ಮಂಡ್ಯ: ಬೆಂಗಳೂರು-ಮೈಸೂರು ರಾಷ್ಟ್ರೀಯ ಹೆದ್ದಾರಿಯಲ್ಲಿ ರಾತ್ರಿ ಸಂಚರಿಸಬೇಡಿ. ಈ ನೂತನ ಎಕ್ಸ್ಪ್ರೆಸ್ ವೇ ಯಲ್ಲಿ ದುಷ್ಕರ್ಮಿಗಳು ಮೊಳೆಗಳಿರುವ ರಿಪೀಸ್ ಪಟ್ಟಿಗಳನ್ನು ರಸ್ತೆಯಲ್ಲಿ ಅಡ್ಡ ಇಟ್ಟು ವಾಹನಗಳ ಟೈರ್ ಪಂಕ್ಚರ್ ಮಾಡಿ ಆ ವಾಹನಗಳ ಪ್ರಯಾಣಿಕರಿಂದ ನಗದು ಚಿನ್ನಾಭರಣ ದರೋಡೆ ಮಾಡುತ್ತಿದ್ದಾರೆನ್ನುವ ಮಾಹಿತಿ ಹಾಗೂ ಫೋಟೋ ಕಳೆದ ಒಂದು ವಾರದಿಂದ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಆದರೆ ಇದೊಂದು ಸುದ್ದಿ ಸುಳ್ಳು ಎಂದು ಮಂಡ್ಯ ಜಿಲ್ಲಾ ಪೊಲೀಸರು ಸ್ಪಷ್ಟಪಡಿಸಿದ್ದಾರೆ.
ಈ ಹಿನ್ನೆಲೆಯಲ್ಲಿ ಸ್ಪಷ್ಟನೆ ನೀಡಿರುವ ಜಿಲ್ಲಾ ಪೊಲೀಸ್ ಇಲಾಖೆ, ಆ ಫೋಟೋ ಬೆಂಗಳೂರು ಮೈಸೂರು ಹೆದ್ದಾರಿಯಲ್ಲಿ ತೆಗೆದಿದ್ದಲ್ಲ. ಅಲ್ಲದೆ ಈ ರೀತಿಯ ಮಾದರಿಯಲ್ಲಿ ದರೋಡೆ ನಡೆಯುತ್ತಿದೆ ಎನ್ನುವಂತಹ ಪ್ರಕರಣಗಳು ಇಂದಿಗೂ ನಡೆದಿಲ್ಲ ಎಂದು ಸ್ಪಷ್ಟಪಡಿಸಿದೆ. ಫೇಸ್ ಬುಕ್ ಬಳಕೆದಾರರೋರ್ವರು ಜಾಲತಾಣದಲ್ಲಿ ತಮ್ಮ ಖಾತೆಯಲ್ಲಿ ಹೆದ್ದಾರಿಯ ಮಧ್ಯೆ ಮೊಳೆಗಳಿರುವ ರಿಪೀಸ್ ಪಟ್ಟಿಗಳ ಫೋಟೋವನ್ನು ಹಾಕಿ ರಾತ್ರಿ ವೇಳೆ ಸಂಚಾರ ಮಾಡಬೇಡಿ. ಸವಾರರು ವಾಹನ ನಿಲ್ಲಿಸಿದರೆ ಸಹಾಯ ಮಾಡುವ ನೆಪದಲ್ಲಿ ಬಂದು ಚಾಕು ತೋರಿಸಿ ಹಣ ದೋಚುತ್ತಾರೆ. ಶ್ರೀರಂಗಪಟ್ಟಣದಿಂದ ಕೆಂಕೆರೆ ವರೆಗೆ ಒಂದು ಅಂಗಡಿ ಹಾಗೂ ಕಟ್ಟಡಗಳಿಲ್ಲ. ದರೋಡೆಕೋರರಿಗೆ ಹೈವೇ ಪೊಲೀಸರು ಸಂಪೂರ್ಣ ಬೆಂಬಲ ನೀಡುತ್ತಾರೆಂದು ಆರೋಪಿಸಿದ್ದರು. ಈ ಫೋಸ್ಟ್ ಸಾಕಷ್ಟು ವೈರಲ್ ಆಗಿತ್ತು.
ವೈರಲ್ ಆದ ಹಿನ್ನೆಲೆಯಲ್ಲಿ ಫೋಟೋ ಹಾಗೂ ಮಾಹಿತಿ ಸುಳ್ಳೆಂದು ಪೊಲೀಸ್ ಇಲಾಖೆಯು ಮಾಹಿತಿ ನೀಡಿದೆ. ಅಲ್ಲದೆ ಸಾರ್ವಜನಿಕರು ದಿನದ 24 ಘಂಟೆಯೂ ನಿರ್ಭೀತಿಯಿಂದ ಈ ಹೆದ್ದಾರಿಯಲ್ಲಿ ಸುರಕ್ಷಿತವಾಗಿ ಪ್ರಯಾಣ ಮಾಡಬಹುದಾಗಿದೆ. ಈ ಹಿಂದೆ ಹೆದ್ದಾರಿಯಲ್ಲಿ ನಡೆದಿದ್ದ ಅಪರಾಧ ಪ್ರಕರಣಗಳನ್ನು ಪತ್ತೆ ಮಾಡಲಾಗಿದೆ. ಜತೆಗೆ, ಹೆದ್ದಾರಿಯಲ್ಲಿ ಪೊಲೀಸ್ ಸಿಬ್ಬಂದಿ ನಿಯೋಜಿಸಿ ಭದ್ರತೆ ನೀಡಲಾಗಿದೆ. ಸಾರ್ವಜನಿಕರು ಇಂತಹ ವದಂತಿಗೆ ಕಿವಿಗೊಡದೇ ಹಾಗೂ ಸಾಮಾಜಿಕ ಜಾಲತಾಣದಲ್ಲಿ ವಿಷಯವನ್ನು ಹಂಚಿಕೊಳ್ಳುವ ಮುನ್ನ ಅದನ್ನು ಪರಾಮರ್ಶಿಸಬೇಕೆಂದು ಸಲಹೆ ನೀಡಲಾಗಿದೆ. ಏಕೆಂದರೆ ಈ ಹೆದ್ದಾರಿಯಲ್ಲಿ ಪ್ರತೀ ನಿಮಿಷಕ್ಕೂ ಹಗಲು ರಾತ್ರಿ ವಾಹನಗಳು ಚಲಿಸುತ್ತಿರುತ್ತವೆ. ಹೀಗಿರುವಾಗ ಯಾವುದಾದರೊಂದು ವಾಹನವನ್ನು ತಡೆದರೂ ಹಿಂದಿನಿಂದ ವಾಹನಗಳ ಸಾಲು ಬರುತ್ತಿರುತ್ತದೆ ಹಾಗಾಗಿ ದರೋಡೆ ಅಸಾಧ್ಯವಾಗಿದೆ.
ಫೇಸ್ ಬುಕ್ ಬಳಕೆದಾರರೋರ್ವರು ಪೋಸ್ಟ್ ಒಂದರಲ್ಲಿ ಬೆಂಗಳೂರಿಗೆ ಕುಟುಂಬ ಸಮೇತರಾಗಿ ಕಾರಿನಲ್ಲಿ ಬರುವವರು ಯಾವುದೇ ಸಂದರ್ಭದಲ್ಲೂ ರಾತ್ರಿ ಬರಲು ಪ್ರಯತ್ನಿಸಬೇಡಿ. ಪ್ರಸ್ತುತ ಎಕ್ಸ್ ಪ್ರೆಸ್ ವೇ ಕಾರುಗಳಲ್ಲಿ ಪುಂಡರು ಮತ್ತು ದರೋಡೆಕೋರರು ತಿರುಗಾಡುತ್ತಿರುತ್ತಾರೆ. ವಾಹನಗಳನ್ನು ಪಂಚರ್ ಮಾಡುವ ಮೂಲಕ ನಿಲ್ಲಿಸಿ ಸಹಾಯ ಮಾಡುವ ನೆಪದಲ್ಲಿ ಹತ್ತಿರ ಬಂದು ಪರಿಸ್ಥಿತಿಯ ದುರ್ಲಾಭ ಪಡೆದುಕೊಂಡು ಚಾಕು, ಕತ್ತಿಯಿಂದ ಜನರನ್ನು ಗಾಯಗೊಳಗೊಳಿಸಿ ಎಲ್ಲವನ್ನೂ ದೋಚುತ್ತಾರೆ.
ನೈಫ್ ಪಾಯಿಂಟ್ ನಲ್ಲಿ ಎಟಿಎಂ ಕಾರ್ಡ್ ಅಥವಾ ಗೂಗಲ್ ಪೇಯಿಂದಲೂ ಒತ್ತಾಯವಾಗಿ ಹಣ ದೋಚುತ್ತಾರೆ. ನಾವು ಎಷ್ಟು ಕಿರುಚಿದರೂ ಯಾರೂ ಕೇಳುವುದಿಲ್ಲ. ಒಂದು ವಾಹನವೂ ನಿಲ್ಲಿಸುವುದಿಲ್ಲ. ಶ್ರೀರಂಗಪಟ್ಟಣದಿಂದ ಕೆಂಕೇರಿಗೆ ಒಂದೇ ಒಂದು ಅಂಗಡಿ ಅಥವಾ ಕಟ್ಟಡ ಕಾಣಿಸುವುದಿಲ್ಲ. ಪೊಲೀಸರಿಗೆ ಏನಾದರೂ ಹೇಳಿದರೆ ನಾವು ತನಿಖೆ ನಡೆಸುತ್ತೇವೆ ಎಂದು ಹೇಳುತ್ತಾರಷ್ಟೇ. ಕಳೆದು ಹೋಗಿದೆ ಎಂದರೆ ಕೇಸಿಗೆ ಬರುತ್ತಲೇ ಇರಬೇಕಾಗುತ್ತದೆ. ಈ ಕಳ್ಳರಿಗೆ ಹೈವೇ ಪೊಲೀಸರು ಸಂಪೂರ್ಣ ಬೆಂಬಲ ನೀಡುತ್ತಿದ್ದಾರೆ ಎಂದೂ ಆರೋಪಿಸಿದ್ದರು. ಆದ್ದರಿಂದ ಎಲ್ಲರೂ ಗಮನಹರಿಸಿ. ನಿಮ್ಮ ಸ್ನೇಹಿತರೊಂದಿಗೆ ಮಾಹಿತಿಯನ್ನು ಹಂಚಿಕೊಳ್ಳಿ. ಮದ್ದುರು, ಮಂಡ್ಯ, ಬಿಡದಿ, ಚನ್ನಪಟ್ಟಣ, ಶ್ರೀರಂಗಪಟ್ಟಣ ತುಂಬಾ ಕೆಟ್ಟ ಪ್ರದೇಶಗಳು. ದಿನನಿತ್ಯ ಕಾರು, ಲಾರಿ ದರೋಡೆ ನಡೆಯುತ್ತದೆ. ಆದರೆ ಸತ್ಯ ಯಾರಿಗೂ ಗೊತ್ತಿಲ್ಲ. ಲಾರಿ ಚಾಲಕರು ದಯವಿಟ್ಟು ರಸ್ತೆಯಲ್ಲಿ ನಿಲ್ಲಿಸಿ ಮಲಗಬೇಡಿ. ದರೋಡೆ ಮತ್ತು ಮಾರಣಾಂತಿಕ ಹಿಂಸೆಗೆ ಒಳಗಾಗುವುದನ್ನು ನೆನಪಿಡಿ ಎಂದು ವೈರಲ್ ಪೋಸ್ಟ್ ನಲ್ಲಿ ಬರೆಯಲಾಗಿದೆ.
ಆದರೆ ಇದೀಗ ಈ ಪೋಸ್ಟ್ ಪೋಲೀಸರ ಗಮನಕ್ಕೆ ಬಂದಿದ್ದು ಸುಳ್ಳು ಸುದ್ದಿ ಹರಡಬೇಡಿ ಎಂದು ಸೂಚನೆ ನೀಡಿದೆ.