ಐರಿಷ್ ಕವಿಯ ಒಂದು ಮಾತಿನ ಪ್ರಭಾವದಿಂದ ಇಂಗ್ಲಿಷ್ ಭಾಷೆಯಲ್ಲಿ ಕಾವ್ಯ ರಚನೆಯನ್ನು ಬಿಟ್ಟು ತಮ್ಮ ಮಾತೃ ಭಾಷೆಯಲ್ಲಿ ಸಾಹಿತ್ಯ ಆರಾಧನೆಯನ್ನು ಮಾಡಿದಂತಹ ಕವಿ ಜ್ಞಾನಪೀಠ ಪ್ರಶಸ್ತಿ ವಿಜೇತ ಡಾ. ಕುಪ್ಪಳ್ಳಿ ವೆಂಕಟಪ್ಪ ಪುಟ್ಟಪ್ಪ (ಕುವೆಂಪು) ಕಾವ್ಯನಾಮದಿಂದ ಕನ್ನಡದ ಕೀರ್ತಿ ಜಗದಗಲಕ್ಕೆ ಹಾರಿಸಿದರು. ಇಂತಹ ಕವಿ ಸಾಹಿತಿ ಕನ್ನಡವನ್ನು ಕನ್ನಡತನವನ್ನು ಉಳಿಸುವ ಬಗೆಗೆ ಅಪಾರ ಕಾಳಜಿಯನ್ನು ಹೊಂದಿದ್ದರು ಅಷ್ಟೆ ಅಲ್ಲದೆ ಅದನ್ನು ತಮ್ಮ ಕೃತಿಗಳ ಮುಖಾಂತರ ನಾಡಿನ ಜನರಿಗೆ ತಿಳಿಸಲು ಸದಾ ಕಾರ್ಯಗತರಾಗಿದ್ದರು.
ಕನ್ನಡ ಕೇವಲ ಕರ್ನಾಟಕಕ್ಕೆ ಮಾತ್ರ ಸೀಮಿತವಾಗಿರದೆ ವಿಶ್ವದೆಲ್ಲೆಡೆ ತನ್ನ ಎಲ್ಲೆಯನ್ನು ಮೀರಿ ಪಸರಿಸುವ ಕಾರ್ಯವನ್ನು ಮಾಡಬೇಕಾಗಿದ್ದು ಪ್ರತಿಯೊಬ್ಬ ಕನ್ನಡಿಗನ ಆದ್ಯ ಕರ್ತವ್ಯ ಮತ್ತು ಇದಕ್ಕೆ ಪೂರಕವಾಗುವಂತೆ ತಾನು ಭಾರತೀಯ ಎಂಬ ವಿಚಾರವನ್ನು ಸಹ ಅಷ್ಟೇ ಮುಖ್ಯವಾಗಿ ತಿಳಿದಿರಬೇಕು. ದೇಶವು ಒಂದು ಮರವಾದರೆ ಕನ್ನಡ ಮತ್ತು ಕರ್ನಾಟಕ ಅದರ ಒಂದು ಕೊಂಬೆಯಂತೆ ಮರ ಬೆಳೆದರೆ ಮಾತ್ರ ರೆಂಬೆ ಕೊಂಬೆಗಳು ಬೆಳೆಯಲು ಸಾಧ್ಯ ಇದು ಭಾರತದ ಕುರಿತು ಕುವೆಂಪುರವರ ವಿಚಾರಗಳಾಗಿದ್ದವು.
ಕುವೆಂಪುರವರ ಪ್ರಕಾರ ವ್ಯಕ್ತಿಯು ಪರಭಾಷಾ ವಿರೋಧಿಯಾಗಬಾರದು ಹಾಗಂತ ಸ್ವಂತ ಭಾಷೆಯ ಮೇಲಿನ ಅಭಿಮಾನವನ್ನು ಬಿಡಬಾರದು ಇದೇ ದೇಶದ ಅಖಂಡತೆಯ ಮೂಲ ಮಂತ್ರವಾಗಿದೆ.
ತಮ್ಮ ಕೃತಿಗಳಲ್ಲಿ ಕನ್ನಡದ ಕುರಿತು ಅವರು ತಿಳಿಸಿದ ಅಂಶಗಳು ಈ ಕೆಳಗಿನಂತಿವೆ.
* ರಕ್ತತರ್ಪಣದ ಮುಂದುವರೆದ ಭಾಗದಂತೆ ಕಂಡುಬರುವ ಸುಮೂಹೂರ್ತವೋ ಇಂದೆ ಎಂಬ ಕವನದಲ್ಲಿ ಸ್ವಾತಂತ್ರ್ಯದ ಜೊತೆಗೆ ಸಂಗ್ರಾಮವು ಇದೇ ಆದರೆ ಇಂದು ನಾವೆಲ್ಲ ಬರಿ ಸ್ವಾತಂತ್ರ್ಯದ ಪರಿಕಲ್ಪನೆಯನ್ನು ಹೊಂದಿವೆ ಹೊರತು ಸಂಗ್ರಾಮದ ಪರಿಕಲ್ಪನೆಯಿಲ್ಲ. ನಮ್ಮ ಸ್ವಾತಂತ್ರ್ಯದ ಹಿಂದಿನ ಸಂಗ್ರಾಮವನ್ನು ಅರಿಯಬೇಕಾದ ಅನಿವಾರ್ಯತೆ ಇಂದು ನಮಗೆ ಎದುರಾಗಿದೆ.
** ಭರತ ಭೂಮಿ ನನ್ನ ತಾಯಿ
ಭರತ ಭೂಮಿ ನನ್ನಂತಹ ಸಹಸ್ರಾರು ಕವಿಗಳನ್ನು ಪೋಷಿಸುತ್ತಿರುವ ಮಹಾತಾಯಿ ಎಂದು ಕುವೆಂಪು ಹೇಳಿದ್ದಾರೆ. ನಾವು ನಮ್ಮ ಸ್ವದೇಶಿತನವನ್ನು ಬಿಟ್ಟು ಪಾಶ್ಚಾತ್ಯ ಸಂಸ್ಕೃತಿಯ ಗುಲಾಮರಾಗುತ್ತಿದ್ದೇವೆ ಎಂದು ಕವಿ ಇದರಲ್ಲಿ ತಿಳಿಸಿದ್ದಾರೆ. ಕ್ರಾಂತಿಯಿಂದಲೇ ಕನ್ನಡದ ಅಭಿವೃದ್ಧಿ ಸಾಧ್ಯ ಸತ್ತಂತಿರುವವರಿಂದ ದೇಶದ ಅಥವಾ ನಾಡಿನ ಪ್ರಗತಿ ಸಾಧ್ಯವಿಲ್ಲ ಎಂದು ಘಂಟಾ ಘೋಷವಾಗಿ ಸಾರಿದ್ದಾರೆ.
ಹಂಪೆಯ ಭೀಮ
ಹಂಪೆಯ ಗತವೈಭವನ್ನು ಮರುಕಳಿಸುವ ಈ ಕವಿತೆ ಹಂಪೆಯ ಸಧ್ಯದ ಪರಿಸ್ಥಿತಿಯನ್ನು ಕಂಡು ಕವಿ ಮರುಗಿದ್ದಾರೆ. ವೀರರು ಶೂರರು ಆಳಿ ಹೋದ ನಾಡಿನಲ್ಲಿ ಇಂತಹ ಸಂಧಿದ್ಧ ಪರಿಸ್ಥಿತಿಯನ್ನು ನಾವು ಎದುರಿಸುತ್ತಿದ್ದೆವೆ. ಇಸ್ಲಾಂ ಮೂಲಭೂತವಾದಿಗಳು ಮಾಡಿದ ಅವಾಂತರದಿಂದಾಗಿ ಒಂದು ನಾಡಿನ ಸಾಂಸ್ಕೃತಿಕ ಪರಂಪರೆಯ ಕೊಂಡಿಯನ್ನು ಕಳೆದುಕೊಳ್ಳುವಂತಾಗಿದೆ. ಇದೆ ರೀತಿಯಾಗಿ ಮುಂದುವರೆದರೆ ಸಹಿಸುದಾದರೂ ಹೇಗೆ ? ನಮ್ಮ ಹಂಪೆಯ ವೈಭವ ಮರುಕಳಿಸಲಿ ಎಂಬ ಆಶಾ ಭಾವನೆಯನ್ನು ಕುವೆಂಪು ಅವರು ತೊರಿದ್ದಾರೆ.
ಸಾಯುತಿದೆ ಕನ್ನಡ ಓ ಕನ್ನಡದ ಕಂದ
ಕುವೆಂಪು ಅವರ ಕನ್ನಡ ಆಲೋಚನೆಗಳು ಎಂದಿಗೂ ಅಚಲವಾದವು; ಕನ್ನಡಗಿರನ್ನು ನೇರವಾಗಿ ಖಂಡಿಸುತ್ತಾ ಸಾಯುತಿದೆ ನಿಮ್ಮ ನುಡಿ, ಓ ಕನ್ನಡಿಗರೆ ಪರಭಾಷಾ ವ್ಯಾಮೋಹವನ್ನು ಬಿಟ್ಟು ಹೊರಬನ್ನಿ ಕನ್ನಡದ ಮಕ್ಕಳಾದ ನಾವು ಕನ್ನಡವನ್ನು ಉಳಿಸುವ ಮಹತ್ತರವಾದ ಹೊಣೆ ನಮ್ಮ ಹೆಗಲ ಮೇಲಿದೆ. ಪರಭಾಷೆಯ ಬಗ್ಗೆ ಗೌರವವಿರಲಿ ಆದರೆ ನಮ್ಮ ಭಾಷೆಯ ಮೇಲೆ ತಾಸ್ಸಾರ ಬೇಡ. ಬೇರೆ ಭಾಷೆಗಳ ತುಳಿತಕ್ಕೆ ಒಳಗಾದ ಕುರಿಗಳಾಗ ಬೇಡಿ ತಲೆ ಎತ್ತಿನಿಂತು ಸಿಂಹದಂತೆ ಗರ್ಜಿಸಿ; ನಾಡು ನುಡಿಯನ್ನು ಉಳಿಸಿಕೊಳ್ಳಿ ಎಂದು ಕರೆ ನೀಡಿದ್ದಾರೆ.
ಮೆಟ್ಟುವ ನೆಲ ಕರ್ನಾಟಕ
ಕುವೆಂಪು ಅವರು ಅನೇಕ ಬಾರಿ ತಾವು ಕರ್ನಾಟಕದಲ್ಲಿ ಜನಿಸಿದ್ದೆ ನಮ್ಮ ಪುಣ್ಯ ಎಂದಿದ್ದಾರೆ. ಎಲ್ಲಾದರು ಇರು ಎಂತಾದರು ಇರು ಎಂದೆಂದಿಗೂ ನೀ ಕನ್ನಡವಾಗಿರು ಎಂದು ತಿಳಿಸಿದ್ದಾರೆ. ನೀನು ಕಾಲಿಡುವ ನೆಲ ಅದೇ ಕರ್ನಾಟಕ ನೀ ಕುಡಿಯುವ ನೀರು ಕಾವೇರಿ ನೀ ಮುಟ್ಟುವ ಮರ ಶ್ರೀಗಂಧದ ಮರ ಎಂಬ ಉದಾತ್ತ ಆಲೋಚನೆಗಳನ್ನು ಕುವೆಂಪು ಕನ್ನಡಿಗರಿಗೆ ನೀಡಿದ್ದಾರೆ.
ಕನ್ನಡವನ್ನೇ ಕೇಂದ್ರವಾಗಿಟ್ಟು ಅನೇಕ ಕವನಗಳನ್ನು ರಚಿಸಿದ ಕವಿ; ಕನ್ನಡ ಕರ್ನಾಟಕ ಎಂದಿಗೂ ಅಜರಾಮರವಾಗಿರಲಿ ಎಂದು ಆಶಿಸಿದ್ದಾರೆ. ಕನ್ನಡ ಭಾಷೆಯೇ ಒಂದು ದೊಡ್ಡ ಸಂಸ್ಕೃತಿ ಕಲೆಯ ತವರೂರು ಇಂತಹ ಕನ್ನಡ ಭಾಷೆ ಮತ್ತು ಕನ್ನಡತನವನ್ನು ಉಳಿಸಲು ಕನ್ನಡಿಗರು ಮಾಡಬೇಕಾದಂತಹ ಅನಿವಾರ್ಯತೆಯನ್ನು ಕುವೆಂಪು ಅವರು ತಮ್ಮ ಕವಿತೆಗಳಲ್ಲಿ ವಿವರಿಸಿದ್ದಾರೆ.