ಅತಿಯಾದ ಸುತ್ತಾಟ, ಕೆಲಸದ ಒತ್ತಡ, ಸಮಯಕ್ಕೆ ಸರಿಯಾಗಿ ಊಟ, ಉಪಹಾರ ಆಗಿಲ್ಲ ಎಂದಾಗ, ಆ ಪರಿಸ್ಥಿತಿ ಎಸಿಡಿಟಿಗೆ ಕಾರಣವಾಗುತ್ತೆ. ಎಸಿಡಿಟಿ ಹೆಚ್ಚಾಗ್ತಿದ್ದಂತೆ ವಿಪರೀತ ತಲೆನೋವು ಬರುತ್ತೆ. ನೀವೂ ಇದರಿಂದ ಬೇಸತ್ತಿರುತ್ತೀರಾ ಅಲ್ಲವೇ?
ಜೀವನಶೈಲಿ ಹಾಗೂ ಆಹಾರದಲ್ಲಾದ ಬದಲಾವಣೆಯಿಂದ ಅನೇಕ ಸಮಸ್ಯೆಗಳು ಆರಂಭವಾಗುತ್ತದೆ. ಇಂತಹ ಸಮಸ್ಯೆಗಳಲ್ಲಿ ಜೀರ್ಣಕ್ರಿಯೆಗೆ ಸಂಬಂಧಿಸಿದ ಸಮಸ್ಯೆಯಾದ ಮಲಬದ್ಧತೆ, ಎಸಿಡಿಟಿ ಮತ್ತು ತಲೆನೋವು ಮುಂತಾದವು ಈಗೀಗ ಹೆಚ್ಚಾಗುತ್ತಿವೆ.
ಈ ಎಲ್ಲ ಸಮಸ್ಯೆಗಳಿಗೆ ಮೂಲ ನಮ್ಮ ಆಹಾರ ಪದ್ಧತಿಯೇ ಆಗಿದೆ ಎನ್ನುವುದೇ ಸತ್ಯ. ಸಮಯಕ್ಕೆ ಸರಿಯಾಗಿ ಆಹಾರ ಸೇವಿಸದೇ ಇರುವುದು, ಪೌಷ್ಟಿಕಾಂಶವಿರುವ ಆಹಾರಗಳನ್ನು ಸೇವಿಸದೇ ಇರುವುದು, ಸರಿಯಾಗಿ ನಿದ್ದೆ ಮಾಡದೇ ಇರುವುದರಿಂದ ಅನೇಕ ಸಮಸ್ಯೆಗಳು ಉದ್ಭವವಾಗುತ್ತದೆ. ಆರೋಗ್ಯದಲ್ಲಿ ಏನಾದರೂ ಏರುಪೇರಾದರೆ ನಾವು ವೈದ್ಯರ ಬಳಿ ಹೋಗುತ್ತೇವೆ. ಆರೋಗ್ಯ ಸಮಸ್ಯೆಗಳು ಎದುರಾದಾಗ ವೈದ್ಯರ ಸಲಹೆ ಪಡೆಯುವುದು ಉತ್ತಮವೇ ಆದರೆ ಕೆಲವು ಚಿಕ್ಕ ಪುಟ್ಟ ಸಮಸ್ಯೆಗಳಿಗೆ ನಾವು ಮನೆಯಲ್ಲಿಯೇ ಚಿಕಿತ್ಸೆ ಪಡೆದುಕೊಳ್ಳಬಹುದು.
ಅವುಗಳು ಯಾವುದೆಂದರೆ:
ಬೆಳಿಗ್ಗೆ ಎದ್ದೊಡನೆ ಅರ್ಧ ಚಮಚ ಆಕಳ ತುಪ್ಪವನ್ನು ಒಂದು ಕಪ್ ಬಿಸಿ ನೀರಿನ ಜೊತೆ ಸೇವಿಸಬೇಕು. ಇದನ್ನು ರಾತ್ರಿ ಮಲಗುವಾಗ ಕೂಡ ಮಾಡಬೇಕು. ಈ ವಿಧಾನವನ್ನು ಪ್ರತಿದಿನವೂ ಅನುಸರಿಸಿದರೆ ಎಸಿಡಿಟಿ, ಮಲಬದ್ಧತೆ, ತಲೆನೋವು, ಕೂದಲು ಉದುರುವುದನ್ನು ನಿಧಾನವಾಗಿ ಕಡಿಮೆ ಮಾಡಬಹುದಾಗಿದೆ.
ಈಗಿನ ಪಾಸ್ಟ್ ಫುಡ್ ಹಾಗೂ ಕೆಲವು ಆಹಾರಗಳಿಂದ ಅನೇಕರಲ್ಲಿ ಮಲಬದ್ಧತೆಯ ಸಮಸ್ಯೆ ಕಾಣಿಸುತ್ತದೆ. ಮಲಬದ್ಧತೆಯನ್ನು ಹೋಗಲಾಡಿಸಲು ತುಪ್ಪ ದಿವ್ಯೌಷಧವಾಗಿದೆ. ಇದನ್ನು ಬೆಳಿಗ್ಗೆ ಮತ್ತು ರಾತ್ರಿ ಖಾಲಿ ಹೊಟ್ಟೆಯಲ್ಲಿ ಸೇವಿಸುವುದರಿಂದ ಮಲಬದ್ಧತೆಯ ಸಮಸ್ಯೆಯನ್ನು ದೂರವಾಗುತ್ತದೆ.
ಬಹಳ ಖಾರದ ಪದಾರ್ಥ ಅಥವಾ ಎಣ್ಣೆ ಪದಾರ್ಥಗಳನ್ನು ತಿಂದಾಗ ಎಸಿಡಿಟಿ ಸಮಸ್ಯೆ ಕಂಡುಬರುತ್ತೆ. ಅಲ್ಲದೆ ಪಿಜ್ಜಾ, ಪಾಸ್ತಾ, ಚಿಪ್ಸ್ ಮುಂತಾದವುಗಳಿಂದ ಎಸಿಡಿಟಿ ಕಟ್ಟಿಟ್ಟ ಬುತ್ತಿ. ಹೆಚ್ಚಿನ ಪ್ರಮಾಣದಲ್ಲಿ ಕಾಫಿ, ಟೀ ಸೇವನೆ ಕೂಡ ಎಸಿಡಿಟಿಗೆ ಕಾರಣವಾಗುತ್ತದೆ. ಇವೆಲ್ಲವುಗಳಿಂದ ದೇಹದಲ್ಲಿನ ಪಿಎಚ್ ಪ್ರಮಾಣದಲ್ಲಿ ವ್ಯತ್ಯಾಸವಾಗಿ ಎಸಿಡಿಟಿ ಉಂಟಾಗುತ್ತದೆ. ಇಂತಹ ಸಮಯದಲ್ಲಿ ತುಪ್ಪವು ದೇಹವನ್ನು ನೈಸರ್ಗಿಕವಾಗಿ ತಂಪುಮಾಡುತ್ತದೆ. ಇದರಿಂದ ಎಸಿಡಿಟಿ ಸಮಸ್ಯೆ ದೂರವಾಗುತ್ತದೆ. ತುಪ್ಪದಿಂದ ಶರೀರದಲ್ಲಿ ಚಯಾಪಚಯ ಕ್ರಿಯೆಯಲ್ಲೂ ಸುಧಾರಣೆ ಕಾಣುವ ಸಾಧ್ಯತೆ ಇರುತ್ತದೆ.
ಈಗಾಗಲೇ ಹೇಳಿದಂತೆ ಎಲ್ಲ ಸಮಸ್ಯೆಗಳಿಗೂ ಮೂಲ ನಮ್ಮ ಆಹಾರ ಪದ್ಧತಿ ಹಾಗೂ ಜೀವನ ಶೈಲಿಯೇ ಆಗಿದೆ. ಒತ್ತಡ, ನಿದ್ರೆಯ ಕೊರತೆ, ಗ್ಯಾಸ್, ಮೈಗ್ರೇನ್ ಮುಂತಾದವುಗಳು ಉಂಟಾಗದ ಹಾಗೆ ನೋಡಿಕೊಳ್ಳುವುದೇ ಒಳ್ಳೆಯದು. ನಮ್ಮ ದಿನನಿತ್ಯದ ಆಹಾರದಲ್ಲಿ ತುಪ್ಪವನ್ನು ಸೇವಿಸುವುದು ಇದಕ್ಕೆಲ್ಲ ಪರಿಹಾರ ಎಂದು ಹೇಳಬಹುದು.