ಸಂಸದ ಸನ್ನಿ ಡಿಯೋಲ್ ಅವರ ಗದರ್ 2 ಸಿನಿಮಾ ಸೂಪರ್ ಹಿಟ್ ಪಟ್ಟ ಅಲಂಕರಿಸಿದೆ. ಬಾಕ್ಸ್ ಆಫೀಸ್ನಲ್ಲಿ 500 ಪ್ಲಸ್ ಕೋಟಿ ಗಳಿಕೆ ಮಾಡಿದ ಚಿತ್ರ ಎನಿಸಿಕೊಂಡಿದೆ. ಹೀಗಿರುವಾಗ ಇದೇ ಚಿತ್ರ ಇದೀಗ ದೆಹಲಿಯ ಸಂಸತ್ ಭವನದಲ್ಲಿ ಪ್ರದರ್ಶನ ಕಂಡು ಹೊಸ ದಾಖಲೆ ಬರೆದಿದೆ.
ದೆಹಲಿಯ ನೂತನ ಸಂಸತ್ ಭವನದಲ್ಲಿ ಸಂಸದ ಸನ್ನಿ ಡಿಯೋಲ್ ಗದರ್ 2 ಚಿತ್ರ ಪ್ರದರ್ಶನಗೊಳ್ಳುತ್ತಿರುವುದು ಭಾರತೀಯ ಸಿನಿಮಾ ಇತಿಹಾಸದಲ್ಲೇ ಮೊದಲು.
ಪಂಜಾಬ್ನ ಗುರುದಾಸ್ಪುರ ಕ್ಷೇತ್ರದ ಸಂಸದರಾಗಿರುವ ಸನ್ನಿ ಡಿಯೋಲ್ ಇದೀಗ ತಮ್ಮ ಸಿನಿಮಾವನ್ನು ದೇಶದ ಇತರ ಸಂಸದರಿಗೂ ತೋರಿಸುತ್ತಿದ್ದಾರೆ. ಶುಕ್ರವಾರ (ಆಗಸ್ಟ್ 25) ಬೆಳಗ್ಗೆ 11 ಗಂಟೆಗೆ ನೂತನ ಸಂಸತ್ ಭವನದಲ್ಲಿ ಮೊದಲ ಪ್ರದರ್ಶನಗೊಂಡಿತು. ಪ್ರತಿದಿನ ಐದು ಪ್ರದರ್ಶನಗಳೊಂದಿಗೆ ಮೂರು ದಿನಗಳ ಕಾಲ ಗದರ್ 2 ವಿಶೇಷ ಪ್ರದರ್ಶನ ಆಯೋಜಿಸಲಾಗಿದೆ. ಕಳೆದ ಎರಡು ವಾರಗಳ ಹಿಂದೆ ಬಿಡುಗಡೆಯಾದ ಈ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ಧೂಳೆಬ್ಬಿಸಿದೆ.
22 ವರ್ಷಗಳ ಹಿಂದೆ ಗದರ್ ಚಿತ್ರದ ಮೂಲಕ ಯಶಸ್ಸನ್ನು ಪಡೆದ ನಿರ್ದೇಶಕ ಅನಿಲ್ ಶರ್ಮಾ, ಇದೀಗ ಸೀಕ್ವೆಲ್ ಮೂಲಕವೂ ಗೆದ್ದು ಬೀಗಿದ್ದಾರೆ. ಮೊದಲ ದಿನ ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ಸಿಕ್ಕಿತಾದರೂ, ಸ್ವಾತಂತ್ರ್ಯ ದಿನದ ವಾರ ಪೂರ್ತಿ ಬಾಕ್ಸ್ ಆಫೀಸ್ನಲ್ಲಿ ಈ ಚಿತ್ರ ಹೊಸ ದಾಖಲೆ ಬರೆದಿದೆ.
ಇದೇ ವರ್ಷದ ಆರಂಭದಲ್ಲಿ ಶಾರುಖ್ ಖಾನ್ ನಟನೆಯ ಪಠಾಣ್ ಸಿನಿಮಾ ಬಾಕ್ಸ್ ಆಫೀಸ್ ದೊಡ್ಡ ಮಟ್ಟದ ಸದ್ದು ಮಾಡಿತ್ತು. ಒಟ್ಟಾರೆಯಾಗಿ 1200 ಕೋಟಿ ಗೂ ಅಧಿಕ ಗಳಿಕೆ ಕಂಡಿತ್ತು. ಆ ಪೈಕಿ ಭಾರತದಲ್ಲಿ ಪಠಾಣ್ ಸಿನಿಮಾ 543 ಕೋಟಿ ಗಳಿಸಿತ್ತು. ಇದೀಗ ಗದರ್ ಚಿತ್ರ ಈ ವರೆಗೂ 525 ಕೋಟಿ ಕಲೆಕ್ಷನ್ ಮಾಡಿದೆ. ಇನ್ನೇನು ಶೀಘ್ರದಲ್ಲಿ ಪಠಾಣ್ ದಾಖಲೆಯನ್ನು ಗದರ್ ಸಿನಿಮಾ ಮುರಿಯುವ ಸನಿಹದಲ್ಲಿದೆ