ಮಳೆಗಾಲ ಈಗಾಗಲೇ ಆರಂಭವಾಗಿದೆ. ಮಳೆಗಾಲದಲ್ಲಿ ಸಾಮಾನ್ಯವಾಗಿ ಜ್ವರ, ಶೀತ, ಅಲರ್ಜಿಯಂತಹ ಸಮಸ್ಯೆಗಳು ಮಕ್ಕಳನ್ನು ಆಗಾಗ ಕಾಡುತ್ತಿರುತ್ತವೆ. ಆದ್ದರಿಂದ ಮಳೆಗಾಲದಲ್ಲಿ ಪೋಷಕರು ಮಕ್ಕಳ ಆರೋಗ್ಯದ ಬಗ್ಗೆ ಸಾಕಷ್ಟು ಕಾಳಜಿ ವಹಿಸಬೇಕು. ಮಳೆಗಾಲದಲ್ಲಿ ನಿಮ್ಮ ಮಕ್ಕಳನ್ನು ರೋಗಗಳಿಂದ ರಕ್ಷಿಸಲು ಇಲ್ಲಿವೆ ಕೆಲವು ಸಲಹೆ.
ಕುದಿಸಿದ ನೀರು ಬಳಸಿ:
ಮಳೆಗಾಲದಲ್ಲಿ ಸಾಮಾನ್ಯವಾಗಿ ಅನಾರೋಗ್ಯಕ್ಕೆ ತುತ್ತಾಗಲು ಮುಖ್ಯವಾದ ಕಾರಣವೆಂದರೆ ಜಲಜನ್ಯ ರೋಗಗಳು. ಆದ್ದರಿಂದ ಕುದಿಸಿದ ನೀರು ಕುಡಿಯುವುದು ಆರೋಗ್ಯಕ್ಕೆ ಒಳ್ಳೆಯದು. ಹಾಗೂ ಮಕ್ಕಳ ಜೊತೆಗೆ ನೀವು ಸಹ ಕುದಿಸಿದ ನೀರನ್ನು ಕುಡಿಯಿರಿ. ಇದರಿಂದ ನೆಗಡಿ, ಕೆಮ್ಮು, ಜ್ವರ, ಕಫದಂತಹ ಸಮಸ್ಯೆಗಳಿಂದ ದೂರ ಉಳಿಯಬಹುದು.
ರೋಗ ನಿರೋಧಕ ಶಕ್ತಿ ಹೆಚ್ಚಿಸಿ:
ಮಕ್ಕಳಿಗೆ ವಿಟಮಿನ್ ಸಿ ಅಂಶವಿರುವ ಆಹಾರಗಳನ್ನೇ ಹೆಚ್ಚು ನೀಡುವ ಮೂಲಕ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಿಕೊಳ್ಳಬಹುದು. ನಿಂಬೆಹಣ್ಣಿನ ಶರಬತ್ತು, ಬಾಳೆಹಣ್ಣು, ಬಿಟ್ರೂಟ್ ಹಾಗೂ ಟೊಮೆಟೊ ಹಣ್ಣನ್ನು ಮಕ್ಕಳಿಗೆ ನೀಡಿ. ಹೆಚ್ಚು ಕೊಬ್ಬಿನಾಂಶವಿರುವ ಜಂಕ್ ಫುಡ್ಗಳನ್ನು ನೀಡಬೇಡಿ.
ಹೊರಗಿನ ಆಹಾರ ಸೇವಿಸಬೇಡಿ
ಬಹುತೇಕ ರೋಗಗಳು ನೀರಿನಿಂದ ಹರಡುವುದರಿಂದ, ಹೊರಗಡೆ ಆಹಾರ ಪದಾರ್ಥಗಳನ್ನು ಸಿದ್ಧಪಡಿಸಲು ಅಥವಾ ಬೀದಿ ಬದಿಯ ಆಹಾರ ತಯಾರಿಕೆಗೆ ಯಾವ ನೀರನ್ನು ಬಳಸಲಾಗುತ್ತದೆ ಎಂದು ನೀವು ನಿರ್ಧರಿಸುವುದು ಕಷ್ಟ. ಆದ್ದರಿಂದ ಮಕ್ಕಳಿಗೆ ಹೊರಗಿನ ಆಹಾರಗಳನ್ನು ಮಳೆಗಾಲದಲ್ಲಿ ತಿನ್ನಿಸಬೇಡಿ. ಅದರಲ್ಲೂ ಎಣ್ಣೆಯಲ್ಲಿ ಕರಿದ ಗೋಬಿ, ವಡೆ, ಬಜ್ಜಿಗಳನ್ನು ಕೊಡಬೇಡಿ.ಇದರಿಂದ ಗಂಟಲು ಕಿರಿಕಿರಿ ಉಂಟಾಗಿ ಆರೋಗ್ಯ ಕೆಡುತ್ತದೆ. ಮನೆಯಲ್ಲೇ ಮಕ್ಕಳಿಗೆ ಇಷ್ಟವಾಗುವ ಆಹಾರ ಪದಾರ್ಥಗಳನ್ನು ತಯಾರಿಸಿ ಕೊಡಿ. ಬಿಸಿ ಆಹಾರವನ್ನೇ ಮಕ್ಕಳಿಗೆ ಹೆಚ್ಚು ನೀಡಿ.
ಮನೆಯ ಸುತ್ತ ಸ್ವಚ್ಚವಿರಲಿ:
ಮಳೆಗಾಲದಲ್ಲಿ ಮಳೆ ನೀರು ನಿಂತು ಅಲ್ಲಲ್ಲಿ ಸೊಳ್ಳೆಗಳು ಉತ್ಪತ್ತಿಯಾಗುತ್ತವೆ. ಸೊಳ್ಳೆಗಳು ಕಚ್ಚಿ ಡೆಂಗ್ಯೂ, ಮಲೇರಿಯಾ ಜ್ವರಗಳು ಮಕ್ಕಳನ್ನು ಕಾಡಲಿದೆ. ಹೀಗಾಗಿ, ಸುತ್ತಮುತ್ತ ನೀರು ನಿಲ್ಲದಂತೆ ನೋಡಿಕೊಳ್ಳಿ. ಮನೆಯೊಳಗೆ ಸೊಳ್ಳೆ ಪರದೆಗಳನ್ನು ಬಳಸುವುದು ಒಳ್ಳೆಯದು.
ತೆರೆದಿಟ್ಟ ಹಣ್ಣು- ತರಕಾರಿ ಬೇಡ
ತೆರೆದಿಟ್ಟ ಹಣ್ಣು ಅಥವಾ ತರಕಾರಿಗಳು ನೊಣ ಮತ್ತು ಇತರ ಕೀಟಗಳನ್ನು ಆಕರ್ಷಿಸುತ್ತವೆ. ಇದು ಸೋಂಕು ಅಥವಾ ರೋಗ ಹರಡಲು ಕಾರಣವಾಗಬಹುದು. ತಾಜಾ ಹಣ್ಣು ಮತ್ತು ತರಕಾರಿಗಳನ್ನು ಖರೀದಿಸಿ ಮತ್ತು ಸಾಕಷ್ಟು ಬೇಯಿಸಿದ ಆಹಾರ ಸೇವಿಸಿ.
ಬೆಚ್ಚಗಿರಿ, ಒಣಬಟ್ಟೆ ಧರಿಸಿ
ಮಕ್ಕಳಿಗೆ ಮಳೆಯಲ್ಲಿ ಆಟವಾಡುವುದು ಎಂದರೆ ತುಂಬಾ ಇಷ್ಟ. ಹಾಗೇ, ಮಳೆಯಲ್ಲಿ ಮಕ್ಕಳು ನೆನೆದು ಬರುತ್ತಾರೆ. ಮನೆಗೆ ಬಂದ ಮಕ್ಕಳ ತಲೆ ಹಾಗೂ ದೇಹವನ್ನು ಒರೆಸಬೇಕು. ಮಕ್ಕಳನ್ನು ತಂಡಿ ಹಾಗೂ ಮಳೆಯಿಂದ ಬೆಚ್ಚಗೆ ಇಡಬೇಕು. ಮಳೆಗಾಲದಲ್ಲಿ ಒದ್ದೆಯಾಗದಂತೆ ಎಚ್ಚರ ವಹಿಸುವುದು ಅಗತ್ಯ. ಸಾಧ್ಯವಾದಷ್ಟೂ ಬೆಚ್ಚಗಿದ್ದು ನಿಮ್ಮನ್ನು ನೀವು ರಕ್ಷಿಸಿಕೊಳ್ಳಿ. ಒಂದು ವೇಳೆ ಒದ್ದೆಯಾದರೂ, ತಕ್ಷ ಣ ಮನೆಗೆ ತೆರಳಿ ಕಾಲು ಮತ್ತು ಕೈಗಳನ್ನು ತೊಳೆದುಕೊಂಡು, ಬಟ್ಟೆ ಬದಲಿಸಿ, ತಾಜಾ ಹಾಗೂ ಒಣಗಿದ ಬಟ್ಟೆ ಧರಿಸಿ. ಇದು ನಿಮ್ಮನ್ನು ನೆಗಡಿಯಂತಹ ಸಮಸ್ಯೆಯಿಂದ ದೂರ ಇರಿಸಲು ಸಹಕಾರಿಯಾಗಬಲ್ಲದು.