ಒಂದೊಂದು ಸಲ ನಮಗೆ ಅರಿವೇ ಇಲ್ಲದಂತೆ ಅತಿಯಾದ ಯೋಚನೆಯಲ್ಲಿ ಮುಳುಗುತ್ತೇವೆ. ಇದೊಂದು ಕಾಯಿಲೆ ಇರಬಹುದಾ ಎಂಬ ಗೊಂದಲ ಒಮ್ಮೊಮ್ಮೆ ಉಂಟಾಗುತ್ತದೆ. ವಿಷಯ ಏನು ಇಲ್ಲದಿದ್ದರೂ ಕೂಡ ಚಿಂತೆ ನಮ್ಮನ್ನು ಕೆಲವೊಮ್ಮೆ ಬಿಡುವುದಿಲ್ಲ.
ಒಂದು ನಿರ್ದಿಷ್ಟ ವಿಷಯ ಅಥವಾ ಸನ್ನೀವೇಶದ ಕುರಿತು ನೀವು ಅತಿಯಾಗಿ ಯೋಚಿಸುವುದು ಓವರ್ ಥಿಂಕಿಂಗ್ ಎನ್ನಲಾಗುತ್ತದೆ.
ಎಲ್ಲಾ ಜನರು ಒಂದಲ್ಲ ಒಂದು ವಿಷಯದ ಬಗ್ಗೆ ಚಿಂತಿಸುತ್ತಲೇ ಇರುತ್ತಾರೆ. ಆದರೆ ಏನನ್ನಾದರೂ ಕುರಿತು ಹೆಚ್ಚು ಸಮಯ ಯೋಚಿಸುವುದು, ಆ ವಿಷಯದಲ್ಲಿಯೇ ಹೆಚ್ಚು ಆಸಕ್ತಿ ಹೊಂದುವುದು, ರಾತ್ರಿ ಕೂಡ ಅದರ ಬಗ್ಗೆಯೇ ಚಿಂತಿಸುವುದು ಓವರ್ ಥಿಂಕಿಂಗ್ ಸಮಸ್ಯೆಯನ್ನು ಸೃಷ್ಟಿಸುತ್ತದೆ.
ಆಳವಾಗಿ ಯೋಚಿಸುವ ಸಮಯದಲ್ಲಿ ನಿಮ್ಮ ಮನಸ್ಸು ಬೇರೆ ಕಡೆ ಕೇಂದ್ರೀಕರಿಸಲು ನಿಮಗೆ ಕಷ್ಟವಾಗುತ್ತದೆ. ಇದು ಮಾನಸಿಕ ಅಸ್ವಸ್ಥತೆ, ಖಿನ್ನತೆಗೆ ಕಾರಣವಾಗಬಹುದು ಎಂದು ಸಂಶೋಧಕರು ಅಭಿಪ್ರಾಯ ವ್ಯಕ್ತಪಡಿಸುತ್ತಾರೆ. ಅತಿಯಾಗಿ ಯೋಚಿಸುವುದು ನಕಾರಾತ್ಮಕತೆಯ ಮೇಲೆ ಕೇಂದ್ರೀಕರಿಸುವ ಮೂಲಕ ಹೆಚ್ಚು ಒತ್ತಡವನ್ನು ಉಂಟುಮಾಡುತ್ತದೆ ಎನ್ನಬಹುದು.
ಓವರ್ ಥಿಂಕಿಂಗ್ ಮಾಡುವುದರಿಂದ ಕಡಿಮೆ ನಿದ್ದೆ ಮತ್ತು ಕಡಿಮೆ ವಿಶ್ರಾಂತಿ ಪಡೆಯುವಂತಾಗುತ್ತದೆ.
ಬೇರೆ ಯಾವುದರ ಬಗ್ಗೆ ಆಸಕ್ತಿ ತೋರಿಸಲು ಸಾಧ್ಯವಾಗುವುದಿಲ್ಲ. ಅಧಿಕ ಚಿಂತೆ ಮಾಡುವುದರಿಂದ ಮಾನಸಿಕ ಖಿನ್ನತೆಗೆ ಒಳಗಾಗುವ ಸಾಧ್ಯತೆ ಅಧಿಕ ಪ್ರಮಾಣದಲ್ಲಿ ಇರುತ್ತದೆ. ಸಾಮಾಜಿಕ ಆತಂಕದ ಅಸ್ವಸ್ಥತೆ ಸೇರಿದಂತೆ ಇನ್ನು ಅನೇಕ ಆರೋಗ್ಯ ಸಮಸ್ಯೆಗಳನ್ನು ಇದರಿಂದ ಅನುಭವಿಸಬೇಕಾಗುತ್ತದೆ.
ಮೇಲೆ ಹೇಳಿದಂತೆ ಒಂದಲ್ಲ ಒಂದು ವಿಷಯಕ್ಕೆ ಒಬ್ಬ ವ್ಯಕ್ತಿ ಅಲೋಚನೆಗಳಲ್ಲಿ ಮುಳುಗಿರುತ್ತಾನೆ. ಸಾಮಾನ್ಯವಾಗಿ ಅಲೋಚನೆ ಮಾಡುವುದಕ್ಕೂ, ಒಂದೇ ವಿಷಯದಲ್ಲಿ ಅಲೋಚನೆಗಳಲ್ಲಿ ಮುಳುಗಿರುವುದಕ್ಕೂ ವ್ಯತ್ಯಾಸಗಳಿವೆ.
ರಾತ್ರಿಯ ಸಮಯದಲ್ಲಿ ಜನರು ಹೆಚ್ಚಾಗಿ ಅಲೋಚನೆಗೆ ಜಾರುವ ಸಂಭವ ಅಧಿಕವಾಗಿರುತ್ತದೆ . ನೀವು ದೀರ್ಘಾವಧಿಯಿಂದ ಈ ಸಮಸ್ಯೆ ಎದುರಿಸುತ್ತಿದ್ದರೆ ವೈದ್ಯರ ಸಲಹೆ ಪಡೆಯುವುದು ಉತ್ತಮ.
ವೈದ್ಯರ ಹೊರತಾಗಿ ನೀವು ಧ್ಯಾನ, ನಿಮ್ಮ ಮನಸ್ಸನ್ನು ಬೇರೆಡೆಗೆ ಗಮನ ಹರಿಸುವಂತೆ ಮಾಡುವುದು, ಬಿಡುವಿಲ್ಲದೆ ಯಾವುದಾದರು ಒಂದು ಕೆಲಸದಲ್ಲಿ ತೊಡಗಿರುವ ಹಾಗೆ ಮಾಡಿಕೊಳ್ಳೋದು ಉತ್ತಮ.
ನಿಮ್ಮ ನೆಚ್ಚಿನ ಪುಸ್ತಕಗಳನ್ನು ಓದುವುದು. ಸ್ನೇಹಿತರೊಟ್ಟಿಗೆ ಕಾಲ ಕಳೆಯುವುದು ಸೇರಿದಂತೆ ಸಾಕಷ್ಟು ಮಾರ್ಗಗಳ ಮೂಲಕ ಈ ಓವರ್ ಥಿಂಕಿಂಗ್ ಸಮಸ್ಯೆಯಿಂದ ಹೊರಬರಬಹುದಾದ ದಾರಿ ಇದೆ.