ಬೆಂಗಳೂರು: ರಾಜ್ಯದಲ್ಲಿ ಕಾಂಗ್ರೆಸ್ ಸರ್ಕಾರ ಅಧಿಕಾರಕ್ಕೆ ಬಂದು ನೂರು ದಿನ ಪೂರೈಸಿ ಆಗಿದೆ. ಆದರೆ, ಈ ಅವಧಿಯಲ್ಲಿ ಹೆಚ್ಚು ಸದ್ದು ಮಾಡಿದ್ದು ಅಧಿಕಾರಿಗಳ ವರ್ಗಾವಣೆ !
ಇಂದು ಮುಗಿಯುತ್ತೇ, ನಾಳೆ ಮುಗಿಯುತ್ತೆ ಎನ್ನುತ್ತಲೇ ಬಂದಿರುವ ಸರ್ಕಾರ ಈ ವರೆಗೂ ಮಾತ್ರ ಹಿಂಡು ಹಿಂಡಾಗಿ ಅಧಿಕಾರಿಗಳ ವರ್ಗಾವಣೆ ಮಾಡುವುದನ್ನು ಮಾತ್ರ ನಿಲ್ಲಿಸಿಲ್ಲ.
ಇದೀಗ ಗ್ರಾಮೀಣಾಭಿವೃದ್ದಿ ಮತ್ತು ಪಂಚಾಯತ ರಾಜ್ಯ ಇಲಾಖೆಯಿಂದಲೇ ನಿನ್ನೆ ಮೊನ್ನೆವರೆಗೂ ಪಿಡಿಒಗಳ ವರ್ಗಾವಣೆ ನಡೆಯುತ್ತಲೇ ಇದೆ. ವರ್ಗಾವಣೆ ಆಗಿರುವ ಅಧಿಕಾರಿಗಳಲ್ಲಿ ಕೆಲವರಿಗೆ ಸ್ಥಳ ನಿಯುಕ್ತಿ ಮಾಡದೇ ಕೇಂದ್ರ ಕಚೇರಿಗೆ ಹಾಜರಾಗಲು ಆದೇಶದಲ್ಲಿ ಸೂಚಿಸುತ್ತ ಬಂದಿದೆ.
ಹೀಗೆ ಸ್ಥಳ ನಿಯುಕ್ತಿ ಇಲ್ಲದೇ ನೂರು, ಇನ್ನೂರ ಪಿಡಿಒಗಳು ಮೊದಲು ತಿಂಗಳುಗಟ್ಟಲೇ ಬೆಂಗಳೂರು ಗ್ರಾಮೀಣಾಭಿವೃದ್ದಿ ಮತ್ತು ಪಂಚಾಯಿತಿ ರಾಜ ಆಯುಕ್ತಾಲಯದಲ್ಲಿ ನಿತ್ಯ ಹಾಜರಿ ಹಾಕಿ ರೌಂಡ್ ಹೊಡೆದು ಮನೆಗಳಿಗೆ ಹೋಗುತ್ತಿದ್ದರು. ಅಲ್ಲಿ ಸ್ಥಳ ನಿಯುಕ್ತಿ ಇಲ್ಲದೇ ಹಾಜರಾಗುವ ಪಿಡಿಒಗಳಿಗೆ ಕೂಡಲು ಜಾಗ ಹಾಗೂ ಕುರ್ಚಿಗಳು ಇಲ್ಲದೇ ಕೊನೆಗೆ ಅವರುಗಳನ್ನು ಆಯಾ ಜಿಲ್ಲೆಯ ಪಂಚಾಯಿತಿಗಳಲ್ಲಿ ವರದಿ ಮಾಡಿಕೊಳ್ಳಲು ಇಲಾಖೆ ಸೂಚಿಸಿತು.
ಇದೀಗ ಪ್ರತಿ ಜಿಲ್ಲೆಯಲ್ಲೂ ಹೀಗೆ ಸ್ಥಳ ನಿಯುಕ್ತಿ ಇಲ್ಲದೇ ಪಿಡಿಒಗಳು ತಿಂಗಳುಗಟ್ಟಲೇ ಕೆಲಸ ಇಲ್ಲದೇ ನಿತ್ಯ ಪಂಚಾಯಿತಿಗೆ ತೆರಳುವುದು, ಹಾಜರಿ ಹಾಕುವುದು ಸಂಜೆ ವಾಪಸ್ಸು ಮನೆಗಳಿಗೆ ತೆರಳುವುದು ಇಷ್ಟೆ ಆಗಿದೆ. ಒಂದುವರೆ ಎರಡು ತಿಂಗಳಿಂದ ಇದೇ ನಡೆದಿದ್ದು, ಇದಕ್ಕಾಗಿ ಸರ್ಕಾರ ಪಿಡಿಒಗಳನ್ನು ಜಿಪಂ ಕಚೇರಿಯಲ್ಲಿ ಕೂಡಿಸಿ ಕೆಲಸವೇ ಇಲ್ಲದೇ ಪ್ರತಿ ತಿಂಗಳು ಲಕ್ಷಾಂತರ ರೂಪಾಯಿ ವೇತನ ಮಾಡುತ್ತಿದೆ ಎನ್ನುವ ಆರೋಪಗಳು ಕೇಳಿ ಬಂದಿದ್ದು, ಇದು ಪಿಡಿಒಗಳಲ್ಲೂ ಸಹ ಅಸಮಧಾನಕ್ಕೆ ಕಾರಣವಾಗಿದೆ. ಸರ್ಕಾರ ಕೂಡಲೇ ವರ್ಗಾವಣೆ ಮುಗಿಸಿ ಖಾಲಿ ಇರುವ ಪಿಡಿಒಗಳಿಗೆ ಸ್ಥಳ ನಿಯುಕ್ತಿ ಮಾಡಬೇಕು. ಈ ರೀತಿ ತಿಂಗಳು ಗಟ್ಟಲೇ ಖಾಲಿ ಕೂಡಿಸಿವುದು ತರವಲ್ಲ ಎಂದು ಹೆಸರು ಹೇಳಲು ಇಚ್ಛಿಸಿದ ಸ್ಥಳ ಇಲ್ಲದೇ ನಿತ್ಯ ಜಿಪಂಗೆ ಹಾಜರಿ ಹಾಕಿ ಹೋಗುತ್ತಿರುವ ಪಂಚಾಯಿತಿ ಅಭಿವೃದ್ದಿ ಅಧಿಕಾರಿ ಒಬ್ಬರು ಹೇಳುತ್ತಾರೆ.
ಬೆಳಗಾವಿ-ಮೈಸೂರು ಆಗಿಲ್ಲ :
ಪಂಚಾಯಿತಿ ಅಭಿವೃದ್ದಿ ಅಧಿಕಾರಿಗಳು ವರ್ಗಾವಣೆ ಇನ್ನೂ ಅಂತ್ಯವಾಗಿಲ್ಲ. ಎರಡು ದಿನಗಳ ಹಿಂದಷ್ಟೆ ಸರ್ಕಾರ 216 ಅಧಿಕಾರಿಗಳ ವರ್ಗಾವಣೆ ಮಾಡಿದೆ. ಇದೀಗ ಸ್ಥಳ ಸೂಚಿಸದೇ ಹಿನ್ನಲೆಯಲ್ಲಿ ನಾಲ್ಕು ವಿಭಾಗಗಳಲ್ಲಿ ನೂರು, ಇನ್ನೂರಷ್ಟು ಪಿಡಿಒಗಳು ಜಿಪಂ ಕಚೇರಿಯಲ್ಲಿ ಇದ್ದರೆ. ಈ ಪೈಕಿ ಇದೀಗ ಕಲಬುರಗಿ ಹಾಗೂ ಬೆಂಗಳೂರು ವಿಭಾಗದಲ್ಲಿ ಕ್ಲಿಯರ್ ಆಗಿದ್ದು, ಬೆಳಗಾವಿ ಹಾಗೂ ಮೈಸೂರು ವಿಭಾಗದಲ್ಲಿ ಇನ್ನೂ ಅನೇಕರಿಗೆ ಸ್ಥಳ ನಿಯುಕ್ತಿ ಮಾಡಿಲ್ಲ.
ಬಾಗಲಕೋಟೆ ಜಿಲ್ಲೆಯಲ್ಲಿ ಇವತ್ತಿಗೂ 12 ಜನ ಪಂಚಾಯಿತಿ ಅಭಿವೃದ್ದಿ ಅಧಿಕಾರಿಗಳು ಸ್ಥಳ ನೀಡದೇ ಜಿಪಂ ಕಚೇರಿಗೆ ಬಂದು ಹೋಗುತ್ತಿದ್ದಾರೆ. 198 ಪಂಚಾಯಿತಿಗಳ ಪೈಕಿ ಸದ್ಯ 16 ಪಂಚಾಯಿತಿಗಳಿಗೆ ಪಿಡಿಒಗಳು ಇಲ್ಲ ಎಂದು ಅಧಿಕಾರಿಗಳು ಹೇಳುತ್ತಾರೆ. ಹೀಗೆ ತಿಂಗಳಿಂದ ಖಾಲಿ ಕೂತಿರುವ ಇವರಲ್ಲಿ ಯಾರನ್ನಾದರೂ ವರ್ಗಾವಣೆ ಮಾಡಿದರೆ ಅಲ್ಲಿನ ಆಡಳಿತ ಯಂತ್ರಕ್ಕೆ ವೇಗವಾದರೂ ಸಿಗುತ್ತದೆ. ಆದರೆ, ವರ್ಗಾವಣೆ ವಿಚಾರದಲ್ಲಿ ಹೆಚ್ಚು ಕೆಲಸ ಮಾಡುತ್ತಿರುವ ಪ್ರಭಾವ ಇದಕ್ಕೆ ಅಡ್ಡಿ ಆಗಿದೆ ಎನ್ನಲಾಗುತ್ತಿದೆ.