ಕರ್ನಾಟಕ ವಿಧಾನಸಭಾ ಸಾರ್ವತ್ರಿಕ ಚುನಾವಣೆ 2023 ಮೇ 10 ಮಹಾನ್ ದಿನಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಇದರಲ್ಲಿ ಎಲ್ಲರ ಪಾಲ್ಗೊಳ್ಳುವಿಕೆ ತುಂಬಾನೇ ಅಗತ್ಯ. ಅದಕ್ಕಾಗಿ ಸರ್ಕಾರವು ಮತದಾರನ್ನು ಒಲಿಸಿಕೊಳ್ಳಲು ಸಾಕಷ್ಟು ಜಾಗೃತಿ ಕಾರ್ಯಕ್ರಮಗಳನ್ನು ಮಾಡುತ್ತಿದೆ. ನೂರಕ್ಕೆ ನೂರು ಶೇಖಡ ಮತದಾನ ಎಲ್ಲರ ಆಶಯವಾಗಿದೆ.
ಇತ್ತ ರಾಜ್ಯಾದ್ಯಂತ ಇಂದು (ಏಪ್ರಿಲ್ 30) ನಮ್ಮ ನಡೆ ಮತಗಟ್ಟೆಯಡೆಗೆ ಎಂಬ ವಿಶಿಷ್ಟ ಕಾರ್ಯಕ್ರಮವನ್ನೇ ಆಯೋಜಿಸಲಾಗಿತ್ತು. ಇತ್ತ ಮತಗಟ್ಟೆಯು ರಂಗು ರಂಗಿನ ಬಣ್ಣಗಳ ಚಿತ್ತಾರದಲ್ಲಿ ಆಲಂಕಾರಗೊAಡು ಮತದಾರನ್ನು ಸ್ವಾಗತಿಸಲು ಸಿದ್ಧವಾಗಿದೆ.
ಆಯಾ ಜಿಲ್ಲೆಯ, ಜಿಲ್ಲಾಡಳಿತ ಮತ್ತು ಸ್ವೀಪ್ ಸಮಿತಿಯು ಬೀದಿ ನಾಟಕ, ಇವಿಎಂ ಬಳಕೆಯ ಪ್ರಾತ್ಯಕ್ಷಿಕೆ, ಜಾಥಾ, ರಂಗೋಲಿ ಸ್ಪರ್ಧೆ, ಬೈಕ್ ರ್ಯಾಲಿ, ಪ್ರತಿಜ್ಞಾ ವಿಧಿ ಹೀಗೆ ವಿವಿಧ ರೀತಿಯಲ್ಲಿ ಜನರನ್ನು ಜಾಗೃತಗೊಳಿಸುವುದರ ಜೊತೆಗೆ ಮತದಾನದ ಮಹತ್ವವನ್ನು ಸಾರುತ್ತಿದ್ದಾರೆ.
ಆದರೆ ಕರಾವಳಿ ಜಿಲ್ಲೆ ಉಡುಪಿಯಲ್ಲಿ ವಿನೂತನ ಪ್ರಯೋಗ ಪ್ರಯತ್ನಗಳು ನಡೆಯುತ್ತಿದೆ. ಜಿಲ್ಲಾಡಳಿತ ಮತ್ತು ಸ್ವೀಪ್ ಸಮಿತಿಯು ಮೇ 10ರ ಮತದಾನಕ್ಕೆ ಕರೆಯೋಲೆಯೊಂದನ್ನು ಸಿದ್ದಪಡಿಸಿ ಬಿಡುಗಡೆಗೊಳಿಸಿದೆ.
‘ಮತದಾನದ ಮಮತೆಯ ಕರೆಯೋಲೆ’ ಎಂಬ ಆಮಂತ್ರಣ ಪತ್ರಿಕೆಯಲ್ಲಿ ದಿನಾಂಕ ಮತ್ತು ಸಮಯವನ್ನು ಮುದ್ರಿಸಿ “ನಮ್ಮ ಮತ ನಮ್ಮ ಭವಿಷ್ಯ” ಎಂಬ ಧ್ಯೇಯವಾಕ್ಯದ ಕೆಳಗೆ, ನಿಮ್ಮ ಹೆಸರು ನಮ್ಮ ಚುನಾವಣಾ ಮತದಾನ ಪಟ್ಟಿಯಲ್ಲಿದೆ ತಪ್ಪದೇ ಬಂದು ಮತದಾನ ಮಾಡಬೇಕಾಗಿ ತಮ್ಮಲ್ಲಿ ವಿನಂತಿಸಿಕೋಳ್ಳುತ್ತಿದ್ದೇವೆ. ನಿಮ್ಮ ಆಗಮನವೇ ಆಶೀರ್ವಾದ, ಮತದಾನವೇ ಉಡುಗೊರೆ ಎಂದು ಆಮಂತ್ರಣ ಪತ್ರಿಕೆಯನ್ನು ಸಿದ್ದಪಡಿಸಿ ಜನರಿಗೆ ತಲುಪುವಂತೆ ಮಾಡಲಾಗಿದೆ.
ಇನ್ನು ಎರಡು ದಿನಗಳ ಹಿಂದೆಯಷ್ಟೆ ಮತದಾನದ ಪ್ರಮಾಣವನ್ನು ಹೆಚ್ಚಿಸಲು ಜನಜಾಗೃತಿಗಾಗಿ ಸ್ವೀಪ್ ಸಮಿತಿ ವತಿಯಿಂದ ಇದೇ ಮೊದಲ ಬಾರಿಗೆ ಸಾಲಿಗ್ರಾಮ ಪಾರಂಪಳ್ಳಿಯಲ್ಲಿ ಕಯಾಕಿಂಗ್ ಮೂಲಕ ಮತದಾನದ ಮಹತ್ವದ ಅರಿವು ಮೂಡಿಸಲಾಗಿತ್ತು. ಕಾಂಡ್ಲವನದ ಮಧ್ಯ ಭಾಗಕ್ಕೆ 40ಕ್ಕೂ ಹೆಚ್ಚು ಕಯಾಕ್ ದೋಣಿಗಳ ಮೂಲಕ ತೆರಳಿ, ಕಯಾಕ್ಗಳನ್ನು ಸಾಲಾಗಿ ನಿಲ್ಲಿಸಿ ‘ಮೇ 10’ ಎಂದು ಚಿತ್ತಾರವನ್ನು ಮೂಡಿಸಿ ಎಲ್ಲರು ಮತದಾನ ಮಾಡಲೇ ಬೇಕು ಎಂಬ ಸಂದೇಶವನ್ನು ಸಾರಿದ್ದರು. ಈ ದೃಶ್ಯ ವೈಭವನ್ನು ಡ್ರೋನ್ ಕ್ಯಾಮರಾದಲ್ಲಿ ಸರೆಹಿಡಿಯಲಾಯಿತ್ತು.
ಇದು ಈವರೆಗಿನ ವಿನೂತನ ಪ್ರಯತ್ನಗಳಲ್ಲಿ ಒಂದಾಗಿದೆ. ಒಟ್ಟಿನಲ್ಲಿ ರಾಜ್ಯದ್ಯಾಂತ ಮತದಾರರನ್ನು ಸೆಳೆಯಲು, ಮತದಾನದ ಮಹತ್ವದ ಕುರಿತು ಜಾಗೃತಿ, ಯಾವುದೇ ಆಮಿಷಗಳಿಗೆ ಕಿವಿಗೊಡದೆ ಮತವನ್ನು ನೀಡಲು, ನಮ್ಮ ಜವಬ್ದಾರಿ, ಹಕ್ಕು, ಕರ್ತವ್ಯಗಳನ್ನು ಒತ್ತಿ ಒತ್ತಿ ಜನರಿಗೆ ಮನವರಿಕೆ ಮಾಡಲಾಗುತ್ತಿದೆ.ಇದಕ್ಕಾಗಿ ಆಯಾ ಜಿಲ್ಲೆಯ ಜಿಲ್ಲಾಡಳಿತ ಮತ್ತು ಸ್ವೀಪ್ ಸಮಿತಿಯು ಸತತವಾಗಿ ಶ್ರಮಿಸುತ್ತಿದೆ.