ಬೆಂಗಳೂರು: ಬಿಜೆಪಿ ಮತ್ತು ಜೆಡಿಎಸ್ ಮೈತ್ರಿಯಿಂದ ಮುನಿಸಿಕೊಂಡಿರುವ ನಾಯಕರು ಪಕ್ಷ ತೊರೆಯುತ್ತಿದ್ದಾರೆ. ಜೆಡಿಎಸ್ನಲ್ಲಿ ಪ್ರಮುಖವಾಗಿ ಅಲ್ಪಸಂಖ್ಯಾತ ಮುಖಂಡರು ರಾಜೀನಾಮೆ ನೀಡುತ್ತಿದ್ದಾರೆ.
ಚುನಾವಣೆ ಫಲಿತಾಂಶ ಬಳಿಕ ನಮ್ಮನ್ನು ನಿರ್ಲಕ್ಷ್ಯ ಮಾಡಲಾಗ್ತಿದೆ ಎಂದು ಬಿಜೆಪಿ ಮಾಜಿ ಶಾಸಕರು ಕಾಂಗ್ರೆಸ್ ಸೇರುತ್ತಿದ್ದಾರೆ. ಇತ್ತ ಹೆಚ್ಡಿ ಕುಮಾರಸ್ವಾಮಿ ಇಂದು ಮೈತ್ರಿಯಿಂದಾಗಿ ಅಸಮಾಧಾನಿತರ ಸಭೆ ಕರೆದಿದ್ದಾರೆ. ಆದ್ರೆ ಬಿಜೆಪಿಯಲ್ಲಿ ಅಸಮಾಧಾನಿತರ ಸಭೆ ಕರೆಯಲು ನಾಯಕರೇ ಇಲ್ಲದಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ.
ಮೈತ್ರಿ ಘೋಷಣೆಯಾದ್ರೂ ಬಿಜೆಪಿ ಹೈಕಮಾಂಡ್ ರಾಜ್ಯ ಕಮಲ ಪಾಳಯದ ನಾಯಕ ಯಾರು ಎಂದು ಹೇಳಿಲ್ಲ. ಮಾಜಿ ಸಿಎಂ ಬಿಎಸ್ ಯಡಿಯೂರಪ್ಪ ನಾಯಕತ್ವ ತೆಗೆದುಕೊಳ್ಳಲು ಮುಂದೆ ಬರುತ್ತಿದ್ರೂ ಹೈಕಮಾಂಡ್ ಮಾತ್ರ ಗ್ರೀನ್ ಸಿಗ್ನಲ್ ನೀಡುತ್ತಿಲ್ಲ.
ಹೈಕಮಾಂಡ್ ಯಾವುದೇ ಸಂದೇಶ ಕಳುಹಿಸದೇ ಮೌನಕ್ಕೆ ಜಾರಿದ್ದರಿಂದ ರಾಜ್ಯ ಬಿಜೆಪಿ ನಾಯಕರ ಮುಂದೇನು ಮಾಡಬೇಕು ಎಂಬುದು ತೋಚದೇ ಗೊಂದಲಕ್ಕೆ ಒಳಗಾದಂತೆ ಕಾಣಿಸುತ್ತಿದೆ. ಪಕ್ಷದ ಹಿರಿಯರು ಬಿಜೆಪಿ ತೊರೆಯುತ್ತಿದ್ರೂ ಏನು ತಡೆಯೋರು ಯಾರು ಇಲ್ಲ ಎಂಬ ಸ್ಥಿತಿಗೆ ಕಮಲ ನಾಯಕರು ಬಂದಿದ್ದಾರೆ ಎಂದು ಹೇಳಲಾಗುತ್ತಿದೆ.
ಮಾಜಿ ಸಿಎಂಗಳಾದ ಬಿಎಸ್ ಯಡಿಯೂರಪ್ಪ, ಬಸವರಾಜ್ ಬೊಮ್ಮಾಯಿ, ರಾಜ್ಯ ಬಿಜೆಪಿ ಅಧ್ಯಕ್ಷರಾದ ನಳಿನ್ ಕುಮಾರ್ ಕಟೀಲ್ ಪಕ್ಷ ತೊರೆಯುವವರನ್ನು ತಡೆಯುವ ಪ್ರಯತ್ನಕ್ಕೂ ಮುಂದಾಗಿರೋದು ಅಚ್ಚರಿಯ ಬೆಳವಣಿಗೆಯಾಗಿದೆ.
ಇತ್ತ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್, ಬಿಜೆಪಿ ತೊರೆಯುವರೆಲ್ಲಾ ವೇಸ್ಟ್ ಬಾಡಿಗಳೆಂದು ನಿಂದಿಸಿದ್ದಾರೆ. ಈ ಹೇಳಿಕೆ ಅಸಮಾಧಾನಿತರ ಮುನಿಸು ಹೆಚ್ಚಾಗಲು ಕಾರಣವಾಗಿದೆ.
ರಾಜ್ಯಾಧ್ಯಕ್ಷ, ವಿಪಕ್ಷ ನಾಯಕ ಆಯ್ಕೆ ವಿಳಂಬ, ಜೆಡಿಎಸ್ ಜೊತೆ ದೋಸ್ತಿ ಬಗ್ಗೆ ಕ್ಲಾರಿಟಿ ಇಲ್ಲ, ಅಮಿತ್ ಶಾ ಟ್ವೀಟ್ ಮಾಡಿದ್ದಷ್ಟೇ, ಮಾಹಿತಿ ನೀಡಿಲ್ಲ, ಪಕ್ಷ ತೊರೆಯುತ್ತಿದ್ದಾರೆ ಕೆಲವು ನಾಯಕರು, ಬಿಜೆಪಿಯಲ್ಲಿ ಸಮುದಾಯಗಳ ಹವಾ ಕಡಿಮೆ, ಮಾಧುಸ್ವಾಮಿ ಕೂಡ ಬಿಜೆಪಿಗೆ ಗುಡ್ಬೈ ಸಾಧ್ಯತೆ, ಮಾಜಿ ಶಾಸಕ ರಾಮಪ್ಪ ಲಮಾಣಿಯಿಂದ ಕಾಂಗ್ರೆಸ್ ಸೇರುವ ಮಾತು, ‘ಹೈ’ ನಡೆಯಿಂದ ಪಕ್ಷ ಸಂಘಟನೆಗೆ ಭಾರೀ ಹಿನ್ನಡೆ, ಲೋಕಸಭೆ ಚುನಾವಣೆಗೆ ತಯಾರಿ ಆಗುತ್ತಿಲ್ಲ, ಹೈಕಮಾಂಡ್ ಜೊತೆ ಮಾತನಾಡಲು ಹಿಂದೇಟು ಹಾಕುತ್ತಿರುವುದು ಇದೆಲ್ಲ ರಾಜ್ಯ ಬಿಜೆಪಿ ನಾಯಕರಲ್ಲಿ ಚಿಂತೆ ಮುಡಿಸುತ್ತಿದೆ