ಎಂತ ಬಿಸಿಲಪ್ಪ ಇಂತಹ ಬೇಸಿಗೆ ಇಂದಿನ ವರೆಗೆ ಬಂದೇ ಇಲ್ಲ ಎನ್ನುವ ಮಾತು ಈಗ ಎಲ್ಲಿ ಹೋದರು ನಮಗೆ ಕೇಳಿಸುತ್ತದೆ. ಖಂಡಿತ ಈ ಮಾತು ನಿಜ ಜನರು ಇಂತಹ ಬೇಸಿಗೆಯನ್ನು ಇತ್ತೀಚಿನ ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ನೋಡುತ್ತಿರೋದು.
ದಿನದಲ್ಲಿ ಎಷ್ಟು ನೀರು ಕುಡಿದರೂ ಬಾಯಾರಿಕೆ ಕಡಿಮೆಯಾಗುತ್ತಿಲ್ಲ. ಮನೆಯಿಂದ ಹೊರಗೆ ಹೋರಟರೇ ಬಿಸಿಲಿನ ಬೇಗೆಯಿಂದ ಯಾವಾಗ ಮನೆಗೆ ಮರಳುತ್ತೇವೂ ಅನ್ನುವ ಹಾಗೇ ನಮಗೆ ಅನಿಸಿಬಿಡುತ್ತದೆ. ಇನ್ನೂ ಚಿಕ್ಕ ಮಕ್ಕಳಿಗೂ ಈ ಉಷ್ಟಾಂಶವನ್ನು ಸಹಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಬಾಯಲ್ಲಿ ಹುಣ್ಣು ಮೈ ಮೇಲೆ ಬೊಕ್ಕೆಗಳು ಈಗ ಎಲ್ಲಾರಿಗೆ ಸರ್ವೇ ಸಾಮಾನ್ಯವಾಗಿದೆ. ಇನ್ನೂ ಸ್ವಲ್ಪ ದಪ್ಪ ಇದ್ದವರ ಮತ್ತು ಮುಟ್ಟಿನ ಅಸುಪಾಸಿನಲ್ಲಿ ಹೆಣ್ಣು ಮಕ್ಕಳ ಪಾಡಂತು ಹೇಳುವುದೇ ಬೇಡ.
ದಿನದಿಂದ ದಿನಕ್ಕೆ ಬಿಸಿಲಿನ ತಾಪ ಹೆಚ್ಚುತ್ತಿದ್ದು, ಇತ್ತೀಚೆಗೆ ಮಹಾರಾಷ್ಟ್ರದಲ್ಲಿ ನಡೆದ ಪ್ರಶಸ್ತಿ ಪ್ರಧಾನ ಸಮಾರಂಭದಲ್ಲಿ ಭಾಗಿಯಾಗಿದ್ದ ವೇಳೆ ಬಿಸಿಲಿನ ತಾಪಮಾನ ತಡೆಯಲಾಗದೇ ೧೧ ಮಂದಿ ಮೃತಪಟ್ಟಿರುವ ಘಟನೆ ನಡೆದಿದೆ. ಇದು ಈ ವರ್ಷದ ಬಿಸಿಲಿನ ತಾಪಮಾನ ಭೀಕರತೆಗೆ ಸಾಕ್ಷಿಯಾಗಿದೆ.
ಈ ಬೇಸಿಗೆ ಮುಗಿಯುವವರೆಗೂ ನಾವು ನಮ್ಮ ದೇಹದ ಉಷ್ಟಾಂಶವನ್ನು ಸಮತೋಲದಲ್ಲಿಟ್ಟುಕೊಳ್ಳುವುದು ಬಹಳ ಅಗತ್ಯವಾಗಿದೆ. ಆದರಿಂದ ಕೆಲವೊಂದು ಮುನ್ನೆಚ್ಚರಿಕೆಯನ್ನು ಪಾಲಿಸಬೇಕಾಗುತ್ತದೆ.
ಬೇಸಿಗೆಯಲ್ಲಿ ಸಾಧ್ಯವಾದಷ್ಟು ಅಗತ್ಯಕ್ಕಿಂತ ಹೆಚ್ಚು ನೀರನ್ನು ಕುಡಿಯಬೇಕು. ಸಾಧ್ಯವಾದಾಗಲೆಲ್ಲ ಎಳನೀರು ಕುಡಿಯಿರಿ, ಆದಷ್ಟು ದೇಹ ನೀರಿನಂಶ ಕಳೆದುಕೊಳ್ಳದಿರುವಂತೆ ನೋಡಿಕೊಳ್ಳಿ. ಇನ್ನು ತಂಪಿನ ಬೀಜ ಕಾಮಕಸ್ತೂರಿ ಬೀಜವನ್ನು ನೀರಿನಲ್ಲಿ ನೆನೆಯಲು ಬಿಟ್ಟು ಅದರ ನೀರು ಬೀಜದ ಸಮೇತ ಸೇವಿಸಿ. ದೇಹ ತಂಪಾಗಿರುತ್ತದೆ. ದೇಹವನ್ನು ತಂಪಾಗಿರಿಸುವಂತಹ ಕಲ್ಲಂಗಡಿ ಸೌತೆಕಾಯಿ ಮತ್ತು ಮೊಸರಿನಂತರ ಆಹಾರಗಳನ್ನು ಹೆಚ್ಚಾಗಿ ಸೇವಿಸಿ. ಜಂಕ್ ಫುಡ್ನಿಂದ ಸಾಧ್ಯವಾದಷ್ಟು ದೂರವಿರಿ. ಇದರ ಜೊತೆ ಆಗಾಗ ಡಿಹೈಡ್ರೇಶನ್ ಕಾಣಿಸಿಕೊಳ್ಳುವವರು ಎಲೆಕ್ಟ್ರೊಲೈಟ್ ಸೊಲ್ಯುಶನ್ ಬೆರೆಸಿ ನೀರು ಕುಡಿಯಿರಿ.
ಇನ್ನೂ ಕಾಟನ್ ಬಟ್ಟೆಯನ್ನು ಹೆಚ್ಚಾಗಿ ಧರಿಸಿ ಆದಷ್ಟು ಬಟ್ಟೆ ಸಡಿಲವಾಗಿ ಇದ್ದರೆ ನಿಮಗೂ ಆರಾಮವೆನಿಸಬಹುದು. ಮನೆಯಿಂದ ಹೊರಗೆ ಹೋಗುವಾಗ ಛತ್ರಿ ಅಥವಾ ತಲೆಯನ್ನು ಮುಚ್ಚುವ ಬಟ್ಟೆಗಳನ್ನು ಬಳಸಿ ಸೂರ್ಯನ ಶಾಖ ನೆರವಾಗಿ ದೇಹವನ್ನು ಸಂಪರ್ಕಿಸದಂತೆ ನೋಡಿಕೊಳ್ಳಿ. ಮಧ್ಯಾಹ್ನದ ಹೊತ್ತು ಆದಷ್ಟು ನೆರಳಿನಲ್ಲಿರಲು ಪ್ರಯತ್ನಿಸಿ.