ಹಲಸು ಆರೋಗ್ಯಕ್ಕೆ ತುಂಬಾ ಉಪಯೋಗಕಾರಿ. ಹಲಸಿನ ಹಣ್ಣಿನ ಬೀಜಗಳು ಕೂಡಾ ಆರೋಗ್ಯಕ್ಕೆ ತುಂಬಾನೇ ಒಳ್ಳೆಯದು. ಅನೇಕ ಪೋಷಕಾಂಶಗಳಿಂದ ಸಮೃದ್ಧವಾಗಿರುವ ಹಲಸಿನ ಹಣ್ಣಿನ ಬೀಜದ ಆರೋಗ್ಯ ಪ್ರಯೋಜನಗಳು ಇವೆ.
ತಿನ್ನಲು ಬಲು ರುಚಿಕರವಾಗಿರುವ ಹಲಸು ನಾಲಿಗೆಗೆ ರುಚಿ ಮಾತ್ರವಲ್ಲದೆ ಆರೋಗ್ಯಕ್ಕೂ ಉತ್ತಮ ಪೊಟಾಸಿಯಂ ಮತ್ತು ವಿಟಮಿನ್ ಗಳನ್ನು ನೀಡುತ್ತದೆ. ಆದರೆ ಹಲಸಿನ ಹಣ್ಣು ತಿಂದು ಅದರಲ್ಲಿರುವ ಬೀಜವನ್ನು ಹಲವರು ಎಸೆಯುತ್ತಾರೆ. ಇದನ್ನು ಎಸೆಯುವ ಬದಲು ಆ ಬೀಜಗಳನ್ನು ಸುಟ್ಟು ಅಥವಾ ಬೇಯಿಸಿ ತಿನ್ನಬಹುದು. ಏಕೆಂದರೆ ಇದು ನಾಲಿಗೆಗೆ ರುಚಿಯನ್ನು ನೀಡುವುದು ಮಾತ್ರವಲ್ಲದೆ ಆರೋಗ್ಯಕ್ಕೂ ಕೂಡಾ ಬಹಳ ಪ್ರಯೋಜನಕಾರಿ. ಈ ಹಲಸಿನ ಬೀಜಗಳಲ್ಲಿ ಹೇರಳವಾಗಿ ಪ್ರೋಟೀನ್, ವಿಟಮಿನ್ ಬಿ ಮತ್ತು ಪೊಟ್ಯಾಸಿಯಂ ನಂತಹ ಪೋಷಕಾಂಶಗಳಿಂದ ತುಂಬಿರುತ್ತದೆ.
ಇಂತಹ ಪೋಷಕಾಂಶಗಳಿಂದ ಸಮೃದ್ಧವಾಗಿರುವ ಹಲಸಿನಹಣ್ಣಿನ ಬೀಜಗಳ ಸೇವನೆಯಿಂದ ದೊರಕುವ ಆರೋಗ್ಯ ಪ್ರಯೋಜನಗಳ ಬಗ್ಗೆ ತಿಳಿಯೋಣ.
ಹಲಸಿನ ಬೀಜಗಳಲ್ಲಿ ಫೈಬರ್ ಅಂಶ ಸಮೃದ್ಧವಾಗಿದ್ದು, ಇದು ಜೀರ್ಣಕ್ರಿಯೆಯನ್ನು ಸುಧಾರಿಸಲು ಸಹಾಯ ಮಾಡುತ್ತದೆ. ಹಾಗೂ ಕರುಳಿನ ಆರೋಗ್ಯವನ್ನು ಸುಧಾರಿಸಲು ಸಹಾಯಕ. ಮಾತ್ರವಲ್ಲದೆ ಹಲಸಿನ ಬೀಜದ ಸೇವನೆಯಿಂದ ಮಲಬದ್ಧತೆಯನ್ನು ಕೆಲವೊಮ್ಮೆ ಸರಿಯಾಗುವ ಹಾಗೆ ಮಾಡುತ್ತದೆ.
ಹಲಸಿನ ಬೀಜಗಳಲ್ಲಿ ಪೊಟ್ಯಾಸಿಯಂ ಅಂಶ ಸಮೃದ್ಧವಾಗಿರುವುದರಿಂದ ಪೊಟ್ಯಾಸಿಯಂ ರಕ್ತನಾಳಗಳಿಗೆ ವಿಶ್ರಾಂತಿಯನ್ನು ಒದಗಿಸುವ ಮೂಲಕ ರಕ್ತದೊತ್ತಡದವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.
ಆರೋಗ್ಯಕರ ಮೂಳೆಗಾಗಿ ಕ್ಯಾಲ್ಸಿಯಂ ಹೊರತು ಪಡಿಸಿ ಇನ್ನು ಹಲವಾರು ಇತರ ಪೋಷಕಾಂಶಗಳು ಕೂಡಾ ನಮ್ಮ ದೇಹಕ್ಕೆ ಬೇಕಾಗುತ್ತವೆ. ಅವುಗಳಲ್ಲಿ ಮೆಗ್ನೇಸಿಯಂ ಕೂಡಾ ಒಂದು. ಹಲಸಿನ ಹಣ್ಣಿನ ಬೀಜಗಳಲ್ಲಿ ಹೇರಳವಾಗಿ ಮೆಗ್ನೇಸಿಯಂ ನಂತಹ ಅಂಶಗಳಿದ್ದು, ಇದು ಕ್ಯಾಲ್ಸಿಯಂ ಹೀರಿಕೊಳ್ಳಲು ಮತ್ತು ಮೂಳೆಗಳನ್ನು ಬಲಪಡಿಸಲು ಸಹಾಯ ಮಾಡುತ್ತದೆ ಎಂದರೆ ತಪ್ಪಾಗಲಾರದು.
ಹಲಸಿನ ಬೀಜಗಳಲ್ಲಿರುವ ಕಾರ್ಬೋಹೈಡ್ರೇಟ್ ಇರುವ ಕಾರಣ ಇದರ ಸೇವನೆಯಿಂದಾಗಿ ಶಕ್ತಿಯ ಉತ್ತಮ ಮೂಲವು ನಮಗೆ ದೊರಕುತ್ತದೆ. ಹಲಸಿನ ಬೀಜಗಳು ವಿಟಮಿನ್ ಬಿ ಅಂಶವನ್ನು ಕೂಡ ಹೊಂದಿದೆ.
ಕಬ್ಬಿಣಾಂಶ ಕೊರತೆಯ ಕಾರಣದಿಂದ ಹೆಚ್ಚಾಗಿ ಮಹಿಳೆಯರು ರಕ್ತಹೀನತೆಯ ಸಮಸ್ಯೆಯನ್ನು ಎದುರಿಸುತ್ತಿರುತ್ತಾರೆ. ಹಲಸಿನ ಬೀಜಗಳು ಕಬ್ಬಿಣಾಂಶದ ಉತ್ತಮ ಮೂಲವಾಗಿದ್ದು, ಅದು ಆರೋಗ್ಯಕರ ಕೆಂಪು ರಕ್ತಕಣಗಳ ಉತ್ಪಾದನೆಗೆ ಸಹಾಯ ಮಾಡುತ್ತದೆ. ಸಾಕಷ್ಟು ಪ್ರಮಾಣದ ಕಬ್ಬಿಣದ ಸೇವನೆಯು ರಕ್ತಹೀನತೆಯನ್ನು ತಡೆಯಲು ಸಹಾಯ ಮಾಡುವುದರ ಜೊತೆಗೆ ಅವುಗಳು ದೇಹದಾದ್ಯಂತ ಸೂಕ್ತವಾದ ಆಮ್ಲಜನಕದ ಸಾಗಣೆಯನ್ನು ಉತ್ತೇಜಿಸುತ್ತದೆ. ಇಷ್ಟೆಲ್ಲ ಆರೋಗ್ಯ ಪ್ರಯೋಜನಗಳಿರುವ ಹಲಸಿನ ಬೀಜದ ಸೇವನೆಯನ್ನು ನಾವು ಆಗಾಗ ಮಾಡುತ್ತಿರುವುದು ಉತ್ತಮ.