ಬೆಂಗಳೂರು: ಶನಿವಾರ ಗೂಂಡಾ ಕಾಯ್ದೆಯಡಿ ಬಂಧಿತರಾಗಿರುವ ಪುನಿತ್ ಕೆರೆಹಳ್ಳಿ ಅಲಿಯಾಸ್ ಪುನಿತ್ ಕುಮಾರ್ ಅವರನ್ನು ನ್ಯಾಯಾಂಗ ಬಂಧನಕ್ಕೆ ಕಳುಹಿಸಲಾಗಿದ್ದು, ಬಂಧನವನ್ನು ರಾಜ್ಯ ಗೃಹ ಇಲಾಖೆ ಅನುಮೋದಿಸುವ ಅಥವಾ ನಿರಾಕರಿಸುವ ಮೊದಲು ಅವರ ಪ್ರಕರಣವನ್ನು ಸಲಹಾ ಮಂಡಳಿಯಿಂದ (advisory board) ಪರಿಶೀಲಿಸಲಾಗುವುದು.
ಸಿಸಿಬಿ ಪೊಲೀಸರ ಶಿಫಾರಸಿನ ಮೇರೆಗೆ ಬೆಂಗಳೂರು ಪೊಲೀಸ್ ಕಮಿಷನರ್ ಬಿ ದಯಾನಂದ ಅವರ ಅನುಮೋದನೆಯ ಆಧಾರದ ಮೇಲೆ ಬೆಂಗಳೂರು ಕೇಂದ್ರ ಅಪರಾಧ ವಿಭಾಗದ (ಸಿಸಿಬಿ) ಪೊಲೀಸರು ಕೆರೆಹಳ್ಳಿಯನ್ನು ಗೂಂಡಾ ಕಾಯ್ದೆಯಡಿ ಬಂಧಿಸಿದ್ದಾರೆ. ಕಮೀಷನರ್ ದಯಾನಂದ ಅವರು ಸ್ವಯಂಘೋಷಿತ ಬಲಪಂಥೀಯ ಸಂಘಟನೆಯಾದ ರಾಷ್ಟ್ರ ರಕ್ಷಣಾ ಪಡೆಯ ಕಾರ್ಯಕರ್ತನಾಗಿ ಕಳೆದ 10 ವರ್ಷಗಳಿಂದ ಅಪರಾಧಗಳಲ್ಲಿ ಭಾಗಿಯಾಗಿದ್ದಕ್ಕಾಗಿ ಕರ್ನಾಟಕ ಗೂಂಡಾ ಕಾಯಿದೆ, 1985 ರ ಅಡಿಯಲ್ಲಿ ಕೆರೆಹಳ್ಳಿಯನ್ನು “ಗೂಂಡಾ” ಎಂದು ಘೋಷಿಸಲು ಅನುಮೋದನೆ ನೀಡಿದ್ದಾರೆ. ಆಗಸ್ಟ್ 11 ರಂದು ಕೆರೆಹಳ್ಳಿಯನ್ನು ಬಂಧಿಸಲಾಗಿದ್ದು ಈ ವಿಷಯವನ್ನು ಆಗಸ್ಟ್ 12 ರಂದು ಸಿಸಿಬಿ ಪೊಲೀಸರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಕಾಳಧನಿಕರು, ಮಾದಕವಸ್ತು ಅಪರಾಧಿಗಳು, ಜೂಜುಕೋರರು, ಗೂಂಡಾಗಳ ವಿರುದ್ದ (ಕರ್ನಾಟಕ ಪ್ರಿವೆನ್ಶನ್ ಆಫ್ ಡೇಂಜರಸ್ ಆಕ್ಟಿವಿಟೀಸ್, ಗೂಂಡಾ ಕಾಯಿದೆ, 1985,) ಗೂಂಡಾ ಕಾಯಿದೆಯಡಿಯಲ್ಲಿ ಪ್ರಕರಣ ದಾಖಲಿಸಲಾಗುತ್ತದೆ. ಇದು “ಕೃತ್ಯದಲ್ಲಿ ತೊಡಗಿರುವ ವ್ಯಕ್ತಿಗಳ ಬಂಧನವನ್ನು ಅನುಮತಿಸುತ್ತದೆ. ಈ ಕಾಯ್ದೆಯಡಿಯಲ್ಲಿ ಬಂಧಿಸಲಾದ ವ್ಯಕ್ತಿಗಳಿಗೆ ಗರಿಷ್ಠ ಒಂದು ವರ್ಷದವರೆಗೆ ಜಾಮೀನಿಗೆ ಯಾವುದೇ ಅವಕಾಶವಿರುವುದಿಲ್ಲ. 2021 ರಿಂದ ರಾಜ್ಯದಲ್ಲಿ ಆರು ಅಪರಾಧಗಳಲ್ಲಿ ಭಾಗಿಯಾಗಿರುವ ಆರೋಪದ ಹಿನ್ನೆಲೆಯಲ್ಲಿ ಕರ್ನಾಟಕದಲ್ಲಿ “ರೌಡಿ” ವ್ಯಕ್ತಿಗಳ ಪಟ್ಟಿಯಲ್ಲಿ ಇವರ ಹೆಸರನ್ನು ಸೇರಿಸಲು ಬೆಂಗಳೂರು ಪೊಲೀಸರು ಈ ವರ್ಷದ ಜೂನ್ನಲ್ಲಿ ಪುನೀತ್ ಕೆರೆಹಳ್ಳಿ (35) ಅವರಿಗೆ ನೋಟಿಸ್ ನೀಡಿದ್ದರು. ಕೊಲೆ ಹಲ್ಲೆ , ಮತ್ತು ಕ್ರಿಮಿನಲ ಬೆದರಿಕೆಯ ಆರೋಪಗಳನ್ನು ಇವರ ಮೇಲೆ ಹೊರಿಸಲಾಗಿದೆ.
ಕಳೆದ ಮಾರ್ಚ್ 31 ಮತ್ತು ಏಪ್ರಿಲ್ 1 ರ ಮಧ್ಯರಾತ್ರಿ ಬೆಂಗಳೂರಿನ ಗಡಿ ಭಾಗದ ರಾಮನಗರ ಪ್ರದೇಶದಲ್ಲಿ ದನ ಸಾಗಾಟಗಾರ ಇದ್ರೀಸ್ ಪಾಷಾ (39) ಸಾವಿನ ಪ್ರಕರಣದಲ್ಲಿ ಕೆರೆಹಳ್ಳಿ ಇತ್ತೀಚೆಗೆ ಆರೋಪಿಯಾಗಿದ್ದರು. ಈ ಪ್ರಕರಣದಲ್ಲಿ ಗೋ ಸಾಗಾಟದ ವಾಹನವನ್ನು ಅಡ್ಡಗಟ್ಟಿದ ನಂತರ ಪೂನೀತ್ ಅವರು ಫೇಸ್ ಬುಕ್ ಲೈವ್ ನಲ್ಲಿ ಘಟನಾವಳಿಗಳನ್ನು ಪ್ರಸಾರ ಮಾಡುತಿದ್ದರು. ನಂತರ ಪುನೀತ್ ಅವರನ್ನು ಆರೋಪಿಯನ್ನಾಗಿ ಮಾಡಿ ರಾಜಾಸ್ಥಾನದಲ್ಲಿ ಬಂಧಿಸಲಾಗಿತ್ತು.
ಆದರೆ ಪಾಷಾ ಹೃದಯಾಘಾತದಿಂದ ಸಾವನ್ನಪ್ಪಿದ್ದಾರೆ ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ. ಆದರೆ, ಆರೋಪಿಗಳು ಪಾಷಾ ಅವರ ಮೇಲೆ ಸ್ಟನ್ ಗನ್ ಬಳಸಿ ಹೃದಯ ಸ್ತಂಭನಕ್ಕೆ ಕಾರಣವಾಗಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ಹೃದಯಾಘಾತದಿಂದ ಸಾವನ್ನು ಸೂಚಿಸಿದ ಶವಪರೀಕ್ಷೆ ವರದಿಯ ಆಧಾರದ ಮೇಲೆ ಕರ್ನಾಟಕ ಹೈಕೋರ್ಟ್ ಮೇ ತಿಂಗಳಲ್ಲಿ ಕೆರೆಹಳ್ಳಿ ಅವರಿಗೆ ಜಾಮೀನು ನೀಡಿತ್ತು.
ಗೋರಕ್ಷಕರ ಮತ್ತೊಂದು ಪ್ರಕರಣದಲ್ಲಿ, ಮಾರ್ಚ್ 20 ರಂದು ಬೆಂಗಳೂರಿನ ಎಲೆಕ್ಟ್ರಾನಿಕ್ ಸಿಟಿ ಪೊಲೀಸ್ ವ್ಯಾಪ್ತಿಯಲ್ಲಿ ಅಕ್ರಮ ದನ ಸಾಗಾಟದ ಆರೋಪದೊಂದಿಗೆ ಸಾಗಣೆದಾರ ಅಲೀಮುಲ್ಲಾ ಬೇಗ್ ಅವರನ್ನು ತಡೆದ ಆರೋಪದ ಮೇಲೆ ಕೆರೆಹಳ್ಳಿ ಆರೋಪಿಯಾಗಿದ್ದರು. ಪಾಷಾ ಸಾವಿನ ನಂತರ ಅವರ ಕುಟುಂಬಸ್ಥರು ಕೆರೆಹಳ್ಳಿ ವಿರುದ್ದ ಪ್ರಕರಣ ದಾಖಲಿಸಿದ್ದಾರೆ. ಕೆರೆಹಳ್ಳಿ ಮತ್ತು ಸಂಗಡಿಗರು ಬೇಗ್ ಮತ್ತು ಚಾಲಕನಿಗೆ ಥಳಿಸಿದ್ದಾರೆ ಮತ್ತು ವಿದ್ಯುತ್ ಶಾಕ್ ನೀಡಲು ಸ್ಟನ್ ಗನ್ ಬಳಸಿದ್ದಾರೆ ಎಂದು ಆರೋಪಿಸಲಾಗಿದೆ.