ಬೆಂಗಳೂರು: ರಾಜ್ಯ ರಾಜಧಾನಿಯಲ್ಲಿ ಇದೇ ಮೊದಲ ಬಾರಿಗೆ ವಿನೂತನ ರೀತಿಯ ಕಳ್ಳತನವೊಂದು ವರದಿ ಆಗಿದೆ. ಈ ಮೊದಲೆಲ್ಲ ಬಿಹಾರ, ಉತ್ತರ ಭಾರತದ ರಾಜ್ಯಗಳಲ್ಲಿ ವರದಿ ಆಗುತಿದ್ದ ಸಾರ್ವಜನಿಕ ಸ್ವತ್ತುಗಳ ಕಳ್ಳತನದಂತಹ ಪ್ರಕರಣಗಳು ಇದೀಗ ಪೋಲೀಸ್ ಕಮೀಷನರ್ ಕಚೇರಿ ಸಮೀಪದಿಂದಲೇ ವರದಿ ಆಗಿರುವುದು ಜನತೆಯನ್ನು ಬೆಚ್ಚಿ ಬೀಳೀಸಿದೆ.
ಸುಮಾರು ಹತ್ತು ಲಕ್ಷ ರೂಪಾಯಿಗಳ ವೆಚ್ಚದಲ್ಲಿ ಕನ್ನಿಂಗ್ ಹ್ಯಾಮ್ ರಸ್ತೆಯಲ್ಲಿ ಸ್ಟೇನ್ ಲೆಸ್ ಸ್ಟೀಲ್ ನಿಂದ ಕಂಪೆನಿಯೊಂದು ತನ್ನ ಸಾಮಾಜಿಕ ಜವಾಬ್ದಾರಿ ನಿಧಿ( ಸಿಎಸ್ಆರ್ ) ಯಿಂದ ತಂಗುದಾಣವನ್ನು ಒಂದೂ ವರೆ ವರ್ಷಗಳ ಹಿಂದೆ ನಿರ್ಮಾಣ ಮಾಡಿಕೊಟ್ಟಿತ್ತು. ಇದರಲ್ಲಿ ಮೇಲ್ಚಾವಣಿ , ಸ್ಟೀಲ್ ನ ಕುಳಿತುಕೊಳ್ಳುವ ಆಸನಗಳನ್ನೂ ಅಳವಡಿಸಲಾಗಿತ್ತು. ಇದನ್ನು ಬಿಎಂಟಿಸಿ ನಿರ್ವಹಿಸುತಿತ್ತು. ಇತ್ತೀಚೆಗೆ ಬಿಎಂಟಿಸಿ ನೌಕರರಿಗೆ ಈ ತಂಗುದಾಣವೇ ನಾಪತ್ತೆ ಆಗಿರುವುದು ತಿಳಿದು ಬಂದಿದೆ. ಅಲ್ಲಿ ನೋಡಿದರೆ ಏನೂ ಇಲ್ಲ ಎಲ್ಲವನ್ನೂ ಬಿಚ್ಚಿಕೊಂಡು ಹೋಗಲಾಗಿತ್ತು, ಮೊದಲಿಗೆ ಇದನ್ನು ಬಿಬಿಎಂಪಿ ಯವರು ತೆರವು ಮಾಡಿದ್ದಾರೆ ಎಂದು ಭಾವಿಸಲಾಗಿತ್ತು.
ಬಿಬಿಎಂಪಿ ಯಲ್ಲಿ ವಿಚಾರಿಸಿದ ಅಧಿಕಾರಿಗಳಿಗೆ ಶಾಕ್ ಕಾದಿತ್ತು. ತಾವು ಯಾವುದೇ ತಂಗುದಾಣ ಬಿಚ್ಚಿಲ್ಲ ಎಂದು ಅಧಿಕಾರಿಗಳು ತಿಳಿಸಿದರು.
ಕೂಡಲೇ ಬಿಎಂಟಿಸಿ ಉಪಾದ್ಯಕ್ಷ ಎನ್ ರವಿ ರೆಡ್ಡಿ ಸೆಪ್ಟೆಂಬರ್ 30 ರಂದು ಪೋಲೀಸರ ಬಳಿ ದೂರು ನೀಡಿದ್ದಾರೆ. ಪೊಲೀಸರು ಸಿಆರ್ಪಿಸಿ ಸೆಕ್ಷನ್ 157 ರ ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತಿದ್ದಾರೆ. ಪೋಲೀಸರು ಸಿಸಿ ಟಿವಿಗಳನ್ನು ಪರಿಶಿಲಿಸುತಿದ್ದಾರೆ. ಪೋಲೀಸ್ ಮೂಲಗಳ ಪ್ರಕಾರ ಇದನ್ನು ರಾತ್ರಿ ಹೊತ್ತಿನಲ್ಲಿ ಕಳ್ಳತನ ಮಾಡಲಾಗಿದ್ದು ಈಗ ಹಳೆ ಕಬ್ಬಿಣ ಕೆಜಿಯೊಂದಕ್ಕೆ 30 ರಿಂದ 35 ರೂಪಾಯಿ ದರ ಇದೆ. ನಿಲ್ದಾಣಕ್ಕೆ ಕನಿಷ್ಟ 700-800 ಕೆಜಿ ಕಬ್ಬಿಣ ಬಳಸಲಾಗಿರುತ್ತದೆ. ಗುಜರಿ ಮಾರಾಟ ಮಾಡುವ ದುಷ್ಕರ್ಮಿಗಳೇ ಈ ಕೃತ್ಯ ಎಸಗಿದ್ದಾರೆ. ಈ ಕಳ್ಳತನದಿಂದ ಕನಿಷ್ಟ ಇಪ್ಪತ್ತರಿಂದ ಮೂವತ್ತು ಸಾವಿರ ರೂಪಾಯಿ ಆದಾಯ ಮಾಡಿಕೊಂಡಿರಬಹುದು ಎಂದು ಪೋಲೀಸರು ಶಂಕಿಸಿದ್ದಾರೆ.
ಈ ರೀತಿ ಕಳ್ಳರು ಇದೇ ರೀತಿಯ ಚಾಳಿಯನ್ನು ಮುಂದುವರೆಸಿದರೆ ಬೆಂಗಳುರಿನ ಬಸ್ ತಂಗುದಾಣಗಳಿಗೂ ಪೋಲೀಸ್ ಪಹರೆ ಹಾಕಬೇಕಾಗುತ್ತದೆ ಎಂದು ಸಾಮಾಜಿಕ ತಾಣಗಳಲ್ಲಿ ಚರ್ಚೆಗಳು ನಡೆದಿವೆ.