ಲವಂಗ ಎಂದರೆ ಸಾಮಾನ್ಯವಾಗಿ ವಿಶೇಷ ಖಾದ್ಯಕ್ಕೆ ಬಳಸುವ ಸುಗಂಧಕಾರಕ ಎಂದೇ ನಾವು ಅಂದುಕೊಂಡಿದ್ದೇವೆ. ಅಪರೂಪಕ್ಕೆ ಹಲ್ಲು ನೋವಾದರೆ ಲವಂಗದ ಎಣ್ಣೆಯನ್ನು ಬಿಟ್ಟುಕೊಳ್ಳುವುದನ್ನೂ ಗಮನಿಸಿದ್ದೇವೆ. ಆದರೆ ವಾಸ್ತವದಲ್ಲಿ ಲವಂಗದ ಮಹತ್ವ ಇನ್ನೂ ಬಹಳಷ್ಟಟ್ಟಿದ್ದು ಇಂದಿನ ಲೇಖನದಲ್ಲಿ ಮುಖ್ಯವಾದವನ್ನು ವಿವರಿಸಲಾಗಿದೆ.
ಇಂಡೋನೇಷ್ಯಾದ ಮೂಲ ಎಂದು ಭಾವಿಸಲಾಗಿರುವ ನಿತ್ಯಹರಿದ್ವರ್ಣ ದಾಲ್ಚಿನ್ನಿ ಗಿಡದ ಪ್ರತಿ ಭಾಗಗಳೂ ಸುಗಂಧಭರಿತ ಹಾಗೂ ರುಚಿ ಮತ್ತು ಆರೋಗ್ಯ ವೃದ್ದಿಸುವ ಸಾಮಾಗ್ರಿಗಳಾಗಿವೆ.
ಇದರ ಚೆಕ್ಕೆ, ಒಣ ಎಲೆ, ಮೊಗ್ಗು, ಹೂವು, ಬೇರು, ಎಣ್ಣೆ, ಎಲ್ಲವೂ ಸುಗಂಧಮಯ. ಇದರ ಹೂವಿನ ಮೊಗ್ಗು ಇನ್ನೂ ಹೂವಾಗುವ ಮುನ್ನವೇ ಕೊಯ್ದು ಒಣಗಿಸಿದರೆ ಇದೇ ಲವಂಗ. ಇದು ವಿಶ್ವದ ಅತ್ಯಂತ ಜನಪ್ರಿಯ ಮಸಾಲೆಗಳಲ್ಲಿ ಒಂದಾಗಿದೆ.
ಇದನ್ನು ಸೇರಿಸಿದ ಭಕ್ಷ್ಯಗಳಿಗೆ ನೀಡುವ ಸಿಹಿ ಮತ್ತು ರುಚಿಯ ಜೊತೆಗೆ, ಲವಂಗವು ತನ್ನ ಔಷಧೀಯ ಗುಣಗಳಿಗೂ ಹೆಸರುವಾಸಿಯಾಗಿದೆ.
ಅನುಭವದಿಂದ ಇದರ ಪ್ರಯೋಜನವನ್ನುಅರಿತ ಆಯುರ್ವೇದವೂ ದಿನಕ್ಕೆರಡು ಲವಂಗಗಳನ್ನು ಸೇವಿಸುವಂತೆ ಸಲಹೆ ಮಾಡುತ್ತದೆ. ಹೀಗೆ ದಿನಕ್ಕೆರಡು ಲವಂಗ ಜಗಿದು ನುಂಗುವುದರಿಂದ ಲಭಿಸುವ ಪ್ರಮುಖ ಹತ್ತು ಆರೋಗ್ಯಕರ ಪ್ರಯೋಜನಗಳನ್ನು ನೋಡೋಣ:
ರೋಗ ನಿರೋಧಕ ಶಕ್ತಿಯನ್ನು ಬಲಪಡಿಸುತ್ತವೆ
ಲವಂಗದಲ್ಲಿರುವ ರೋಗನಿರೋಧಕ ಗುಣದಿಂದಾಗಿ ನಾವು ಸೇವಿಸಬಹುದಾದ ಅತ್ಯುತ್ತಮ ಆಹಾರಗಳಲ್ಲಿ ಪ್ರಮುಖ ಸ್ಥಾನ ಪಡೆದಿದೆ.
ಏಕೆಂದರೆ ಇವು ದೇಹದಲ್ಲಿನ ಬಿಳಿ ರಕ್ತ ಕಣಗಳ ಪ್ರಮಾಣವನ್ನು ಹೆಚ್ಚಿಸುತ್ತವೆ, ಬಿಳಿ ರಕ್ತಕಣಗಳು ನಮ್ಮ ರೋಗ ನಿರೋಧಕ ವ್ಯವಸ್ಥೆಯ ವೀರ ಯೋಧರಂತೆ.
ಇವುಗಳ ಸಂಖ್ಯೆ ಉತ್ತಮ ವಾಗಿದ್ದಷ್ಟೂ ನಮ್ಮ ರೋಗ ನಿರೋಧಕ ವ್ಯವಸ್ಥೆಯ ಸೈನ್ಯವೂ ಬಲವಾಗಿಯೇ ಇದ್ದು ಹಲವಾರು ಸೋಂಕುಗಳ ವಿರುದ್ಧ ಹೋರಾಡಲು ನಮಗೆ ಸಹಾಯ ಮಾಡುತ್ತದೆ.
ಮತ್ತು ಅವುಗಳು ಒಳಗೊಂಡಿರುವ ವಿಟಮಿನ್ ಸಿ ಸಹಾ ರೋಗ ನಿರೋಧಕ ಶಕ್ತಿಯನ್ನು ಇನ್ನಷ್ಟು ಬಲಪಡಿಸುತ್ತದೆ.
ಲವಂಗ ಜೀರ್ಣಕ್ರಿಯೆಯನ್ನು ಉತ್ತಮಗೊಳಿಸುತ್ತದೆ
ಲವಂಗದಲ್ಲಿರುವ ಪೋಷಕಾಂಶಗಳು ಜೀರ್ಣಕಾರಿ ಕಿಣ್ವಗಳ ಸ್ರವಿಸುವಿಕೆಗೆ ಉತ್ತೇಜನ ನೀಡುವ ಕಾರಣದಿಂದಲೇ ಆಯುರ್ವೇದ ಲವಂಗವನ್ನು ಜೀರ್ಣಕಾರಿ ಸಮಸ್ಯೆಗಳಿಗೆ ಪರಿಹಾರವಾಗಿ ಬಳಸುತ್ತಿದೆ.
ಇದರ ಸೇವನೆಯಿಂದ ವಾಕರಿಕೆ ಕಡಿಮೆ ಆಗುತ್ತದೆ. ಲವಂಗದಲ್ಲಿ ಕರಗುವ ನಾರು ಉತ್ತಮ ಪ್ರಮಾಣದಲ್ಲಿದ್ದು ಜೀರ್ಣಕ್ರಿಯೆ ಸುಲಭವಾಗಲು ಮತ್ತು ಮಲಬದ್ದತೆ ತಡೆಯಲು ನೆರವಾಗುತ್ತದೆ.
ಲವಂಗವನ್ನು ಹಾಗೇ ಜಗಿದು ನುಂಗುವುದು ಉತ್ತಮವಾಗಿದೆ. ಆದರೆ ಇದು ಕೊಂಚ ಖಾರವಾಗಿದ್ದು ಇದರ ರುಚಿ ಎಲ್ಲರಿಗೂ ಹಿಡಿಸದೇ ಹೋಗಬಹುದು.
ಹಾಗಾಗಿ ಇದನ್ನು ಕುಟ್ಟಿ ಪುಡಿ ಮಾಡಿ ಅಹಾರದೊಂದಿಗೆ ಬೆರೆಸಿ ಅಥವಾ ಕೊಂಚ ಜೇನಿನೊಂದಿಗೆ ಬೆರೆಸಿ ಸೇವಿಸಬಹುದು.
ಹಲ್ಲುನೋವನ್ನು ಕಡಿಮೆ ಮಾಡುತ್ತದೆ
ಈ ಮಸಾಲೆಯಲ್ಲಿ ಸ್ಥಳೀಯ ಅರಿವಳಿಕೆ ಗುಣಗಳೂ ಇವೆ. ವಿಶೇಷವಾಗಿ ನಿಮಗೆ ಹಲ್ಲುನೋವು ಇದ್ದರೆ, ನೀವು ದಂತವೈದ್ಯರ ಬಳಿಗೆ ಬರುವವರೆಗೂ ಎದುರಾಗುವ ನೋವು ಮತ್ತು ಬಾವಿನಿಂದ ಪರಿಹಾರ ಪಡೆಯಲು ನೋಯುತ್ತಿರುವ ಭಾಗದ ಮೇಲೆ ಲವಂಗದ ಎಣ್ಣೆಯಲ್ಲಿ ಅದ್ದಿರುವ ಹತ್ತಿಯುಂಡೆಯನ್ನು ಇರಿಸಿ.
ಕೊಂಚ ಹೊತ್ತು ಕಳೆದ ಬಳಿಕ ಈ ಎಣ್ಣೆಯಂಶ ಲಾಲಾರಸದಲ್ಲಿ ಕರಗಿ ಹೋಗುವ ಕಾರಣ ಆಗಾಗ ಹೊಸ ಹತ್ತಿಯುಂಡೆಯನ್ನು ಲವಂಗದ ಎಣ್ಣೆಯಲ್ಲಿ ಅದ್ದಿ ಇರಿಸುತ್ತಾ ಹೋಗಬೇಕು.
ಆದರೆ ಇದರ ಪರಿಣಾಮ ನೋವನ್ನು ಕಡಿಮೆ ಮಾಡುವುದೇ ವಿನಃ ನೋವಿನ ಮೂಲವನ್ನು ಇಲ್ಲವಾಗಿಸುವಲ್ಲಿ ಇಲ್ಲ.
ಹಾಗಾಗಿ ಇದನ್ನು ತಾತ್ಕಾಲಿಕ ಶಮನ ಎಂದು ಪರಿಗಣಿಸಬೇಕೇ ವಿನಃ ಶಾಶ್ವತ ಪರಿಹಾರ ಎಂದು ಪರಿಗಣಸಬಾರದು.
ಯಕೃತ್ ಆರೋಗ್ಯಕರವಾಗಿರಲು ನೆರವಾಗುತ್ತದೆ
ನಮ್ಮ ದೇಹದ ಪ್ರಮುಖ ಅಂಗವಾದ ಯಕೃತ್ ಗೆ ಹಲವಾರು ಜವಾಬ್ದಾರಿಗಳಿವೆ.
ದೇಹವನ್ನು ಸತತವಾಗಿ ಶೋಧಿಸಿ ಶುದ್ದೀಕರಿಸುವುದು, ಪಿತ್ತರಸವನ್ನು ಸ್ರವಿಸಿ ಜೀರ್ಣಕ್ರಿಯೆಗೆ ನೆರವಾಗುವುದು, ಜೀವ ರಾಸಾಯನಿಕ ಕ್ರಿಯೆಯನ್ನು ನಿಯಂತ್ರಿಸುವುದು, ನಾವು ಸೇವಿಸುವ ಔಷಧಿಗಳ ಸರಿಯಾದ ಬಳಕೆ ಸೂಕ್ತವಾಗಲು ನೆರವಾಗುತ್ತದೆ.
ಲವಂಗದಲ್ಲಿರುವ ಯೂಜಿನಾಲ್ ಎಂಬ ಪೋಷಕಾಂಶ ಯಕೃತ್ ಸ್ನೇಹಿ ಗುಣಗಳನ್ನು ಹೊಂದಿದ್ದು ಯಕೃತ ಕ್ಷಮತೆಯನ್ನು ಹೆಚ್ಚಿಸುತ್ತದೆ.
ದೇಹದ ನೋವು ಮತ್ತು ಉರಿಯೂತವನ್ನು ಕಡಿಮೆ ಮಾಡಲು ನೆರವಾಗುತ್ತದೆ
ಲವಂಗದಲ್ಲಿರುವ ಯುಜೆನಾಲ್ ನೋವು ನಿವಾರಕ ಮತ್ತು ಉರಿಯೂತ ನಿವಾರಕ ಗುಣಗಳನ್ನು ಹೊಂದಿದೆ. ವಿಶೇಷವಾಗಿ ತಲೆನೋವನ್ನು ಗುಣಪಡಿಸಲು ಇದು ಹೆಚ್ಚು ಬಳಕೆಯಾಗುತ್ತದೆ.
ಈ ಅದ್ಭುತ ಗುಣದ ಪ್ರಯೋಜನ ಪಡೆಯಲು 2 ವಿಧಾನಗಳಲ್ಲಿ ಒಂದನ್ನು ಅನುಸರಿಸಬಹುದು. ಅವುಗಳನ್ನು ಪುಡಿ ಅಥವಾ ಎಣ್ಣೆಯ ರೂಪದಲ್ಲಿ ಸೇವಿಸುವುದು ಅಥವಾ ನೋವಿರುವ ಭಾಗದ ಮೇಲೆ ಸವರಿಕೊಳ್ಳುವುದು.
ನೀವು ಅವುಗಳನ್ನು ಸೇವಿಸಲು ಬಯಸಿದರೆ, ಒಂದು ಚಿಕ್ಕ ಚಮಚ ಲವಂಗ ಪುಡಿ ಮತ್ತು ಕೊಂಚ ಕಲ್ಲುಪ್ಪನ್ನು ಒಂದು ಲೋಟ ಹಾಲಿನೊಂದಿಗೆ ಬೆರೆಸಿ ಕುಡಿಯಿರಿ.
ಇದರಿಂದ ಮೈ ಕೈ ನೋವು ಹಾಗೂ ತಲೆನೋವನ್ನು ಶೀಘ್ರವೇ ನಿವಾರಣೆಯಾಗುತ್ತದೆ.
ನೀವು ಇದನ್ನು ನೋವಿರುವ ಭಾಗಕ್ಕೆ ಹಚ್ಚಲು ಬಯಸಿದರೆ, ನೀವು ಲವಂಗವನ್ನು ತೆಂಗಿನ ಎಣ್ಣೆಯಲ್ಲಿ ನೆನೆಸಿಟ್ಟು ಕೊಂಚ ಹೊತ್ತಿನ ಬಳಿಕ ಅರೆದು ದಪ್ಪನೆಯ ಲೇಪನ ತಯಾರಿಸಿ ನೋವಿರುವ ಭಾಗಕ್ಕೆ ಹಚ್ಚಿಕೊಳ್ಳಬಹುದು.
ಮೂಳೆ ಮತ್ತು ಮೂಳೆಸಂಧುಗಳಿಗೆ ಉತ್ತಮವಾಗಿವೆ
ಲವಂಗದಲ್ಲಿ ಮೂಳೆ ಮತ್ತು ಮೂಳೆಸಂಧುಗಳ ಆರೋಗ್ಯವನ್ನು ಉತ್ತೇಜಿಸುವ ಫ್ಲೇವನಾಯ್ಡುಗಳು, ಮ್ಯಾಂಗನೀಸ್ ಮತ್ತು ಯುಜೆನಾಲ್ ನಂತಹ ಹಲವಾರು ಪೋಷಕಾಂಶಗಳನ್ನು ಹೊಂದಿದೆ.
ಈ ಪೋಷಕಾಂಶಗಳು ಮೂಳೆಯ ಸಾಂದ್ರತೆಯನ್ನು ಹೆಚ್ಚಿಸುತ್ತವೆ ಹಾಗೂ ಅವು ಮೂಳೆ ಅಂಗಾಂಶಗಳ ರಚನೆಯಲ್ಲಿ ಬಳಸಲ್ಪಡುವ ಮೂಲಕ ಮತ್ತು ಆರೋಗ್ಯಕರ ಖನಿಜಗಳನ್ನು ನಮ್ಮ ಮೂಳೆಗಳಿಗೆ ಸೇರಿಸಿ ಮೂಳೆಗಳನ್ನು ಗಟ್ಟಿಗೊಳಿಸುತ್ತವೆ.
ಟೀ ಟ್ರೀ ಎಣ್ಣೆ, ಲವಂಗ ಮತ್ತು ತುಳಸಿಯನ್ನು ಬಳಸಿ ತಯಾರಿಸಿದ ಗಿಡಮೂಲಿಕೆಗಳ ಮುಖಮಾರ್ಜಕ ಅಥವಾ ಮೌತ್ವಾಶ್ ಸಹಾ ಯಶಸ್ವಿಯಾಗಿದೆ. ಬೆಲ್ಜಿಯಂನ ಕೆ.ಯು.ಲೆವೆನ್ ವಿಶ್ವವಿದ್ಯಾಲಯದ ಪಿರಿಯೊಡಾಂಟಿಕ್ಸ್ (ಹಲ್ಲಿನ ಹುಳುಕುಗಳ ಚಿಕಿತ್ಸಕ) ವಿಭಾಗದ ತಜ್ಞರ ಪ್ರಕಾರ, ಈ ನೈಸರ್ಗಿಕ ಮುಖಮಾರ್ಜಕ ಒಸಡುಗಳ ಆರೋಗ್ಯವನ್ನು ಉತ್ತಮಗೊಳಿಸುತ್ತದೆ ಮತ್ತು ಸತತ ಇಪ್ಪತ್ತೊಂದು ದಿನ ತೊಳೆದುಕೊಳ್ಳುವ ಮೂಲಕ ಬಾಯಿಯಲ್ಲಿರುವ ಬ್ಯಾಕ್ಟೀರಿಯಾ ಮತ್ತು ಕೂಳೆ ಸಂಗ್ರಹಗೊಳ್ಳುವ ಪ್ರಮಾಣವನ್ನು ಕಡಿಮೆ ಮಾಡುತ್ತದೆ.
ಪ್ರಬಲ ಆಂಟಿ ಆಕ್ಸಿಡೆಂಟ್ ಅಥವಾ ಉತ್ಕರ್ಷಣ ನಿರೋಧಕಗ ಗುಣಗಳಿವೆ
ಲವಂಗಗಳಲ್ಲಿ ಪಾಲಿಫಿನಾಲ್ಗಳು ಉತ್ತಮ ಪ್ರಮಾಣದಲ್ಲಿವೆ.. ಪಾಲಿಫಿನಾಲ್ಗಳು ನಮ್ಮ ಸಸ್ಯಾಹಾರದಲ್ಲಿರುವ ಪೋಷಕಾಂಶಗಳಾಗಿದ್ದು ಕರುಳುಗಳಿಂದ ಹೀರಲ್ಪಡುವ ಸೂಕ್ಷ್ಮ ಧಾತುಗಳಾಗಿವೆ.
ಅವು ನಮ್ಮ ದೇಹಕ್ಕೆ ಹೆಚ್ಚಿನ ಪ್ರಯೋಜನಗಳನ್ನು ನೀಡುತ್ತವೆ. ಹೇಗೆಂದರೆ: ಅವು ರಕ್ತದಲ್ಲಿನ ಕೊಲೆಸ್ಟ್ರಾಲ್ ಮಟ್ಟ ತಗ್ಗಿಸಿ ರಕ್ತದೊತ್ತಡವನ್ನು ಕಡಿಮೆ ಮಾಡುತ್ತದೆ.
ಅಪಧಮನಿಗಳ ಕಾರ್ಯವನ್ನು ಸುಧಾರಿಸುವ ಜೊತೆಗೇ ನರಗಳ ಹಿಗ್ಗುವಿಕೆಯ ಗುಣವನ್ನೂ ಉತ್ತಮಗೊಳಿಸುತ್ತವೆ. ಈ ಮೂಲಕ ಉತ್ತಮ ಆರೋಗ್ಯ ಮತ್ತು ದೀರ್ಘಾಯುಷ್ಯವನ್ನು ನೀಡುತ್ತವೆ.
ರಕ್ತದಲ್ಲಿನ ಸಕ್ಕರೆಯ ಮಟ್ಟದ ನಿಯಂತ್ರಣದಲ್ಲಿ ನೆರವಾಗಬಹುದು
ಮಧುಮೇಹಿಗಳ ರಕ್ತದಲ್ಲಿ ಸಕ್ಕರೆಯ ಮಟ್ಟ ಅಧಿಕವಾಗದಂತೆ ನೋಡಿಕೊಳ್ಳುವುದೇ ಮಧುಮೇಹ ನಿಯಂತ್ರಣದ ಕ್ರಮವಾಗಿದೆ.
ಮಧುಮೇಹದ ಸಮಸ್ಯೆ ಇರುವವರಿಗೆ ಲವಂಗ ಸೂಕ್ತವಾಗಿದೆ, ಏಕೆಂದರೆ ಅವು ದೇಹದೊಳಗಿನ ಇನ್ಸುಲಿನ್ ನಂತೆ ಕಾರ್ಯನಿರ್ವಹಿಸುತ್ತವೆ.
ತನ್ಮೂಲಕ ರಕ್ತದಿಂದ ಹೆಚ್ಚುವರಿ ಸಕ್ಕರೆಯನ್ನು ನಿಮ್ಮ ಜೀವಕೋಶಗಳಿಗೆ ಒದಗಿಸಲು, ಸಮತೋಲನವನ್ನು ಪುನಃಸ್ಥಾಪಿಸಲು ಮತ್ತು ನಿಮ್ಮ ರಕ್ತದಲ್ಲಿನ ಸಕ್ಕರೆಯನ್ನು ನಿಯಂತ್ರಣದಲ್ಲಿಡಲು ಅವು ನೆರವಾಗುತ್ತವೆ.
ರಕ್ತ ಹೆಪ್ಪುಗಟ್ಟುವಿಕೆಯನ್ನು ನಿಧಾನಗೊಳಿಸುತ್ತದೆ. ಲವಂಗದಲ್ಲಿ ಕಂಡುಬರುವ ಯುಜೆನಾಲ್ ರಕ್ತ ಹೆಪ್ಪುಗಟ್ಟುವಿಕೆಯನ್ನು ನಿಧಾನಗೊಳಿಸುತ್ತದೆ.
ಆದರೆ ಇದು ರಕ್ತವನ್ನು ತೆಳುವಾಗಿಸುವ ಗುಣ ಇರುವ ಔಷಧಿಗಳೊಂದಿಗೆ ವ್ಯತಿರಿಕ್ತವಾಗಿ ಪ್ರತಿಕ್ರಿಯಿಸುವ ಕಾರಣ ಈ ಔಷಧಿಗಳನ್ನು ಸೇವಿಸುವವರು ಲವಂಗವನ್ನು ಸೇವಿಸಬಾರದು.
ಹಾಗಾಗಿ, ಆಹಾರದಲ್ಲಿ ಲವಂಗವನ್ನು ಸೇರಿಸಿ ಸೇವಿಸಲು ಪ್ರಾರಂಭಿಸುವ ಮುನ್ನ ನಿಮಗೆ ಚಿಕಿತ್ಸೆ ನೀಡುತ್ತಿರುವ ವೈದ್ಯರ ಸಲಹೆಯನ್ನು ಪಡೆದೇ ಮುಂದುವರೆಯುವುದು ಅವಶ್ಯ.