ಸಾಮಾನ್ಯ ಜನರು ಸುಳ್ಳು ಹೇಳುವುದು ಸಹಜ. ಎಲ್ಲರು ಕೂಡ ಒಂದಲ್ಲ ಒಂದು ರೀತಿಯಲ್ಲಿ ಸುಳ್ಳು ಹೇಳುತ್ತಿರುತ್ತಾರೆ. ಆದರೆ ಮಕ್ಕಳು ಸುಳ್ಳು ಹೇಳಬಾರದು ಎಂದು ನಾವು ದೊಡ್ಡವರು ಆಶಿಸುತ್ತೇವೆ. ನಾವು ಹೇಗೆ ನಡೆದುಕೊಳ್ಳುತ್ತೇವೋ ಹಾಗೆಯೇ ಮಕ್ಕಳು ಕೂಡ ನಡೆದುಕೊಳ್ಳುತ್ತಾರೆ. ಅದಕ್ಕಾಗಿ ಮಕ್ಕಳ ಮುಂದೆ ನಾವು ತಪ್ಪಿತಸ್ಥರಾಗಬಾರದು. ಮಕ್ಕಳನ್ನು ಉತ್ತಮ ದಾರಿಯಲ್ಲಿ ನಡೆದುಕೊಂಡು ಹೋಗುವಂತೆ, ನಾವೇ ಅವರಿಗೆ ತಿಳಿ ಹೇಳಬೇಕು.
ತಮ್ಮ ಮಗು ಮೊದಲ ಬಾರಿಗೆ ಸುಳ್ಳು ಹೇಳುತ್ತಿದೆ ಎಂದು ಪೋಷಕರಿಗೆ ತಿಳಿದಾಗ, ಅದು ಸಂಕಟದ ಮತ್ತು ಕಷ್ಟಕರವಾದ ಕ್ಷಣವಾಗಿರುತ್ತದೆ. ನೀವು ಅವರನ್ನು ಬೈಯಬೇಕೋ ಅಥವಾ ಅವರನ್ನು ಸುಮ್ಮನೆ ಬಿಡಬೇಕೋ ಎಂದು ನೀವು ಗೊಂದಲಕ್ಕೊಳಗಾಗಬಹುದಾದ ಸಾಧ್ಯತೆ ಇರುತ್ತದೆ.
ನಿಮ್ಮ ಮಗುವಿನ ವಯಸ್ಸಿನ ಮೇಲೆ ಸುಳ್ಳು ಅವಲಂಬಿತವಾಗಿರುತ್ತದೆ. ಅನೇಕ ಮಕ್ಕಳು ಕಾಲಕಾಲಕ್ಕೆ ಸುಳ್ಳು ಹೇಳುತ್ತಾರೆ. ಸಮಾಜದಲ್ಲಿ ಹೇಗೆ ಕಾರ್ಯನಿರ್ವಹಿಸಬೇಕೆಂದು ಅವರು ಕಲಿಯುವಾಗ ಕೆಲವೊಮ್ಮೆ ಸುಳ್ಳು ಹೇಳೋದು ಸಹಜ. ಅದನ್ನು ಹೇಗೆ ಸರಳೀಕರಿಸುವುದು ಎಂದು ನಾವು ತಿಳಿದವರಾಗಿ ಅದನ್ನು ಸರಿಪಡಿಸಬೇಕು.
ಕೆಲವು ಸುಳ್ಳುಗಳು ಮುಗ್ಧವಾಗಿರಬಹುದು ಅಥವಾ ಇತರರಿಗೆ ಬೇಸರವಾಗುವ ತರಹದ್ದು ಇರಬಹುದು. ಆದರೆ ಅವರ ಸುಳ್ಳು ನಡವಳಿಕೆಯನ್ನು ಪತ್ತೆಹಚ್ಚಲು ಮತ್ತು ಮೇಲ್ವಿಚಾರಣೆ ಮಾಡಲು, ಪರಿಸ್ಥಿತಿಯನ್ನು ಪರಿಣಾಮಕಾರಿಯಾಗಿ ನಿಯಂತ್ರಿಸಲು ಕ್ರಮಗಳನ್ನು ತೆಗೆದುಕೊಳ್ಳುವುದು ಮುಖ್ಯವಾಗಿರುತ್ತದೆ.
ಕೆಲವೊಮ್ಮೆ ಮಕ್ಕಳು ಏನಾದರೂ ತುಂಟತನ ಮಾಡಿ ಸಿಕ್ಕಿಬೀಳುವುದನ್ನು ತಪ್ಪಿಸಿಕೊಳ್ಳಲು ಸುಳ್ಳು ಹೇಳುತ್ತಾರೆ. ಮಕ್ಕಳು ಸುಳ್ಳು ಹೇಳಲು ಪ್ರಾರಂಭಿಸಿದಾಗ ನೀವು ಗಮನಿಸಬೇಕು. ಬಹುತೇಕ ಸುಳ್ಳುಗಳನ್ನು ಭಯದಿಂದ ಹೇಳುತ್ತಿರುತ್ತಾರೆ. ಮೊದಲು ನಿಮ್ಮ ಬಗ್ಗೆ ಅವರಿಗಿರುವ ಭಯವನ್ನು ಹೋಗಲಾಡಿಸಿ. ಮಕ್ಕಳಿಗೆ ಹೊಡೆಯದೆ ತಪ್ಪು ಮಾಡಿದಾಗ ಏನಾಯಿತು ಎಂದು ತಾಳ್ಮೆಯಿಂದ ಕೇಳಬೇಕು.
ಕೆಲವು ಮಕ್ಕಳು ಬೇಕುಬೇಕಂತ ಸುಳ್ಳು ಹೇಳುವುದಿಲ್ಲ, ಅದು ಅವರ ಅಭ್ಯಾಸದ ಭಾಗವಾಗಿರುತ್ತದೆ. ಅವರ ಈ ಅಭ್ಯಾಸವನ್ನು ನಿಯಂತ್ರಿಸಲು ಸಾಧ್ಯವಾಗದಿದ್ದರೆ, ಅಂದರೆ ಮಗು ತನ್ನ ಆಲೋಚನೆಗಳನ್ನು ಅರ್ಥಮಾಡಿಕೊಳ್ಳಲು ಹೆಣಗಾಡುತ್ತಿದ್ದರೆ, ನೀವು ಅವರ ಮಾತನ್ನು ತಾಳ್ಮೆಯಿಂದ ಆಲಿಸಬೇಕು ಮತ್ತು ನಿರ್ಧಾರಗಳನ್ನು ತೆಗೆದುಕೊಳ್ಳಲು ಅವರಿಗೆ ಸಹಾಯ ಮಾಡಬೇಕು.
ನಿಮ್ಮ ಮೇಲಿನ ಭಯ ಹೋದರೆ ಅರ್ಧ ಸುಳ್ಳು ಮಾಯವಾಗುತ್ತದೆ.
ಉಳಿದದ್ದನ್ನು ಸರಿಪಡಿಸಲು ನೀವು ಅವರ ನಂಬಿಕೆಯನ್ನು ಗಳಿಸಬೇಕು. ಗೆಳೆಯರಾಗಿ ಮಕ್ಕಳೊಂದಿಗೆ ಸಮಾನವಾಗಿರಲು ಪ್ರಯತ್ನಿಸಬೇಕು. ಅದೇ ಸಮಯದಲ್ಲಿ, ಅವರು ಏನು ಹೇಳುತ್ತಾರೆಂದು ಎಲ್ಲವನ್ನೂ ಒಪ್ಪಿಕೊಳ್ಳಬೇಕಾಗಿಲ್ಲ. ಆದರೆ ನೀವು ಅವರ ಕ್ರಿಯೆಯನ್ನು ಅಥವಾ ಅವರ ಆಲೋಚನೆಯನ್ನು ನಿರಾಕರಿಸಿದಾಗ, ಅವರ ಸ್ನೇಹಿತರಂತೆ ತಮಾಷೆಯಾಗಿ ಹೇಳಿ. ಸುಳ್ಳು ಹೇಳದೆ ಆ ಸಮಸ್ಯೆಯನ್ನು ಹೇಗೆ ಪರಿಹರಿಸಬಹುದು ಎಂದು ತಿಳಿಹೇಳಿದ್ದರೆ ಪರಿಸ್ಥಿತಿಯನ್ನು ಹೇಗೆ ಪರಿಣಾಮಕಾರಿಯಾಗಿ ಎದುರಿಸಬೇಕೆಂದು ಅವರಿಗೆ ಅರ್ಥವಾಗುತ್ತದೆ.
ಅಲ್ಲದೆ ಅದಕ್ಕೆ ಸರಿಯಾದ ಸ್ಪೂರ್ತಿದಾಯಕ ಕಥೆಗಳನ್ನು ಹೇಳಿ. ಸತ್ಯದ ಮೌಲ್ಯವನ್ನು ತಿಳಿಸಿ. ನಿಮ್ಮ ಮಕ್ಕಳು ತಮ್ಮ ತಪ್ಪುಗಳನ್ನು ಅಥವಾ ಮುಜುಗರದ ಕ್ಷಣಗಳನ್ನು ನಿಮ್ಮೊಂದಿಗೆ ಹಂಚಿಕೊಳ್ಳಲು ನಿಮ್ಮನ್ನು ನಂಬುವುದಿಲ್ಲ. ನೀವು ಕ್ಷಮಿಸುವವರಾಗಿರಬೇಕು ಮತ್ತು ನಿಮ್ಮ ಮಗು ತಪ್ಪು ಮಾಡಿದಾಗ ಕೋಪಗೊಳ್ಳಬೇಡಿ ಅಥವಾ ಹೊಡೆಯಬೇಡಿ. ಹಾಗಾದಾಗ ಮಾತ್ರ ಮುಂದಿನ ಬಾರಿ ಸತ್ಯ ಹೇಳಲು ಹಿಂಜರಿಯದೆ ಸತ್ಯವನ್ನೇ ಹೇಳುತ್ತಾರೆ.
ಮಕ್ಕಳು ತಪ್ಪು ಮಾಡಿ ಸತ್ಯ ಹೇಳಿದರೆ ಮೊದಲು ಅವರನ್ನು ಪ್ರಾಮಾಣಿಕರು ಎಂದು ಹೊಗಳಿ ನಂತರ ತಪ್ಪನ್ನು ತಿದ್ದಿಕೊಳ್ಳಲು ಏನು ಮಾಡಬೇಕು ಎಂದು ಹೇಳಿ. ಮುಂದಿನ ಬಾರಿ ಅದೇ ತಪ್ಪನ್ನು ಮಾಡದಿರಲು ರೂಢಿ ಮಾಡಿಸಿದರೆ ಮಕ್ಕಳು ಅದನ್ನು ತಿದ್ದುಕೊಂಡು ಸರಿ ದಾರಿಯಲ್ಲಿ ನಡೆಯುತ್ತಾರೆ