ಇಂದಿನ ಕಾಲದ ಮಹಿಳೆಯರು ಮನೆ ಕೆಲಸಕ್ಕೆ ಆಳು, ಓಡಾಡೋಕೆ ಬೈಕ್, ಕಾರು, ಒಂದು ಅರ್ಧ ಪರ್ಲಂಗು ನಡೆಯೋದಿಲ್ಲ, ಕಂಪ್ಯೂಟರ್ ಬಿಟ್ರೆ ಮೊಬೈಲ್, ಮೊಬೈಲ್ ಬಿಟ್ರೆ ಟಿವಿ, ಹಣ ಸುರಿದು ಜಿಮ್ ಗೆ ಸೇರಿಕೊಳ್ಳುವುದು ಹೀಗೆ ಮಾಡುತ್ತಿರುತ್ತಾರೆ. ಹೀಗಾದರೆ ಹೊಟ್ಟೆ ಹೇಗೆ ಕರಗುವುದು ಹೇಳಿ?
ಈಗ ಎಲ್ಲದಕ್ಕೂ ಮಶಿನ್ ಬಂದಿದೆ. ಮನೆ ಬಾಗಿಲು ದಾಟಿದ್ದರೆ ಸಾಕು ವಾಹನ ಹತ್ತುತ್ತೇವೆ. ಮನೆಯಲ್ಲಿ ಟೇಬಲ್ ಮೇಲೆ ಕುಳಿತು ಆಹಾರ ಸೇವನೆ ಮಾಡ್ತೇವೆ. ದೇವರಿಗೆ ಬಗ್ಗಿ ನಮಸ್ಕಾರ ಮಾಡೋ ಬದಲು ನಿಂತಲ್ಲೇ ಕೈ ಮುಗಿತ್ತೇವೆ. ಹಿಂಗಿರುವಾಗ ದೇಹಕ್ಕೆ ವ್ಯಾಯಾಮ ಹೇಗೆ ಸಿಗುತ್ತದೆ ಅಲ್ಲವೇ?
ಹೊಟ್ಟೆ, ಬೊಜ್ಜು ಎಲ್ಲಿ ಕರಗಬಹುದು? ಹೀಗೆ ಮಾಡಿದಾಗ ತೂಕ ಏರಿಕೆಯಾಗುತ್ತದೆ ಬಿಟ್ಟರೆ ಕಡಿಮೆ ಅಂತು ಆಗುವುದಿಲ್ಲ. ನಿತ್ಯದ ಮನೆ ಕೆಲಸವನ್ನು ಹಳೆ ಶೈಲಿಯಲ್ಲಿ ನೀವೂ ಮಾಡಿದ್ರೆ ವ್ಯಾಯಾಮವೂ ಆಗುತ್ತೆ, ಬೊಜ್ಜು ಕರಗುತ್ತದೆ. ನಾವು ನಿತ್ಯ ಮಾಡುವ ಕೆಲಸದಲ್ಲೇ ಸಾಕಷ್ಟು ವ್ಯಾಯಾಮ ಸಿಗುತ್ತದೆ.
ನಮ್ಮ ದೇಹದ ಕೆಲ ಭಾಗಗಳು ಆಕ್ಟಿವ್ ಆಗಬೇಕು ಎಂದರೆ ಪಾತ್ರೆ ತೊಳೆಯೋದು, ಮನೆ ಒರೆಸೋದು ಮಾಡಬೇಕು. ಇದರಿಂದ ನಮ್ಮ ದೇಹಕ್ಕೆ ವ್ಯಾಯಾಮ ಸಿಗುತ್ತದೆ. ಈಗಿನ ದಿನಗಳಲ್ಲಿ ಉದ್ದದ ಕೋಲು ಹಿಡಿದು ನೆಲೆ ಒರೆಸ್ತಾರೆ. ಇದರ ಬದಲು ನೀವು ಹಿಂದಿನ ಕಾಲದವರಂತೆ ಬಟ್ಟೆಯಲ್ಲಿ ನೆಲೆ ಒರೆಸೋದನ್ನು ರೂಢಿ ಮಾಡಿಕೊಳ್ಳಿ. ಇದು ಸ್ವಲ್ಪ ಮಾಲಾಸನವನ್ನು ಹೋಲುತ್ತೆ. ನೀವು ಮಾಲಾಸನದಲ್ಲಿ ಕುಳಿತಲ್ಲೇ ಕುಳಿತಿರುತ್ತೀರಿ. ಆದ್ರೆ ನೆಲೆ ಒರೆಸಿವಾಗ ಮಾಲಾಸನ ಭಂಗಿಯಲ್ಲೇ ನೀವು ಸ್ವಲ್ಪ ಹಿಂದೆ ಮುಂದೆ ಹೋಗ್ಬೇಕಾಗುತ್ತದೆ.
ಮಾಲಾಸನದಿಂದ ಸಾಕಷ್ಟು ಪ್ರಯೋಜನವಿದೆ. ಮಾಲಾಸನವನ್ನು ಮಾಲೆಯ ಆಸನ ಅಥವಾ ಉಪವೇಶಾಸನ ಎಂದು ಕರೆಯಲಾಗುತ್ತದೆ. ಈ ಆಸನ ಮನೆಯಲ್ಲಿ ಕುಳಿತು ಆಫೀಸ್ ಕೆಲಸ ಮಾಡುವವರಿಗೆ ಮತ್ತು ಕಚೇರಿಯಲ್ಲಿ ಕೆಲಸ ಮಾಡುವವರಿಗೆ ಉತ್ತಮ ಆಸನವಾಗಿದೆ. ಇದರಿಂದ ಸೊಂಟದ ಭಾಗ, ಕಾಲುಗಳು ಬಲವಾಗುತ್ತದೆ.
ಮಲಬದ್ಧತೆ ಹಾಗೂ ಜೀರ್ಣಕ್ರಿಯೆಯ ಸಮಸ್ಯೆ ಇರೋರಿಗೆ ರಾತ್ರಿಯಾಗ್ತಿದ್ದಂತೆ ಹೊಟ್ಟೆ ಊದಿಕೊಳ್ಳುತ್ತದೆ. ಈ ಸಮಸ್ಯೆಯಿಂದ ಹೊರಗೆ ಬರಬೇಕೆಂದ್ರೆ ನೀವು ಮಾಲಾಸನ ಅಭ್ಯಾಸ ಮಾಡಿ. ಸಂತಾನೋತ್ಪತ್ತಿ ಸರಾಗವಾಗಿ ಆಗುತ್ತವೆ. ಗರ್ಭಿಣಿ ಮಹಿಳೆಯರು ಈ ಆಸನ ಮಾಡುವುದರಿಂದ ಹೆರಿಗೆಗೆ ಹೆಚ್ಚು ಅನುಕೂಲವಾಗುತ್ತದೆ. ಮಾಲಾಸನವು ಮಹಿಳೆಯರಿಗೆ ಉತ್ತಮ ಆಸನವಾಗಿದೆ. ಇದರಿಂದ ಪಿಸಿಒಎಸ್ ಸಮಸ್ಯೆಗಳು ನಿವಾರಣೆಯಾಗುತ್ತವೆ. ಈ ಆಸನದಿಂದ ಲೈಂಗಿಕಾಸಕ್ತಿ ಕೂಡ ಹೆಚ್ಚುವುದರಲ್ಲಿ ಅನುಮಾನ ಇಲ್ಲ.
ಮಾಲಾಸನ ಮಾಡೋದು ಹೇಗೆ? :
ಮಾಲಾಸನದಲ್ಲಿ ಕುಳಿತುಕೊಳ್ಳುವಾಗ ಮೊದಲು ನೀವು ನಿಮ್ಮ ಕಾಲನ್ನು 45 ಡಿಗ್ರಿ ಕೋನದಲ್ಲಿ ಇಟ್ಟುಕೊಳ್ಳಬೇಕು.
ನಿಮ್ಮ ಕಾಲುಗಳನ್ನು ಸೊಂಟಕ್ಕಿಂತ ಅಗಲವಾಗಿಡಿ.
ಮೊಣಕಾಲನ್ನು ಬಗ್ಗಿಸಿ ಪಾದಗಳ ಮೇಲೆ ಭಾರ ಹಾಕಿ ಕುಳಿತುಕೊಳ್ಳಿ. ನಿಮ್ಮ ಬೆನ್ನು ನೇರವಾಗಿರಲಿ.
ನಿಮ್ಮ ತೊಡೆಯ ಭಾಗ ಕೂಡ ಸಾಧ್ಯವಾದಷ್ಟು ಹೊರಗಡೆಯೇ ಇರುವಂತೆ ನೋಡಿಕೊಳ್ಳಿ.
ಮಾಲಾಸನದ ಸಮಯದಲ್ಲಿ ನಿಮ್ಮ ಎದೆಯ ಭಾಗ ಪೂರ್ತಿಯಾಗಿ ಮುಂದಕ್ಕೆ ಇರಬೇಕು ಹಾಗೂ ಭುಜಗಳು ಕೂಡ ಅಗಲವಾಗಿರಬೇಕು.
ನಿಮ್ಮ ಅಂಗೈಯನ್ನು ಜೋಡಿಸಿ ಪ್ರಾರ್ಥನೆಯ ಭಂಗಿಯಲ್ಲಿ ಕುಳಿತುಕೊಳ್ಳಿ.
ಈ ಆಸನದಲ್ಲಿ ಕುಳಿತು ವರ್ಕ್ ಮಾಡುವವರು ತಲೆ ದಿಂಬು ಅಥವಾ ಗೋಡೆಯ ಸಹಾಯ ಪಡೆಯಬಹುದಾಗಿದೆ.
ಪ್ರಾರಂಭದಲ್ಲಿ ಈ ಆಸನಗಳನ್ನು ಮಾಡುವವರಿಗೆ ಕಾಲುಗಳಲ್ಲಿ ನೋವು ಕಾಣಿಸಿಕೊಳ್ಳಬಹುದು. ಹಾಗೆ ನೋವು ಕಾಣಿಸಿಕೊಂಡಾಗ ಕೆಲ ಸಮಯ ವಿಶ್ರಾಂತಿ ತೆಗೆದುಕೊಂಡು ನಂತರ ಮತ್ತೆ ಮಾಲಾಸನವನ್ನು ಮುಂದುವರೆಸಬಹುದು. ದಿನಕ್ಕೆ ಹತ್ತು ನಿಮಿಷಗಳ ಕಾಲ ಈ ವ್ಯಾಯಾಮ ಮಾಡಬಹುದು. ಗರ್ಭಿಣಿಯರು ಈ ಆಸನ ಮಾಡದೆ ಇರುವುದು ಉತ್ತಮ.