ಇಂದಿನ ಕಾಲದಲ್ಲಿ ಬೊಜ್ಜಿನ ಸಮಸ್ಯೆಯಿಂದ ಬಳಲುತ್ತಿರುವವರು ಒಂದೆಡೆಯಾದರೇ, ದೇಹವನ್ನು ಫಿಟ್ ಆಗಿ ಇಡಬಯಸುವವರು ಇನ್ನೊಂದೆಡೆ. ಬೊಜ್ಜು ಶೇಖರಣೆಯಾಗಿ ಆರೋಗ್ಯದಲ್ಲಿ ಸಮಸ್ಯೆಗಳು ಉಂಟಾಗಬಹುದೆಂದು ಹೇಳಲಾಗುತ್ತದೆ. ಹಾಗೆಯೇ ದೇಹದ ಫಿಟ್ನೆಸ್ಗಾಗಿ ಅತಿಯಾದ ವ್ಯಾಯಾಮ ಮಾಡುವುದರಿಂದಲೂ ಆರೋಗ್ಯ ಸಮಸ್ಯೆ ಬರುತ್ತದೆ ಎಂದರೆ ನಿಮಗೆ ಅಚ್ಚರಿಯಾಗಬಹುದು.
ಅತಿಯಾದರೆ ಅಮೃತನೂ ವಿಷ ಎನ್ನುವ ನಾಣ್ಣುಡಿಯನ್ನು ನೀವು ಕೇಳಿರುತ್ತೀರಾ. ಹಾಗೆಯೇ ಅತಿಯಾಗಿ ವ್ಯಾಯಾಮ ಮಾಡುವುದರಿಂದ ಆರೋಗ್ಯ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ. ದೇಹವನ್ನು ಫಿಟ್ ಆಗಿ ಇಡಲು ಅತಿಯಾದ ವ್ಯಾಯಾಮ ಮಾಡುವುದು ಮತ್ತು ಡಯೆಟ್ ಮಾಡುವುದು ದೇಹದ ಮೇಲೆ ಅಡ್ಡ ಪರಿಣಾಮವನ್ನು ಬೀರುತ್ತದೆ.
ಏರೋಬಿಕ್ಸ್, ಯೋಗ, ಬಾಡಿ ವೇಯ್ಟ್ ಹೀಗೆ ಯಾವುದೇ ವ್ಯಾಯಾಮವಾಗಲಿ ಅವುಗಳನ್ನು ಮಾಡಿದಾಗ ನಮ್ಮ ದೇಹಕ್ಕೆ ಹೆಚ್ಚು ಪೋಷಕಾಂಶಗಳು ಬೇಕಾಗುತ್ತದೆ. ಆದರೆ ನಾವು ಫಿಟ್ ಆಗಲು ಡಯಟ್ ಮಾಡಿ ಕಡಿಮೆ ಆಹಾರವನ್ನು ಸೇವಿಸಿದಾಗ ನಮ್ಮ ದೈಹಿಕ ಚಟುವಟಿಕೆಗಳಿಗೂ, ನಮ್ಮ ಆಹಾರ ಪದ್ಧತಿಗೂ ಹೊಂದಾಣಿಕೆಯಾಗುವುದಿಲ್ಲ. ಆಗ ನಮ್ಮನ್ನು ನಾನಾ ಆರೋಗ್ಯ ಸಮಸ್ಯೆ ಕಾಡಲು ಪ್ರಾರಂಭಿಸುತ್ತದೆ. ಡಯೆಟ್ ಮಾಡುವುದು ದೈಹಿಕ ಚಟುವಟಿಕೆಗಳನ್ನು ಮಾಡಿ ದೇಹದಲ್ಲಿ ಬೆವರು ಹರಿಸುವುದರಿಂದ ತೂಕ ಕಡಿಮೆಯಾಗುತ್ತದೆ. ಹಾಗೆಯೇ ಆದರಿಂದ ಆರೋಗ್ಯದ ಮೇಲೆ ಉಂಟಾಗುವ ಅಡ್ಡ ಪರಿಣಾಮವನ್ನು ಏದುರಿಸಲು ಸಿದ್ದರಿರಬೇಕು.
ಅತಿ ವ್ಯಾಯಾಮದಿಂದ ಹೃದಯಾಘಾತ:
ವ್ಯಾಯಾಮ ಅತಿಯಾದರೆ ಹೃದಯದ ಮೇಲೆ ಒತ್ತಡ ಬೀಳುತ್ತದೆ. ಹಾಗೆಯೇ ಹಠಾತ್ ಹೃದಯ ಸ್ಥಂಬನ ಮತ್ತು ಹೃದಯಾಘಾತ ಸಂಭವಿಸುವ ಸಾಧ್ಯತೆಗಳು ಹೆಚ್ಚು. ಮಧ್ಯವಯಸ್ಕ ಯುವಕರು, ಕಿರಿಯರು ಚಿಕ್ಕ ವಯಸ್ಸಿನಲ್ಲಿಯೇ ಹೃದಯಾಘಾತದಿಂದ ಸಾವನ್ನಪ್ಪುತ್ತಿರುವ ಪ್ರಕರಣಗಳು ಹೆಚ್ಚುತ್ತಿರುವುದಕ್ಕೆ ಅತಿಯಾದ ವ್ಯಾಯಾಮವೂ ಕಾರಣ ಎಂದು ಹಲವು ವರದಿಗಳು ತಿಳಿಸಿವೆ.
ವಾಕಿಂಗ್,ಯೋಗ, ಬಾಡಿ ವೇಯ್ಟ್ ತರಬೇತಿ, ನೃತ್ಯ, ಜಿಮ್ ಹೋದರೆ ಆರೋಗ್ಯವಂತರಾಗಬಹುದು ಎನ್ನುವ ತಪ್ಪು ಕಲ್ಪನೆ ಈಗೀನ ಯುವ ಜನತೆಯಲ್ಲಿದೆ. ಸಿಕ್ಸ್ ಪ್ಯಾಕ್, ಸೈಜ್ ಜೀರೊ ಫಿಗರ್ ಉತ್ತಮ ಆರೋಗ್ಯಕ್ಕೆ ಫಿಟ್ ನೆಸ್ ಗೆ ಮಾನದಂಡವಲ್ಲ ಎನ್ನುವುದನ್ನು ಮೊದಲು ಅರ್ಥ ಮಾಡಿಕೊಳ್ಳಬೇಕು. ಸರಿಯಾದ ಆಹಾರ ಕ್ರಮ ಮತ್ತು ಜೀವನ ಶೈಲಿಯನ್ನು ರೂಢಿಸಿಕೊಂಡು ಸರಳವಾದ ವ್ಯಾಯಾಮವನ್ನು ಮಾಡಿದರೆ ಉತ್ತಮ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು.
ವ್ಯಾಯಾಮ ಮಾಡುವವರು ಇದನ್ನು ಪಾಲಿಸಿ:
*ಆದಷ್ಟೂ ಸರಳವಾದ ವ್ಯಾಯಾಮವನ್ನು ಮಾಡಿ
*ಅತಿಯಾಗಿ ವ್ಯಾಯಾಮ ಮಾಡಬರದು ಎಂದ ಮಾತ್ರಕ್ಕೆ ಸ್ವಲ್ಪ ಪ್ರಮಾಣದ ವ್ಯಾಯಾಮ ಮಾಡದೇ ಇರುವುದನ್ನು ಮೈಗೂಡಿಸಿಕೊಳ್ಳಬಾರದು
*ದೈಹಿಕ ಚಟುವಟಿಕೆಯನ್ನು ಮಾಡದೇ ಸುಮ್ಮನೆ ಕೂರುವುದು ಸರಿಯಲ್ಲ. ದಿನಕ್ಕೆ ಒಂದು ಗಂಟೆ ಚೆನ್ನಾಗಿ ವ್ಯಾಯಾಮ ಮಾಡಿ.
*ದಿನದಲ್ಲಿ ಪ್ರತಿ ಗಂಟೆಗೊಮ್ಮೆ ಎದ್ದು ಓಡಾಡುತ್ತಿರಿ
*ದಿನಕ್ಕೆ 10,000 ಹೆಜ್ಜೆ ಇಡಲು ಪ್ರಯತ್ನಿಸಿ
*ದೈಹಿಕ ಚಟುವಟಿಕೆಗಳ ಮೂಲಕ ದೇಹವನ್ನು ದಂಡಿಸದಿರಿ.
*ವ್ಯಾಯಾಮದಿಂದ ಮಾಡುವಾಗ ವಿರಾಮ ತೆಗೆದುಕೊಂಡು ಚೇತರಿಸಿಕೊಳ್ಳುವುದು ಮುಖ್ಯ
*ರಾತ್ರಿಯ ನಿದ್ದೆ ಮಾಡದೆ ಇದ್ದರೂ ಮರುದಿನ ಜಾಗಿಂಗ್, ವ್ಯಾಯಾಮ ಮಾದುವುದು ತುಂಬಾ ಅಪಾಯ. ವಿರಾಮ ಪಡೆದುಕೊಂಡ ನಂತರ ವ್ಯಾಯಾಮ ಮಾಡುವುದು ಉತ್ತಮ.