ಸೊಳ್ಳೆ ಚಿಕ್ಕದಾದರೂ, ಅದರ ಕಚ್ಚುವಿಕೆಯಿಂದ ಹರಡುವ ರೋಗಗಳು ಮನುಷ್ಯನನ್ನೇ ಬಲಿತೆಗೆದುಕೊಳ್ಳುವಷ್ಟು ಅಪಾಯಕರಿ ಆಗಿದೆ. ಸೊಳ್ಳೆ ಎಂಬ ಚಿಕ್ಕ ಜೀವಿಯನ್ನು ನಿರ್ಲಕ್ಷ್ಯ ಮಾಡಿದರೆ ಅವುಗಳು ನಮ್ಮ ಪ್ರಾಣಕ್ಕೆ ಕುತ್ತು ತರಬಹುದು. ಪ್ರಪಂಚದಾದ್ಯಂತ ಲಕ್ಷಾಂತರ ಜನರು ಕೇವಲ ಸೊಳ್ಳೆಗಳ ಕಾರಣದಿಂದಲೇ ಸಾವನ್ನಪ್ಪುತ್ತಿದ್ದಾರೆ ಎಂದರೆ ಆಶ್ಚರ್ಯವಾಗುತ್ತದೆ. ಆದ್ದರಿಂದ ಸೊಳ್ಳೆಗಳು ಉಂಟಾಗದಂತೆ ತುಂಬಾನೇ ಎಚ್ಚರವಹಿಸಬೇಕಾಗಿದೆ. ಈ ಸೊಳ್ಳೆಗಳಿಂದ ನಾನಾ ಬಗೆಯ ಭಯಾನಕ ಕಾಯಿಲೆ ಮನುಷ್ಯ ಬಲಿಯಾಗುತ್ತಿದ್ದಾರ
ಡೆಂಗ್ಯೂ
ಮನುಷ್ಯನ ಆರೋಗ್ಯಕ್ಕೆ ಅತ್ಯಂತ ಮಾರಕವಾಗಿರುವ ಕಾಯಿಲೆ ಎಂದರೆ ಅದು ಡೆಂಗ್ಯೂ ಜ್ವರ. ಇದು ಹೆಣ್ಣು ಈಡಿಸ್ ಸೊಳ್ಳೆಗಳ ಕಚ್ಚುವಿಕೆಯಿಂದ ಉಂಟಾಗುತ್ತದೆ. ಸೊಳ್ಳೆಯು ಸೋಂಕಿತ ವ್ಯಕ್ತಿಯನ್ನು ಕಚ್ಚಿ ವೈರಸ್ ಅನ್ನು ಹೊತ್ತೊಯ್ಯುತ್ತಿರುವ ಸಂದರ್ಭದಲ್ಲಿ ಸೋಂಕಿಲ್ಲದ ವ್ಯಕ್ತಿಯನ್ನು ಕಚ್ಚಿದಾಗ ಮಾತ್ರ ರೋಗ ಹರಡುವಿಕೆಯು ಸಂಭವಿಸುತ್ತದೆ. ಡೆಂಗ್ಯೂ ಜ್ವರ ಉಂಟಾದ ವ್ಯಕ್ತಿಗಳಲ್ಲಿ ಕಂಡು ಬರುವ ರೋಗ ಲಕ್ಷಣಗಳು ಎಂದರೆ ಮೈ ಕೈ ನೋವು, ಕೀಲು ನೋವು, ಜ್ವರ ಇತ್ಯಾದಿ. ಒಂದು ವೇಳೆ ಡೆಂಗ್ಯೂ ಜ್ವರ ವಿಪರೀತವಾದರೆ ರಕ್ತಸ್ರಾವ ಉಂಟಾಗಿ ದೇಹದಲ್ಲಿ ರಕ್ತದ ಒತ್ತಡ ಕುಸಿತ ಕಂಡು ಸಾವು ಸಂಭವಿಸಬಹುದು.
ಚಿಕೂನ್ ಗುನ್ಯಾ
ಚಿಕೂನ್ಗುನ್ಯಾ ಮಾರಣಾಂತಿಕವಲ್ಲದ ವೈರಲ್ ಕಾಯಿಲೆಯಾಗಿದ್ದರೂ ಮನುಷ್ಯರನ್ನು ದುರ್ಬಲಗೊಳಿಸಿ ಬಿಡುತ್ತದೆ. ಈ ಕಾಯಿಲೆ ಸೋಂಕಿತ ಸೊಳ್ಳೆಗಳ ಕಡಿತದಿಂದ ಹರಡುತ್ತದೆ. ಚಿಕೂನ್ ಗುನ್ಯಾ ಹೆಚ್ಚುಕಮ್ಮಿ ಡೆಂಗ್ಯೂ ಜ್ವರವನ್ನು ಹೋಲುತ್ತದೆ. ಚಿಕೂನ್ಗುನ್ಯಾ ವೈರಸ್ ಪ್ರಾಥಮಿಕವಾಗಿ ಸೋಂಕಿತ ಸೊಳ್ಳೆಯ ಕಚ್ಚುವಿಕೆಯ ಮೂಲಕ ಜನರಿಗೆ ಹರಡುತ್ತದೆ, ಮುಖ್ಯವಾಗಿ ಈಡಿಸ್ ಈಜಿಪ್ಟಿ ಮತ್ತು ಈಡಿಸ್ ಅಲ್ಬೋಪಿಕ್ಟಸ್ ಮೂಲಕ ಹಬ್ಬುತ್ತದೆ. ಚಿಕೂನ್ಗುನ್ಯಾ ಮುಖ್ಯವಾಗಿ ಆಫ್ರಿಕಾ, ಭಾರತ ಮತ್ತು ಆಗ್ನೇಯ ಏಷ್ಯಾದಲ್ಲಿ ಕಂಡುಬರುತ್ತದೆ. ಡೆಂಗ್ಯೂನಂತೆಯೇ ಮೈ ಕೈ ನೋವು, ಕೀಲು ನೋವು, ಜ್ವರದ ಲಕ್ಷಣಗಳನ್ನು ಇದು ಹೊಂದಿದೆ.
ಮಲೇರಿಯಾ
ಸಾಮಾನ್ಯವಾಗಿ ಮಲೇರಿಯಾ ಅನಾಫಿಲಿಸ್ ಎಂಬ ಹೆಣ್ಣು ಸೊಳ್ಳೆಯಿಂದ ಹರಡುತ್ತದೆ. ಸೊಳ್ಳೆಯಲ್ಲಿ ಪ್ಲಾಸ್ಮೊಡಿಯಂ ಪ್ಯಾರಸೈಟ್ 18 ದಿನಗಳ ಕಾಲ ಅಭಿವೃದ್ಧಿಯಾಗಿ ಆನಂತರ ಸೊಳ್ಳೆ ಎಂಜಲಿನ ಮೂಲಕ ಮನುಷ್ಯನನ್ನು ಕಚ್ಚಿದಾಗ ವರ್ಗಾವಣೆ ಯಾಗುತ್ತದೆ. ಒಮ್ಮೆ ಮಲೇರಿಯಾ ಪ್ಯಾರಸೈಟ್ ರಕ್ತ ಸಂಚಾರದಲ್ಲಿ ಸೇರಿದರೆ ಸೋಂಕು ಉಂಟಾದ ವ್ಯಕ್ತಿಗೆ ಜ್ವರ, ಚಳಿ, ತಲೆ ನೋವು, ವಿಪರೀತ ಮೈ ಬೆವರು ಇತ್ಯಾದಿ ಸಮಸ್ಯೆಗಳು ಕಾಣಿಸುತ್ತವೆ. ಇದನ್ನು ನಿರ್ಲಕ್ಷ್ಯ ಮಾಡಿದರೆ ಕಿಡ್ನಿಗಳ ಹಾನಿ ಉಂಟಾಗಿ ಕೊನೆಗೆ ಸಾವು ಸಂಭವಿಸುತ್ತದೆ.
ಝಿಕಾ ವೈರಸ್
ರೋಗ ನಿರೋಧಕ ಶಕ್ತಿ ಕಡಿಮೆ ಇರುವವರಿಗೆ, ಗರ್ಭಿಣಿಯರಿಗೆ ಈ ಕಾಯಿಲೆ ತುಂಬಾನೇ ಅಪಾಯಕಾರಿ. ಪ್ರಾಣಕ್ಕೂ ಕುತ್ತು ತರಬಹುದು. ಝಿಕಾ ವೈರಸ್ ಪತ್ತೆಯಾದ ಕಡೆ ಗರ್ಭಿಣಿಯರು ಸೊಳ್ಳೆ ಕಚ್ಚದಂತೆ ಹೆಚ್ಚಿನ ಜಾಗ್ರತಿವಹಿಸಬೇಕಾಗಿದೆ.
ಕಾಮಲೆ
ಈಡೀಸ್ ಎಂಬ ಸೊಳ್ಳೆಯಿಂದ ಗಂಭೀರ ಕಾಮಲೆ ರೋಗ ಕಂಡು ಬರುವುದು, ಈ ಕಾಯಿಲೆಗೆ ವಿಶ್ವದಲ್ಲಿ 30, 000ಕ್ಕೂ ಅಧಿಕ ಜನರು ಸಾವನ್ನಪ್ಪಿದ್ದಾರೆ.
ವೆಸ್ಟ್ ನೈಲ್ ವೈರಸ್
ಇದು ಕೂಡ ಸೊಳ್ಳೆ ಕಚ್ಚುವುದರಿಂದ ಉಂಟಾಗುವ ಆರೋಗ್ಯ ಸಮಸ್ಯೆಯಾಗಿದೆ.
ಹೀಗೆ ಸೊಳ್ಳೆ ಕಚ್ಚುವುದರಿಂದ ಅನೇಕ ಗಂಭೀರ ಸಮಸ್ಯೆಗಳು ಉಂಟಾಗುವುದು. ಈ ರೋಗಗಳನ್ನು ತಡೆಗಟ್ಟಬೇಕೆಂದರೆ ಮೊದಲು ಸೊಳ್ಳೆಗಳನ್ನು ತಡೆಗಟ್ಟಬೇಕು. ನಿಮ್ಮ ಮನೆ ಮತ್ತು ಮನೆಯ ಸುತ್ತಮುತ್ತ ಸ್ವಚ್ಛವಾಗಿರಲಿ. ಎಲ್ಲಿಯೂ ನೀರು ನಿಂತುಕೊಳ್ಳದಂತೆ ನೋಡಿ ಕೊಳ್ಳಿ. ಮನೆಯಲ್ಲಿ ಮಾಸ್ಕಿಟೋ ಕಾಯಿಲ್, ಲಿಕ್ವಿಡ್ ಎಲೆಕ್ಟ್ರಿಕ್ ಇತ್ಯಾದಿಗಳನ್ನು ಬಳಸುವ ಮೂಲಕ ಸೊಳ್ಳೆಗಳಿಂದ ಕಾಪಾಡಿ ಕೊಳ್ಳಬಹುದು. ಕಿಟಕಿಗಳಿಗೆ ರಕ್ಷಣಾತ್ಮಕ ಸ್ಕ್ರೀನ್ ಗಳನ್ನು ಬಳಸಿ. ಮನೆಯ ಕಿಟಕಿ ಹಾಗೂ ಬಾಗಿಲುಗಳನ್ನು ಸಂಜೆ ಹೊತ್ತಿನಲ್ಲಿ ತೆರೆದಿಡಬೇಡಿ. ಮತ್ತು ಮಲಗುವಾಗ ಸೊಳ್ಳೆ ಪರದೆಯನ್ನು ಬಳಸುವುದು ಉತ್ತಮ.