ಇಂದಿನಿಂದ ಹಿಂದೂಗಳ ಪವಿತ್ರ ಅಮರನಾಥ ಯಾತ್ರೆ ಆರಂಭವಾಗಿದೆ. ದಕ್ಷಿಣ ಕಾಶ್ಮೀರದ ಭಗವತಿ ನಗರದ ಬೇಸ್ ಕ್ಯಾಂಪ್ನಿಂದ 3.880 ಮೀಟರ್ ಎತ್ತರದಲ್ಲಿರುವ ಅಮರನಾಥ ದೇಗುಲಕ್ಕೆ ಸುಮಾರು 3,400 ಭಕ್ತರ ಮೊದಲ ಬ್ಯಾಚ್ ಯಾತ್ರೆ ಆರಂಭಿಸಿದೆ. ಜಮ್ಮು ಮತ್ತು ಕಾಶ್ಮೀರದ ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾ ಈ ಯಾತ್ರೆಗೆ ಚಾಲನೆ ನೀಡಿದರು.
ಅಮರನಾಥ ಯಾತ್ರೆ ಜುಲೈ 1 ರಿಂದ ಪ್ರಾರಂಭವಾಗಿ ಆಗಸ್ಟ್ 31 ರಂದು ಕೊನೆಗೊಳ್ಳಲಿದೆ. 62 ದಿನಗಳ ಯಾತ್ರೆಯು ಸಮುದ್ರ ಮಟ್ಟದಿಂದ 13,500 ಅಡಿ ಎತ್ತರದಲ್ಲಿರುವ ದಕ್ಷಿಣ ಕಾಶ್ಮೀರ ಹಿಮಾಲಯದಲ್ಲಿರುವ ಭಗವಾನ್ ಶಿವನ ಗುಹಾ ದೇವಾಲಯಕ್ಕೆ ಭಕ್ತರು ಭೇಟಿ ನೀಡಲಿದ್ದಾರೆ. ಬಿಗಿ ಭದ್ರತೆಯ ನಡುವೆ ಶನಿವಾರ ಮುಂಜಾನೆ ಯಾತ್ರಾರ್ಥಿಗಳು ಬೇಸ್ ಕ್ಯಾಂಪ್ನಿಂದ ಯಾತ್ರೆ ಪ್ರಾರಂಭಿಸಿದ್ದಾರೆ.
ಎರಡು ಮಾರ್ಗಗಳಲ್ಲಿ ಈ ಯಾತ್ರೆ ನಡೆಯಲಿದ್ದು ಅನಂತ್ನಾಗ್ ಜಿಲ್ಲೆಯ ನನ್ವಾನ್-ಪಹಲ್ಗಾಮ್ 48 ಕಿ.ಮೀ. ಮಾರ್ಗ ಹಾಗೂ ಗಂಡೆರ್ಬಾಲ್ ಜಿಲ್ಲೆಯ ಬಲ್ತಾಳ್ನ 14 ಕಿ.ಮೀ. ಮಾರ್ಗವಾಗಿ ಯಾತ್ರೆ ನಡೆಯಲಿದೆ. ಐಟಿಬಿಪಿ ಯೋಧರು ಯಾತ್ರೆಯ ಸಂಪೂರ್ಣ ಭದ್ರತೆಯ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ. ಹೆದ್ದಾರಿಯಲ್ಲಿ ಭಾರತೀಯ ಸೇನೆ ಮತ್ತು ಪೊಲೀಸ್ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ.
ಕೇಂದ್ರಾಡಳಿತ ಪ್ರದೇಶ ಸರ್ಕಾರವು ಆಹಾರ, ವಸತಿ, ವಿದ್ಯುತ್, ನೀರು, ಭದ್ರತೆ ಮತ್ತು ತ್ಯಾಜ್ಯ ನಿರ್ವಹಣೆಗೆ ಸರಿಯಾದ ವ್ಯವಸ್ಥೆಗಳನ್ನು ಸಮರ್ಪಕವಾಗಿ ಮಾಡಲು ಅನೇಕ ಇಲಾಖೆಗಳೊಂದಿಗೆ ಕಾರ್ಯನಿರ್ವಹಿಸುತ್ತಿದೆ.
ಅಮರನಾಥ ಯಾತ್ರೆಯ ಇತಿಹಾಸ:
ಭೃಗು ಮಹರ್ಷಿಗಳು ಪವಿತ್ರ ಅಮರನಾಥ ಗುಹೆಗೆ ಮೊದಲು ಭೇಟಿ ನೀಡಿದ್ದರು. ಕಾಶ್ಮೀರ ಕಣಿವೆ ಸಂಪೂರ್ಣವಾಗಿ ನೀರಿನಲ್ಲಿ ಮುಳುಗಿದ ನಂತರ, ಮಹರ್ಷಿ ಕಶ್ಯಪರು ನದಿಗಳು ಮತ್ತು ತೊರೆಗಳ ಮೂಲಕ ನೀರನ್ನು ಹೊರಕ್ಕೆ ತಂದರು ಎಂದು ಹೇಳಲಾಗುತ್ತದೆ. ಆ ದಿನಗಳಲ್ಲಿ ಭೃಗು ಋಷಿಯು ಹಿಮಾಲಯಕ್ಕೆ ಪ್ರಯಾಣಿಸುವಾಗ ಅದೇ ಮಾರ್ಗದಲ್ಲಿ ಬಂದರು. ತಪಸ್ಸಿಗಾಗಿ ಏಕಾಂತದ ಹುಡುಕಾಟದಲ್ಲಿದ್ದರು. ಈ ಸಂದರ್ಭದಲ್ಲಿ ಅವರು ಬಾಬಾ ಅಮರನಾಥ ಗುಹೆಗೆ ಭೇಟಿ ನೀಡಿದ್ದರು. ಅಂದಿನಿಂದ, ಪ್ರತಿ ವರ್ಷ ಶ್ರಾವಣ ಮಾಸದಲ್ಲಿ ಅಮರನಾಥ ಪವಿತ್ರ ಗುಹೆಯ ಯಾತ್ರೆ ನಡೆಯುತ್ತಿದೆ. ಅಮರನಾಥ ಯಾತ್ರೆಯ ಕುರಿತು ಇತಿಹಾಸಕಾರ ಕಲ್ಹನ್ ಅವರ ‘ರಾಜತರಂಗಿಣಿ’ ಪುಸ್ತಕ ಮತ್ತು ಫ್ರೆಂಚ್ ಪ್ರವಾಸಿ ಫ್ರಾಂಕೋಯಿಸ್ ಬರ್ನಿಯರ್ ಅವರ ಪುಸ್ತಕದಲ್ಲಿ ವಿವರವಾಗಿ ಉಲ್ಲೇಖಿಸಲಾಗಿದೆ.
ಅಮರನಾಥ ಗುಹೆಯ ರಹಸ್ಯ:
ಅಮರನಾಥ ಗುಹೆಯು ಬೇಸಿಗೆಯಲ್ಲಿ ಹೊರತುಪಡಿಸಿ ಹೆಚ್ಚಿನ ಸಮಯ ಹಿಮದಿಂದ ಆವೃತವಾಗಿರುತ್ತದೆ. ಅಮರನಾಥ ಗುಹೆಯ ರಹಸ್ಯವೆಂದರೆ ಇಲ್ಲಿ ಶಿವಲಿಂಗವು ನೈಸರ್ಗಿಕವಾಗಿ ರೂಪುಗೊಂಡಿದೆ. ಗುಹೆಯ ಮೇಲ್ಛಾವಣಿಯಿಂದ ಮಂಜುಗಡ್ಡೆಯು ನೀರಿನ ಹನಿಗಳಾಗಿ ತೊಟ್ಟಿಕ್ಕುತ್ತವೆ, ಇದರಿಂದಾಗಿ ಮಂಜುಗಡ್ಡೆಯ ಶಿವಲಿಂಗವು ರೂಪುಗೊಳ್ಳುತ್ತದೆ. ಶಿವಲಿಂಗದ ಪಕ್ಕದಲ್ಲಿ ಇನ್ನೂ ಎರಡು ಸಣ್ಣ ಮಂಜುಗಡ್ಡೆಯ ಶಿವಲಿಂಗಗಳು ರೂಪುಗೊಳ್ಳುತ್ತದೆ. ಇದನ್ನು ಭಕ್ತರು ತಾಯಿ ಪಾರ್ವತಿ ಮತ್ತು ಭಗವಾನ್ ಗಣೇಶನ ಸಂಕೇತವೆಂದು ಪೂಜಿಸುತ್ತಾರೆ.
ಚಂದ್ರನ ಗಾತ್ರ ಚಿಕ್ಕದಾಗುವಿಕೆಗೆ ಮತ್ತು ದೊಡ್ಡದಾಗುವಿಕೆಗೆ ಅನುಗುಣವಾಗಿ ಇಲ್ಲಿನ ಶಿವಲಿಂಗದ ಗಾತ್ರವು ಬದಲಾವಣೆಯಾಗುತ್ತದೆ. ಅಪೂರ್ವ ದೃಶ್ಯ ಅಮರನಾಥ ಗುಹೆಯಲ್ಲಲ್ಲದೇ ಪ್ರಪಂಚದ ಯಾವ ಮೂಲೆಯಲ್ಲೂ ನೋಡಲು ಸಾಧ್ಯವಿಲ್ಲ. ಇಲ್ಲಿನ ಶಿವಲಿಂಗವು ಶ್ರಾವಣ ಮಾಸದ ಶುಕ್ಲ ಪಕ್ಷದ ಹುಣ್ಣಿಮೆಯಂದು ಪೂರ್ಣ ಗಾತ್ರದಲ್ಲಿ ಇರುತ್ತದೆ ನಂತರ ಅಮಾವಾಸ್ಯೆ ಸಮೀಪಿಸಿದಂತೆ ಅದರ ಗಾತ್ರವು ಕಡಿಮೆಯಾಗಲು ಪ್ರಾರಂಭಿಸುತ್ತದೆ.