ್ ಗೂ ಯಾವುದೇ ಸಂಪರ್ಕ ಇರಲಿಲ್ಲ. ಈ ಪ್ರಕರಣದ ತನಿಖೆ ನಡೆಸುತ್ತಿರುವ ಸಿಸಿಬಿ ಪೋಲೀಸರು ತಾಂತ್ರಿಕ ಸಾಕ್ಷ್ಯದ ಮೂಲಕ ಇದನ್ನು ಪತ್ತೆ ಹಚ್ಚಿದ್ದಾರೆ. ಈಗ ಕೇರಳ ಜೈಲಿನಲ್ಲಿರುವ ನಾಸಿರ್ ನನ್ನು ಸಿಸಿಬಿ ಪೋಲೀಸರು ಬಾಡಿ ವಾರೆಂಟ್ ಮುಖಾಂತರ ಕರೆತರಲು ಸಿದ್ಧತೆ ನಡೆಸಿದ್ದು, ವಿಧ್ವಂಸಕ ಕೃತ್ಯದ ಸಂಚಿನ ಮತ್ತಷ್ಟು ಮಾಹಿತಿ ಬಹಿರಂಗವಾಗಲಿದೆ.
ಒಂದು ವೇಳೆ ಈ ಶಂಕಿತರನ್ನು ಬಂದಿಸದೇ ಇದ್ದರೆ ಇವರು ನಸೀರ್ ನ ಸೂಚನೆಯಂತೆ ಭಯೋತ್ಪಾದನಾ ಕೃತ್ಯ ಎಸಗುತ್ತಿದ್ದರು ಎಂದು ಪೋಲೀಸರು ತಿಳಿಸಿದ್ದಾರೆ. ಜೈಲಿನಲ್ಲಿದ್ದುಕೊಂಡೇ ಉಗ್ರ ಕೃತ್ಯ ಎಸಗಲು ಯುವಕರನ್ನು ತಯಾರು ಮಾಡುತ್ತಿರುವ ನಸೀರ್ ನ ಕೃತ್ಯ ಪೋಲೀಸರನ್ನೂ ಚಕಿತಗೊಳಿಸಿದೆ. ಕರ್ನಾಟಕ , ಕೇರಳ, ತಮಿಳುನಾಡಿನಲ್ಲಿ ಈತನ ವಿರುದ್ದ ಒಟ್ಟು 19 ಭಯೋತ್ಪಾದನಾ ಕೃತ್ಯದ ಮೊಕದ್ದಮೆಗಳು ವಿಚಾರಣೆಗೆ ಬಾಕಿ ಇವೆ.