ಕ್ರೆಡಿಟ್ ಕಾರ್ಡ್ ಬಳಕೆ ಹೆಚ್ಚಿನವರಿಗೆ ತಿಳಿದೆ ಇದೆ. ಕೆಲವರು ಕ್ರೆಡಿಟ್ ಕಾರ್ಡ್ನ್ನು ಸದುಪಯೋಗಪಡಿಸಿಕೊಂಡು ಉನ್ನತ ಮಟ್ಟಕ್ಕೆ ಸಾಗಿದ್ದರೆ, ಇನ್ನೂ ಕೆಲವರು ಅದನ್ನು ದುರ್ಬಳಕೆ ಮಾಡಿಕೊಂಡು ಜೀವನವನ್ನೇ ನಾಶ ಮಾಡಿಕೊಂಡವರು ಇದ್ದಾರೆ.
ಉದ್ಯೋಗದಲ್ಲಿದ್ದವರು ಸಾಮಾನ್ಯವಾಗಿ ಕ್ರೆಡಿಟ್ ಕಾರ್ಡ್ನ್ನು ಬಳಕೆ ಮಾಡುತ್ತಾರೆ ಆದರೆ ಇತ್ತೀಚಿನ ದಿನಗಳಲ್ಲಿ ವಿದ್ಯಾರ್ಥಿಗಳಿಗೂ ಕೂಡ ಕ್ರೆಡಿಟ್ ಕಾರ್ಡ್ನ್ನು ನೀಡಲಾಗುತ್ತಿದೆ.
ಕಾಲೇಜು ವಿದ್ಯಾರ್ಥಿಗಳಿಗೆ ವಿದ್ಯಾಭ್ಯಾಸದ ಉದ್ದೇಶದಿಂದ ಬ್ಯಾಂಕ್ಗಳು ಕ್ರೆಡಿಟ್ ಕಾರ್ಡ್ ನೀಡುತ್ತಿದ್ದು, ವಿದ್ಯಾರ್ಥಿಗಳು ತಮ್ಮ ಅನುಕೂಲಕ್ಕೆ ತಕ್ಕಂತೆ ಕಾರ್ಡ್ ಬಳಕೆ ಮಾಡಿಕೊಳ್ಳಬೇಕಾದರೂ ಕೂಡ ಕೆಲವೊಂದು ನಿಯಮಗಳನ್ನು ಪಾಲಿಸಬೇಕಾಗುತ್ತದೆ.
ಕಾಲೇಜು ವಿದ್ಯಾರ್ಥಿಗಳಿಗೆ ಕ್ರೆಡಿಟ್ಕಾರ್ಡ್ ನೀಡಲಾಗುತ್ತದೆ ಎಂದ ಮಾತ್ರಕ್ಕೆ ಎಲ್ಲಾ ವಿದ್ಯಾರ್ಥಿಗಳಿಗೂ ಈ ಸೌಲಭ್ಯ ದೊರೆಯುವುದಿಲ್ಲ. ಕೆಲವು ಬ್ಯಾಂಕ್ ಶಿಕ್ಷಣ ಸಾಲ ಪಡೆದಿರುವ ವಿದ್ಯಾರ್ಥಿಗಳಿಗೆ ಮಾತ್ರ ಕ್ರೆಡಿಟ್ ಕಾರ್ಡ್ ಇದಗಿಸುತ್ತವೆ ಇನ್ನೂ ಕೆಲವು ಬ್ಯಾಂಕ್ ನಿಶ್ಚಿತ ಠೇವಣೀಯನ್ನು ಆಧಾರವಾಗಿ ಇಟ್ಟುಕೊಂಡು ಕಾರ್ಡ್ನ್ನು ನೀಡುತ್ತವೆ. ಹಾಗೇ ಕೆಲವೊಂದಿಷ್ಟು ಬ್ಯಾಂಕ್ಗಳು ಪೋಷಕರು ಹೊಂದಿರುವ ಕ್ರೆಡಿಟ್ ಕಾರ್ಡ್ ಜೊತೆ ಹೆಚ್ಚುವರಿಯಾಗಿ ಮಕ್ಕಳಿಗೆ ಆಡ್-ಆನ್ ಕ್ರೆಡಿಟ್ ಕಾರ್ಡ್ ಒದಗಿಸುತ್ತವೆ.
ಕ್ರೆಡಿಟ್ ಕಾರ್ಡ್ ಪಡೆದುಕೊಳ್ಳಲು ೧೮ವರ್ಷ ವಯಸ್ಸು ಆಗಿರಬೇಕು.ಹಾಗೆಯೇ ಒಂದು ನಿರ್ದಿಷ್ಟ ಮೊತ್ತದ ಫಿಕ್ಸೆಡ್ ಡಿಫಾಸಿಟ್ ವಿದ್ಯಾರ್ಥಿಯ ಖಾತೆಯಲ್ಲಿ ಇದ್ದರೆ ಅದರ ಆಧಾರದಲ್ಲಿ ವಿದ್ಯಾರ್ಥಿಯು ಕ್ರೆಡಿಟ್ ಕಾರ್ಡ್ ಪಡೆದುಕೊಳ್ಳಬಹುದು. ಕಾರ್ಡ್ ಲಿಮಿಟ್ ಸಹ ಇದೇ ಆಧಾರದಲ್ಲಿ ನಿರ್ಧರಿತವಾಗುತ್ತದೆ.
ಕ್ರೆಡಿಟ್ ಕಾರ್ಡ್ ಹೊಂದಿರುವ ವ್ಯಕ್ತಿಗಳು ಅಂದರೆ ವಿದ್ಯಾರ್ಥಿಯ ಪಾಲಕರು ತಮ್ಮ ಕಾರ್ಡ್ ಜತೆ ಮಗ ಅಥವಾ ಮಗಳ ಹೆಸರನ್ನು ಸೇರಿಸಿಕೊಂಡು ಆಡ್ ಆನ್ ಮಾದರಿಯಲ್ಲಿ ಕ್ರೆಡಿಟ್ ಕಾರ್ಡ್ನ್ನು ಪಡೆಯಬಹುದು. ಹಾಗೆಯೇ ವಿದ್ಯಾರ್ಥಿ ಉಳಿತಾಯ ಖಾತೆ ಇದ್ದು, ಉತ್ತಮ ಇತಿಹಾಸ ಹೊಂದಿದ್ದರೆ ಕ್ರೆಡಿಟ್ ಕಾರ್ಡ್ ಪಡೆದುಕೊಳ್ಳಲು ಸಾಧ್ಯವಿದೆ.
ಕ್ರೆಡಿಟ್ ಕಾರ್ಡ್ಗೆ ಅರ್ಜಿಸಲ್ಲಿಸಲು ಜನ್ಮ ಪ್ರಮಾಣಪತ್ರ, ವಿಳಾಸ ದೃಢಿಕರಣ ಪತ್ರ, ಕಾಲೇಜಿನಿಂದ ನೀಡಿರುವ ಗುರುತಿನ ಚೀಟಿ ಎರಡು ಭಾವಚಿತ್ರ ಹಾಗೂ ಆಯಾ ಬ್ಯಾಂಕ್ಗಳು ಕೇಳುವ ಅಗತ್ಯ ದಾಖಲೆಗಳನ್ನು ನೀಡಬೇಕಾಗುತ್ತದೆ.
ಎಸ್ವಿಐ ವಿದ್ಯಾರ್ಥಿ ಫ್ಲಸ್ ಅಡ್ವಾಂಟೇಜ್ ಕ್ರೆಡಿಟ್ ಕಾರ್ಡ್, ಹೆಚ್ಡಿಎಫ್ಸಿ ಬ್ಯಾಂಕ್ ಫೋರೆಕ್ಸ್ಫ್ಲಸ್ ಮುಂತಾದ ಕ್ರೆಡಿಟ್ ಕಾರ್ಡ್ ವ್ಯವಸ್ಥೆ ಇದ್ದು ಅಗತ್ಯವಿದ್ದ ವಿದ್ಯಾರ್ಥಿ ಈ ವ್ಯವಸ್ಥೆಯನ್ನು ಬಳಸಿಕೊಳ್ಳಬಹುದು.
ಪಾಲಕರಿಂದ ದೂರವಿದ್ದು ವ್ಯಾಸಂಗ ಮಾಡುವ ವಿದ್ಯಾರ್ಥಿಗಳಿಗೆ ಈ ಸೌಲಭ್ಯ ಅನುಕೂಲವಾಗಬಹುದು. ಆದರೆ ಕ್ರೆಡಿಟ್ ಕಾರ್ಡ್ನ್ನು ದುರ್ಬಳಕೆ ಮಾಡದೆ ಜಾಣ್ಮೆಯಿಂದ ಬಳಸುವುದು ಸೂಕ್ತ.